ନବୀନ ଫିଟ୍ ଆଣ୍ଡ ଫାଇନ୍ !

ଭୁବନେଶ୍ୱର: ନବୀନ ପଟ୍ଟନାୟକଙ୍କୁ ଆଜିକାଲି ସଭାସମିତି ଏବଂ ବିଭିନ୍ନ ସାମାଜିକ କାର୍ଯ୍ୟକ୍ରମରେ ଦେଖିବାକୁ ମିଳିଲାଣି । ଜଣେ ରାଜନେତାଙ୍କ ପାଇଁ ଏହା ସାଧାରଣ କଥା ହୋଇଥିଲେ ମଧ୍ୟ ନବୀନଙ୍କୁ ଏହାର ବ୍ୟତିକ୍ରମ କୁହାଯାଏ । ନିର୍ବାଚନରେ ହାରିବା ପରଠାରୁ ସେ ନବୀନ ନିବାସରୁ ବିଶେଷ ବାହାରୁ ନ ଥିଲେ । ଶଙ୍ଖଭବନକୁ କ୍ୱଚିତ୍ ଆସୁଥିଲେ । ମୁମ୍ବାଇରୁ ଅପରେସନ୍ ହୋଇ ଫେରିଲା ପରେ ବିଶ୍ରାମ ଆଳରେ ଏ ସବୁ ବି ବନ୍ଦ ହୋଇଗଲା । କାହା ସହ କଥା ହେବା ଦୂରେ ଥାଉ, କାହାରିକୁ ଦର୍ଶନ ବି ଦେଉ ନ ଥିଲେ । ସେହି ସମୟରେ ନୂଆପଡ଼ା ଉପନିର୍ବାଚନ ପ୍ରଚାର ମଇଦାନକୁ ଓହ୍ଲାଇବା ତାଙ୍କ ପାଇଁ ବୁମେରାଂ ହେଲା । ତାଙ୍କର ବୟସ ଏବଂ ଦୁର୍ବଳ ସ୍ୱାସ୍ଥ୍ୟକୁ ନେଇ ସାଧାରଣରେ ଅନେକ ଆଲୋଚନା ହେଲା । ନବୀନ ପଟ୍ଟନାୟକଙ୍କ ପାଖରେ ଆଉ ଲଢ଼ିବାର ବୟସ କି ଦମ୍ଭ ନାହିଁ ବୋଲି ସମସ୍ତେ ଧରିନେଲେ । ସେଥିପାଇଁ ନିଜ ଦଳରୁ ତାଙ୍କୁ କିଏ ‘ଆହା’ କହିଲେ ତ ବିରୋଧୀଙ୍କ ପକ୍ଷରୁ ତାତ୍ସଲ୍ୟ କଲେ । ନବୀନ ପଟ୍ଟନାୟକଙ୍କର ସମୟ ସରିଗଲା ବୋଲି ପ୍ରଚାର ହେଲା ।

ମାତ୍ର ତାଙ୍କ ନାଁରେ ଯାହା ସବୁ ଆଲୋଚନା ହେଉଛି ତାହାର ସତ୍ୟତା ନାହିଁ । ଏକଥା ଆମେ କହୁନୁ । ନବୀନ ବାବୁ ତାଙ୍କ କାର୍ଯ୍ୟରେ ଦେଖାଇବା ଆରମ୍ଭ କରିଛନ୍ତି । ଏଇ କିଛିଦିନର କାର୍ଯ୍ୟକଳାପରୁ ତାଙ୍କର ସକ୍ରିୟତା ବାରି ହେଉଛି । ଯେତେବେଳେ ସେ ଅସୁସ୍ଥ ବୋଲି ପ୍ରବଳ ଚର୍ଚ୍ଚା ହେଉଥିଲା ସେତେବେଳେ ସାଂସଦ ଅପରାଜିତା ଷଡ଼ଙ୍ଗୀଙ୍କ ଆମନ୍ତ୍ରଣ ରକ୍ଷା କରି ତାଙ୍କ ଝିଅ ବାହାଘର ଭୋଜିରେ ଯୋଗଦେଇଥିଲେ । ଗଲା ରବିବାରରେ ସେ ତାଙ୍କର ଜଣେ ବନ୍ଧୁ ସ୍ୱନାମଧନ୍ୟ ଡାକ୍ତର ଶଙ୍କର ଆଚାର୍ଯ୍ୟଙ୍କ ପୁଅଙ୍କ ବିବାହ ଭୋଜିରେ ଯୋଗଦେବାକୁ ଘାଟିକିଆସ୍ଥିତ ଭୁବନେଶ୍ୱର କ୍ଲବ୍ ଆନେକ୍ସକୁ ଯାଇଥିଲେ । ସେଠାରେ ତାଙ୍କର ଗୁପଚୁପ୍ ଖାଇବା ଦୃଶ୍ୟ ସୋସିଆଲ୍ ମିଡିଆରେ ଛାଇ ହୋଇଗଲା । ତା’ ପରଦିନ ଲଳିତ କଳା ଏକାଡେମୀରେ ଆୟୋଜିତ ଜଗନ୍ନାଥ ପଣ୍ଡାଙ୍କ କଳା ପ୍ରଦର୍ଶନୀ ‘ଦ ଲଙ୍ଗ ଅଫ ଅସ୍’ କାର୍ଯ୍ୟକ୍ରମରେ ଯୋଗଦେଇଥିଲେ । ବିଧାନସଭାରେ ରାଜା ସ୍ୱାଇଁଙ୍କୁ ଦେଖି ତାଙ୍କ ପୁଅ ବାହାଘର ତାରିଖ ପଚାରି ବୁଝିଥିଲେ ।

ଖାଲି ସେତିକି ନୁହେଁ, ନବୀନ ବାବୁ ମୁଖ୍ୟମନ୍ତ୍ରୀ ଥିବା ବେଳେ ବିଧାନସଭାକୁ ନିୟମିତ ଆସୁ ନ ଥିଲେ । ପ୍ରଶ୍ନୋତ୍ତର କାର୍ଯ୍ୟକ୍ରମ ବେଳେ ପ୍ରାୟତଃ ଅନୁପସ୍ଥିତ ରହୁଥିଲେ । ଅପରାହ୍ନ ୫ଟା ପୂର୍ବରୁ କେବେ ବିଧାନସଭା ଆସୁ ନ ଥିଲେ । ମାତ୍ର ବିରୋଧୀ ଦଳ ନେତା ଭାବେ ସେ ତାଙ୍କର ଅଭ୍ୟାସ ବଦଳାଇଛନ୍ତି । ଅଧିକାଂଶ ଦିନ ଗୃହରେ ଉପସ୍ଥିତ ରହୁଛନ୍ତି । ବାହାରେ ଅପେକ୍ଷାରତ ଗଣମାଧ୍ୟମକୁ କାଗଜ ନ ପଢ଼ି ବାଇଟ୍ ଦେଉଛନ୍ତି । ବଜେଟ୍ ଉପରେ ତାଙ୍କର ଧାଡ଼ିକିଆ ପ୍ରତିକ୍ରିୟା ‘ଫୁଲ୍ ଅଫ ମେନ୍ୟୁ ଇନ୍ ଏମ୍ପଟି କିଚେନ୍’ ସାଧାରଣରରେ ଆଲୋଚନାର ବିଷୟ ପାଲଟିଥିଲା । ଚାଷୀ ସମସ୍ୟାକୁ ନେଇ ଦଳୀୟ ବିଧାୟକମାନେ ହଟ୍ଟଗୋଳ କରୁଥିବା ବେଳେ ସେ ବିଧାନସଭା ଗୃହକୁ ଝଡ଼ ଭଳି ପ୍ରବେଶ କରୁଥିବାର ଦୃଶ୍ୟ ବିରଳ ଥିଲା । ସାଧାରଣ ବଜେଟ୍ ଆଲୋଚନା ଦିନ ଅପରାହ୍ନ ୪ଟାରେ ବିଧାନସଭାରେ ହାଜର ହୋଇଥିଲେ । ସେହିଭଳି ପ୍ରବଳ ଖରା ସତ୍ତ୍ୱେ ୨୪ ତାରିଖ ଦିନ ଲୋୟର ପିଏମଜିରେ ଅନୁଷ୍ଠିତ ଚାଷୀ ସୁରକ୍ଷା ସମାବେଶରେ ଯୋଗଦେଇଥିଲେ । ରାଜ୍ୟର ବିଜେପି ସରକାରଙ୍କ ଜନବିରୋଧୀ କାର୍ଯ୍ୟ ଏବଂ ବିପର୍ଯ୍ୟସ୍ତ ଆଇନଶୃଙ୍ଖଳା ବିରୋଧରେ ଆନ୍ଦୋଳନ ଡାକରା ଏବଂ ସରକାରକୁ କୁମ୍ଭକର୍ଣ୍ଣ ନିଦରୁ ଉଠାଇବାକୁ ତାଙ୍କର ଆହ୍ୱାନ କର୍ମୀମାନଙ୍କୁ ପ୍ରବଳ ଉତ୍ସାହିତ କରିଥିଲା ।

ଗୁରୁତ୍ୱପୂର୍ଣ୍ଣ କଥା ହେଲା, ନବୀନ ନିବାସରେ ଏବେ ତାଙ୍କୁ ନେତାମାନେ ଆରାମରେ ସାକ୍ଷାତ କରିପାରୁଛନ୍ତି । ନବୀନ ସେମାନଙ୍କ ସହ ବିଭିନ୍ନ ବିଷୟରେ ସିଧାସଳଖ ଆଲୋଚନା କରୁଛନ୍ତି । ଆଗରୁ ଭି. କେ ପାଣ୍ଡିଆନଙ୍କୁ ନବୀନଙ୍କ ପାଖେ ପାଖେ ଦେଖିବାକୁ ମିଳୁଥିଲା । ନବୀନଙ୍କ ଇଚ୍ଛା ପାଣ୍ଡିଆନଙ୍କ ଜରିଆରେ ପରିପ୍ରକାଶ ହେଉଥିଲା । ମାତ୍ର ଏବେ ନବୀନ ନିଜେ ସବୁ କଥା ଶୁଣୁଛନ୍ତି, କହୁଛନ୍ତି । ନବୀନ ନିବାସରେ ପାଣ୍ଡିଆନଙ୍କୁ ଦେଖିବାକୁ ମିଳୁନି । ସେ ଭୁବନେଶ୍ୱରରେ ଅଛନ୍ତି ନା ଦିଲ୍ଲୀ କି ଲଣ୍ଡନରେ ଅଛନ୍ତି ତାହାର ସାମାନ୍ୟତମ ସୂଚନା କୌଣସି ନେତାଙ୍କ ପାଖରେ ନାହିଁ । ସୁତରାଂ ନବୀନ ଏହି ବୟସରେ ବି ନିଜେ ପାରିବାର ତାହା କାର୍ଯ୍ୟରେ ଦେଖାଉଛନ୍ତି ।

ନବୀନଙ୍କର ହାବଭାବରୁ ତାଙ୍କର ଦଳ ପରିଚାଳନାରେ ସାମର୍ଥ୍ୟ ଓ ଆଗ୍ରହର ଅଭାବ ନଥିବା ରାଜନୈତିକ ପର୍ଯ୍ୟବେକ୍ଷକ ମହଲରେ ଆଲୋଚନା ହେଉଛି । ବୟସ ଅଧିକ ହୋଇଥିଲେ ମଧ୍ୟ ଶାରୀରିକ ଓ ମାନସିକ ସ୍ତରରେ ସେ ଯେ ଦୃଢ଼ ଅଛନ୍ତି ତାଙ୍କ କାର୍ଯ୍ୟକଳାପରୁ ଜଣାପଡୁଛି ।

ରୋଚକ କଥାଟି ହେଉଛି, ନବୀନଙ୍କର ଏହି ସକ୍ରିୟତା ସରକାର ଏବଂ ସରକାରୀ ଦଳଙ୍କ ପାଇଁ ଯେତିକି ଅସୁବିଧା ସୃଷ୍ଟି କରିନି, ଦଳ ଭିତରେ ମୁଣ୍ଡ ଟେକୁଥିବା ଅସନ୍ତୁଷ୍ଟଙ୍କୁ ବେଶୀ ଅସୁବିଧାରେ ପକାଇ ଦେଇଛି । ନବୀନଙ୍କ ନିଷ୍କ୍ରିୟତାର ସୁଯୋଗରେ କିଛି ନେତା କରୁଥିବା ମେଳି ଓ ଭୋଜିଭାତ ବନ୍ଦ ହୋଇଯାଇଛି । ଖାସ୍ କରି ମୁଣ୍ଡ ଉପରେ ରାଜ୍ୟସଭା ନିର୍ବାଚନ ଥିବା ସତ୍ତ୍ୱେ ଦଳ ବିରୋଧୀ କାର୍ଯ୍ୟ ପାଇଁ ଦୁଇ ବିଧାୟକଙ୍କୁ ନିଲମ୍ବିତ କରିବାର ସାହସିକତା ଆଗରେ ଅସନ୍ତୁଷ୍ଟଙ୍କ ଯୋଜନା ମାଡ଼ ଖାଇଯାଇଛି । ଗଣମାଧ୍ୟମ କ୍ୟାମେରା ଦେଖିଲେ ତଥାକଥିତ ଅସନ୍ତୁଷ୍ଟମାନେ ଜାଗା ଛାଡ଼ି ପଳାଉଛନ୍ତି ।

ତେବେ ଆଗାମୀ ଦିନରେ ବିଜେଡି ପାଇଁ ଅନେକ ଚାଲେଂଜ ଥିବା ବେଳେ ନବୀନ ଏହି ଧାରାକୁ ବଜାୟ ରଖିପାରିବେ ନା ନାହିଁ ତାହା ଦେଖିବାର କଥା । ସେ ଏକା ଏକା ଆଗକୁ ବଢ଼ିବେ ନା ତାଙ୍କୁ ସହଯୋଗ କରିବା ପାଇଁ ସେକେଣ୍ଡ ଇନ୍ କମାଣ୍ଡ ଖୋଜିବେ ତାହା ସମସ୍ତଙ୍କର ଉତ୍କଣ୍ଠା ବଢ଼ାଇଛି ।