ଭୁୁବନେଶ୍ୱର: ବର୍ଷେ ବି ଅପେକ୍ଷା କରିବାକୁ ପଡ଼ିଲାନି । ଆଇନମନ୍ତ୍ରୀ ଭାବେ ଦାୟିତ୍ୱ ନେବାର ବର୍ଷେ ନ ପୁରୁଣୁ ଓକିଲାତି ପେଶା ଧରିଥିବା ପୁଅର ଭାଗ୍ୟ ଖୋଲିଗଲା । ଲଟେରି ଉଠିବା ଭଳି ତାଙ୍କୁ ମିଳିଗଲା ସରକାରୀ ଓକିଲ ପଦ । ବର୍ଷ ବର୍ଷ ଧରି ଏହି ପଦ ପାଇବାକୁ ଆଶାୟୀ ଥିବା ଅଭିଜ୍ଞମାନେ ଏହି ନିଯୁକ୍ତି ସମ୍ପର୍କରେ ଟେର୍ ବି ପାଇଲେନି । ଆଇନମନ୍ତ୍ରୀଙ୍କ ଔକାତ୍ ଦେଖି ସେମାନେ ଜଳକା ହୋଇଯାଇଛନ୍ତି ।
କେନ୍ଦ୍ର ସରକାରଙ୍କ ମାଲି ମକଦମା ଗୁଡ଼ିକର ପରିଚାଳନା ପାଇଁ ଓଡ଼ିଶା ହାଇକୋର୍ଟରେ ନିଯୁକ୍ତି ପାଇଛନ୍ତି ଆଇନମନ୍ତ୍ରୀ ପୃଥ୍ୱୀରାଜ ହରିଚନ୍ଦନଙ୍କର ପୁଅ ଦିଗବିଜୟ ହରିଚନ୍ଦନ । ୩ ବର୍ଷ ପାଇଁ ତାଙ୍କୁ ଏହି ନିଯୁକ୍ତି ମିଳିଛି । ଗତ ଜୁନ୍ ୨ ତାରିଖରେ କେନ୍ଦ୍ର ଆଇନ ମନ୍ତ୍ରଣାଳୟ ପକ୍ଷରୁ ଏହାର ନିର୍ଦ୍ଦେଶନାମା ପ୍ରକାଶ ପାଇଛି । ସେବେଠାରୁ ସେ ଓଡ଼ିଶା ହାଇକୋର୍ଟରେ କାର୍ଯ୍ୟରତ ଅଛନ୍ତି ।
ତେବେ ଦିଗବିଜୟ ହରିଚନ୍ଦନଙ୍କର ନିଯୁକ୍ତିକୁ ନେଇ ମୁଣ୍ଡ ଟେକିଛି ବିବାଦ । ସେ ଅଯୋଗ୍ୟ ବୋଲି କେହି କହୁନାହାନ୍ତି । ଆଇନମନ୍ତ୍ରୀଙ୍କ ପୁଅ ବୋଲି ଯେ ସରକାରୀ ଓକିଲ ପଦବୀରେ ନିଯୁକ୍ତି ପାଇପାରିବେନି ତାହା ନୁହେଁ । ଯୋଗ୍ୟତା ବଳରେ ସମସ୍ତେ ସବୁ ପଦବୀରେ ରହିପାରିବେ । ମାତ୍ର ଦିଗବିଜୟଙ୍କ ନିଯୁକ୍ତିରେ କିଛି ବ୍ୟତିକ୍ରମ ଥିବା କୁହାଯାଉଛି ।
ପ୍ରଥମରେ, ତାଙ୍କର ସିଙ୍ଗଲ୍ ଆପଏଣ୍ଟମେଣ୍ଟ । ଅର୍ଥାତ୍ ନିଯୁକ୍ତି ତାଲିକାରେ ଦିଗବିଜୟ ଏକମାତ୍ର ଓକିଲ ଅଛନ୍ତି । ଯଦିଓ ଆଦେଶରେ ଏକାଧିକ ଓକିଲଙ୍କୁ ସୂଚୀତ କରାଯାଇଛି ।
ଦ୍ୱିତୀୟରେ, ନିଯୁକ୍ତି ଆଦେଶରେ ଦିଗବିଜୟଙ୍କ ଅଫିସ୍ ଠିକଣା ରହିଛି କ୍ୟାପିଟାଲ୍ ହସ୍ପିଟାଲ୍ ନିକଟସ୍ଥ ଆଇନମନ୍ତ୍ରୀଙ୍କ ସରକାରୀ ବାସଭବନ/ଆବାସିକ କାର୍ଯ୍ୟାଳୟ । ଅର୍ଥାତ ବାପାଙ୍କ ଆବାସିକ କାର୍ଯ୍ୟାଳୟରୁ ନିଜର ଦପ୍ତର ଚଳାଉଛନ୍ତି ସରକାରୀ ନିଯୁକ୍ତିପ୍ରାପ୍ତ ପୁଅ । ଯାହା କନଫ୍ଲିକ୍ଟ ଅଫ ଇଣ୍ଟ୍ରେଷ୍ଟ ବୋଲି କୁହାଯାଉଛି ।
ଆହୁରି ଗୁରୁତ୍ୱପୂର୍ଣ୍ଣ କଥା ହେଉଛି, ରାଜ୍ୟରେ ବିଜେପି ସରକାର ଆସିଲା ପରେ ସରକାରୀ ଓକିଲ ନିଯୁକ୍ତିରେ ଅହେତୁକ ବିଳମ୍ବ ଘଟିଚାଲିଛି । ଏଯାଏ ବିଭିନ୍ନ ଜିଲ୍ଲା ଓ ଅର୍ଦ୍ଧ ନ୍ୟାୟିକ ସଂସ୍ଥାରେ ସରକାରୀ ଓକିଲଙ୍କର ଅଭାବ ରହିଛି । ବିଭିନ୍ନ ନିଗମ ଏବଂ ବୋର୍ଡ ଭଳି ଦଳୀୟ ସମର୍ଥିତ ବ୍ୟକ୍ତିଙ୍କୁ ବିଭିନ୍ନ ଜାଗାରେ ସରକାରୀ ଓକିଲ ପଦବୀରେ ଥଇଥାନ କରିବା ଏକ ପ୍ରଥା ହୋଇଯାଇଥିଲେ ମଧ୍ୟ ମୋହନ ସରକାର ତାହା ପୂରଣ କରିବାରେ ଏ ଯାଏଁ ସମର୍ଥ ହୋଇନାହାନ୍ତି । ସରକାରୀ ନିଯୁକ୍ତି ପାଇଁ ଆଶାୟୀମାନେ ଚାହିଁ ବସିଛନ୍ତି ।
ଏତିକିବେଳେ ଆଇନମନ୍ତ୍ରୀ ଏକାକୀ ନିଜ ପୁଅର କ୍ୟାରିୟର୍ ପାଇଁ ଯତ୍ନଶୀଳ ହେବା ଅନେକଙ୍କୁ ଆଚମ୍ବିତ କରିଛି । କେନ୍ଦ୍ର ସରକାରରେ ଚାପ ପକାଇ ନିଜ ପୁଅର ଥଇଥାନ କରାଇଛନ୍ତି ବୋଲି ଅଭିଯୋଗ କରି ଆଇନମନ୍ତ୍ରୀଙ୍କ ନୈତିକତାକୁ ପ୍ରଶ୍ନ କରିଛନ୍ତି । ବିଶ୍ୱଭୂଷଣ ହରିଚନ୍ଦନଙ୍କ ଭଳି ନୈତିକ ମୂଲ୍ୟବୋଧରେ ବିଶ୍ୱାସ ରଖୁଥିବା ଜଣେ ସମ୍ମାନସ୍ପଦ ରାଜନେତାଙ୍କ ପରିବାରରେ ଏଭଳି ବିଲକ୍ଷଣକୁ ନେଇ ଅନେକ ଆଇନଜୀବୀ ଦୁଃଖ ପ୍ରକାଶ କରିଛନ୍ତି ।
ଅନ୍ୟପକ୍ଷରେ ମନ୍ତ୍ରିମଣ୍ଡଳ ସମ୍ପ୍ରସାରଣଠାରୁ ଆରମ୍ଭ କରି ନିଗମ, ବୋର୍ଡ ନିଯୁକ୍ତିରେ ସମ୍ପୂର୍ଣ୍ଣ ହାତ ବାନ୍ଧି ବସିଥିବା ମୋହନ ମାଝୀ ସରକାର ଏବଂ ସର୍ବୋପରି ରାଜ୍ୟ ବିଜେପି ସଙ୍ଗଠନରେ ଏହା ନକରାତ୍ମକ ଛବି ସୃଷ୍ଟି କରିଛି । ଆଇନମନ୍ତ୍ରୀଙ୍କ ପୁତ୍ରମୋହ ଖୋଦ୍ ବିଜେପି ମହଲରେ ଆଲୋଚନାର ବିଷୟ ହୋଇଛି ।
