ଶ୍ରୀନଗର: କେନ୍ଦ୍ରୀୟ କଶ୍ମୀରର ଗନେ୍ଦରବଲ ଜିଲ୍ଲାରେ ୬.୫ କିଲୋମିଟର ସୋନମାର୍ଗ ଟନେଲ ଗତକାଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦ୍ୱାରା ଉଦଘାଟିତ ହୋଇଛି । ଏହି ଟନେଲ ସାରା ଦେଶ ପାଇଁ ଗର୍ବର ବିଷୟ ହୋଇଥିବା ବେଳେ ଏହାର ନିର୍ମାଣରେ ଡ. କ୍ରିଷନ୍ କୁମାରଙ୍କ ଅବଦାନକୁ ସବୁଆଡୁ ସାବାସୀ ମିଳିଛି । ତାଙ୍କର ଦୂରଦୃଷ୍ଟି, ଅକ୍ଲାନ୍ତ ପରିଶ୍ରମ ଓ ପ୍ରତ୍ୟକ୍ଷ ତତ୍ତ୍ୱାବଧାନରେ ଟନେଲ ନିର୍ମାଣ କାର୍ଯ୍ୟ ଧାର୍ଯ୍ୟ ସମୟରେ ସମ୍ପନ୍ନ ହୋଇପାରିଛି ।
ଜେଡ୍-ମୋଡ଼ ଏହି ଟନେଲ ନିର୍ମାଣ ଦାୟିତ୍ୱ ଦିଆଯାଇଥିଲା ଜାତୀୟ ରାଜପଥ ଓ ଭିତ୍ତିଭୂମି ବିକାଶ ନିଗମ(ଏନଏଚଆଇଡିସିଏଲ)କୁ । କେନ୍ଦ୍ରୀୟ ଡେପୁଟେସନରେ ଥିବା ଓଡିଶା କ୍ୟାଡର ଆଇଏଏସ୍ ଡ. କ୍ରିଷନ୍ କୁମାର ଏହାର ପରିଚାଳନା ନିର୍ଦ୍ଦେଶକ ବା ଏମଡି ଅଛନ୍ତି । ୨୦୧୫ ମେ ମାସରେ ଆରମ୍ଭ ହୋଇଥିବା ପ୍ରକଳ୍ପ କାର୍ଯ୍ୟ ମଝିରେ ଧୀମା ପଡ଼ିଯାଇଥିଲା । ୨୦୨୨ ମସିହାରେ କ୍ରିଷନ୍ କୁମାର ଏନଏଚଆଇଡିସିଏଲର ଏମଡି ଭାବେ ଦାୟିତ୍ୱ ନେବା ପରେ ସେ ଏହାର ନିର୍ମାଣ କାର୍ଯ୍ୟ ତ୍ୱରାନ୍ୱିତ କରିଥିଲେ । ଖୋଦ୍ ପ୍ରଧାନମନ୍ତ୍ରୀ ଶ୍ରୀ ମୋଦୀ ଏବଂ ପରିବହନ ମନ୍ତ୍ରୀ ନୀତିନ୍ ଗଡ଼କରୀଙ୍କ ତତ୍ତ୍ୱାବଧାନରେ ସେ ନିଜର ଦାୟିତ୍ୱକୁ ସୁଚାରୂରୂପେ ତୁଲାଇଥିଲେ ।
ଗତକାଲି ଏହି ଟନେଲର ଉଦଘାଟନ ଅବସରରେ ପ୍ରଧାନମନ୍ତ୍ରୀଙ୍କୁ ଡ. କ୍ରିଷନ୍ କୁମାର ପ୍ରକଳ୍ପର କାର୍ଯ୍ୟକାରିତା ଓ ଉପଯୋଗିତା ସମ୍ପର୍କରେ ଅବଗତ କରାଇଥିଲେ ।
ସୂଚନାଯୋଗ୍ୟ, ଗନେ୍ଦରବଲ ଜିଲ୍ଲାର ଗଗନଗିର ଓ ସୋନମାର୍ଗକୁ ସଂଯୋଗ କରୁଥିବା ୬.୫ କିଲୋମିଟର ଦୀର୍ଘ ଦୁଇ ଲେନ୍ ବିଶିଷ୍ଟ ଟନେଲ୍ ୨୭୦୦ କୋଟି ଟଙ୍କାରୁ ଅଧିକ ବ୍ୟୟରେ ନିର୍ମିତ ହୋଇଛି । ଏହି ଟନେଲରେ ୭.୫ ମିଟର ଚଉଡ଼ା ଜରୁରିକାଳୀନ ନିର୍ଗମ ପଥ ମଧ୍ୟ ରହିଛି । ସମୁଦ୍ର ପତ୍ତନଠାରୁ ୮,୬୫୦ ଫୁଟ ଉଚ୍ଚତାରେ ଅବସ୍ଥିତ ଜେଡ୍ ମୋଡ଼ ଟନେଲ ଶ୍ରୀନଗର ଓ ସୋନମାର୍ଗ ମଧ୍ୟରେ ବର୍ଷସାରା ଯୋଗାଯୋଗରେ ଉଲ୍ଲେଖନୀୟ ଉନ୍ନତି ଆଣିବ । ଭୂସ୍ଖଳନ ପ୍ରବଣ ଓ ହିମସ୍ଖଳନ ପ୍ରଭାବିତ ଅଞ୍ଚଳକୁ ଏଡ଼େଇ ଲେହକୁ ଯିବା ରାସ୍ତାକୁ ସହଜ କରିବ ।
