ଭୁବନେଶ୍ୱର: ବିଧାୟକ ଅରୁଣ ସାହୁ, ମନ୍ତ୍ରୀ ଅତନୁ ସବ୍ୟସାଚୀ ନାୟକଙ୍କ ପରେ ସୌମ୍ୟ ପଟ୍ଟନାୟକଙ୍କୁ ଆଜି ଟାର୍ଗେଟ୍ କରିଛନ୍ତି ମନ୍ତ୍ରୀ ପ୍ରତାପ ଦେବ । ସୌମ୍ୟ କେମିତିକା ବ୍ଲାକମେଲର୍ ତାହା ସେ ବୁଝାଇ ଦେଇଛନ୍ତି । ବିଜେଡି ପ୍ରତି ତାଙ୍କର ଯଦି ଏତେ ବିତୃଷ୍ଣା ତେବେ ଦଳତ୍ୟାଗ କରି ସମ୍ପାଦକୀୟ ଲେଖନ୍ତୁ ବୋଲି ଆହ୍ୱାନ ଦେଇଛନ୍ତି । ସୌମ୍ୟ ତାଙ୍କ ଜବାବରେ ବିଜେଡିରୁ ଇସ୍ତଫା ଦେବେନି ବୋଲି କହି ଓଲଟି ଦଳକୁ ଚାଲେଂଜ କରିଛନ୍ତି ।
ସୌମ୍ୟବାବୁ ଜଣେ ବ୍ଲାକମେଲର୍ ବୋଲି ମନ୍ତ୍ରୀ ପ୍ରତାପ ଦେବ ବି ଆଜି କହିଛନ୍ତି । ସେ କହିଛନ୍ତି ଯେ ଦଳ ଭିତରେ ରହି ସମ୍ପାଦକୀୟ ଆଳରେ ଯଦି ନିଜ ଦଳକୁ ସମାଲୋଚନା କରିବେ, ଦଳର ନୀତିକୁ ସମାଲୋଚନା କରିବେ, ନେତାଙ୍କୁ ସମାଲୋଚନା କରିବେ ତାକୁ ବ୍ଲାକମେଲିଂ କୁହାଯାଏ । ସୌମ୍ୟବାବୁ ନିର୍ଦ୍ଦିଷ୍ଟ ଦଳରେ ରହି ଅନୁଶାସନ ଭଙ୍ଗ କରୁଛନ୍ତି । ଧାରାବାହିକ ଏବଂ ଉଦ୍ଦେଶ୍ୟମୂଳକ ଭାବେ ସମାଲୋଚନା କରୁଛନ୍ତି । ଏହା ବିଲକୁଲ ସମୀଚୀନ ନୁହେଁ । ଦଳ ଭିତରେ ଥାଇ ଦଳୀୟ ଫୋରମ୍ ରେ ନ କହି ବାହାରେ ସମାଲୋଚନା କରିବା ଦଳର ଶୃଙ୍ଖଳା ଭଙ୍ଗ ହେଉଛି । ଯଦି ବିଜେଡିରେ ସବୁ ଭୁଲ୍ ହେଉଛି ଏବଂ ତାଙ୍କୁ ଏତେ ଆଘାତ ଲାଗୁଛି ତେବେ ଦଳରୁ ଇସ୍ତଫା ଦେଇଦିଅନ୍ତୁ ।
୫-ଟି ସଚିବ ଭି.କେ.ପାଣ୍ଡିଆନଙ୍କ ଜିଲ୍ଲାଗସ୍ତ ସମ୍ପର୍କରେ ସୌମ୍ୟବାବୁଙ୍କ ଆପତ୍ତି ଉପରେ ମତ ରଖିଛନ୍ତି ପ୍ରତାପ ଦେବ । ସେ କହିଛନ୍ତି, ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ମୁଖ୍ୟମନ୍ତ୍ରୀଙ୍କ ଦପ୍ତର ସାଧାରଣ ଲୋକଙ୍କ ଅଭିଯୋଗ ଶୁଣିଛନ୍ତି । ଏ ସମ୍ପର୍କରେ ମୁଖ୍ୟମନ୍ତ୍ରୀଙ୍କ ସ୍ପଷ୍ଟୀକରଣ ଆସିବା ପରେ ଚର୍ଚ୍ଚାର ଅବସାନ ଘଟିବା ଦରକାର ।
ମନ୍ତ୍ରୀ ପ୍ରତାପ ଦେବଙ୍କ ଏହି ମନ୍ତବ୍ୟ ପରେ ଖଣ୍ଡପଡ଼ା ବିଧାୟକ ସୌମ୍ୟରଂଜନ ପଟ୍ଟନାୟକ ଏକ ପ୍ରେସ୍ ମିଟ୍ କରି ଏହାର ଜବାବ ରଖିଥିଲେ । ସେ ତିନୋଟି ଭୂମିକାରେ ଥିବାରୁ ଦ୍ୱନ୍ଦରେ ରହିବା ସ୍ୱାଭାବିକ ବୋଲି କହିବା ସହ ବିଜେଡିକୁ ଭଲପାଉଥିବାରୁ ଦଳର ଦୋଷ ଦୁର୍ବଳତା ସୁଧାରିବା ତାଙ୍କର ଦାୟିତ୍ୱ ବୋଲି ଦାବି କରିଥିଲେ । ମୁଁ ଦଳ କାହିଁକି ଛାଡ଼ିବି? ସେମାନଙ୍କର ସସପେଣ୍ଡ ଅଧିକାର ଅଛି, ସେମାନେ ଚାହିଁଲେ କରିପାରିବେ ବୋଲି କହିବା ସହ ଓଲଟି ସଚିବଙ୍କର ଇସ୍ତଫା ଦାବି କରିଥିଲେ । ମୁଖ୍ୟମନ୍ତ୍ରୀ ଏତେ ଅସହାୟ କାହିଁକି ବୋଲି ମଧ୍ୟ ପ୍ରଶ୍ନ କରିଥିଲେ ।
ସୂଚନାଯୋଗ୍ୟ, ସୌମ୍ୟ ପଟ୍ଟନାୟକଙ୍କ ଦଳ ବିରୋଧୀ ଆଚରଣକୁ ନେଇ ପ୍ରଥମେ ଟାର୍ଗେଟ୍ କରିଥିଲେ ତାଙ୍କର ଖଣ୍ଡପଡ଼ା ପ୍ରତିଦ୍ୱନ୍ଦୀ ତଥା ପୂର୍ବତନ ବିଧାୟକ ଅନୁଭବ ପଟ୍ଟନାୟକ । ତିନି ଦିନ ତଳେ ଜିଲ୍ଲାର ବରିଷ୍ଠ ନେତା ତଥା ନୟାଗଡ଼ ବିଧାୟକ ଅରୁଣ ସାହୁ ସାମନାକୁ ଆସିଥିଲେ । ସୌମ୍ୟଙ୍କୁ ସେ ଜଣେ ବ୍ଲାକମେଲର୍ ଭାବେ ଅଭିହିତ କରିବା ସହ ତାଙ୍କର ମାଟିକୁ ସମ୍ମାନ ନାରା ଏକ ପ୍ରବ‚ନା ବୋଲି କହିଥିଲେ । ବିଧାୟକ ଭାବେ ୪ ବର୍ଷ ୪ ମାସ ସମୟ ଭିତରେ ସେ ମାଟିର କଥା କେତେ ବୁଝିଛନ୍ତି ତାହାର ଜବାବ ମାଗିଥିଲେ ଅରୁଣ । ତା’ ପରଦିନ ବରିଷ୍ଠ ମନ୍ତ୍ରୀ ଅତନୁ ସବ୍ୟସାଚୀ ନାୟକ ମୁହଁ ଖୋଲିଥିଲେ । ସେ ମଧ୍ୟ ସୌମ୍ୟଙ୍କୁ ବ୍ଲାକମେଲର୍ କହିଥିଲେ । ଦଳ ବଦଳରେ ଅଭ୍ୟସ୍ତ ସୌମ୍ୟବାବୁଙ୍କର ବିଜେଡିରେ ବ୍ଲାକମେଲିଂ କରିବାର ପ୍ରୟାସ ସଫଳ ହେବ ନାହିଁ ବୋଲି ଅତନୁ କହିଥିଲେ ।
