ନବୀନ..ନବୀନ, ମୋହନ..ମୋହନ

ଭୁବନେଶ୍ୱର: ନବୀନ ପଟ୍ଟନାୟକ ଏବଂ ମୋହନ ମାଝୀଙ୍କୁ ତୁଳନା କରି ଉଭୟ ଗୋଷ୍ଠୀ ପରଷ୍ପରକୁ ଟ୍ରୋଲ୍ କରୁଛନ୍ତି । ନବୀନ ବାବୁଙ୍କ ମୁହଁରେ ଚଣ୍ଡିଖୋଲ, ବାରିପଦାର ବିକୃତ ଉଚ୍ଚାରଣ କାହା ପାଇଁ ଅସହ୍ୟ ହୋଇଥିବା ବେଳେ ମୋହନ ବାବୁଙ୍କ ମୁହଁରେ ହିନ୍ଦୀ ଏବଂ ଇଂରାଜୀର ବିକୃତ ଉଚ୍ଚାରଣ କାହା ପାଇଁ ଅସହ୍ୟ ହେଉଛି । ଉତ୍କଳମଣି ଗୋପବନ୍ଧୁ ଦାସଙ୍କ ଜାଗାରେ ମଧୁସୂଦନ ଦାସ କହିଦେବା ହେଉ କି ସମ୍ବିଧାନ ଦିବସ ଜାଗାରେ ସ୍ୱାଧୀନତା ଦିବସ ପାଟିରୁ ବାହାରିଗଲା ବୋଲି ମୁଖ୍ୟମନ୍ତ୍ରୀଙ୍କୁ ଅଶିକ୍ଷିତ, ଅଜ୍ଞାନୀ ଦର୍ଶାଇ ସୋସିଆଲ୍ ମିଡିଆରେ ଗାଳି କରାଯାଉଛି । ମୁଖ୍ୟମନ୍ତ୍ରୀଙ୍କୁ ଆଦିବାସୀ ଆକ୍ଷେପରେ ତାଙ୍କର ଭିଜୁଆଲ୍ ଏଡିଟ୍ କରି ହାତରେ ଚାଙ୍ଗୁ କି ଢ଼ୋଲ୍ ଧରେଇ ନଚାଯାଉଛି । କମ କଥା କହି, ଲୋକଙ୍କ ସାଙ୍ଗରେ ନ ମିଶି, ଓଡ଼ିଆରେ କଥା ନ କହି ମଧ୍ୟ ନବୀନ ବାବୁ ଲୋକପ୍ରିୟତାର ଶୀର୍ଷରେ । ପାଞ୍ଚ ଥରର ମୁଖ୍ୟମନ୍ତ୍ରୀ । ଲକ୍ଷ ଲକ୍ଷ ଓଡ଼ିଆଙ୍କ ହୃଦୟରେ ଆଜି ବି ବିରାଜମାନ । ଏହା ହିଁ ସତ୍ୟ । ସେହିଭଳି ନୂଆ କରି ମୁଖ୍ୟମନ୍ତ୍ରୀ ହୋଇଥିବା ମୋହନ ମାଝୀ ପ୍ରୋଟୋକଲ୍ ଭୁଲି ଲୋକଙ୍କ ସାଙ୍ଗରେ ମିଶିଯିବା କି ଭାବବିହ୍ୱଳ ହୋଇ ଅନର୍ଗଳ ଭାଷଣ ଦେବା ତାଙ୍କର ବ୍ୟକ୍ତିତ୍ୱର ଅନନ୍ୟ ଦିଗ । ଏଥିରେ ନବୀନଙ୍କ ସହ ତୁଳନା କରି ତାଙ୍କୁ ଛୋଟ କରିବାକୁ ଉଦ୍ୟମ କରିବା ବରଂ ବୁମେରାଂ ହୋଇପାରେ । କାରଣ ଆଜିର ଏହି ମୋହନ ବ୍ରାଣ୍ଡ କାଲିକି ନବୀନଙ୍କ ଲୋକପ୍ରିୟତାଠାରୁ ଯେ ବଳି ନ ଯିବ ତାହାର କେହି ଗ୍ୟାରେଣ୍ଟି ଦେଇପାରିବେ ନାହିଁ ।

ମୋହନ ମାଝୀ ଜଣେ ସାଧାସିଧା ଲୋକ । ନିପଟ ଗାଁର ଅତି ସାଧାରଣ ଆଦିବାସୀ ପରିବାରରୁ ଆସି ଆଜି ଓଡ଼ିଶାର ମୁଖ୍ୟମନ୍ତ୍ରୀ । ମୁଖ୍ୟମନ୍ତ୍ରୀ ହେଲା ପରେ ତାଙ୍କ ଢ଼ଙ୍ଗଢ଼ାଙ୍ଗ ବଦଳି ନାହିଁ । ଅନେକ କ୍ଷେତ୍ରରେ ମୁଖ୍ୟମନ୍ତ୍ରୀ ଆଦବ କାଇଦା(ପ୍ରୋଟୋକଲ)୍ ବାହାରକୁ ଯାଇ ସେ ନିଜକୁ ପରଖୁଛନ୍ତି । ଭିଡ଼ ଭିତରକୁ ଯାଇ ଲୋକଙ୍କ ସହ ମିଶୁଛନ୍ତି । କାହାର କ’ଣ ସମସ୍ୟା ଅଛି ପଚାରି ବୁଝୁଛନ୍ତି । କ’ଣ କରିବେ ନ କରିବେ ସମୟ କହିବ । କିନ୍ତୁ ଲୋକଙ୍କ ସହ ଯୋଡି ହେବାର ପ୍ରବୃତ୍ତିକୁ ତାଙ୍କର ବଡ଼ପଣ ବୋଲି କୁହାଯିବ । ଗରିବ ବନ୍ଧୁ ନିରଞ୍ଜନ ଶତପଥୀଙ୍କ ଅକାଳ ବିୟୋଗ ଖବର ପାଇ ଜନ୍ମମାଟି କେନ୍ଦୁଝରକୁ ଛୁଟି ଗଲେ । ବନ୍ଧୁଙ୍କର ଶେଷ ଦର୍ଶନ କରି ଆଖିରୁ ଲୁହ ଗଡ଼େଇଲେ । ଶୋକ ସନ୍ତପ୍ତ ପରିବାର ଲୋକଙ୍କୁ ଶାନ୍ତ୍ୱନା ଦେଇ ସୁଖରେ ବଞ୍ଚାଇବାର ପ୍ରତିଶ୍ରୁତି ଦେଲେ ।

ଏଥିରେ ରାଜନୀତି ଥିବା କହିଲେ ଭୁଲ୍ ହେବ । ବରଂ ନିହାତି ଥିଲା ମାନବିକତା । ବନ୍ଧୁତ୍ୱର ନିଦର୍ଶନ । ଜଣେ ଉଚ୍ଚ ପଦବୀକୁ ଚାଲିଗଲେ ତଳେ ଥିବା ନିଜର ଲୋକଙ୍କ ପାଇଁ ଅପହଞ୍ଚ ତତ୍ତ୍ୱରେ ମୋହନଙ୍କର ଯେ ବିଶ୍ୱାସ ନାହିଁ ତାହା ଥିଲା ଏହି ଘଟଣାର ଜ୍ୱଳନ୍ତ ଉଦାହରଣ । ଏଥିରେ ତାଙ୍କ ମୁଖ୍ୟମନ୍ତ୍ରୀ ଚେହେରା ମଳିନ ହୋଇଯାଇନି, ବରଂ ଲୋକଙ୍କ ମୁଖ୍ୟମନ୍ତ୍ରୀ ଭାବେ ତାଙ୍କୁ ଜାଜୁଲ୍ୟମାନ କରିଛି ।

ମୋହନ ମାଝୀ ଏଥରକୁ ମିଶାଇ ୪ ଥର ବିଧାୟକ ହେଲେଣି । ମେଣ୍ଟ ସରକାର ଅମଳରେ ୨୦୦୫ରୁ ୨୦୦୯ ସେ ବିରୋଧୀ ଦଳର ଉପମୁଖ୍ୟ ସଚେତକ ଥିଲେ । ୨୦୧୯ରେ ବିରୋଧୀ ଦଳର ମୁଖ୍ୟ ସଚେତକ ଥିଲେ । ବିଭିନ୍ନ ପ୍ରସଙ୍ଗକୁ ବିଧାନସଭାରେ ପ୍ରଭାବୀ ଢ଼ଙ୍ଗରେ ଉପସ୍ଥାପନ କରିବାରେ ତାଙ୍କର ଦକ୍ଷତାକୁ ସମସ୍ତେ ପ୍ରଶଂସା କରିଛନ୍ତି । ବ୍ୟକ୍ତିଗତ ଜୀବନରେ ତାଙ୍କର ସରଳ ଜୀବନଶୈଳୀକୁ ମଧ୍ୟ ସମସ୍ତେ ପାଖରୁ ଦେଖିଛନ୍ତି । ମାତ୍ର ଏବେ ମୁଖ୍ୟମନ୍ତ୍ରୀ ହେବା ପରେ ତାଙ୍କର ଜ୍ଞାନ ଗାରିମା ଏବଂ ଜୀବନଚର୍ଯ୍ୟାକୁ ନେଇ ବିରୋଧୀ ଶିବିର ସମାଲୋଚନା କରୁଛନ୍ତି ।

ସୋସିଆଲ୍ ମିଡିଆରେ ଟ୍ରୋଲ୍ ବାହିନୀ ତାଙ୍କୁ ବ୍ୟକ୍ତିଗତ ଆକ୍ଷେପ କରି ଚାଲିଛନ୍ତି । ଜଣେ ମୁଖ୍ୟମନ୍ତ୍ରୀ ପକେଟରୁ ପାନିଆ ବାହାର କରି ନିଜ ଚୁଟି ସଜାଡ଼ିବା ଏକ ଅପରାଧ ନୁହେଁ । ଯଦି ଅଭ୍ୟାସ ଦୃଷ୍ଟିରୁ ମୋହନ ବାବୁ ଏହା କଲେ ତାହା ତାଙ୍କର ଷ୍ଟାଇଲ୍ ବୋଲି ଧରିବାକୁ ପଡ଼ିବ । ତାଙ୍କୁ ନାଟୁଆ କହି ମଜା ଉଡ଼ାଇବା କୌଣସି ବୁଦ୍ଧିମାନ ଲୋକର କାର୍ଯ୍ୟ ହୋଇ ନ ପାରେ ।

ବିଦେଶ ଗସ୍ତ କାଳରେ ମୋହନ ବାବୁ ଯଦି ବିଭିନ୍ନ ଜାଗାରେ ଫଟୋ ପୋଜ୍ ଦେଲେ ସେଥିରେ କିଏ ବ୍ୟତିବ୍ୟସ୍ତ ହେବା କଥା ନୁହେଁ । କାରଣ ଏହା ତାଙ୍କର ନିଜସ୍ୱ ଷ୍ଟାଇଲ୍ ହୋଇପାରେ ।

ମୋହନ ମାଝୀ କେମିତି ବସିଲେ, କେମିତି ଖାଇଲେ ତାହାକୁ ମଧ୍ୟ ସୋସିଆଲ୍ ମିଡିଆରେ ଭାଇରାଲ୍ କରାଯାଉଛି । ବିରୋଧୀ ରାଜନୈତିକ ଦଳର ଚେଲାଚାମଣ୍ଡାମାନେ ଏହାକୁ ପ୍ରସଙ୍ଗ କରି ଖୁସିରେ ଗଦ ଗଦ ହେଉଛନ୍ତି । ମାତ୍ର ଏହା ମୁଖ୍ୟମନ୍ତ୍ରୀଙ୍କର ଭାବମୂର୍ତ୍ତିରେ ଆଞ୍ଚ ଆଣୁନି, ବରଂ ଅଧିକାଂଶ ଲୋକେ ତାଙ୍କର ସରଳ ଜୀବନଶୈଳୀକୁ ପସନ୍ଦ କରୁଛନ୍ତି ।

ପୂର୍ବରୁ ତାଙ୍କର ବଡ଼ ବଡ଼ ସରକାରୀ ସଭା ସମିତିରେ ଯୋଗ ଦେବାର ଅଭିଜ୍ଞତା ନ ଥିଲା । ବିଧାୟକରୁ ସିଧାସଳଖ ମୁଖ୍ୟମନ୍ତ୍ରୀ ହେବା ପରେ ଲଗାତର ଭାବେ ବିଭିନ୍ନ ସଭାସମିତିରେ ତାଙ୍କୁ ଭାଷଣ ଦେବାକୁ ପଡୁଛି । ଲମ୍ବା ଭାଷଣରେ ତାଙ୍କର ରୁଚି ଅଛି ନା ଅଫିସରମାନେ ତାଙ୍କୁ ଖୁସି କରିବା ପାଇଁ ଲମ୍ବା ଭାଷଣ ଲେଖୁଛନ୍ତି ତାହା ସେମାନେ ଜାଣିଥିବେ । ମାତ୍ର ଲମ୍ବା ଭାଷଣ ଶୁଣିବାକୁ କାହାର ଧୈର୍ଯ୍ୟ କି ସମୟ ନାହିଁ ଏକଥା ମୁଖ୍ୟମନ୍ତ୍ରୀଙ୍କୁ ତାଙ୍କ ପରାମର୍ଶଦାତାମାନେ ବୁଝାଇ ପାରିନାହାନ୍ତି ।

ହୋଇପାରେ, ଲମ୍ବା ଲେଖାର କାଗଜ ପଢ଼ିଲା ବେଳେ ମୁଖ୍ୟମନ୍ତ୍ରୀଙ୍କର ଅସୁବିଧା ହେଉଥିବ । ଯେଉଁଥିପାଇଁ ବେଳେ ବେଳେ ପାଟିରୁ ଶବ୍ଦ ଖସି ଯାଉଥିବ । କେତେବେଳେ ଉତ୍କଳମଣି ଗୋପବନ୍ଧୁ ଦାସଙ୍କୁ ମଧୁସୂଦନ ଦାସ କହି ଦେଇଛନ୍ତି । ନଭେମ୍ବର ୨୬ ତାରିଖ ସମ୍ବିଧାନ ଦିବସକୁ ସ୍ୱାଧୀନତା ଦିବସ କହି ଦେଇଛନ୍ତି । ସୋସିଆଲ୍ ମିଡିଆରେ ତାଙ୍କୁ ସେଥିପାଇଁ ଭୀଷଣ ଟ୍ରୋଲ୍ ହେବାକୁ ପଡୁଛି ।

ମାତ୍ର ଏଥିରେ ମୁଖ୍ୟମନ୍ତ୍ରୀଙ୍କର କ’ଣ କ୍ଷତି ହେଉ ନ ହେଉ, ବିରୋଧୀ ଦଳ ବିଶେଷ କରି ବିଜେଡି ପାଇଁ ଏହା ବୁମେରାଂ ହୋଇପାରେ । କାରଣ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ କ୍ଷେତ୍ରରେ ଏହାର ଲମ୍ବା ଉଦାହରଣ ରହିଛି । ଏହା ଅତୀତ ଭାବି ଭୁଲିଗଲେ, ଲୋକେ ସେମାନଙ୍କୁ ପୂରାପୂରି ଭୁଲିଯିବେ ।