ଭଲ ଇଣ୍ଟରଭ୍ୟୁ, ବଢ଼ିଆ ସ୍କ୍ରିପ୍ଟିଂ!

ଭୁୁବନେଶ୍ୱର: ମୋହନ ସରକାରଙ୍କ ବର୍ଷେ ପୂର୍ତ୍ତି ଅବସରରେ ସାରା ଓଡ଼ିଶା ଏବେ ମୋହନମୟ । ମୋହନ ମାଝୀଙ୍କ ଫଟୋ ଏବଂ ସରକାରଙ୍କ ଗୁଣଗାନରେ ମାଳ ମାଳ ବ୍ୟାନର୍, ହୋଡିଂ । ଟିଭି, ଖବରକାଗଜକୁ ଫୁରସତ୍ ନାହିଁ । ଟିଭିରେ ବିଜ୍ଞାପନର ବର୍ଷା । ମୁଖ୍ୟମନ୍ତ୍ରୀଙ୍କ ଖଣ୍ଡ ଖଣ୍ଡ ସାକ୍ଷାତକାର । ଖବରକାଗଜରେ ପୃଷ୍ଠା ପୃଷ୍ଠା ବିଜ୍ଞାପନ । ମୁଖ୍ୟମନ୍ତ୍ରୀଙ୍କ ଫୁଲ୍ ପେଜ୍ ଇଣ୍ଟରଭ୍ୟୁ । ଭୋଜିଭାତରେ କମ୍ପିଲାଣି ରାଜଧାନୀ ଭୁବନେଶ୍ୱର । ପ୍ରମୁଖ ଗଣମାଧ୍ୟମଗୁଡ଼ିକର କଚେ ପୁଅ ବାର୍ । ମୁଖ୍ୟମନ୍ତ୍ରୀଙ୍କ ସହ ଲଞ୍ଚ, ଡିନର୍ ପାର୍ଟି । ଫଟୋ ସେସନ୍ । ଲକ୍ଷ ଲକ୍ଷ ଟଙ୍କାର ବିଜ୍ଞାପନ । ନବୀନ-ପାଣ୍ଡିଆନ୍ ଯୋଡି ୫/୭ ବର୍ଷ ଧରି ଯେମିତି ଦେଇ ଚାଲିଥିଲେ, ମୋହନ ବର୍ଷକରେ ଅଜାଡ଼ି ଦେଲେଣି । ଧନ, ଜନ, ମାନ କେଉଁଥିରେ ଉଣା କରିନାହାନ୍ତି । ସୁତରାଂ କାହା ଜିଭରେ ହାଡ଼ ନାହିଁ ପ୍ରଶ୍ନ କରିବାକୁ । ନରେନ୍ଦ୍ର ମୋଦୀଙ୍କ ପ୍ରବର୍ତ୍ତିତ, ନବୀନ-ପାଣ୍ଡିଆନଙ୍କ ଆଦୃତ ପ୍ରଚାର ମଡେଲକୁ ମୋହନ ମାଝୀ ନିଷ୍ଠାପର ଭାବେ ଆଗକୁ ବଢ଼ାଇଛନ୍ତି ।

ବର୍ଷ ପୂରାଣି ଅବସରରେ ଗତକାଲି ମୁଖ୍ୟମନ୍ତ୍ରୀ ମୋହନ ମାଝୀ ସ୍ଥାନୀୟ ଗୀତଗୋବିନ୍ଦ ସଦନରେ ଏକ ସାମ୍ବାଦିକ ସମ୍ମିଳନୀ କରିଥିଲେ । ଉଦ୍ଦେଶ୍ୟ ଥିଲା ସରକାରଙ୍କ ସଫଳତା ଲୋକଙ୍କୁ ଜଣାଇବା । ଏହାର ଆୟୋଜକ ଥିଲେ ସୂଚନା ଓ ଲୋକ ସମ୍ପର୍କ ବିଭାଗ । ବିଭାଗ ପକ୍ଷରୁ ସାମ୍ବାଦିକଙ୍କ ତାଲିକା ପ୍ରସ୍ତୁତ କରାଯାଇଥିଲା । ମୁଖ୍ୟମନ୍ତ୍ରୀଙ୍କ ଆଗ୍ରହକ୍ରମେ ଆଉ କିଛି ସାମ୍ବାଦିକଙ୍କ ନାଁ ଯୋଡା ଯାଇଥିଲା । ଏହିଭଳି ଭାବେ ପ୍ରାୟ ୧୦୦ ସାମ୍ବାଦିକଙ୍କୁ ନିମନ୍ତ୍ରଣ କରାଯାଇଥିଲା । ଢ଼େର୍ ବିଳମ୍ବରେ କାର୍ଯ୍ୟକ୍ରମ ଆରମ୍ଭ ହେଲା । ମୁଖ୍ୟମନ୍ତ୍ରୀ ଶ୍ରୀ ମାଝୀଙ୍କ ସହ ଦେଖିବାକୁ ମିଳିଲା ମନମୋହନ ସାମଲଙ୍କୁ । ଆରମ୍ଭ ହେଲା ସାମ୍ବାଦିକ ସମ୍ମିଳନୀ । ମୁଖ୍ୟମନ୍ତ୍ରୀ କାଗଜ ପଢ଼ି ଚାଲିଲେ । ମନମୋହନ ଚୁପଚାପ୍ ବସିଲେ ।

କାଗଜ ପଢ଼ି ସାରିଲା ପରେ ମୁଖ୍ୟମନ୍ତ୍ରୀ ସାମ୍ବାଦିକମାନଙ୍କଠାରୁ ଗଣି ଗଣି ୬ଟି ପ୍ରଶ୍ନ ନେଲେ । ଅଡୁଆ ପ୍ରଶ୍ନକୁ ଭିନ୍ନ ଉତ୍ତରରେ ଟାଳି ଦେଲେ । ଏମିତି ସରିଗଲା ସାମ୍ବାଦିକ ସମ୍ମିଳନୀ । ସେଠୁ ସାମ୍ବାଦିକମାନେ ଭୋଜି ଖାଇ ଫେରିଲେ ।

ସଂଧ୍ୟାରେ ରାଜ୍ୟ ଅତିଥି ଭବନଠାରେ ପ୍ରମୁଖ ଗଣମାଧ୍ୟମର ସମ୍ପାଦକ ଏବଂ ତଥାକଥିତ ବିଶିଷ୍ଟ ସାମ୍ବାଦିକମାନଙ୍କୁ ମୁଖ୍ୟମନ୍ତ୍ରୀ ଭେଟିଥିଲେ । ସେଠାରେ ଡିନର୍ ଭୋଜିର ବ୍ୟବସ୍ଥା ହୋଇଥିଲା ।

ସପ୍ତାହେ ହେଲା ମୁଖ୍ୟମନ୍ତ୍ରୀ ବିଭିନ୍ନ ଜାତୀୟ ଖବରକାଗଜକୁ ଇଣ୍ଟରଭ୍ୟୁ ଦେଉଛନ୍ତି । ବିଭିନ୍ନ ବିଭାଗ ପକ୍ଷରୁ ସରକାରଙ୍କ ସଫଳତାର ଆଲେଖ୍ୟ ପ୍ରସ୍ତୁତ କରାଯାଇ ସେମାନଙ୍କୁ ଦିଆଯାଇଛି । ଶେଷକୁ ଥିଲେ ଓଡ଼ିଆ ମିଡିଆ । ଗତକାଲି ମୁଖ୍ୟମନ୍ତ୍ରୀଙ୍କ ବ୍ୟସ୍ତ କାର୍ଯ୍ୟକ୍ରମ ଭିତରେ ପ୍ରମୁଖ ଓଡ଼ିଆ ଗଣମାଧ୍ୟମ ପ୍ରତିନିଧିଙ୍କୁ ଜଣ ଜଣ କରି ସାକ୍ଷାତକାର କାର୍ଯ୍ୟକ୍ରମ ରଖାଯାଇଥିଲା । ଏମିତି ନୁହେଁ ଯେ ଯିଏ ପାରିଲେ ସାକ୍ଷାତକାର ନେଲେ ଏବଂ ଯାହା ମନକୁ ଆସିଲା ପ୍ରଶ୍ନ ପଚାରିଲେ । କ’ଣ ପଚାରିବେ, ତାହା ମୁଖ୍ୟମନ୍ତ୍ରୀଙ୍କ ପଟରୁ ସ୍ଥିରୀକୃତ ଥିଲା । ଉତ୍ତର ବି ପ୍ରସ୍ତୁତ ହୋଇ ରହିଥିଲା । ଅର୍ଥାତ୍ ବରାଦିଆ ପ୍ରଶ୍ନକୁ ବରାଦିଆ ଉତ୍ତର । ଠିକ୍ ଯେମିତି ନିର୍ବାଚନ ବେଳେ ପାଣ୍ଡିଆନଙ୍କ ସାକ୍ଷାତକାର ସାମ୍ବାଦିକମାନେ ନେଇଥିଲେ ।

ଯେମିତିକି, ମୁଖ୍ୟମନ୍ତ୍ରୀଙ୍କୁ ସାମ୍ବାଦିକଙ୍କ ପ୍ରଶ୍ନ- ଆପଣଙ୍କୁ ଲୋକଙ୍କ ମୁଖ୍ୟମନ୍ତ୍ରୀ କାହିଁକି କୁହାଯାଏ?

ମୁଖ୍ୟମନ୍ତ୍ରୀଙ୍କ ଉତ୍ତର- ମୋ ବିଷୟରେ ସୋସିଆଲ୍ ମିଡିଆରେ କ’ଣ ଟ୍ରେଣ୍ଡ ହେଉଛି ମୁଁ ଜାଣିନି । ମୋର ସେଥିପାଇଁ ସମୟ ନାହିଁ । ମୋର ଏକମାତ୍ର ଲକ୍ଷ୍ୟ ଲୋକଙ୍କ ନିକଟତର ହୋଇ ସେମାନଙ୍କ ସେବା କରିବା । ବୋଧହୁଏ ଲୋକମାନେ ସେଥିପାଇଁ ତାଙ୍କ ଆଡୁ ‘ଲୋକଙ୍କ ମୁଖ୍ୟମନ୍ତ୍ରୀ’ ଆଖ୍ୟା ଦେଇଛନ୍ତି ।

ମୁଖ୍ୟମନ୍ତ୍ରୀଙ୍କୁ ସାମ୍ବାଦିକଙ୍କର ଆଉ ଏକ ପ୍ରଶ୍ନ- କଥା ଦେଇ କଥା ରଖିଲେ ମୋହନ । ନିର୍ବାଚନ ପ୍ରତିଶ୍ରୁତି ପୂରଣ ବେଳେ ଏହି ଘୋଷା ବାକ୍ୟ ବ୍ୟବହାର ହେଉଛି । କାହିଁକି?

ମୁଖ୍ୟମନ୍ତ୍ରୀଙ୍କ ଉତ୍ତର- ଲୋକେ ଏହା କହିବା ସ୍ୱାଭାବିକ । କାରଣ ଆମେ ନିର୍ବାଚନ ବେଳେ ଯାହା ପ୍ରତିଶ୍ରୁତି ଦେଇଥିଲୁ, ସବୁ ପୂରଣ କରାଯାଉଛି ।

ସାମ୍ବାଦିକଙ୍କର ଅନ୍ୟ ଏକ ପ୍ରଶ୍ନ- ନବୀନଙ୍କ ‘ମୋ ସରକାର’ ଓ ମୋହନଙ୍କ ‘ଆମ ସରକାର’ ଭିତରେ ଦୂରତା କେତେ?

ମୁଖ୍ୟମନ୍ତ୍ରୀଙ୍କ ଉତ୍ତର- ଆକାଶ ପାତାଳ ତଫାତ୍ । ‘ମୋ ସରକାର’ ଥିଲା ଇଭେଣ୍ଟ ମ୍ୟାନେଜମେଣ୍ଟ ଓ ପ୍ରଚାର ତନ୍ତ୍ରର ସରକାର ଏବଂ ମୋର ‘ଆମ ସରକାର’ ହେଉଛି ପ୍ରକୃତରେ ଲୋକଙ୍କ ସରକାର ।

ଅବଶ୍ୟ ମୁଖ୍ୟମନ୍ତ୍ରୀଙ୍କୁ ସାମ୍ବାଦିକ ପଚାରି ନାହାନ୍ତି ଯେ

-ଗତବର୍ଷ ରଥଯାତ୍ରା ପହଣ୍ଡି ବେଳେ ବଡ଼ଠାକୁର ଶ୍ରୀ ବଳଭଦ୍ରଙ୍କୁ ଚାରମାଳ ଉପରେ ହାମୁଡ଼େଇ ପକାଇଥିବା ଦୋଷୀମାନଙ୍କ ବିରୋଧରେ ସରକାର କେବେ କାର୍ଯ୍ୟାନୁଷ୍ଠାନ ଗ୍ରହଣ କରିବେ?

-ଓଡ଼ିଆ ଅଧିକାରୀ ବୈକୁଣ୍ଠ ପ୍ରଧାନଙ୍କୁ ରାଜ୍ୟପାଳଙ୍କ ପୁଅ ନିର୍ଘାତ ପିଟିଲା, ଜୋତାରେ ଛେପ ପକାଇ ଚଟାଇଲା । ଅଥଚ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେଲା ନାହିଁ । ଏ କେମିତିକା ଓଡ଼ିଆ ଅସ୍ମିତା?

-ପାଣ୍ଡିଆନ୍, କୁଟ୍ଟେ, ଆଶିଷ ସିଂ, ରବିକାନ୍ତ, ଭିନୀଲ୍ କ୍ରୀଷ୍ଣା, ଆଶିଷ ଠାକରେଙ୍କ ଅଣ୍ଟା ଭାଙ୍ଗିବ କେବେ? ଏମାନଙ୍କୁ କ୍ଲିନଚିଟ୍ ଦେଇ ଦିଲ୍ଲୀ ଡେପୁଟେସନ୍ ପଠାଯିବା କେଉଁ ପ୍ରକାରର ଦଣ୍ଡ?

-ଆୟୁଷ୍ମାନ ଭାରତ ଯୋଜନାରେ ଲୋକ କାନ୍ଦୁଛନ୍ତି । ସରକାର ଏ ସମ୍ପର୍କରେ ଅବଗତ ଅଛନ୍ତି ତ?

କାରଣ, ଏହି ସବୁ ପ୍ରଶ୍ନ ପଚାରିବାକୁ ସାମ୍ବାଦିକଙ୍କ ଜିଭରେ ହାଡ଼ ନାହିଁ ।

ବର୍ଷ ପୂର୍ତ୍ତି ପାଳନ ଅବସରରେ ନିଜକୁ ସରଳ, କର୍ମଠ ମୁଖ୍ୟମନ୍ତ୍ରୀ ଭାବେ ଦାବି କରୁଥିବା ମୋହନ ମାଝୀ ପାଣ୍ଡିଆନ୍ ସିଣ୍ଡୋମ୍ରରୁ ଖସିପାରିନାହାନ୍ତି ବୋଲି ବୁଦ୍ଧିଜୀବୀ ମହଲରେ ଆଲୋଚନା ହେଉଛି । ପାଣ୍ଡିଆନ ଯେଉଁ ଧାରା ଧରିଥିଲେ, ମୋହନ ତାହାକୁ ଆହୁରି କ୍ଷିପ୍ର ଗତିରେ ଆଗକୁ ନେଉଛନ୍ତି ବୋଲି ସେମାନଙ୍କର ଅନୁଭବ । ନିଜକୁ ପ୍ରଚାର କରାଇବାରେ ତତ୍କାଳୀନ ପାଣ୍ଡିଆନଙ୍କଠାରୁ ମୋହନ ଦୁଇପାଦ ଆଗରେ ବୋଲି ସେମାନେ କହିଛନ୍ତି ।

ସୂଚନାଥାଉକି, ବର୍ଷେ ତଳେ ମୋହନ ମାଝୀ ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ନେବା ପରେ ପରେ ଲୋକଙ୍କ ମୁଖ୍ୟମନ୍ତ୍ରୀ/ଲୋକଙ୍କ ସରକାର ଭାବେ ଉପସ୍ଥାପିତ କରାଯାଇ ଏକ ନ୍ୟାରେଟିଭ୍ ବନାଯାଇଛି । ରାଜ୍ୟ ଅତିଥି ଭବନରେ ତାଙ୍କର ପ୍ରଥମ ଅଭିଯୋଗ ଶୁଣାଣି ପରେ ମୁଖ୍ୟମନ୍ତ୍ରୀଙ୍କ ଅଫିସ୍ ରୁ ଜାରି ପ୍ରେସ୍ ରିଲିଜ୍ ରେ ହିଁ ଏହି ନ୍ୟାରେଟିଭ୍ (ଲୋକଙ୍କ ମୁଖ୍ୟମନ୍ତ୍ରୀ/ଲୋକଙ୍କ ସରକାର) ଛଡ଼ାଯାଇଥିଲା । ଲୋକେ ତାଙ୍କ ଆଡୁ ଏହା କହିନାହାନ୍ତି ।

ମୋହନ ସରକାରଙ୍କ କାର୍ଯ୍ୟଶୈଳୀକୁ ନାପସନ୍ଦ କରିଛନ୍ତି ବହୁ ବରିଷ୍ଠ ସାମ୍ବାଦିକ ଏବଂ ବୁଦ୍ଧିଜୀବୀ । ସେମାନଙ୍କ ମତରେ, ନୂଆ ସରକାରରେ କୋଉଠି କିଛି କାମ ହଉଥିବା ଅନୁଭବ କରିହେଉନି । ସତେ ଯେମିତି ବ୍ୟବସ୍ଥା ଠପ୍ ହୋଇଯାଇଛି । ହେଲେ ପ୍ରଚାରରେ ଏମାନେ କିନ୍ତୁ ପୂର୍ବ ସରକାରଠୁ ବଳି ଯାଇଛନ୍ତି । ୨୦୧୪ ମସିହାରେ ନରେନ୍ଦ୍ର ମୋଦୀଙ୍କ ଅମଳରୁ ବ୍ୟାପକ ପ୍ରଚାରର ଯୁଗ ଆରମ୍ଭ ହୋଇଥିଲା । ୨୦୧୭ ଆଡକୁ ନବୀନ ସରକାର ଏହି ମଡେଲ ଆପଣେଇଥିଲେ । ଏବେ ମୋହନ ମାଝୀ ତାକୁ କ୍ଷିପ୍ର ଗତିରେ ଆଗକୁ ନେଇ ଚାଲିଛନ୍ତି । ଅତଏବ, ବର୍ଷକର ମୋହନ ସରକାର ଏକ ଇଭେଣ୍ଟ ମ୍ୟାନେଜମେଣ୍ଟ ଓ ପ୍ରଚାରତନ୍ତ୍ରର ସରକାର ବୋଲି ସେମାନଙ୍କର ମତ ।

ସୋସିଆଲ୍ ମିଡିଆରେ ଲୋକେ କ’ଣ ଆଲୋଚନା କରୁଛନ୍ତି ତାହା ଜାଣିବାକୁ ତାଙ୍କ ପାଖରେ ସମୟ ନାହିଁ ବୋଲି ମୁଖ୍ୟମନ୍ତ୍ରୀ କହିଛନ୍ତି । ମାତ୍ର ମୁଖ୍ୟମନ୍ତ୍ରୀ ଏଥିପାଇଁ ସମୟ ବାହାର କରନ୍ତୁ ଏବଂ ସୋସିଆଲ୍ ମିଡିଆରେ ସରକାରଙ୍କ ବିଷୟରେ ଟୀକା ଟିପ୍ପଣୀ ପଢ଼ନ୍ତୁ ବୋଲି ଏହି ବରିଷ୍ଠ ସାମ୍ବାଦିକମାନେ ପରାମର୍ଶ ଦେଇଛନ୍ତି ।