ଭୁବନେଶ୍ୱର: ରାଜ୍ୟସଭା ପ୍ରାର୍ଥୀ ଚୟନରେ ପୁଣି ସରପ୍ରାଇଜ୍ କାର୍ଡ ଖେଳିଛନ୍ତି ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ପୂର୍ବରୁ ଚର୍ଚ୍ଚାରେ ନ ଥିବା ପୂର୍ବତନ ବିଧାୟକ ଦେବାଶିଷ ସାମନ୍ତରାୟ ଏବଂ ପୁରୀର ଯୁବନେତା ଶୁଭାଶିଷ ଖୁଣ୍ଟିଆଙ୍କୁ ଆଜି ପ୍ରାର୍ଥୀ ଘୋଷଣା କରିଛନ୍ତି । ତେବେ ଆଉ ଗୋଟିଏ ଆସନ ପାଇଁ ପ୍ରାର୍ଥୀ ଘୋଷଣା କରାଯାଇନାହିଁ । କ’ଣ ପାଇଁ ତାହା ମଧ୍ୟ ସମସ୍ତଙ୍କୁ ଦ୍ୱନ୍ଦରେ ପକାଇଛି । ବିଜେଡି ହାତରେ ତୃତୀୟ ଆସନଟି ମଧ୍ୟ ଥିବାରୁ କାଲି ଆଡକୁ ଆଉ ଜଣଙ୍କ ନାଁ ଘୋଷଣା ହେବ ନାଁ ଆଉ କିଛି ଖେଳ ଅଛି ତାହା ବୁଝାପଡୁନାହିଁ ।
କଟକ-ବାରବାଟୀର ପୂର୍ବତନ ବିଧାୟକ ହେଉଛନ୍ତି ଦେବାଶିଷ ଓରଫ୍ ଋଷି ସାମନ୍ତରାୟ । ଗତଥର ସେ କଂଗ୍ରେସ ପ୍ରାର୍ଥୀ ମହମ୍ମଦ ମୋକିମ୍ ଙ୍କଠାରୁ ପରାସ୍ତ ହୋଇଥିଲେ । ବର୍ତ୍ତମାନ ସେ କଟକ ଜିଲ୍ଲା ବିଜେଡିର ସଭାପତି ଅଛନ୍ତି । ଏଥର ତାଙ୍କୁ କଟକ-ବାରବାଟୀ ଆସନରୁ ପୁନର୍ବାର ଟିକେଟ ମିଳିବ ବୋଲି କୁହାଯାଉଥିଲା । ପାରାଦ୍ୱୀପରୁ ମଧ୍ୟ ସେ ନିର୍ବାଚନ ଲଢ଼ି ପାରନ୍ତି ବୋଲି ମଧ୍ୟ ଚର୍ଚ୍ଚା ହେଉଥିଲା ।
ସେହିଭଳି ପୁରୀର ଯୁବନେତା ହେଉଛନ୍ତି ଶୁଭାଶିଷ ସରଫ୍ ଲକି ଖୁଣ୍ଟିଆ । ବର୍ତ୍ତମାନ ସେ ରାଜ୍ୟ ଯୁବ ବିଜେଡିର ଉପସଭାପତି ଅଛନ୍ତି । ପୁରୀରୁ ବିଧାନସଭା ଲଢ଼ିବେ ବୋଲି ସେ ପ୍ରବଳ ଆଶାୟୀ ଥିଲେ । ମାତ୍ର ରାଜ୍ୟସଭା ପ୍ରାର୍ଥୀ ଦୌଡ଼ରେ ତାଙ୍କୁ କେହି କଳ୍ପନା କରି ନ ଥିଲେ ।
ରାଜ୍ୟସଭାର ତିନୋଟି ଆସନ ପାଇଁ ବିଜେଡିର ବହୁତ ନେତାଙ୍କ ନାଁ ଚର୍ଚ୍ଚା ହେଉଥିଲା । ସେମାନଙ୍କ ମଧ୍ୟରେ ଆଗରେ ଥିଲେ ସଂତୃପ୍ତ ମିଶ୍ର, ପିନାକୀ ମିଶ୍ର, ଅମର ପଟ୍ଟନାୟକ(ଦ୍ୱିତୀୟ ଥର), ଅରୂପ ପଟ୍ଟନାୟକ । ଜଣେ ମହିଳା, ଆଦିବାସୀ କିମ୍ବା ଭାଷାପ୍ରେମୀଙ୍କୁ ମଧ୍ୟ ମୁଖ୍ୟମନ୍ତ୍ରୀ ରାଜ୍ୟସଭା ପଠାଇପାରନ୍ତି ବୋଲି ଚର୍ଚ୍ଚା ହୋଇଥିଲା । ଆଜି ହଠାତ୍ ଭୁବନେଶ୍ୱର ମଧ୍ୟ ବିଧାୟକ ଅନନ୍ତ ନାରାୟଣ ଜେନାଙ୍କ ନାଁ ପବନରେ ଉଡ଼ିଥିଲା । ଦ୍ୱିପ୍ରହରେ ଦେବାଶିଷ ସାମନ୍ତରାୟଙ୍କୁ ନବୀନ ନିବାସରୁ ଡାକରା ଆସିବା ପରେ ତାଙ୍କ ନାଁକୁ ନେଇ ଚର୍ଚ୍ଚା ଆରମ୍ଭ ହୋଇଥିଲା ।
ଏବେ ନଜର ରହିଲା ତୃତୀୟ ଆସନ ପାଇଁ । ଅତୀତରେ ଅଶ୍ୱିନୀ ବୈଷ୍ଣବ ରାଜ୍ୟସଭା ଯିବା ଭଳି ସେମିତି କିଛି ଖେଳ ହୋଇପାରେ ବୋଲି ଚର୍ଚ୍ଚା ଆରମ୍ଭ ହୋଇଛି ।
