ଭୁୁବନେଶ୍ୱର: ଜଣେ ସାମ୍ବାଦିକ ଭାବେ ନବୀନ ପଟ୍ଟନାୟକଙ୍କୁ ଥରେ ଅଧେ ଭେଟିଛନ୍ତି ରୁବେନ୍ ବାନାର୍ଜୀ । ତାହାପୁଣି ନବୀନଙ୍କ କେନ୍ଦ୍ରମନ୍ତ୍ରୀ ଏବଂ ପ୍ରଥମ ପାଳିର ନୂଆ ନୂଆ ମୁଖ୍ୟମନ୍ତ୍ରୀ ସମୟରେ । ତାହା ପରଠୁ ପାଖାପାଖି ଦେଢ଼ ଦଶନ୍ଧି ଧରି ଓଡ଼ିଶା ସମ୍ପର୍କରେ ଏହି ବଙ୍ଗାଳୀ ବାବୁ ନ ଥିଲେ । ସୁତରାଂ ନବୀନଙ୍କ ସମ୍ପର୍କରେ ସେ ପ୍ରତ୍ୟକ୍ଷ ଭାବେ ଆସିନାହାନ୍ତି । ତାଙ୍କ ସମ୍ପର୍କରେ ସମସ୍ତଙ୍କ ଭଳି ଯାହା କାନକୁହା ଗୁଲିଗପ ଶୁଣିଛନ୍ତି । ତେଣୁ ନବୀନଙ୍କ ସମ୍ପର୍କରେ ରୁବେନ୍ ବାନାର୍ଜୀଙ୍କ ପୁସ୍ତକକୁ ଅନେକାଂଶରେ ଗୁଲିଗପ କୁହାଯାଇପାରିବ । ଆଉ ପାଣ୍ଡିଆନଙ୍କ ବିଷୟରେ ତାଙ୍କର ଲେଖାକୁ ନେଇ ହଟଚମଟ କରୁଥିବା ତଥାକଥିତ ଗଣମାଧ୍ୟମ ବନ୍ଧୁମାନେ ନିଜ ଉପରୁ ବିଶ୍ୱାସ ହରାଇଥିବା ଜଣାପଡୁଛି । ବିଜେଡି ପରାଜୟର କାରଣ ପାଣ୍ଡିଆନ ବୋଲି ସମସ୍ତେ କହୁଛନ୍ତି । ଅଥଚ ରୁବେନଙ୍କ ଓଡ଼ିଆ ସାମ୍ବାଦିକ ବନ୍ଧୁମାନେ ବିଜେଡି ପରାଜୟର କାରଣ ତାଙ୍କଠାରୁ ଶୁଣି ତାଳି ମାରୁଛନ୍ତି । ରୁବେନଙ୍କ କଥାରେ ତାଳ ମେଳାଇ ତାଙ୍କ ପୁସ୍ତକର ପ୍ରଚାର କରିବାରେ ସେମାନେ ଲଜ୍ଜା ଅନୁଭବ କରୁନାହାନ୍ତି । ସେହିଭଳି ବିଜୁ ବାବୁଙ୍କ ସହ ବୈଜୟନ୍ତ ପଣ୍ଡାଙ୍କ ତୁଳନାରେ ଫାଟି ପଡୁଛନ୍ତି । ଏହା ସୁଦୁ ଗୁଲିଗପ ବୋଲି ଜାଣୁଥିଲେ ମଧ୍ୟ ଖୁସି ହେଉଛନ୍ତି ।
ନବୀନ ପଟ୍ଟନାୟକଙ୍କ ସମ୍ପର୍କରେ ବରିଷ୍ଠ ସାମ୍ବାଦିକ ରୁବେନ୍ ବାନାର୍ଜୀ ଲେଖିଥିବା ପୁସ୍ତକର ସଂଶୋଧିତ ସଂଖ୍ୟା ଉନ୍ମୋଚିତ ହୋଇଛି । ଏହି ବହିରେ ସେ ନବୀନ ବାବୁଙ୍କ ସମ୍ପର୍କରେ ବହୁ ଗୋପନ ତଥ୍ୟ ପଦାକୁ ଆଣିଥିବା ଦାବି କରିଛନ୍ତି । ସେଥିପାଇଁ ସେ କୁଆଡ଼େ ବହୁତ ଗବେଷଣା କରିଛନ୍ତି । ଓଡ଼ିଶାର ରାଜନୈତିକ ଇତିହାସକୁ ଭଲଭାବେ ଅନୁଧ୍ୟାନ କରିଛନ୍ତି । ତେବେ ବୈଜୟନ୍ତ ପଣ୍ଡାଙ୍କ ସମ୍ପର୍କରେ ତାଙ୍କର ଅବତାରଣା ଯେ ସମ୍ପୂର୍ଣ୍ଣ ମିଛ ଏବଂ ଭ୍ରମାତ୍ମକ ତାହା ଆମ ଅନୁସନ୍ଧାନରୁ ପାଠକଙ୍କୁ ଜଣାଇ ଦେବାକୁ ଉଚିତ୍ ମନେ କରୁଛୁ ।
ରୁବେନଙ୍କ ଗବେଷଣା ତଥ୍ୟ ହେଉଛି, ନବୀନ ବାବୁଙ୍କ କାନରେ ପାଖଲୋକମାନେ ବିଷ ଭରୁଥିଲେ । ଜୟ ପଣ୍ଡା ଆଉ ଜଣେ ବିଜୁ ପଟ୍ଟନାୟକ ହୋଇଯିବେ ବୋଲି ଚୁଗୁଲି କରିଥିଲେ । କାରଣ ହେଉଛି, ବୈଜୟନ୍ତ ଡେଙ୍ଗା- ବିଜୁ ବାବୁ ଡେଙ୍ଗା, ବୈଜୟନ୍ତ ପାଇଲଟ୍-ବିଜୁ ବାବୁ ପାଇଲଟ୍, ବିଜୁ ବାବୁଙ୍କ ସ୍ତ୍ରୀ ପଞ୍ଜାବୀ-ବୈଜୟନ୍ତ ପଣ୍ଡାଙ୍କ ସ୍ତ୍ରୀ ପଞ୍ଜାବୀ ।
ସତ ହେଉଛି, ନବୀନ ପଟ୍ଟନାୟକଙ୍କର କୌଣସି ପାଖଲୋକ ତାଙ୍କୁ କେବେ ବି ଏଭଳି କିଛି କହିନାହାନ୍ତି । ଏହା ଏକ ଭାବନା । ବୈଜୟନ୍ତ ପଣ୍ଡାଙ୍କୁ ବିଜୁ ବାବୁଙ୍କ ସହ ତୁଳନା କରିବା ଏକ କାଳ୍ପନିକ ବିଷୟବସ୍ତୁ । ଯାହାର ଜନ୍ମ ହୋଇଥିଲା ୨୦୦୯ ମସିହା ପୂର୍ବରୁ । ରୋଚକ କଥା ହେଉଛି, ବୈଜୟନ୍ତଙ୍କୁ ଖୁସି କରିବା ପାଇଁ ନୁହେଁ । ବରଂ ତାଙ୍କୁ ବ୍ଲାକମେଲ୍ କରିବାକୁ ଏକ ପାକ୍ଷିକ ଖବରକାଗଜ ଏଭଳି ଉଦ୍ଭଟ ଷ୍ଟୋରି କରିଥିଲା । ଉକ୍ତ ପାକ୍ଷିକ କାଗଜ ସେତେବେଳେ ବେଶ୍ ଚର୍ଚ୍ଚାରେ ଥିଲା । ଆକାଶରୁ ତୋଳି ଆଣିଲା ଭଳି ପଲିଟିକାଲ୍ ଷ୍ଟୋରିରୁ ପାଠକ ମଜ୍ଜା ଉଠାଉଥିଲେ ।
ସେତେବେଳେ ବୈଜୟନ୍ତ ପଣ୍ଡା ଥିଲେ ନବୀନ ବାବୁଙ୍କ ପାଖଲୋକ । ନବୀନଙ୍କ କାନରେ ଟୁପୁରୁଟାପର କରୁଥିବା ହାତଗଣତି ନେତାଙ୍କ ମଧ୍ୟରୁ ଜଣେ ଥିଲେ । ପ୍ୟାରୀମୋହନ ମହାପାତ୍ର କିନ୍ତୁ ବୈଜୟନ୍ତଙ୍କୁ ଦୂର୍ ଦୂର୍ ମାର୍ ମାର୍ କରୁଥିଲେ । ଏହି ରାଜନୈତିକ ପୃଷ୍ଠଭୂମିରେ ସଂପୃକ୍ତ ପାକ୍ଷିକ ଖବର କାଗଜ ଗରମାଗରମ ଖବର ପ୍ରକାଶ କରୁଥିଲା । ହଠାତ୍ କୌଣସି କାରଣରୁ ବୈଜୟନ୍ତଙ୍କ ଉପରେ ବିଗିଡି ଯାଇଥିଲା ଉକ୍ତ ପାକ୍ଷିକ ଖବର କାଗଜ । ତାଙ୍କୁ ପାନେ ଦେବା ପାଇଁ ଏକ କଭର୍ ଷ୍ଟୋରି ପ୍ଲାଣ୍ଟ କରାଯାଇଥିଲା । ସେଥି ଖବରରେ ବିଜୁ ବାବୁଙ୍କ ସହ ବୈଜୟନ୍ତଙ୍କୁ ତୁଳନା କରାଯାଇଥିଲା । ମୋଟାମୋଟି ଭାବେ ବୈଜୟନ୍ତଙ୍କୁ ଚୁମୁଟିବା ପାଇଁ ଦୁଇ ସାମ୍ବାଦିକଙ୍କର ଏହା ଥିଲା ବର୍ଣ୍ଣନା । ଯାହାକୁ ନେଇ କେବେ ବି କୋଉଠି ଏହା ଚର୍ଚ୍ଚାର ବିଷୟ ହୋଇ ନ ଥିଲା କି କାହା ମନରେ ଗୁୁଞ୍ଜରଣ ନ ଥିଲା ।
ସୂଚନାଥାଉକି, ବୈଜୟନ୍ତ ଏହି ଖବରରେ ଭୟଭୀତ ହୋଇପଡ଼ିଥିଲେ । କାରଣ ନବୀନଙ୍କ ମନୋଭାବକୁ ସେ ଭଲ ଭାବେ ଜାଣିଥିଲେ । ତେଣୁ ତାଙ୍କ ଦୃଷ୍ଟି ଆଢ଼ୁଆଳକୁ ତାହା ନ ଆଣିବା ପାଇଁ ରାତାରାତି ବଜାରରୁ ସଂପୃକ୍ତ ଖବରକାଗଜ ଇସ୍ୟୁକୁ ଉଭାନ କରାଇ ଦେଇଥିଲେ । ଏବଂ ଯିଏ ଏହି ଖବର ଛାପି ଲାଭ ପାଇବାକୁ ଚାହିଁଥିଲେ ସେମାନଙ୍କୁ ବୈଜୟନ୍ତ ସନ୍ତୁଷ୍ଟ କରିଥିଲେ । ସେତେବେଳେ ବୈଜୟନ୍ତଙ୍କ ଟିମ୍ ରେ କାମ କରୁଥିବା ସମସ୍ତଙ୍କୁ ଏହା ଜଣା ଅଛି ।
ପ୍ରକୃତରେ ଯେଉଁ କାରଣ ପାଇଁ ବୈଜୟନ୍ତଙ୍କୁ ନବୀନ ଦୂରେଇଦେଲେ ରୁବେନ୍ ବାନାର୍ଜୀ ସମ୍ଭବତଃ ତାହା ପାଠକଙ୍କୁ ଲୁଚାଇବାକୁ ଚାହିଁଛନ୍ତି । ଯଦି ଗବେଷଣା କରୁଥିଲେ ତେବେ ଏଇ ସାଧାରଣ କଥାଟି ସେ ନିଶ୍ଚିତ ଜାଣିଥିବେ । ହୁଏତ କୌଣସି କାରଣରୁ ତାହା ସାମନାକୁ ଆଣିନାହାନ୍ତି ।
ପ୍ରକୃତ କଥା ହେଲା- ୨୦୦୯ ନିର୍ବାଚନ ପରବର୍ତ୍ତୀ ସମୟରେ ବୈଜୟନ୍ତ ପଣ୍ଡା ମନେ ମନେ ନିଜକୁ ନବୀନ ପଟ୍ଟନାୟକଙ୍କ ବିକଳ୍ପ ଚେହେରା ବୋଲି ଭାବି ନେଇଥିଲେ । ସେହି ସ୍ୱପ୍ନ ନେଇ ଗୋଟିଚାଳନା କରିଥିଲେ । ଅତି ଗୋପନୀୟ ଭାବେ ସେ ଆଗକୁ ବଢ଼ିଥିଲେ । ନିଜର ଏକ ଟିମ୍ କରି ରାଜ୍ୟବ୍ୟାପୀ ଲୋକସମ୍ପର୍କ ଅଭିଯାନ ଆରମ୍ଭ କରିଥିଲେ । ନବୀନଙ୍କ ମନ୍ତ୍ରିମଣ୍ଡଳର ସଦସ୍ୟ ଏବଂ ବିଧାୟକମାନଙ୍କ ସହ ସମ୍ପର୍କ ବଢ଼ାଇବାକୁ ମଧ୍ୟ ଉଦ୍ୟମ ହୋଇଥିଲା ।
ଏହି ପୃଷ୍ଠଭୂମିରେ ୨୦୧୪ ନିର୍ବାଚନ ପରେ ବୈଜୟନ୍ତ ବାବୁ ରାଜ୍ୟ ସରକାରଙ୍କ ବାବଦରେ ଜନସାଧାରଣଙ୍କ ମତାମତ ଜାଣିବା ଆଳରେ ନିଜର ଉଦ୍ଦେଶ୍ୟ ଚରିତାର୍ଥ ପାଇଁ ଏକ ଗୋପନ ସର୍ଭେ କରାଇଥିଲେ । ନବୀନ ପଟ୍ଟନାୟକଙ୍କ ପରେ ଲୋକ କାହାକୁ ମୁଖ୍ୟମନ୍ତ୍ରୀ ଭାବେ ଦେଖିବାକୁ ଚାହାନ୍ତି ତାହା ଥିଲା ସର୍ଭେର ଉଦ୍ଦେଶ୍ୟ ।
ଓଟିଭିରେ କାମ କରିଥିବା ଜଣେ ବରିଷ୍ଠ ସାମ୍ବାଦିକଙ୍କ ସୂଚନା ଅନୁଯାୟୀ, ବୈଜୟନ୍ତ ଏହି ସର୍ଭେ ଫଳାଫଳକୁ ନିଜ ଇଚ୍ଛାରେ ପ୍ରଭାବିତ କରିଥିଲେ । କାରଣ ନବୀନଙ୍କ ପାଖରେ ଏହା କେମିତି ଭାବରେ ପହଞ୍ଚାଇବା ଥିଲା ତାଙ୍କର ଯୋଜନା । ସର୍ଭେ ଫଳାଫଳ ଏୟା କରାଯାଇଥିଲା ଯେ ମୁଖ୍ୟମନ୍ତ୍ରୀ ଭାବରେ ନବୀନଙ୍କ ପରେ ବୈଜୟନ୍ତ ପଣ୍ଡା ହେଉଛନ୍ତି ଓଡ଼ିଶାବାସୀଙ୍କ ଦ୍ୱିତୀୟ ପସନ୍ଦ । ତୃତୀୟ ପସନ୍ଦ କରାଯାଇଥିଲା ଡାକ୍ତର ଦାମୋଦର ରାଉତଙ୍କୁ ।
ବୈଜୟନ୍ତ ପଣ୍ଡାଙ୍କର ମୁଖ୍ୟମନ୍ତ୍ରୀ ହେବାର ଅଭିଳାଷ ଏବଂ ଦଳରେ ତାଙ୍କର ବିଭୀଷଣ କାର୍ଯ୍ୟକଳାପ ସମ୍ପର୍କରେ ନବୀନ ପଟ୍ଟନାୟକ ଜାଣିଲା ପରେ ସେ ତାଙ୍କୁ ଆଉ ବିଶ୍ୱାସକୁ ନେଲେ ନାହିଁ । ସେବେଠାରୁ ସେ ବୈଜୟନ୍ତଙ୍କଠାରୁ ନିଜକୁ ଯଥାସମ୍ଭବ ଦୂରେଇ ରଖିଲେ ।
ମାତ୍ର ବୈଜୟନ୍ତ ବାବୁଙ୍କ ସମ୍ପର୍କରେ ନବୀନ ବାବୁଙ୍କ କାନରେ ପାଖଲୋକମାନେ ବିଷ ଭରୁଥିଲେ ବୋଲି ଲେଖିଛନ୍ତି ରୁବେନ୍ ବାନାର୍ଜୀ । କୁଆଡ଼େ ଜୟ ପଣ୍ଡା ଆଉ ଜଣେ ବିଜୁ ପଟ୍ଟନାୟକ ହୋଇଯିବେ ବୋଲି ନବୀନଙ୍କ ପାଖଲୋକମାନେ ଚୁଗୁଲି କରିଥିଲେ । କାରଣ ବୈଜୟନ୍ତ ଡେଙ୍ଗା- ବିଜୁ ବାବୁ ଡେଙ୍ଗା, ବୈଜୟନ୍ତ ପାଇଲଟ୍-ବିଜୁ ବାବୁ ପାଇଲଟ୍, ବିଜୁ ବାବୁଙ୍କ ସ୍ତ୍ରୀ ପଞ୍ଜାବୀ-ବୈଜୟନ୍ତ ପଣ୍ଡାଙ୍କ ସ୍ତ୍ରୀ ପଞ୍ଜାବୀ ।
ନିଜେ ରୁବେନ୍ ବାନାର୍ଜୀ ଏହାକୁ ହାସ୍ୟାସ୍ପଦ ବୋଲି ଟିଭିରେ ବାଇଟ୍ ଦେଇ ଏହା ଗୁଲିଗପ ବୋଲି ପରୋକ୍ଷରେ ସ୍ୱୀକାର କରିଛନ୍ତି ।
