ପେଟ୍ରୋଲ୍ ପମ୍ପରେ ଭୟଙ୍କର ବିସ୍ଫୋରଣ, ନିଆଁ

ଭୁବନେଶ୍ୱର: ଦିନ ପ୍ରାୟ ୧.୧୫ ମିନିଟ୍ । ହଠାତ୍ ପେଟ୍ରୋଲ୍ ପମ୍ପଟି ଥରିବାକୁ ଲାଗିଲା । ଚାରିଆଡ଼େ ଅନ୍ଧାର ହୋଇଗଲା । ତାପରେ ବିକଟାଳ ଶବ୍ଦରେ ପ୍ରଚଣ୍ଡ ବିସ୍ଫୋରଣ ଘଟିଥିଲା । ଉଚ୍ଚା ଆକାଶ ଯାଏଁ ନିଆଁ ଉଠି ହୁତୁ ହୁତୁ ଜଳିବାକୁ ଲାଗିଲା । କେହି କିଛି ବୁଝିପାରି ନ ଥିଲେ କ’ଣ ଘଟୁଛି । ଗାଡ଼ି ମଟର ଛାଡ଼ି ଯିଏ ଯୁଆଡ଼େ ଧାଇଁବାରେ ଲାଗିଥିଲେ । ଅତ୍ୟନ୍ତ ଭୟାନକ ଥିଲା ଏ ଦୃଶ୍ୟ ।

ରାଜଭବନ ନିକଟ ପେଟ୍ରୋଲ୍ ପମ୍ପରେ ଥିବା ସିଏନଜି ଟାଙ୍କିରେ ବିସ୍ଫୋରଣ ଘଟିବାରୁ ଆଜି ଏହି ଭୟଙ୍କର ଦୁର୍ଘଟଣା ଘଟିଛି । ବିସ୍ଫୋରଣ ଏତେ ଭୟଙ୍କର ଥିଲା ପ୍ରାୟ ୫ କିଲୋମିଟର ଦୂରକୁ ଥରେଇଥିଲା । ଏଥିରେ ପେଟ୍ରୋଲ୍ ପମ୍ପଟି ଛିନଛତ୍ର ହୋଇଯାଇଛି । ମଣିଷ ମାଂସ ଖଣ୍ଡ ଖଣ୍ଡ ହୋଇ ତଳେ ପଡ଼ିଛି । କିଛି ଖଣ୍ଡ ବିଖଣ୍ଡିତ ହାତ, ଗୋଡ଼, କାନ ତଳେ ପଡ଼ିଥିବା ଦେଖିବାକୁ ମିଳିଛି । ଅନେକ ମଟରସାଇକେଲ୍ ଭାଙ୍ଗିରୁଜି ଯାଇଛି । ରାସ୍ତାରେ ଥିବା କିଛି କାର୍ ର କାଚ ଭାଙ୍ଗିଯାଇଛି । ଆଖପାଖ ଦୋକାନଗୁଡ଼ିକ ଧ୍ୱଂସ ହୋଇଯାଇଛି । ପାଖ ଘର ଏବଂ ପାଚେରୀ ଭୁଷୁଡ଼ି ଯାଇଛି ।

ଏଥିରେ ବର୍ତ୍ତମାନ ସୁଦ୍ଧା ୯ ଜଣ ଆହତ ହୋଇଥିବା ସରକାରୀ ଭାବେ କୁହାଯାଉଥିଲେ ମଧ୍ୟ ଏହି ସଂଖ୍ୟା ଅଧିକ ବୋଲି ଅନୁମାନ କରାଯାଉଛି । ପ୍ରତ୍ୟକ୍ଷଦର୍ଶୀଙ୍କ କହିବାନୁଯାୟୀ, ଦୁର୍ଘଟଣା ବେଳେ ୧୦ ରୁ ୧୫ ଜଣ ଜଣ ପେଟ୍ରୋଲ୍ ପମ୍ପ କର୍ମଚାରୀ କାମ କରୁଥିଲା ବେଳେ ପ୍ରାୟ ୧୦ ଜଣ ଲୋକ ପେଟ୍ରୋଲ୍ ପକାଉଥିଲେ । ତେଣୁ ମୃତାହତଙ୍କ ସଂଖ୍ୟା ସ୍ପଷ୍ଟ ଜାଣିବା ସମ୍ଭବ ହୋଇନାହିଁ ।

ଅଗ୍ନିକାଣ୍ଡ ଖବର ପାଇଲା କ୍ଷଣି ପୁଲିସ କମିଶନର, ଡିସିପିଙ୍କ ସମେତ ୬ ଟି ଦମକଳବାହିନୀ ଘଟଣାସ୍ଥଳରେ ପହଞ୍ଚିଥିଲେ । ଅଗ୍ନିଶମ ବାହିନୀ ଅକ୍ଲାନ୍ତ ପରିଶ୍ରମ କରି ନିଆଁକୁ ଆୟତ୍ତ କରିବାରେ ସକ୍ଷମ ହୋଇଥିଲେ । ପୁଲିସ ସହ ମିଶି ଓଡ୍ରାଫ୍ ଟିମ୍ ଉଦ୍ଧାର କାର୍ଯ୍ୟ କରିଥିଲେ । କମିଶନର ସୁଧାଶୁଂ ଷଡ଼ଙ୍ଗୀଙ୍କ କହିବାନୁଯାୟୀ ୮ ଜଣ ଆହତଙ୍କୁ ଚିକିତ୍ସା ପାଇଁ କ୍ୟାପିଟାଲ୍ ହସ୍ପିଟାଲ୍ ପଠାଯାଇଛି । ୨ ଜଣଙ୍କ ଅବସ୍ଥା ଗୁରୁତର ଥିବାରୁ ସେମାନଙ୍କୁ କଟକ ବଡ଼ ଡାକ୍ତରଖାନାକୁ ପଠାଇ ଦିଆଯାଇଛି । ଅବସ୍ଥା ନିୟନ୍ତ୍ରଣକୁ ଆସିଥିବା କମିଶନର ସୂଚନା ଦେଇଛନ୍ତି ।

ଆହତମାନଙ୍କୁ ମାଗଣା ଚିକିତ୍ସା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଘୋଷଣା କରିଛନ୍ତି । ଆହତମାନଙ୍କର ଆଶୁ ଆରୋଗ୍ୟ କାମନା କରିଛନ୍ତି ମୁଖ୍ୟମନ୍ତ୍ରୀ ।