ଭୁବନେଶ୍ୱର: ଜୁନ୍ ୧୨ ତାରିଖରେ ମୋହନ ମାଝୀ ସରକାରଙ୍କୁ ପୂରିବ ବର୍ଷେ । ରାଜ୍ୟବ୍ୟାପୀ ଏହାକୁ ଧୂମଧାମରେ ପାଳିବା ପାଇଁ ବଡ଼ ଯୋଜନା ହୋଇଛି । ଭୋଜିଭାତ, ନାଚ, ଗୀତ ଆସର ସାଙ୍ଗକୁ ସରକାରଙ୍କ ସଫଳତା ଲୋକଙ୍କୁ ଜଣାଇବା ପାଇଁ ବ୍ୟାପକ କାର୍ଯ୍ୟକ୍ରମର ଆୟୋଜନ କରାଯାଇଛି । ଜୁନ୍ ୫ ତାରିଖରୁ କାର୍ଯ୍ୟକ୍ରମ ଆରମ୍ଭ ହୋଇ ଜୁନ୍ ୨୦ ପର୍ଯ୍ୟନ୍ତ ଚାଲିବ । ଏକ ଉଚ୍ଚସ୍ତରୀୟ ବୈଠକରେ କାର୍ଯ୍ୟକ୍ରମର ଖସଡ଼ା ପ୍ରସ୍ତୁତ ହୋଇଛି ।
ଜୁନ୍ ୧୨ ତାରିଖରେ ଜନତା ମଇଦାନରେ ମୁଖ୍ୟ ଉତ୍ସବ ପୂର୍ବରୁ ଜୁନ୍ ୫ ତାରିଖରୁ ୧୨ ତାରିଖ ମଧ୍ୟରେ ୪ଟି ଡିନର୍ ପାର୍ଟିର ଆୟୋଜନ କରାଯାଉଛି । ବିଭିନ୍ନ ବର୍ଗର ବ୍ୟକ୍ତିବିଶେଷଙ୍କ ସହ ମୁଖ୍ୟମନ୍ତ୍ରୀ ସେହି ପାର୍ଟିରେ ମିଶିବେ । ପ୍ରଥମ ଡିନର୍ ପାର୍ଟିକୁ ରାଜ୍ୟର ବିଶିଷ୍ଟ ସାମ୍ବାଦିକମାନଙ୍କୁ ନିମନ୍ତ୍ରଣ କରିବାକୁ ଯୋଜନା ହୋଇଥିବା ବେଳେ ଦ୍ୱିତୀୟ ଡିନର୍ ପାର୍ଟିକୁ ଶିଳ୍ପୋଦ୍ୟୋଗୀ, ତୃତୀୟ ଡିନର୍ ପାର୍ଟିକୁ ସିଭିଲ୍ ସୋସାଇଟି ବ୍ୟକ୍ତିବିଶେଷ ଏବଂ ଚତୁର୍ଥ ଡିନର୍ ପାର୍ଟିକୁ ବିଧାୟକ ଏବଂ ସାଂସଦମାନଙ୍କୁ ନିମନ୍ତ୍ରଣ କରାଯିବ । ଏହିସବୁ ବୈଠକରେ ରାଜ୍ୟର ବିକାଶ ପାଇଁ ପ୍ରସ୍ତାବ ନିଆଯିବ ।
୧୨ ତାରିଖରେ ଜନତା ମଇଦାନରେ ହେବାକୁ ଥିବା ମୁଖ୍ୟ ଉତ୍ସବରେ ମୋହନ ସରକାରଙ୍କ ସଫଳତା ଉପରେ ପର୍ଯ୍ୟବେସିତ ୫ ମିନିଟିଆ ଥିମ୍ ସଙ୍ଗ୍ ଏବଂ ୨୫ ମିନିଟିଆ ଡକୁ୍ୟମେଣ୍ଟାରି ଫିଲ୍ମ ପ୍ରଦର୍ଶନ ହେବ । ୨୦୩୬ର ଭିଜନ୍ ଡକୁ୍ୟମେଣ୍ଟ ମଧ୍ୟ ଉନ୍ମୋଚିତ ହେବ । ସରକାରଙ୍କ ୩୬୫ ଦିନ ପୂରଣକୁ ସ୍ମରଣୀୟ କରିବା ପାଇଁ ୩୬୫ଟି ପ୍ରକଳ୍ପର ଶିଳାନ୍ୟାସ କରାଯିବ । ୩୬୫ଟି ପ୍ରକଳ୍ପକୁ ଉଦଘାଟନ କରାଯିବ । ସେଦିନ ସଂଧ୍ୟାରେ ବିରାଟ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବ । ସେଦିନର କାର୍ଯ୍ୟକ୍ରମରେ ଯୋଗଦେବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଗୃହ ମନ୍ତ୍ରୀ ଅମିତ୍ ଶାହ ଓ ବିଜେପି ଶାସିତ ରାଜ୍ୟର ମୁଖ୍ୟମନ୍ତ୍ରୀମାନଙ୍କୁ ନିମନ୍ତ୍ରଣ କରାଯାଇଛି ।
ଜୁନ୍ ୧୨ରେ ଭୁବନେଶ୍ୱରର ଜନତା ମଇଦାନରେ ଆରମ୍ଭ ହେଉଥିବା ପୂର୍ତ୍ତି ପାଳନ ଉତ୍ସବ ୨୦ ତାରିଖ ପର୍ଯ୍ୟନ୍ତ ସାରା ରାଜ୍ୟରେ ଚାଲିବ । ଜୁନ୍ ୧୩ରେ ବ୍ରହ୍ମପୁରରେ ରାଜ୍ୟସ୍ତରୀୟ ନାରୀଶକ୍ତି ସମାବେଶ ଅନୁଷ୍ଠିତ ହେବ । ଜୁନ୍ ୧୮ରେ ଢ଼େଙ୍କାନାଳରେ ଯୁବଶକ୍ତି, ଜୁନ୍ ୧୯ରେ ମୟୁରଭଞ୍ଜରେ ଆଦିବାସୀଶକ୍ତି ଏବଂ ଜୁନ୍ ୨୦ରେ ବରଗଡ଼ରେ ଚାଷୀଶକ୍ତି ସମାବେଶ ହେବ ।
ଏହା ବାଦ୍, ରାଜ୍ୟର ସବୁ ଜାଗାରେ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ କରାଯାଇଛି । ସଂସ୍କୃତି ବିଭାଗ ପକ୍ଷରୁ ଭୁବନେଶ୍ୱର ରବୀନ୍ଦ୍ରମଣ୍ଡପରେ ଥିଏଟର୍ ଫେଷ୍ଟିଭାଲ୍ ହେବ । ଭଞ୍ଜ କଳାମଣ୍ଡପରେ ହେବ ମୁ୍ୟଜିକାଲ୍ ଇଭେଣ୍ଟ । ମୋହନ ସରକାରଙ୍କ ସଫଳତାର ଗାଥା ଧରି ପ୍ରତି ବ୍ଲକ୍ ରେ ବିକାଶ ରଥ ବୁଲିବ । ବିଭିନ୍ନ ସରକାରୀ ମାଗାଜିନ୍ ରେ ମୋହନ ସରକାରଙ୍କ ପ୍ରଶଂସାରେ ସ୍ୱତନ୍ତ୍ର ସଂଖ୍ୟା ବାହାରିବ । ପିଲାଙ୍କ ମଧ୍ୟରେ “ମୋ ସ୍ୱପ୍ନର ଓଡ଼ିଶା’କୁ ନେଇ ପ୍ରତିଯୋଗିତା ହେବ ।
ସବୁ କାର୍ଯ୍ୟକ୍ରମକୁ ସଫଳତାର ସହ ଆୟୋଜନ କରିବା ପାଇଁ ବିଭିନ୍ନ ବିଭାଗକୁ ଦାୟିତ୍ୱ ବଣ୍ଟା ଯାଇଛି । ପୂର୍ତ୍ତ, ଗୃହ ଏବଂ ଶିଳ୍ପ ବିଭାଗ ପରଷ୍ପର ମଧ୍ୟରେ ସମନ୍ୱୟ ରଖି ଏହି ସବୁ ଦାୟିତ୍ୱକୁ ସୂଚାରୁ ରୂପେ ତୁଲାଇବେ । କାର୍ଯ୍ୟକ୍ରମ ରୂପାୟନ ଦାୟିତ୍ୱ ଇପିକଲ୍ ଉପରେ ନ୍ୟସ୍ତ କରାଯାଇଛି ।
