ଭୁୁବନେଶ୍ୱର: ରାଜ୍ୟସଭାରେ ବିଜେଡି ସଂସଦୀୟ ଦଳର ନେତା ପଦରୁ ଗତକାଲି ଇସ୍ତଫା ଦେଇଥିଲେ ଡ. ସସ୍ମିତ୍ ପାତ୍ର । ଦଳ ସଭାପତି ନବୀନ ପଟ୍ଟନାୟକଙ୍କ ପାଖକୁ ସେ ତାଙ୍କର ଇସ୍ତଫାପତ୍ର ପଠାଇଥିବା ଖବର ଆସିଥିଲା । ମାତ୍ର ତାଙ୍କର ଇସ୍ତଫାପତ୍ର କେଉଁଠୁ ମିଳି ନ ଥିଲା କି ସସ୍ମିତଙ୍କ ସହ ଯୋଗାଯୋଗ ହୋଇପାରି ନ ଥିଲା । ସାମ୍ବାଦିକମାନେ ସସ୍ମିତଙ୍କୁ ଫୋନ୍ କଲାବେଳେକୁ କେତେବେଳେ ତାଙ୍କ ମୋବାଇଲ୍ ସୁଇଚ୍ ଅଫ୍ କହୁଥିଲା ତ ଆଉ କେବେ ଆଉଟ୍ ଅଫ୍ ରେଞ୍ଜ୍ ଆସୁଥିଲା । ବେଳେ ବେଳେ ରିଙ୍ଗ ହେଉଥିଲେ ମଧ୍ୟ କେହି ଉଠାଉ ନ ଥିଲେ । ନିଜେ ସସ୍ମିତ୍ ତାଙ୍କର ଇସ୍ତଫା ସଂକ୍ରାନ୍ତରେ ନିର୍ଦ୍ଦିଷ୍ଟ ସାମ୍ବାଦିକଙ୍କୁ ଜଣାଇ ଅନ୍ତର୍ଦ୍ଧାନ ହୋଇଯାଇଥିବା ଜଣାପଡ଼ିଲା । ତେବେ ତାଙ୍କର ଇସ୍ତଫାର ରହସ୍ୟ ଓ ଇସ୍ତଫାପତ୍ରର ଠିକଣା ଖୋଜା ଯାଉଥିବା ବେଳେ ଆଜି ନବୀନ ନିବାସରୁ ଏଥିରେ ମୋହର ବାଜିଛି । ବିଜେଡି ରାଜ୍ୟସଭା ସଂସଦୀୟ ଦଳ ନେତା ପଦରୁ ଡ. ସସ୍ମିତ୍ ପାତ୍ରଙ୍କ ଇସ୍ତଫାକୁ ସଭାପତି ନବୀନ ପଟ୍ଟନାୟକ ଗ୍ରହଣ କରିଥିବା କୁହାଯାଇଛି ।
ସସ୍ମିତଙ୍କ କାର୍ଯ୍ୟକଳାପରେ ଅସନ୍ତୋଷ ପ୍ରକାଶ ସହ ତାଙ୍କୁ ସଂସଦୀୟ ଦଳ ନେତା ପଦରୁ ହଟାଇବା ପାଇଁ ଦଳର ୪ ଜଣ ସାଂସଦ ଦେବାଶିଷ ସାମନ୍ତରାୟ, ମାନସ ମଙ୍ଗରାଜ, ସୁଲତା ଦେଓ ଏବଂ ଶୁଭାଷିଶ ଖୁଣ୍ଟିଆ ଗତ ସୋମବାର ଦିନ ସଭାପତିଙ୍କୁ ଚିଠି ଲେଖିଥିଲେ । ବିଜୁ ବାବୁଙ୍କୁ ଅପମାନିତ କରି ନିଶିକାନ୍ତ ଦୁବେ ଦେଇଥିବା ମନ୍ତବ୍ୟକୁ ରାଜ୍ୟସଭାରେ ଯେଉଁ ଢ଼ଙ୍ଗରେ ପ୍ରତିବାଦ କରାଯିବା କଥା ତାହା କରାଯାଇ ନ ଥିବାରୁ ସେମାନେ ଅସନ୍ତୋଷ ଝାଡ଼ିଥିଲେ । ତାଙ୍କ ଉପରକୁ ବିପଦ ଆସୁଥିବା ଜାଣି ସସ୍ମିତ୍ ଆଗତୁରା ସଂସଦୀୟ ଦଳର ନେତା ପଦ ଛାଡ଼ିଥିବା କୁହାଯାଉଛି ।
୨୦୨୨ ମସିହାରୁ ସସ୍ମିତ୍ ରାଜ୍ୟସଭାରେ ବିଜେଡି ସଂସଦୀୟ ଦଳର ନେତା ରହିଥିଲେ । ତାଙ୍କର ଦକ୍ଷତା ଓ ପ୍ରଦର୍ଶନ ନେଇ କାହାର ଆପତ୍ତି ନ ଥିଲା । ମାତ୍ର ୱକଫ୍ ବିଲ୍ ପ୍ରସଙ୍ଗରେ ସେ ବିବାଦରେ ଫସିଥିଲେ । ବିଲ୍ ବିରୋଧରେ ବିଜେଡି ଭୋଟ୍ ଦେବ ବୋଲି ପୂର୍ବରୁ ନିଷ୍ପତ୍ତି ହୋଇଥିଲେ ମଧ୍ୟ ଶେଷ ମୁହୂର୍ତ୍ତରେ ସାଂସଦମାନଙ୍କ ବିବେକ ଉପରେ ନିଷ୍ପତ୍ତି ଛାଡ଼ି ଦିଆଯାଇଥିଲା । ଏଥିପାଇଁ ସସ୍ମିତଙ୍କ ଉପରେ ବର୍ଷିଥିଲେ ଦେବାଶିଷ ସାମନ୍ତରାୟ । ସସ୍ମିତ୍ ମନଇଚ୍ଛା କାର୍ଯ୍ୟ କରୁଛନ୍ତି ଏବଂ ଅନ୍ୟ ସାଂସଦମାନଙ୍କୁ ବିଶ୍ୱାସକୁ ନେଉନାହାନ୍ତି ବୋଲି ଅଭିଯୋଗ ବଢ଼ି ଚାଲିଥିଲା । ବିଜୁ ବାବୁଙ୍କୁ ନିଶିକାନ୍ତ ଦୁବେଙ୍କ ଅପମାନ ପ୍ରସଙ୍ଗରେ ରାଜ୍ୟସଭାରେ ନିନ୍ଦା ପ୍ରସ୍ତାବ ଆଣିବାକୁ ବିଜେଡି ସାଂସଦମାନେ ପ୍ରସ୍ତୁତ ଥିବା ବେଳେ ସସ୍ମିତ୍ ଏକା ଦୁଇପଦ କହି ୱାକ୍ ଆଉଟ୍ କରିବା ଘଟଣାକୁ ଅନ୍ୟ ସାଂସଦମାନେ ଗ୍ରହଣ କରିନାହାନ୍ତି ।
