ଭୁବନେଶ୍ୱର: ଶେଷରେ ମୁଣ୍ଡ ନୂଆଁଇଲା ପାକିସ୍ତାନ । ଭାରତ-ପାକିସ୍ତାନ ମଧ୍ୟରେ ଆରମ୍ଭ ହୋଇଯାଇଥିବା ଅଘୋଷିତ ଯୁଦ୍ଧରେ ବିରାମ ଲାଗିଛି । ଅସ୍ତ୍ରବିରତି ଲାଗୁ ପାଇଁ ଦୁଇ ଦେଶ ମଧ୍ୟରେ ସହମତି ହୋଇଛି । ଜଳ, ସ୍ଥଳ ଓ ଆକାଶପଥରେ ଆକ୍ରମଣ ନ କରିବାକୁ ଉଭୟ ପକ୍ଷ ରାଜି ହୋଇଛନ୍ତି । ଭାରତୀୟ ସମୟ ଆଜି ଅପରାହ୍ନ ୫ଟାରୁ ଏହା ଲାଗୁ ହୋଇଛି ବୋଲି ବୈଦେଶିକ ସଚିବ ବିକ୍ରମ ମିଶ୍ରି ସୂଚନା ଦେଇଛନ୍ତି ।
ଭାରତର ଆକ୍ରମଣରେ ଥରହର ପାକିସ୍ତାନର ଡିଜିଏମଓ ଆଜି ଦିନ ୩ଟା ୩୫ରେ ଭାରତର ଡିଜିଏମଓଙ୍କୁ ଫୋନ୍ କରି ଯୁଦ୍ଧବିରତି/ଅସ୍ତ୍ରବିରତି ପାଇଁ ଅନୁରୋଧ କରିଥିଲେ । ଭାରତ ଏହି ପ୍ରସ୍ତାବରେ ସହମତି ଜଣାଇଥିଲା । ଏହାପରେ ୩ ବାହିନୀକୁ ଉଭୟ ଦେଶ ପକ୍ଷରୁ ଏହି ନିଷ୍ପତ୍ତି ଜଣାଇ ଦିଆଯାଇଥିଲା । ଆସନ୍ତା ୧୨ ତାରିଖ ୧୨ଟାରେ ଡିଜିଏମଓସ୍ତରୀୟ ପୁଣି ଆଲୋଚନା ହେବ ।
ତେବେ ଆମେରିକାର ମଧ୍ୟସ୍ଥତାରେ ଏହା ସମ୍ଭବ ହୋଇଛି ବୋଲି ରାଷ୍ଟ୍ରପତି ଡୋନାଲଡ ଟ୍ରମ୍ପ୍ ଦାବି କରିଛନ୍ତି । ଭାରତର ଅସ୍ତ୍ରବିରତି ଘୋଷଣା ପୂର୍ବରୁ ଆମେରିକା ରାଷ୍ଟ୍ରପତି ଟ୍ରମ୍ପ୍ ଏବଂ ସେକ୍ରୋଟାରୀ ମାରକୋ ରୁବିଓ ଭାରତ-ପାକ୍ ମଧ୍ୟରେ ଯୁଦ୍ଧବିରତି ନେଇ ସହମତି ହୋଇଥିବା ସେମାନଙ୍କ ଏକ୍ସ ହାଣ୍ଡଲରେ ସୂଚନା ଦେଇଥିଲେ । ଆମେରିକା ମଧ୍ୟସ୍ଥତାରେ ଗତ ରାତିରେ ଲମ୍ବା ସମୟ ଧରି ଆଲୋଚନା ପରେ ଭାରତ ଏବଂ ପାକିସ୍ତାନ ସମ୍ପୂର୍ଣ୍ଣ ଯୁଦ୍ଧବିରତି ପାଇଁ ସହମତି ଦେଇଥିବା ସେ କହିଥିଲେ । ଏଥିପାଇଁ ଦୁଇଦେଶକୁ ସେ ଅଭିନନ୍ଦନ ମଧ୍ୟ ଜଣାଇଥିଲେ ।
ସେକ୍ରେଟାରୀ ରୁବିଓ ଲେଖିଥିଲେ ଯେ ଗତ ୪୮ ଘଣ୍ଟା ଧରି ସେ ଏବଂ ଉପରାଷ୍ଟ୍ରପତି ଭାନ୍ସ ଭାରତ-ପାକ୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ସେହବାଜ ସରିଫ୍, ଭାରତର ବୈଦେଶିକ ମନ୍ତ୍ରୀ ଏସ. ଜୟଶଙ୍କର, ପାକ୍ ସେନା ମୁଖ୍ୟ ଅସିମ ମୁନିର, ଜାତୀୟ ସୁରକ୍ଷା ପରାମର୍ଶଦାତା ଅଜିତ୍ ଡୋଭାଲ୍ ଏବଂ ଅସିମ ମଲ୍ଲିକଙ୍କ ସହ ଆଲୋଚନା କରିଥିଲେ । ଉଭୟ ପକ୍ଷ ଯୁଦ୍ଧବିରତି ପାଇଁ ସହମତି ପ୍ରକାଶ କରିଥିବା ସେ ସୂଚନା ଦେଇଥିଲେ ।
ତେବେ ଆମେରିକା ମଧ୍ୟସ୍ଥତା ନେଇ ଭାରତ ପକ୍ଷରୁ କୌଣସି ସୂଚନା ଦିଆଯାଇନାହିଁ ।
