ଭୁୁବନେଶ୍ୱର: ଗୋପାଳପୁର ବେଳାଭୂମିରେ ଘଟିଥିବା ଜଘନ୍ୟ କାଣ୍ଡର ପୁନରାବୃତ୍ତି । ରାଜଧାନୀ ଛାତି ଉପରେ ଦୟା ନଈପଠାରେ ଜଣେ ୧୭ ବର୍ଷୀୟା ଛାତ୍ରୀ ତାଙ୍କ ପୁରୁଷବନ୍ଧୁଙ୍କ ସାମନାରେ ଗଣଦୁଷ୍କର୍ମର ଶିକାର ହୋଇଛନ୍ତି । ଏହି ଘଟଣାରେ ଦୁଇ ଅଭିଯୁକ୍ତ ଗିରଫ ହୋଇଥିଲେ ମଧ୍ୟ ମୁଖ୍ୟ ଅଭିଯୁକ୍ତ ଧରାପଡ଼ିନାହିଁ । ଘଟଣାଟି ସାରା ରାଜ୍ୟରେ ଆଲୋଡ଼ନ ସୃଷ୍ଟି କରିଛି । ଏହି ଘଟଣାରେ ବିରୋଧୀ ଦଳ ନେତା ନବୀନ ପଟ୍ଟନାୟକ ସରକାରଙ୍କୁ କଡ଼ା ସମାଲୋଚନା କରିଥିବା ବେଳେ ମହିଳାମାନଙ୍କୁ ସୁରକ୍ଷା ଦେବାରେ ଅସମର୍ଥ ସରକାର ଗାଦି ଛାଡ଼ି ଦିଅନ୍ତୁ ବୋଲି ତାଙ୍କ ଦଳର ମହିଳା ଶାଖା ଦାବି କରିଛି ।
ଗତ ୧୦ ତାରିଖ ଅପରାହ୍ନରେ ନାବାଳିକା ତାଙ୍କ ପୁରୁଷ ବନ୍ଧୁଙ୍କ ସହିତ ବାଇକ୍ ରେ ଧଉଳି ଶାନ୍ତିସ୍ତୁପ ବୁଲିବାକୁ ଯାଇଥିଲେ । ସଂଧ୍ୟା ୭ଟା ବେଳକୁ ସେମାନେ ଫେରୁଥିଲେ । ଧଉଳି ଥାନାଠାରୁ ମାତ୍ର ଗୋଟିଏ କିମି ଦୂର ଲିଙ୍ଗିପୁର-ଟଙ୍କପାଣି ରାସ୍ତାରେ ଏକ ନିଛାଟିଆ ଜାଗାରେ ବାଇକ୍ ରଖି ଦୟା ନଈପଠାରେ ଅଟକିଥିଲେ । ଏହି ସମୟରେ ୫ ଜଣ ଦୁର୍ବୃତ୍ତ ସେଠାରେ ପହଞ୍ଚି ଜୋରଜବରଦସ୍ତ ଟଙ୍କା ମାଗିଥିଲେ । ଟଙ୍କା ଦେବାକୁ ୍ୱନା କଲାରୁ ସେମାନେ ଯୁବକଙ୍କୁ ନିସ୍ତୁକ ପିଟିଥିଲେ ଏବଂ ଟଙ୍କା ମୋବାଇଲ୍ ଛଡ଼ାଇ ନେଇଥିଲେ ।
ନାବାଳିକା ପ୍ରେମିକା ଏହାର ପ୍ରତିବାଦ କରିବାରୁ ଦୁର୍ବୃତ୍ତମାନେ ତାଙ୍କୁ ଟଣାଓଟରା କରି ପୋଷାକ ଚିରି ଦେଇଥିଲେ । ଯୁବକଙ୍କୁ ବାନ୍ଧି ଦେଇଥିଲେ । ଦୁଇଜଣ ଦୁର୍ବୃତ୍ତ ତାଙ୍କୁ ବାନ୍ଧି ଧରିଥିଲା ବେଳେ ତାଙ୍କ ଆଗରେ ଅନ୍ୟ ୩ ଦୁର୍ବୃତ୍ତ ଝିଅଟିକୁ ଦୁଷ୍କର୍ମ କରିଥିଲେ । ମୋବାଇଲରେ ଫଟୋ ଉଠାଇଥିଲେ । ଭିଡିଓ ରେକର୍ଡିଂ କରିଥିଲେ । ଶେଷରେ ତାଙ୍କ ବେକରୁ ସୁନା ଚେନ୍ ନେଇ ପଳାଇଥିଲେ । ପୀଡ଼ିତାଙ୍କୁ ଧରି ପୁରୁଷବନ୍ଧୁ ସିଧା ହସ୍ପିଟାଲ୍ ଯାଇଥିଲେ ଏବଂ ପରଦିନ ଧଉଳି ଥାନାରେ ଏତଲା ଦେଇଥିଲେ ।
ଘଟଣା ଘଟିବାର ୫ ଦିନ ପରେ ଦୁଇ ଅଭିଯୁକ୍ତଙ୍କୁ ପୁଲିସ ଗିରଫ କରିଛି । ସେମାନେ ହେଉଛନ୍ତି କଟକ ଜିଲ୍ଲା ବାଙ୍କୀର ବିଭୁ ପ୍ରସାଦ ମିଶ୍ର(୩୨) ଓ ଓଲଟପୁର ଅଞ୍ଚଳର କାଳନ୍ଦୀ ପାତ୍ର(୩୧) । ତେବେ ମୁଖ୍ୟ ଅଭିଯୁକ୍ତକୁ ଗିରଫ କରିବାରେ ପୁଲିସ ଏ ଯାଏଁ ସକ୍ଷମ ହୋଇନାହିଁ । ତା’ ଘର ଶିଶୁପାଳଗଡ଼ରେ ଏବଂ ତା’ ନାଁରେ ୨୦ ରୁ ଅଧିକ ଅପରାଧିକ ମାମଲା ଥିବା ଜଣାପଡ଼ିଛି ।
ରାଜ୍ୟ ମହିଳା କମିଶନ ସଦସ୍ୟା ଉର୍ମିଳା ମହାପାତ୍ର ଆଜି ଘଟଣାସ୍ଥଳକୁ ଯାଇ ଅନୁଧ୍ୟାନ କରିଛନ୍ତି । ଅନ୍ଧାର ରାତିରେ ଏଭଳି ନିଛାଟିଆ ଜାଗାକୁ ଝିଅମାନେ ନ ଆସିବାକୁ ତାଙ୍କର ପରାମର୍ଶ ବିବାଦ ସୃଷ୍ଟି କରିଛି ।
ଖୋଦ୍ ରାଜଧାନୀ ଛାତି ଉପରେ ଏହି ବର୍ବର ଘଟଣାକୁ ନେଇ ଉଦବେଗ ପ୍ରକାଶ କରିଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ । ଏହା ଅତ୍ୟନ୍ତ ସ୍ପର୍ଶକାତର ଏବଂ ବିଚଳିତ କଲା ଭଳି ବିଷୟ । ବର୍ବରତା ଓ ଅରାଜକତା ସୀମା ଟପୁଛି, ରାଜଧାନୀ ଅସୁରକ୍ଷିତ ହେଉଛି । ଭୟଶୂନ୍ୟ ହେଉଛନ୍ତି ଅପରାଧୀ, ବିଶ୍ୱନୀୟତା ହରାଉଛି ସରକାର । ଆଇନଶୃଙ୍ଖଳା ଆଉ କେତେ ବିପର୍ଯ୍ୟସ୍ତ ହେଲେ ସରକାର ସଜାଗ ହେବେ ବୋଲି ସେ ପ୍ରଶ୍ନ କରିଛନ୍ତି ।
‘ଏକ୍ସ’ ପୋଷ୍ଟରେ ନବୀନ ଆହୁରି ଲେଖିଛନ୍ତି ଯେ ରାଜଧାନୀରେ ମହିଳାଙ୍କ ପାଇଁ ସୁରକ୍ଷିତ ପରିବେଶ ସୁନିଶ୍ଚିତ କରି ନ ପାରିବା ବିଜେପି ସରକାରରେ ଅପାରଗତା ଓ ସମ୍ବେଦନହୀନ ଆଚରଣକୁ ଦର୍ଶାଉଛି । ମହିଳାଙ୍କ ସୁରକ୍ଷା ସହ ଅପରାଧ ପ୍ରବଣତାକୁ ରୋକିବା ପାଇଁ ସରକାର କଠୋର ପଦକ୍ଷେପ ନିଅନ୍ତୁ । ଘଟଣା ରୋକିବା ଦିଗରେ ସରକାର ତତ୍ପର ହେବାକୁ ପରାମର୍ଶ ଦେଇଛନ୍ତି ।
ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା କିନ୍ତୁ ଏହାର କଡ଼ା ଜବାବ ଦେଇଛନ୍ତି । ଦୁଃଖଦ ଘଟଣାକୁ ନେଇ ରାଜନୀତି କରିବା ଆପଣଙ୍କ ଭଳି ବ୍ୟକ୍ତିତ୍ୱଙ୍କଠାରୁ ଓଡ଼ିଶା ଲୋକେ କେବେ ବି ଆଶା କରିନଥିବେ । ସତ ଆଉ କେବେ କହିବେ? ଏହି ଘଟଣାରେ ତ୍ୱରିତ ପୁଲିସର ପଦକ୍ଷେପ ଓ ଅଭିଯୁକ୍ତ ଗିରଫ ଏହା ହେଉଛି ସତ । ଆପଣଙ୍କ ଦେଖେଇବା ରାସ୍ତାରେ ନୁହେଁ ଏବେ ସରକାରରେ ଆଇନ ତା ବାଟରେ ଯାଉଛି ବୋଲି ‘ଏକ୍ସ’ ରେ ଲେଖିଛନ୍ତି ।
ଶଙ୍ଖଭବନରେ ଏକ ସାମ୍ବାଦିକ ସମ୍ମିଳନୀରେ ମହିଳା ବିଜେଡି ସଭାନେତ୍ରୀ ସ୍ନେହାଙ୍ଗିନୀ ଛୁରିଆ ରାଜ୍ୟରେ ମହିଳା ସୁରକ୍ଷା ବିପର୍ଯ୍ୟସ୍ତ ବୋଲି ଅଭିଯୋଗ କରିବା ସହ ମହିଳାଙ୍କୁ ସୁରକ୍ଷା ଦେବାରେ ଅସମର୍ଥ ସରକାର ଗାନି ଛାଡ଼ିଦିଅନ୍ତୁ ବୋଲି କହିଛନ୍ତି ।
