ହେବାକୁ ଦେବାନି: ନବୀନ

ଭୁବନେଶ୍ୱର: ଏମଏମଡିଆର ସଂଶୋଧନ ବିଲ୍ ପ୍ରତ୍ୟାହାର ଦାବିରେ ବିରୋଧୀ ଦଳ ଏକାଠି ହୋଇଛନ୍ତି । ଗତକାଲି କଂଗ୍ରେସ ଭବନରେ ଇଣ୍ଡିି ମେଣ୍ଟର ନେତୃବୃନ୍ଦ ଏକାଠି ହୋଇ ଏହି ପ୍ରସଙ୍ଗରେ ରାଜ୍ୟବ୍ୟାପୀ ଗଣଆନ୍ଦୋଳନ ଗଢ଼ି ତୋଳିବାକୁ ସଂକଳ୍ପ ନେଇଥିଲେ । ଆଜି ବିଜେଡି ସୁପ୍ରିମୋ ତଥା ବିରୋଧୀ ଦଳର ନେତା ନବୀନ ପଟ୍ଟନାୟକ ଏମଏମଡିଆର ସଂଶୋଧନ ବିରୋଧରେ ମିଳିତ ସଂଗ୍ରାମ ପାଇଁ ଆହ୍ୱାନ ଦେଇଛନ୍ତି । ଏକ ଭିଡିଓ ବାର୍ତ୍ତାରେ ଏହା ହେବାକୁ ଦେବାନି ବୋଲି ରାଜ୍ୟବାସୀଙ୍କୁ ଦମ୍ଭ ଦେଇଥିଲା ବେଳେ ତାଙ୍କ ଶେଷ ନିଶ୍ୱାସ ପର୍ଯ୍ୟନ୍ତ ଓଡ଼ିଶା ଓ ଓଡ଼ିଶାବାସୀଙ୍କ ଅଧିକାର ପାଇଁ ଲଢ଼େଇ ଜାରି ରଖିବେ ବୋଲି ଘୋଷଣା କରିଛନ୍ତି ।

ନବୀନ କହିଛନ୍ତି- ୨୦୦୦ ମସିହାରେ ଆମେ ଓଡ଼ିଶା ଶାସନ ଦାୟିତ୍ୱ ନେଲା ବେଳେ ରାଜ୍ୟର ଆର୍ଥିକ ଅବସ୍ଥା ବହୁତ ଖରାପ ଥିଲା । ଆମକୁ ଓଭରଡ୍ରାଫ୍ଟ ଉପରେ ନିର୍ଭର କରିବାକୁ ପଡୁଥିଲା । ୨୦୨୪ରେ ସରକାର ପରିବର୍ତ୍ତନ ବେଳକୁ ୫୦ ହଜାର କୋଟି ଟଙ୍କା ବଳକା ରାଜସ୍ୱ ଆମେ ଛାଡ଼ି ଯାଇଥିଲୁ । ଆମର ଦୃଢ଼ ବିତ୍ତୀୟ ପରିଚାଳନା ପାଇଁ ଏହା ସମ୍ଭବ ହେଲା । ରାଜ୍ୟର ଦ୍ରୁତ ବିକାଶରେ ମାଇନିଂ ଟିକସ ମୁଖ୍ୟ ଭୂମିକା ଗ୍ରହଣ କରିଥିଲା । କିନ୍ତୁ ଆଜି ଓଡ଼ିଶାର ଅର୍ଥନୀତି ବିପଦରେ ।

ନିକଟରେ ପାର୍ଲିଆମେଣ୍ଟରେ ପାରିତ ଏମଏମଡିଆର୍ ସଂଶୋଧନ ବିଲ୍ ଓଡ଼ିଶା ଓ ଓଡ଼ିଶାବାସୀଙ୍କର ବହୁତ କ୍ଷତି କରିବାକୁ ଯାଉଛି । ବିନା ଆଲୋଚନାରେ କେନ୍ଦ୍ର ସରକାର ଏହାକୁ ପାରିତ କରିଦେଲେ । କେବଳ ବିଜେଡି ସାଂସଦମାନେ ଏହାକୁ ରାଜ୍ୟସଭାରେ ବିରୋଧ କରିଥିଲେ । ଏହି ବିଲ୍ କୁ ବିରୋଧ କରି ମୁଁ ଆମ ରାଜ୍ୟର ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଥିଲି । ସର୍ବଦଳୀୟ ବୈଠକ ଡାକିବାକୁ ଓ ବିଧାନସଭାରେ ସ୍ୱତନ୍ତ୍ର ଅଧିବେଶନ ଡାକିବାକୁ ଅନୁରୋଧ କରିଥିଲି । ଓଡ଼ିଶା ଓ ଓଡ଼ିଶାବାସୀଙ୍କ ସ୍ୱାର୍ଥ ଆଗରେ କେହି ବଡ଼ ନୁହେଁ । ପାର୍ଟି ନୁହେଁ, ମାଟିର ସ୍ୱାର୍ଥ ପାଇଁ ଆମକୁ ଆଜି ଏକାଠି ହେବାକୁ ପଡ଼ିବ ।

ଏମଏମଡିଆର ସଂଶୋଧନ ବିଲ୍ ଆମ ଖଣି ଉପରେ ଆମ ଅଧିକାର ଶେଷ କରି ଦେଇଛି । ଓଡ଼ିଶାରେ କ୍ରୋମାଇଟ୍, ବକ୍ସାଇଟ୍, ଲୁହାପଥର, କୋଇଲା, ମାଙ୍ଗାନିଜ୍ ସର୍ବାଧିକ ଗଚ୍ଛିତ ଅଛି । କିନ୍ତୁ ଏମଏମଡିଆର ସଂଶୋଧନ ବିଲ୍ ଏ ସବୁ ଉପରୁ ଆମ ଅଧିକାର ଛଡ଼େଇ ନେଇଛି । ଆମ ଲୋକଙ୍କ କଲ୍ୟାଣ ପାଇଁ ଆମ ଖଣିରୁ ଆମେ କାହିଁକି ଟିକସ ଆଦାୟ କରିପାରିବୁନି? ଆମ ଲୋକ ଧୂଳି, ଧୂଆଁ ସହିବେ । କିନ୍ତୁ ଦିଲ୍ଲୀ ଦରବାର ଆମ ସମ୍ପଦରେ ସମୃଦ୍ଧ ହେବ । ଏହା ଆମେ ହେବାକୁ ଦେବାନି ।

୨୪ ବର୍ଷ ଧରି ମୁଁ ଓଡ଼ିଶାର ସ୍ୱାର୍ଥକୁ ଜଗିଥିଲି । କେନ୍ଦ୍ରରେ ବିଭିନ୍ନ ଦଳର ସରକାର ଥିଲେ ମଧ୍ୟ ଓଡ଼ିଶାର ଅଧିକାରରେ କ୍ଷତି ଆଣିବାକୁ କେହି ସାହାସ କରି ନ ଥିଲେ । ଆପଣମାନେ ୨୦୨୪ରେ ପରିବର୍ତ୍ତନ କରି ନୂଆ ବିଜେପି ସରକାର ଆଣିଲେ । କିନ୍ତୁ ମାତ୍ର ଦୁଇବର୍ଷ ଭିତରେ ସବୁ ବଦଳିଗଲା । ଓଡ଼ିଶାକୁ ଏବେ କେନ୍ଦ୍ରର ଦୟା ଉପରେ ନିର୍ଭର କରିବାକୁ ହେବ । ଆପଣମାନେ ଓଡ଼ିଶାରୁ ଲୋକସଭାକୁ ୨୦ ଜଣ ବିଜେପି ସାଂସଦ ଦେଲେ । କିନ୍ତୁ ଏ ମାଟି ପାଇଁ କେହି ବି ପାଟି ଖୋଲିଲେନି । ଓଡ଼ିଶାର ସ୍ୱାର୍ଥରକ୍ଷା ପାଇଁ ସେମାନଙ୍କ ଦାୟିତ୍ୱ ତୁଲାଇବାରେ ଭୟଙ୍କର ଭାବେ ବିଫଳ ହୋଇଛନ୍ତି । କେବଳ ବିଜେଡି ହିଁ ରାଜ୍ୟସଭାରେ ଏ ସଂଶୋଧନ ବିଲକୁ ଦୃଢ଼ ବିରୋଧ କରିଥିଲା ।

ବିଜୁ ବାବୁ ସବୁବେଳେ ରାଜ୍ୟର ବିକାଶ ପାଇଁ ଅର୍ଥନୈତିକ ସ୍ୱାଧୀନତା ଉପରେ ଜୋର୍ ଦେଉଥିଲେ । ଏହି ସଂଶୋଧନ ବିଲ୍ ଦ୍ୱାରା ଆଜି ଓଡ଼ିଶାର ଟିକସ ପରିମାଣ ବହୁତ କମିଯିବ । ପ୍ରତିବର୍ଷ ଆମେ ହଜାର ହଜାର କୋଟି ଟଙ୍କାର କ୍ଷତି ସହିବା । ଏହି ଟଙ୍କାରେ ଓଡ଼ିଶାରେ ଅନେକ ସ୍କୁଲ, କଲେଜ, ଡାକ୍ତରଖାନା ହୋଇଥାନ୍ତା । ରାସ୍ତା, ପୋଲ, ବିଜୁଳି ଏବଂ ଅନ୍ୟ ଭିତ୍ତିଭୂମି ହୋଇଥାନ୍ତା । ଚାଷୀ ଉପକାର ପାଇଥାନ୍ତା । ଗରିବ ଲୋକ ଉପକାର ପାଇଥାନ୍ତା । କିନ୍ତୁ ଏବେ ଏତେବଡ଼ କ୍ଷତି ଓଡ଼ିଶା ସହି ପାରିବ ତ? ଆମ ପିଲାମାନଙ୍କୁ ଆମର ଭବିଷ୍ୟତ ବଂଶଧରକୁ ଆମେ କ’ଣ ଜବାବ ଦେବା? ଜେନ୍-ଜି ର ଭବିଷ୍ୟତ କ’ଣ ହେବ?

ଓଡ଼ିଶାକୁ ଦୁର୍ବଳ କରିବାକୁ ଚାଲିଥିବା ଏହି ଭୟଙ୍କର ଚକ୍ରାନ୍ତକୁ ଓଡ଼ିଶାବାସୀ କେବେ ବରଦାସ୍ତ କରିବେନି । ଏ ମାଟି ଆମର । ଏ ଖଣି ଆମର । ଆମ ଅଧିକାରର ସୁରକ୍ଷା ପାଇଁ ମୁଁ ଲଢ଼ିବି । ଶେଷ ନିଶ୍ୱାସ ପର୍ଯ୍ୟନ୍ତ ଓଡ଼ିଶା ଓ ଓଡ଼ିଶାବାସୀଙ୍କ ଅଧିକାର ପାଇଁ ମୋର ଲଢ଼େଇ ଜାରି ରହିବ । ଏହି ଲଢ଼େଇରେ ଓଡ଼ିଶାବାସୀ ସାମିଲ ହେବାକୁ ମୋର ନିବେଦନ ।