ଭୁୁବନେଶ୍ୱର: ଧର୍ମଶାଳା ବିଧାୟକ ହିମାଂଶୁ ଶେଖର ଓରଫ୍ ଲିକୁ ସାହୁଙ୍କ ଉପରେ ଆକ୍ରମଣ ପଛରେ ପୂର୍ବତନ ବିଧାୟକ ତଥା ବିଜେଡି ନେତା ପ୍ରଣବ ପ୍ରକାଶ(ବବି) ଦାସଙ୍କ ହାତ ଥିବା ଅଭିଯୋଗ ହୋଇଛି । ନିଜେ ବିଧାୟକ ଏହି ଅଭିଯୋଗ କରିବା ପରେ ଯାଜପୁର ଜିଲ୍ଲା ରାଜନୀତିରେ ତମ୍ବିତୋଫାନ ଲାଗି ରହିଛି । ଏଭଳି ସମୟରେ ବବିଙ୍କ ସୁରକ୍ଷାରେ ବାହାରି ତାଙ୍କୁ କ୍ଲିନଚିଟ୍ ଦେଇଛନ୍ତି ସୁକିନ୍ଦା ବିଧାୟକ ତଥା ରାଜ୍ୟ ସମବାୟ, ହସ୍ତତନ୍ତ ଓ ବୟନଶିଳ୍ପ ମନ୍ତ୍ରୀ ପ୍ରଦୀପ(ଟୁଟୁ) ବଳ ସାମନ୍ତ ।
ବିଧାୟକଙ୍କ ଉପରେ ଆକ୍ରମଣ ଘଟଣାକୁ ନେଇ ଆଜି ଗଣମାଧ୍ୟମ ପ୍ରତିନିଧିମାନେ ମନ୍ତ୍ରୀଙ୍କର ପ୍ରତିକ୍ରିୟା ଲୋଡ଼ିଥିଲେ । ଏହି ଘଟଣାରେ ବବି ଦାସଙ୍କ ସଂପୃକ୍ତି ଅଛି ନା ନାହିଁ ବୋଲି ଜାଣିବାକୁ ଚାହିଁଥିଲେ । ମାତ୍ର ବବିଙ୍କର ସଂପୃକ୍ତି ଅଭିଯୋଗକୁ ମନ୍ତ୍ରୀ ଶ୍ରୀ ବଳସାମନ୍ତ ସଫା ସଫା ଖଣ୍ଡନ କରିଥିଲେ । କହିଥିଲେ, ବିଧାୟକଙ୍କ ଉପରେ ଆକ୍ରମଣ ଘଟଣା ପ୍ରାୟୋଜିତ ନୁହେଁ ବୋଲି ବାହାରୁ ମୁଁ ଶୁଣୁଛି । ସେଠି ରାସ୍ତାରୋକ ହୋଇଥିଲା । ସେହି ସମୟରେ ବିଧାୟକଙ୍କ ଗାଡ଼ି ପଶିଯାଇଛି । ଏଥିରେ କିଛି ପିଲା ରିଆକ୍ଟ କରିଛନ୍ତି । ଯାହା ହୋଇଛି ହଉ ହଉ ହେଇ ଯାଇଥିବ । ଏଥିରେ ନେତାଙ୍କ ସଂପୃକ୍ତି କେଉଁଠୁ ଆସିବ?
ମନ୍ତ୍ରୀଙ୍କର ଏହି ବୟାନ ବିଧାୟକ ଲିକୁ ସାହୁଙ୍କ ଗୋଷ୍ଠୀକୁ ଅଡୁଆରେ ପକାଇଛି । କାରଣ ଲିକୁ ସ୍ୱାଧୀନ ପ୍ରାର୍ଥୀ ଭାବେ ନିର୍ବାଚନ ଲଢ଼ିଥିଲେ ମଧ୍ୟ ବିଧାୟକ ନିର୍ବାଚିତ ହେଲା ପରେ ବିଜେପିକୁ ସମର୍ଥନ କରୁଛନ୍ତି । ସେ ବିଜେପିରୁ ହିଁ ଟିକେଟ ଆଶାୟୀ ଥିଲେ ଏବଂ ଟିକେଟ ନ ପାଇବାରୁ ସ୍ୱାଧୀନ ଲଢ଼ିଥିଲେ । ତେଣୁ ତାଙ୍କୁ ବିଜେପି ବିଧାୟକ ଭାବେ ଗଣତି କରାଯାଉଛି । ମାତ୍ର ବିଜେପି ସରକାରରେ ଜିଲ୍ଲାର ହେଭିୱେଟ୍ ନେତା ଭାବେ ପରିଗଣିତ ହେଉଥିବା ମନ୍ତ୍ରୀ ପ୍ରଦୀପ ବଳ ସାମନ୍ତ ବିଜେଡି ନେତା ବବି ଦାସଙ୍କ ସପକ୍ଷରେ ବାହାରିବା ଏବଂ ତାଙ୍କୁ କ୍ଲିନଚିଟ୍ ଦେବା ଲିକୁଙ୍କ ପାଇଁ ଅସୁବିଧା ସୃଷ୍ଟି କରିଛି । ଏହାକୁ ନେଇ ଯାଜପୁର ଜିଲ୍ଲା ରାଜନୀତି ରୋଚକ ମୋଡ଼ ନେଇଛି ।
ସୂଚନାଯୋଗ୍ୟ, ଗତକାଲି ସଂଧ୍ୟାରେ ଯାଜପୁର-କୁଆଖାଇ ରାସ୍ତାର ବୁଢ଼ାଘାଟଠାରେ ଯାଜପୁର ବିରଜା ହାଟ ଖୋଲିବା ପ୍ରତିବାଦରେ ଶତାଧିକ ବିଜେଡି କର୍ମୀ ଟାୟାର ଜାଳି ରାସ୍ତାରୋକ କରିଥିଲେ । ଏତିକିବେଳେ ବିଧାୟକ ଲିକୁ ସାହୁ ଯାଜପୁରକୁ ଏକ ଜରୁରୀ କାମରେ ଯାଉଥିଲେ । ତାଙ୍କ ଗାଡ଼ି ସେଇ ଭିଡ଼ କାଟି ଅତିକ୍ରମ କରୁଥିବା ବେଳେ କିଛି ଆନେ୍ଦାଳନକାରୀ ଯୁବକ ଗାଡ଼ି ଆଡ଼କୁ ମାଡ଼ି ଆସି ଟେକାପଥର ମାଡ଼ କରିବା ସହ ଖରାପ ଭାଷାରେ ଗାଳିଗୁଲଜ କରିଥିଲେ । ଗାଡ଼ିର କାଚ ଭାଙ୍ଗି ବିଧାୟକଙ୍କୁ ଟଣାଓଟଣା କରିଥିଲେ । ମାଡ଼ ମାରିଥିବା ବି ଅଭିଯୋଗ ହୋଇଛି ।
ଏହି ଘଟଣା ପାଇଁ ଯାଜପୁରର ପୂର୍ବତନ ବିଧାୟକ ବବି ଦାସଙ୍କୁ ସିଧାସଳଖ ଦାୟୀ କରିଛନ୍ତି ଧର୍ମଶାଳା ବିଧାୟକ । ବବି ଦାସଙ୍କ ସମର୍ଥକମାନେ ତାଙ୍କୁ ଯୋଜନାବଦ୍ଧ ଭାବେ ଜୀବନରୁ ମାରିଦେବାକୁ ଉଦ୍ୟମ କରିଥିବା ସେ ଅଭିଯୋଗ କରିଛନ୍ତି । ତେବେ ବବି ଏହାକୁ ସମ୍ପୂର୍ଣ୍ଣ ଅସ୍ୱୀକାର କରିଛନ୍ତି । ବିଜେଡି ହିଂସାରେ ବିଶ୍ୱାସ କରେ ନାହିଁ ଏବଂ କୌଣସି ହିଂସାକୁ ପ୍ରଶୟ ଦିଆଯିବ ନାହିଁ । ଏଭଳି ଘଟଣା ଘଟାଇଥିବା ଲୋକଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ପାଇଁ ସେ ପୁଲିସକୁ ଅନୁରୋଧ କରିଥିବା ଗତକାଲି ଗଣମାଧ୍ୟମକୁ କହିଥିଲେ ।
