ଭୁବନେଶ୍ୱର: ଉତ୍କର୍ଷ ଓଡ଼ିଶା କନକ୍ଲେଭ୍ ରେ ଯୋଗଦେବାକୁ ଭୁବନେଶ୍ୱର ଆସିଥିବା ବେଦାନ୍ତ ଅଧ୍ୟକ୍ଷ ଅନୀଲ ଅଗ୍ରୱାଲଙ୍କୁ ଅପମାନଜନକ ପରିସ୍ଥିତିର ସାମନା କରିବାକୁ ପଡ଼ିଛି । ହୋଟେଲରୁ ବାହାରି ସେ କନକ୍ଲେଭ ସ୍ଥଳକୁ ଆସୁଥିବା ବେଳେ ଗ୍ରୀନ ଓଡ଼ିଶା ଟିମ୍ ତାଙ୍କ ଗାଡ଼ି ଆଗରେ କଳାପତାକା ଦେଖାଇ ‘ଅନୀଲ ଅଗ୍ରୱାଲ୍ ଗୋ ବ୍ୟାକ୍’ ବୋଲି ନାରାବାଜି କରିଥିଲେ । ଲାଞ୍ଜିଗଡ଼ ବେଦାନ୍ତ ଆଲୁମିନା ରିଫାଇନାରି ୟୁନିଟ୍ ରେ ରେଡ୍ ମଡ୍ ପଣ୍ଡ ଭାଙ୍ଗି ସ୍ଥାନୀୟ ଜନବସତିକୁ ପ୍ରବଳ କ୍ଷତି କରିଥିବା ବେଳେ କର୍ତ୍ତୃପକ୍ଷଙ୍କ ନିରବଦ୍ରଷ୍ଟାର ସେମାନେ ପ୍ରତିବାଦ କରିବା ସହ ତୁରନ୍ତ କ୍ଷତିପୂରଣ ଦେବାକୁ ଦାବି କରିଥିଲେ ।
ରାୟଗଡ଼ାରେ ଆଉ ଏକ ଆଲୁମିନିୟମ୍ ପ୍ରକଳ୍ପ ବସାଇବା ଯୋଜନାରେ ରାଜ୍ୟ ସରକାରଙ୍କ ସହ କଥାବାର୍ତ୍ତା କରିବାକୁ ଆସିଥିବା ଅନୀଲ ଅଗ୍ରୱାଲ୍ ଏଭଳି ପରିସ୍ଥିତିର ସାମନା କରିବେ ବୋଲି କେବେ ଭାବି ନ ଥିବେ । ମାତ୍ର ଗ୍ରୀନ ଓଡ଼ିଶା ଟିମ୍ ସଦସ୍ୟମାନେ ତାହା କରିକି ଦେଖାଇଛନ୍ତି । ବେଦାନ୍ତରୁ କୋଟି କୋଟି ଟଙ୍କା ବିଜ୍ଞାପନ ପାଉଥିବା ଓଡିଶାର ପ୍ରମୁଖ ଗଣମାଧ୍ୟମଗୁଡ଼ିକ ସେଦିନର ଘଟଣା ଲୋକଲୋଚନକୁ ଆଣି ନ ଥିଲେ ମଧ୍ୟ ଖବରଟି ବିଜୁଳି ବେଗରେ ବ୍ୟାପିଯାଇଛି । ଲାଞ୍ଜିଗଡ଼ବାସୀଙ୍କ ଦୁର୍ଦ୍ଦଶା ଦେଖାଦେଖି ରାୟଗଡ଼ାବାସୀ ଆଶଙ୍କା ଗଣିଲେଣି । ସେଠାରେ ବେଦାନ୍ତର ପ୍ରସ୍ତାବିତ ପ୍ରକଳ୍ପକୁ ବିରୋଧ କରିବା ପାଇଁ ପରିବେଶ ସୁରକ୍ଷା କର୍ମୀମାନେ ସଜବାଜ ହେଲେଣି ।
ରାଜ୍ୟରେ ବିଜେପି ସରକାରଙ୍କ ସହ ସମ୍ପର୍କ ବଢ଼ାଇଥିବା ବେଦାନ୍ତ ମୁଖ୍ୟ ଶ୍ରୀ ଅଗ୍ରୱାଲ୍ ଉତ୍କର୍ଷ ଓଡ଼ିଶା କନକ୍ଲେଭ୍ ରେ ମୁଖ୍ୟମନ୍ତ୍ରୀ ମୋହନ ମାଝୀଙ୍କ ସହ ସୌହାର୍ଦ୍ଦ୍ୟପୂର୍ଣ୍ଣ ଆଲୋଚନା କରି ରାୟଗଡ଼ା ଜିଲ୍ଲାରେ ୬ ନିୟୁତ ଟନ୍ କ୍ଷମତା ବିଶିଷ୍ଟ ଆଲୁମିନିୟମ୍ ରିଫାଇନାରି ଓ ୩ ନିୟୁତ ଟନ୍ କ୍ଷମତାର ସ୍ମେଲଟର୍ ସ୍ଥାପନ ପାଇଁ ଆବଶ୍ୟକୀୟ ସହଯୋଗର ପ୍ରତିଶ୍ରୁତି ନେଇଛନ୍ତି । ମାତ୍ର ଏହା ସହଜ ହେବ ନାହିଁ ବୋଲି କୁହାଯାଉଛି । କାରଣ ଲାଞ୍ଜିଗଡ଼ ୟୁନିଟ୍ ର ରେଡ୍ ମଡ୍ ପଣ୍ଡ ଘଳିଆଜନିତ କ୍ଷୟକ୍ଷତି ସମସ୍ତଙ୍କ ପାଇଁ ଚିନ୍ତା ଓ ଉଦବେଗରର କାରଣ ହୋଇଛି ।
