ଭୁବନେଶ୍ୱର: ଶାସକ ଦଳରେ ଥିବା ଭୟଙ୍କର ଗୋଷ୍ଠୀ କନ୍ଦଳ ଆଜି ଦାଣ୍ଡରେ ଗଡ଼ିଛି । ଝାରସୁଗୁଡ଼ା ନିର୍ବାଚନମଣ୍ଡଳୀକୁ ଏକ ମନ୍ଦିର ପ୍ରତିଷ୍ଠା ଉତ୍ସବରେ ଯୋଗଦେବାକୁ ଯାଇଥିବା ରାଜସ୍ୱମନ୍ତ୍ରୀ ସୁରେଶ ପୂଜାରୀଙ୍କୁ ଆଜି ପ୍ରବଳ ହଟହଟା ହେବାକୁ ପଡ଼ିଛି । ନିଜ ଦଳର ବିଧାୟକ ଟଙ୍କଧର ତ୍ରିପାଠୀଙ୍କ ସମର୍ଥକମାନେ ତାଙ୍କୁ ସେଠାରେ ପୂରାଇ ଦେଇନାହାନ୍ତି । ତାଙ୍କ ଗାଡ଼ିକୁ ଅଟକାଇ ‘ସୁରେଶ ପୂଜାରୀ ଗୋ ବ୍ୟାକ୍’ ନାରାବାଜିରେ ଅଞ୍ଚଳ ଫଟାଇଛନ୍ତି । ଦଳୀୟ କର୍ମୀଙ୍କଠାରୁ ଅପମାନ ପାଇ ମନ୍ତ୍ରୀ ସେଠାରୁ ରାଗ ଓ ଅଭିମାନରେ ଫେରି ଆସିଛନ୍ତି ।
ଝାରସୁଗୁଡ଼ା ଜିଲ୍ଲା ସଦର ବ୍ଲକ ହୀରମା ପଞ୍ଚାୟତର କନ୍ଦାଗାଡ଼ଠାରେ ଏକ ମନ୍ଦିର ପ୍ରତିଷ୍ଠା ଉତ୍ସବରେ ଯୋଗଦେବାକୁ ନିମନ୍ତ୍ରଣ ପାଇ ଯାଇଥିଲେ ମନ୍ତ୍ରୀ ଶ୍ରୀ ପୂଜାରୀ । ମାତ୍ର ମନ୍ତ୍ରୀଙ୍କୁ ପାନେ ଦେବା ପାଇଁ ବିଧାୟକ ଟଙ୍କଧର ତ୍ରିପାଠୀଙ୍କ ସମର୍ଥକମାନେ ପ୍ରସ୍ତୁତ ହୋଇ ରହିଥିଲେ । ଆଉ ମନ୍ତ୍ରୀ ସେଠାରେ ପହଞ୍ଚିବା ବାଟରେ ବିଧାୟକଙ୍କ ସମର୍ଥକମାନେ ଗାଡ଼ି ଅଟକାଇ ନାରାବାଜି କରିଥିଲେ ।
ବିଜେପି ପତାକା ହଲାଇ ଦଳେ ‘ସୁରେଶ ପୂଜାରୀ ଗୋ ବ୍ୟାକ୍’ ନାରା ଦେଉଥିଲା ବେଳେ ଆଉ ଦଳେ ‘ଟଙ୍କଧର ତ୍ରିପାଠୀ ଜିନ୍ଦାବାଦ୍’ ନାରା ଦେଇଥିଲେ । ସେହି ଭିଡ଼ରୁ ମନ୍ତ୍ରୀଙ୍କ ସମର୍ଥନରେ କିଛି ଯୁବକ ବାହାରି ‘ସୁରେଶ ପୂଜାରୀ ଜିନ୍ଦାବାଦ’ ଧ୍ୱନି ଦେଇଥିଲେ । ପ୍ରବଳ ନାରାବାଜି ଭିତରେ ମନ୍ତ୍ରୀ ଗାଡ଼ିରୁ ଓହ୍ଲାଇ ତାଙ୍କୁ ବିରୋଧ କରୁଥିବା ଦଳୀୟ କର୍ମୀଙ୍କୁ ବୁଝାଇବାକୁ ଚେଷ୍ଟା କରିଥିଲେ । ମାତ୍ର ତାହା ବୃଥା ହୋଇଥିଲା । କେହି ତାଙ୍କ କଥା ଶୁଣି ନ ଥିଲେ । ଓଲଟି ମୁହଁ ହଲାଇ ଆଗକୁ ମାଡ଼ି ଆସିଥିଲେ । କିଛି ଅଘଟଣର ଆଶଙ୍କାରେ ସୁରକ୍ଷା କର୍ମୀମାନେ ମନ୍ତ୍ରୀଙ୍କୁ ଗାଡ଼ିରେ ବସାଇ ଦେଇଥିଲେ ।
ତେବେ ବିରୋଧକାରୀମାନେ ଗାଡ଼ି ଆଗରୁ ନ ହଟି ଅଧିକ ନାରାବାଜି କରିଥିଲେ । ମନ୍ତ୍ରୀଙ୍କ ଗାଡ଼ିକୁ ଗଡ଼ାଇ ଦେଇ ନ ଥିଲେ । ଏହା ମନ୍ତ୍ରୀଙ୍କୁ ଜୋର୍ ବାଧିଥିଲା । ରାଗ ତମ ତମ ହୋଇ ପୁଣି ଗାଡ଼ିରୁ ଓହ୍ଲାଇ ଆସିଥିଲେ । ସେତିକିବେଳେ କିଛି କର୍ମୀଙ୍କ ସହ ତାଙ୍କର ପ୍ରବଳ ଉଚ୍ଚବାଚ ହୋଇଥିଲା । ଗାଳି ଦେଉଥିବା ଜଣେ କର୍ମୀଙ୍କୁ ମନ୍ତ୍ରୀ ହାତ ଉଠାଇବାରୁ ଉତ୍ତେଜନା ବଢ଼ି ଯାଇଥିଲା । ଶେଷରେ ପୁଲିସ ହେପାଜତରେ ମନ୍ତ୍ରୀ ସେଠାରୁ ଫେରି ଆସିଥିଲେ ।
ବିଧାୟକଙ୍କ କିଛି ସମର୍ଥକଙ୍କ କହିବା ଅନୁଯାୟୀ, ମନ୍ତ୍ରୀ ସୁରେଶ ପୂଜାରୀ ତାଙ୍କ ଗସ୍ତ ସମ୍ପର୍କରେ ସ୍ଥାନୀୟ କର୍ମୀ ଓ ପଦାଧିକାରୀଙ୍କୁ ଅବଗତ କରିନାହାନ୍ତି । ଏମିତି କାହିଁକି ହେଲା ବୋଲି ସେମାନେ ପ୍ରଶ୍ନ କରିଛନ୍ତି । ତେବେ ଏହା ଉପରେ ସୁରେଶ ପୂଜାରୀଙ୍କ ପ୍ରତିକ୍ରିୟା ମିଳିନାହିଁ ।
ସ୍ଥାନୀୟ ଅଞ୍ଚଳରେ ହେଉଥିବା ଚର୍ଚ୍ଚା ଅନୁଯାୟୀ, ସୁରେଶ ପୂଜାରୀ ଏବଂ ଟଙ୍କଧର ତ୍ରିପାଠୀଙ୍କ ମଧ୍ୟରେ ଶତ୍ରୁତା ଆଜିର ନୁହେଁ । ଗତ ନିର୍ବାଚନ ପୂର୍ବରୁ ସେମାନଙ୍କ ମଧ୍ୟରେ ପ୍ରବଳ ତିକ୍ତତା ରହି ଆସିଛି । କନ୍ଦାଗାଡ଼ଠାରେ ମନ୍ଦିର ପ୍ରତିଷ୍ଠା କରିଥିବା ବ୍ୟକ୍ତି ବିଧାୟକ ଟଙ୍କଧରଙ୍କର ବିରୋଧୀ ଲୋକ । ସେଥିପାଇଁ ବିଧାୟକଙ୍କୁ ନ ଡ଼ାକି ମନ୍ତ୍ରୀ ସୁରେଶ ପୂଜାରୀଙ୍କୁ ସେ ଆମନ୍ତ୍ରଣ କରିଥିଲେ । ବିଧାୟକ ପ୍ରତିଶୋଧପରାୟଣ ହୋଇ ସମର୍ଥକମାନଙ୍କ ଦ୍ୱାରା ଏହି କାଣ୍ଡ ଘଟାଇଛନ୍ତି । ତେବେ ଏ ସଂକ୍ରାନ୍ତରେ ବିଧାୟକଙ୍କ ପ୍ରତିକ୍ରିୟା ଆମେ ପାଇନାହୁଁ ।
