କିଏ ସେହି ପ୍ରଭାବଶାଳୀ ବ୍ୟକ୍ତି?

ଭୁବନେଶ୍ୱର: ରାଜଧାନୀରେ ମାତିଛନ୍ତି ଜମି ଲୁଟେରା । କିଛି ମାଫିଆ ନିରୀହ ଲୋକଙ୍କୁ ଡରାଇ ଧମକାଇ ସେମାନଙ୍କ ଜମି ହାତଉଥିବା ବେଳେ ଆଉ କିଛି ସରକାରୀ ଜମିକୁ ସିଧାସଳଖ ଲୁଟି ନେଉଛନ୍ତି । ସରକାରୀ ବାବୁଙ୍କୁ ହାତ କରି ସରକାରୀ ଜମିକୁ ଲୁଟିବାରେ ଏମାନେ କୁଆଡ଼େ ସିଦ୍ଧହସ୍ତ । ବର୍ଷ ବର୍ଷ ଧରି ସମସ୍ତଙ୍କ ଦୃଷ୍ଟି ଆଢ଼ୁଆଳରେ ଏଭଳି କାରନାମା ଚାଲୁଥିବା ବେଳେ ଏକ ସାଂଘାତିକ ମାମଲା ଲୋକଲୋଚନକୁ ଆସିଛି । ୫ ଏକର ଜଙ୍ଗଲ କିସମର ଏକ ସରକାରୀ ଜମିକୁ ସ୍ଥିତିବାନ କରାଇ ତାହା ଉପରେ ନିର୍ମାଣ ଚାଲିଛି ବିଶାଳ ଆପାର୍ଟମେଣ୍ଟ । ଅତ୍ୟନ୍ତ ପ୍ରଭାବଶାଳୀ ଜଣେ ବ୍ୟକ୍ତିଙ୍କ ମାଲିକାନାରେ ଏହି ଆପାର୍ଟମେଣ୍ଟ ତିଆରି ଚାଲିଛି । ରାଜ୍ୟ ସରକାରଙ୍କ ସାଧାରଣ ପ୍ରଶାସନ ବିଭାଗର ସରଜମିନ ତଦନ୍ତରୁ ଏହି ବେଆଇନ କାରସାଦିର ପର୍ଦ୍ଦାଫାସ ହୋଇଛି ।

ଗତ ୨୧ ତାରିଖରେ ରାଜ୍ୟ ସରକାରଙ୍କ ସାଧାରଣ ପ୍ରଶାସନ ବିଭାଗରୁ ଖୋର୍ଦ୍ଧା ଜିଲ୍ଲାପାଳ, ଭୁବନେଶ୍ୱର ଉପଜିଲ୍ଲାପାଳ ଏବଂ ଭୁବନେଶ୍ୱର ତହସିଲଦାରଙ୍କୁ ଏକ ଚିଠି ଆସିଛି । ପଟିଆରେ ଶିଳ୍ପ ପ୍ରତିଷ୍ଠା ପାଇଁ ଲିଜ୍ ସୂତ୍ରରେ ଦିଆଯାଇଥିବା ୫ ଏକରର ସରକାରୀ ଜାଗାକୁ ସ୍ଥିତିବାନ୍ କରାଯାଇ ସେଠାରେ ବହୁତଳ ପ୍ରସାଦ ନିର୍ମାଣ କରାଯାଉଥିବାରୁ ସାଧାରଣ ପ୍ରଶାସନ ବିଭାଗ ଆକ୍ସନ୍ ମୁଡ୍ କୁ ଆସିଛି । ଏହି ଜାଗାର ଆରଓଆର ସଂଶୋଧନ କରି ସ୍ଥିତିବାନ ଷ୍ଟାଟସ୍ ହଟାଇବା ପାଇଁ ତହସିଲଦାରଙ୍କୁ ନିର୍ଦ୍ଦେଶ ଦିଆଯାଇଥିବା ବେଳେ ଜିଲ୍ଲାପାଳ ଏ ଦିଗରେ ତ୍ୱରିତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କୁହାଯାଇଛି ।

ସାଧାରଣ ପ୍ରଶାସନ ବିଭାଗର ଚିଠିରେ ହିଁ ଏହି ସରକାରୀ ଜାଗାର ଅତୀତ ଓ ଭବିଷ୍ୟତ କାହାଣୀ ରହିଛି । ଅତି ଯୋଜନାବଦ୍ଧ ଭାବେ ସମ୍ପୂର୍ଣ୍ଣ ବେଆଇନ କାର୍ଯ୍ୟ କରାଯାଇଛି । ସରକାରଙ୍କ ଶୁଭଦୃଷ୍ଟିରେ ରହିଲେ ଅସମ୍ଭବ କାର୍ଯ୍ୟ କିଭଳି ସମ୍ଭବ ହୋଇପାରେ ଏହା ତାହାର ଗୋଟିଏ ନଗ୍ନ ଉଦାହରଣ ବୋଲି କୁହାଯାଉଛି ।

ମୌଜା- ପଟିଆ । ଖାତା ନମ୍ବର-୪୯୩ । ପ୍ଲଟ୍ ନଂ-୩୦୯ । ଏରିଆ-୫ ଏକର । ୪୫ ବର୍ଷ ତଳେ ଏହି ଜାଗାକୁ ରାଜ୍ୟ ସରକାର ଶିଳ୍ପ ପ୍ରତିଷ୍ଠା ଉଦ୍ଦେଶ୍ୟରେ ପଲଟ୍ରୋନିକ୍ ଆଲାଏଡ ଇଣ୍ଡଷ୍ଟ୍ରିଜ୍ ତେଜପାଲ୍ ସିଂଙ୍କୁ ୯୯ ବର୍ଷିଆ ଲିଜ୍ ସୂତ୍ରରେ ଦେଇଥିଲେ । ଆରଏଲଡି ନଂ ୯୨୯୫, ତାରିଖ ୧୭.୧୨.୧୯୭୯ରେ ଭୁବନେଶ୍ୱର ତହସିଲଦାରଙ୍କ ଦ୍ୱାରା ଏହି ଲିଜ୍ ଡିଡ୍ ରେଜିଷ୍ଟ୍ରି ହୋଇଥିଲା ।

ମାତ୍ର ପରବର୍ତ୍ତୀ ସମୟରେ ଏହି ଜାଗାର ଠିକଣା ବଦଳିଗଲା । ତେଜପାଲ୍ ସିଂ, ପ୍ରୋପ୍ରାଇଟର ପଲଟ୍ରୋନିକ୍ ଆଲାଏଡ ଇଣ୍ଡଷ୍ଟ୍ରିଜ୍ ନାଁରେ ୪୭୪/୫ ଖାତା ନମ୍ବର ପ୍ରସ୍ତୁତ କରାଯାଇ ସଂପୃକ୍ତ ଜାଗାର ଷ୍ଟାଟସ୍ ସ୍ଥିତିବାନ କରିଦିଆଗଲା । ତତ୍କାଳୀନ ଭୁବନେଶ୍ୱର ତହସିଲଦାର ହାତକାଟି ସରକାରୀ ଜାଗାକୁ ସ୍ଥିତିବାନ ରେ ବଦଳେଇଦେଲେ ।

ଖାଲି ସେତିକି ନୁହେଁ, ପରବର୍ତ୍ତୀ ସମୟରେ ଜଙ୍ଗଲ କିସମ ଏହି ଜାଗାକୁ “ଘରବାରି’ ବର୍ଗୀକରଣ କରି ଦିଆଗଲା । ଓଏଲଆର ଆକ୍ଟର, ୧୯୬୦ର ଧାରା ୮-ଏରେ ଏହାର ସରକାରୀ ଆଦେଶ ପ୍ରକାଶ ପାଇଲା । ଯାହାର କେସ୍ ନଂ ଥିଲା ୭୧୧୪/୨୦୨୨ ।

ଅର୍ଥାତ୍ ୨୦୨୨ ମସିହା ବେଳକୁ ୫ ଏକର ଜଙ୍ଗଲ କିସମର ମୂଳ ସରକାରୀ ଜାଗାଟି ସ୍ଥିତିବାନ ପାଲଟି ଘରବାରି କିସମକୁ ବଦଳିଗଲା । ତେବେ କଥା ସେତିକିରେ ଅଟକି ନାହିଁ । ପଲଟ୍ରୋନିକ୍ ଆଲାଏଡ ଇଣ୍ଡଷ୍ଟ୍ରିଜ୍ ପ୍ରୋପାଇଟର୍ ତେଜପାଲ୍ ସିଂଙ୍କ ନାଁରେ ଥିବା ଏହି ଜାଗା ପାୱାର ଅଫ୍ ଆଟର୍ଣ୍ଣିଂ ବଳରେ ଜନୈକ ପ୍ରଭାବଶାଳୀ ବ୍ୟକ୍ତିଙ୍କ ଅକ୍ତିଆରକୁ ଚାଲିଆସିଛି । ସଂପୃକ୍ତ ପ୍ରଭାବଶାଳୀ ବ୍ୟକ୍ତିଙ୍କ ମାଲିକାନାରେ ଏବେ ସେଠାରେ ନିର୍ମାଣ ଚାଲିଛି ବିଶାଳ ଆପାର୍ଟମେଣ୍ଟ । ସାଧାରଣ ପ୍ରଶାସନ ବିଭାଗ ଅଧିକାରୀମାନେ ଫିଲ୍ଡ ଭେରିଫିକେସନ୍ ବେଳେ ଏହି ନିର୍ମାଣ ଦେଖି ତାଜୁବ ହୋଇଯାଇଛନ୍ତି ।

ଆହୁରି ଗୁରୁତର କଥା ହେଉଛି, ଚିହ୍ନିତ ୫ ଏକର ଜାଗାକୁ ଲାଗି ଆଉ ୨ ଏକର ସରକାରୀ ଜାଗା ମାଡ଼ି ଆପାର୍ଟମେଣ୍ଟ ନିର୍ମାଣ ହେଉଥିବା ଜଣେ ବିଭାଗୀୟ ଅଧିକାରୀଙ୍କ ସୂତ୍ରରୁ ଜଣାପଡ଼ିଛି ।

ଏଭଳି ଭାବେ ସାଂଘାତିକ ବେଆଇନ କାରସାଦି ବଳରେ ସରକାରୀ ଜାଗାକୁ ହାତେଇବାଠାରୁ ଆରମ୍ଭ କରି ସେଠାରେ ବ୍ୟବସାୟିକ ନିର୍ଦ୍ଦେଶରେ ଆପାର୍ଟମେଣ୍ଟ ନିର୍ମାଣ କରିବା ପର୍ଯ୍ୟନ୍ତ ସବୁଥିରେ ଅନାୟାସରେ ସଫଳ ହୋଇଛନ୍ତି ସଂପୃକ୍ତ ପ୍ରଭାବଶାଳୀ ବ୍ୟକ୍ତି । ଶିଳ୍ପ ପ୍ରତିଷ୍ଠା ଉଦ୍ଦେଶ୍ୟରେ ଦିଆଯାଇଥିବା ଏକ ଲିଜହୋଲ୍ଡ ଜାଗା ଉପରେ ରେସିଡେନସିଆଲ୍ କମ୍ପ୍ଲେକ୍ସ ନିର୍ମାଣ ପାଇଁ ବି ଶେଷରେ ବିଏମସି/ବିଡିଏ ବି ଅନୁମତି ଦେଇଛନ୍ତି ।

ସାଧାରଣ ପ୍ରଶାସନ ବିଭାଗର ଅଣ୍ଡର ସେକ୍ରେଟାରୀ ଗତ ୨୧ ତାରିଖରେ ଖୋର୍ଦ୍ଧା ଜିଲ୍ଲାପାଳ, ଭୁବନେଶ୍ୱର ଉପଜିଲ୍ଲାପାଳ ଏବଂ ଭୁବନେଶ୍ୱର ତହସିଲଦାରଙ୍କୁ ୨୭୯୧୨ ନଂ ଚିଠିରେ ଏହି ମାମଲାର ଅବତାରଣା କରି ଆବଶ୍ୟକୀୟ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦେଇଛନ୍ତି । ବିଏମସି/ବିଡିଏ ମଧ୍ୟ ସେଠାରେ ବିଲଡିଂ ପ୍ଲାନ୍ ଅନୁମୋଦନକୁ ବାତିଲ କରି ନିର୍ମାଣ କାର୍ଯ୍ୟ ବନ୍ଦ କରିବାକୁ ପଦକ୍ଷେପ ନେବେ । ଏହାକୁ ଅତ୍ୟନ୍ତ ଜରୁରୀ ବୋଲି ବିଚାର କରିବାକୁ ଜିଲ୍ଲାପାଳ, ଉପଜିଲ୍ଲାପାଳ, ତସହସିଲଦାର, ବିଏମସି ଏବଂ ବିଡିଏକୁ କୁହାଯାଇଛି ।

ଏବେ ଦେଖିବାର କଥା, ପ୍ରକୃତରେ ଏହି ବେଆଇନ କାରସାଦି ଉପରେ ସତରେ କାର୍ଯ୍ୟାନୁଷ୍ଠାନ ହେଉଛି ନା ନାହିଁ । ଜାଗାର ଆରଓଆର ସଂଶୋଧନ କରି ସ୍ଥିତିବାନ ଷ୍ଟାଟସ୍ ହଟାଇବା ଏବଂ ନିର୍ମାଣାଧୀନ ଆପାର୍ଟମେଣ୍ଟକୁ ଭାଙ୍ଗି ସରକାର ତାଙ୍କ ଜାଗାକୁ ଫେରିପାଇବା ସତରେ କ’ଣ ସମ୍ଭବପର?