ଭୁବନେଶ୍ୱର: ମଦ ବେପାରୀ ସାହୁ ବ୍ରଦର୍ସଙ୍କ ବିଭିନ୍ନ ଶାଖାରେ ଗତକାଲିଠାରୁ ଆୟକର ବିଭାଗର ଚଢ଼ଉ ଚାଲିଛି । ଆଜି ଦ୍ୱିତୀୟ ଦିନରେ ଭୁବନେଶ୍ୱର କର୍ପୋରେଟ୍ ଅଫିସ ସମେତ ବଲାଙ୍ଗୀର, ସମ୍ବଲପୁର, ଟିଟିଲାଗଡ଼, ସୁନ୍ଦରଗଡ଼, ବୌଦ୍ଧର ମଦ ପ୍ରସ୍ତୁତ ବିଭିନ୍ନ ଶାଖାରେ ଚଢ଼ଉ ଜାରି ରହିଛି । କେବଳ ବଲାଙ୍ଗୀରର ସୁଦପଡ଼ା ଭାଟିରୁ ଗତକାଲି ଆୟକର ବିଭାଗର ଅଧିକାରୀମାନେ ପ୍ରାୟ ୨୦୦ କୋଟି ନଗଦ ଟଙ୍କା ଜବତ କରିଥିବା କୁହାଯାଉଛି । ଆଜି ମଧ୍ୟ ବିଭିନ୍ନ ସ୍ଥାନରୁ ପ୍ରାୟ ୧୦୦ କୋଟି ଜବତ ହେଲାଣି ବୋଲି ଅସମର୍ଥିତ ସୂତ୍ରରୁ ଜଣାପଡ଼ିଛି । ଆଳୁ ଖୋଳୁ ଖୋଳୁ ମହାଦେବ ବାହାରିଲା ଭଳି ଏତେ ପରିମାଣର ନଗଦ ଟଙ୍କା ଅଧିକାରୀମାନଙ୍କ ହୋସ୍ ଉଡ଼ାଇ ଦେଇଛି । ୬ ଟି ମେସିନ୍ ସାହାଯ୍ୟରେ ଡର୍ଜନରୁ ଅଧିକ କର୍ମଚାରୀ ଟଙ୍କା ଗଣିବାରେ ଲାଗିଛନ୍ତି ।
ସୂଚନା ଅନୁଯାୟୀ, ବଲାଙ୍ଗୀରରେ ଥିବା ସାହୁ ବ୍ରଦର୍ସଙ୍କ ସୁଦପଡ଼ା ଦେଶୀ ମଦ ଭାଟିରୁ ଗତକାଲି ଚଢ଼ଉ ବେଳେ ୧୫୦ କୋଟି ନଗଦ ଟଙ୍କା ଜବତ ହୋଇଥିଲା । ଏକାଧିକ ଆଲମାରୀରେ ସେହି ଟଙ୍କାକୁ ଥାକ ମାରି ରଖାଯାଇଥିଲା । ବିଳମ୍ବିତ ରାତିରେ ଟଙ୍କା ବଣ୍ଡଲ ଗୁଡ଼ିକୁ ବସ୍ତାରେ ବାନ୍ଧି ଟ୍ରକ୍ ରେ ବଲାଙ୍ଗୀରର ଷ୍ଟେଟ୍ ବ୍ୟାଙ୍କ ମୁଖ୍ୟ କାର୍ଯ୍ୟାଳୟକୁ ନିଆଯାଇଥିଲା । ଆଜି ସିଆଇଏଫ ଏବଂ ଓଡ଼ିଶା ପୁଲିସଙ୍କ ସୁରକ୍ଷା ବଳୟ ଭିତରେ ଏବଂ ଆୟକର ବିଭାଗର ଅଧିକାରୀଙ୍କ ଉପସ୍ଥିତିରେ ୬ ଟି ମେସିନ୍ ଯୋଗେ ୮ ଜଣ ବ୍ୟାଙ୍କ କର୍ମଚାରୀଙ୍କୁୁ ଟଙ୍କା ଗଣା କାମରେ ଲଗାଯାଇଛି । ଆଜି ପୁଣି ଶତାଧିକ କୋଟି ଟଙ୍କା ଜବତ ହୋଇଥିବାରୁ ଟଙ୍କା ଗଣା କାର୍ଯ୍ୟ ସମ୍ପୂର୍ଣ୍ଣ ହେବାକୁ ୫/୬ ଦିନ ଲାଗିଯିବ ବୋଲି ଅନୁମାନ କରାଯାଉଛି ।
ଆଜି ଚଢ଼ଉର ଦ୍ୱିତୀୟ ଦିନରେ ଭୁବନେଶ୍ୱର ପଳାସପଲ୍ଲୀରେ ଥିବା ସାହୁ କମ୍ପାନୀର କର୍ପୋରେଟ୍ ଅଫିସ, ବଲାଙ୍ଗୀର ସୁଦପଡ଼ା ମଦଭାଟି, ସମ୍ବଲପୁର ଧନୁପାଲିରେ ଥିବା ଦେଶୀ ମଦ ଭାଟି, ବଡ଼ବଜାର ଅଞ୍ଚଳରେ ଥିବା ବଳଦେବ ସାହୁ ଆଣ୍ଡ ସନସ୍ ର ଅଫିସ, ରାଉରକେଲା ସିଭିଲ ଟାଉନସିପ୍ ଅଞ୍ଚଳର ବ୍ୟବସାୟୀ କାମେଶ୍ୱର ତିୱାରୀଙ୍କ ଘର, ଅଫିସ ଓ ଦୋକାନ, ବୀରମିତ୍ରପୁରରେ ରାଜେଶ ସାହୁଙ୍କ ଦେଶୀ ମଦ ଭାଟି ଏବଂ ରାୟଗଡ଼ା ଗାନ୍ଧୀନଗରରେ ଥିବା ଅରବିନ୍ଦ ସାହୁଙ୍କ ଦେଶୀ ମଦ ଭାଟି ଉପରେ ଆୟକର ବିଭାଗ ରେଡ୍ କରି ବିପୁଳ ନଗଦ ଟଙ୍କା ଜବତ କରିଥିବା ସୂଚନା ମିଳିଛି ।
ଘର ଓ ଅଫିସରେ ଶହ ଶହ କୋଟି ଟଙ୍କା ରଖିଥିବା ଏହି ସାହୁ ବ୍ରଦର୍ସ କିଏ ବୋଲି ସମସ୍ତଙ୍କ ମନରେ ଉତ୍ସୁକତା ସୃଷ୍ଟି ହୋଇଛି । ସୂଚନା ଅନୁଯାୟୀ, ଅବିଭକ୍ତ ବିହାର(ଝାଡ଼ଖଣ୍ଡ)ର ମଦ ବ୍ୟବସାୟୀ ତଥା କଂଗ୍ରେସ ରାଜ୍ୟସଭା ସାଂସଦ ଧୀରଜ ସାହୁଙ୍କର ଏମାନେ ସମ୍ପର୍କୀୟ । ଝାଡ଼ଖଣ୍ଡ, ଓଡ଼ିଶା, କୋଲକତାରେ ସେମାନଙ୍କର ସଂଖ୍ୟାଧିକ ଦେଶୀ ମଦ କାରଖାନା/ ଭାଟି ଅଛି । ଧୀରଜଙ୍କର ଡିଷ୍ଟିଲେରି ପ୍ରାଇଭେଟ୍ ଲିମିଟେଡ୍ ଓ ରାଣୀସତୀ ଗ୍ରୁପ୍ ଅଫ କମ୍ପାନୀର ବିଭିନ୍ନ ଶାଖା ଅଛି । ଓଡ଼ିଶାରେ ତାଙ୍କର ଅଂଶୀଦାର ହେଉଛନ୍ତି ଭାଇ ବଳଦେବ ସାହୁ ଓ ଆଣ୍ଡ କୋ । ବଳଦେବ ସାହୁ ଆଣ୍ଡ ଗ୍ରୁପ୍ ଅଫ କମ୍ପାନୀ ନିୟନ୍ତ୍ରଣରେ ଶତାଧିକ ମଦ କାରଖାନା ଓ ଇଟାଭାଟି ଅଛି । ରାଜକିଶୋର ସାହୁ, ଦେବରାଜ ସାହୁ, ଦୀପକ ସାହୁ, ସଞ୍ଜୟ ସାହୁ ଏହି କାରଖାନାର ଜଣେ ଜଣେ ମାଲିକ । ରାୟଗଡ଼ାରୁ ବଲାଙ୍ଗୀର ପର୍ଯ୍ୟନ୍ତ ଏମାନଙ୍କ ଅକ୍ତିଆରରେ ସବୁ ଦେଶୀ ମଦ କାରଖାନା ଚାଲୁଥିବା କୁହାଯାଉଛି ।
ମଦ ବ୍ୟବସାୟୀ ଧୀରଜ ସାହୁ ଝାଡ଼ଖଣ୍ଡରୁ କଂଗ୍ରେସ ଟିକେଟରେ ରାଜ୍ୟସଭା ସାଂସଦ ଅଛନ୍ତି । ଏଥର ମଧ୍ୟପ୍ରଦେଶ ବିଧାନସଭା ନିର୍ବାଚନରେ ସେ କଂଗ୍ରେସ ପାଇଁ ବିପୁଳ ପାଣ୍ଠି ଯୋଗାଇଥିବା କୁହାଯାଉଛି । ୨୦୧୯ରେ ମଧ୍ୟ ସେ ଆୟକର ଜାଲରେ ପଡ଼ିଥିଲେ । ରାଞ୍ଚିରୁ ଦିଲ୍ଲୀ ଯିବା ବେଳେ ରାଞ୍ଚି ବିମାନବନ୍ଦରରୁ ୩୮ଲକ୍ଷ ଟଙ୍କା ଜବତ କରିଥିଲା ଆୟକର ବିଭାଗ ।
ତେବେ ସେ ଯାହା ହେଉ, ଟିକସ ଫାଙ୍କି ଅଭିଯୋଗରେ ଆୟକର ବିଭାଗ ଏହି ଚଢ଼ଉ କରିଛି । ୪ ଟି ରାଜ୍ୟରେ ନିର୍ବାଚନ ସରୁ ସରୁ ଏଭଳି ବଡ଼ ଧରଣର ଚଢ଼ଉ ପଛରେ ବଡ଼ ରହସ୍ୟ ଥିବା ଚର୍ଚ୍ଚା ହେଉଛି । ତେବେ ଓଡ଼ିଶାରେ ସାହୁ ବ୍ରଦର୍ସଙ୍କ ଘର ଓ ଅଫିସରୁ ଶହ ଶହ କୋଟି ନଗଦ ଟଙ୍କା ମିଳିବା ଅଧିକ ରହସ୍ୟମୟ ହୋଇଯାଇଛି ।
