ଭୁବନେଶ୍ୱର: ରାୟଗଡ଼ା ଜିଲ୍ଲା କଲ୍ୟାଣପୁର ଥାନା ଅଞ୍ଚଳରେ ଘଟିଥିବା ଘଟଣା ଯେତିକି ବୀଭତ୍ସ, ସେତିକି ଭୟାନକ । ‘ବିକାଶର ଧାରା ଓଡ଼ିଶା ସାରା’ ସ୍ଲୋଗାନ୍ ଦିଆଯାଉଥିବା ରାଜ୍ୟରେ ଏଭଳି କୁତ୍ସିତ, ବୀଭତ୍ସ ଘଟଣା ଆମ ସମସ୍ତଙ୍କ ମୁହଁ ତଳକୁ କରିଦେଇଛି । ରାଜଧାନୀ ଉପକଣ୍ଠ ବାଲିଅନ୍ତାରେ ମବ୍ ଲିଞ୍ଚିଂ ବା ଭିଡ଼ ହତ୍ୟାର ବୀଭତ୍ସ ଦୃଶ୍ୟ ମନରୁ ନ ଯାଉଣୁ ଦୁର୍ଗମ କଲ୍ୟାଣପୁର ଅଞ୍ଚଳରେ ଜଣେ ଉଚ୍ଚଶିକ୍ଷିତା ଅଣଓଡ଼ିଆ ଯୁବତୀଙ୍କୁ ପିଲାଚୋର ସନେ୍ଦହରେ ୪୦ ରୁ ଅଧିକ ଲୋକ ଚୁଟି ଘୋଷାଡ଼ି ବିଧା ଗୋଇଠା ମାରିବା, ତାଙ୍କର ଅନ୍ତବସ୍ତ୍ର ଫାଡ଼ିଦେବା, ଜୀବନ ଓ ଇଜ୍ଜତ ବଞ୍ଚାଇବା ପାଇଁ ନେହୁରା ହେଉଥିବା ବିବସ୍ତ୍ର ଯୁବତୀଙ୍କର ଅସହାୟତାକୁ ମୋବାଇଲ୍ ରେ ଭିଡିଓ କରି ମଜ୍ଜା ନେବାର ଦୃଶ୍ୟ ମନକୁ ଆହୁରି ବିଚଳିତ କରିଦେଉଛି । ଆଜି କାହିଁକି ଆମର ଏ ଅବସ୍ଥା? ପୁଲିସ ଉପରୁ ଲୋକଙ୍କ ଭୟ ଓ ଭରସା ତୁଟିଯାଇଛି କାହିଁକି? ଏହାର ସମାଧାନ କ’ଣ? ପୁଣି ଏକ ଅଘଟଣକୁ କ’ଣ ଅପେକ୍ଷା କରି ରହିବା?
ଗତ ୧୬ ତାରିଖରେ ରାୟଗଡ଼ା ଜିଲ୍ଲା କଲ୍ୟାଣପୁର ଅଞ୍ଚଳରେ ଘଟିଥିବା ଘଟଣା ସାରା ଦେଶରେ ଆଲୋଡ଼ନ ସୃଷ୍ଟି କରିଛି । ‘ଗ୍ରାମ ବିକାଶ’ ଏନଜିଓ ସଂସ୍ଥାରେ ରେ ଇଣ୍ଟର୍ଣ୍ଣସିପ୍ କରୁଥିବା ଦିଲ୍ଲୀର ଜଣେ ଯୁବତୀ ଓ ତାଙ୍କର ସହଯୋଗୀ ଗୁଜୁରାଟୀ ଯୁବକଙ୍କୁ ପିଲାଚୋର ସନ୍ଦେହରେ ବର୍ବରୋଚିତ ଭାବରେ ଆକ୍ରମଣ କରାଯିବା ଘଟଣା ସମସ୍ତଙ୍କୁ ସ୍ତବ୍ଧ କରିଦେଇଛି । ଯୁବତୀଙ୍କ ଚୁଟି ଟାଣି ତାଙ୍କର ଅନ୍ତବସ୍ତ୍ର ଫାଡ଼ିବାର ଦୃଶ୍ୟ ଅଧିକ ବିଚଳିତ କରିଛି ।
ଏକ୍ସପୋଜର୍ ଭିଜିଟ୍ ରେ ଦୁହେଁ କନ୍ଧମାଳ ଦାରିଙ୍ଗିବାଡ଼ି ଆସିଥିଲେ । ସେଠାରୁ କଳାହାଣ୍ଡିର ଥୁଆମୂଳ ରାମପୁର ଯାଉଥିଲେ । ତେବେ ରାୟଗଡ଼ା ଜିଲ୍ଲା କଲ୍ୟାଣପୁର ଅଞ୍ଚଳ ରେ ଯାଉଥିବା ବେଳେ ବାଟ ହୁଡ଼ି ଯାଇଥିଲେ । ଇନ୍ତାଲିଗୁଡ଼ା ବୋଲି ଗୋଟେ ଗ୍ରାମରେ ପଶିଯାଇଥିଲେ । ସେଦିନ ଶେଷ ରଜ ଥିବାରୁ ଗାଁରେ ଗହଳି ଚହଳି ଥିଲା । ପିଲାମାନେ ରଜ ଦୋଳି ଖେଳୁଥିଲେ । ଏହି ଦୃଶ୍ୟ ଦେଖି ଦୁହେଁ ସେଠାରେ ଅଟକି ଯାଇଥିଲେ । ଖୁସିରେ ପିଲାମାନଙ୍କୁୁ ଗେହ୍ଲ କରି ଚକୋଲେଟ୍ ଦେଇଥିଲେ ।
ମାତ୍ର ସେଠାରେ ଉପସ୍ଥିତ ଥିବା କିଛି ନିଶାସକ୍ତ ଯୁବକ ଦୁହିଁଙ୍କୁ ପିଲାଚୋର ଭାବିଦେଲେ । ହୋ ହଲ୍ଲା କରିବାରୁ ଗାଁର ଅନ୍ୟମାନେ ମାଡ଼ି ଆସିଥିଲେ । କିଛି ନ ବୁଝି ଦୁହିଁଙ୍କୁ ଘେରିଯାଇ ପିଟିବା ଆରମ୍ଭ କରିଦେଲେ । ଉଭୟ ପରିଚୟ ପତ୍ର ଦେଖାଇବା ସତ୍ତ୍ୱେ କେହି ବୁଝିବା ଅବସ୍ଥାରେ ନ ଥିଲେ । ଯୁବକଙ୍କୁ ପିଟି ପିଟି ରକ୍ତାକ୍ତ କରିଦେଲା ପରେ ଯୁବତୀଙ୍କ ଚୁଟି ଘୋଷାଡ଼ି ମୁହଁକୁ ମୁଥ ପରେ ମୁଥ ପକାଇଥିଲେ । ତାଙ୍କର ଅନ୍ତବସ୍ତ୍ର ଫାଡ଼ି ଦେଇଥିଲେ । ଦେହରେ କପଡ଼ା ଖଣ୍ଡେ ପକାଇବାକୁ ଯୁବତୀ ହାତଯୋଡି ନେହୁରା ହେଉଥିଲା ବେଳେ ଲୋକମାନେ ତାଙ୍କର ମଜାକ୍ ଉଡ଼ାଉଥିଲେ । କିଛି ଯୁବକ ଯୁବତୀଙ୍କ ବିବସ୍ତ୍ର ଶରୀରକୁ ମୋବାଇଲ୍ ରେ ଭିଡିଓ କରିବାରେ ମାତି ଯାଇଥିଲେ । ଶେଷରେ ସେମାନଙ୍କ କବଳରୁ ଦୁହିଁଙ୍କୁ ଉଦ୍ଧାର କରିଥିଲେ ଗ୍ରାମର ଜଣେ ସହୃଦୟ ଯୁବକ । ଉଭୟଙ୍କୁ ଡାକ୍ତରଖାନାରେ ଭର୍ତ୍ତି କରି ପୁଲିସକୁ ଖବର ଦେଇଥିଲେ ।
ପୁଲିସ ଏହି ଘଟଣାରେ ପୂର୍ବରୁ ୧୬ ଜଣଙ୍କୁ ଗିରଫ କରିଥିଲା । ଆଜି ଆଉ ୫ ଜଣଙ୍କୁ ଗିରଫ କରିଛି । ଘଟଣାରେ ସଂପୃକ୍ତ ସମସ୍ତଙ୍କୁ ଗିରଫ କରାଯିବ ବୋଲି ରାୟଗଡ଼ା ଏସପି କହିଛନ୍ତି ।
ଦୁର୍ଗମ ଅଞ୍ଚଳରେ ଘଟଣା ଘଟିଥିବାରୁ ପ୍ରଥମେ ଏକପ୍ରକାର ଚପିଯାଇଥିଲା କହିଲେ ଚଳେ । ତଥାକଥିତ ବଡ଼ ବଡ଼ ଟିଭି, ଖବରକାଗଜରେ ଖବରଟି ଦିନକ ପରେ ଭିତର ପୃଷ୍ଠାରେ ଛୋଟ ହୋଇ ଆସିଥିଲା । ସରକାର ବଦନାମ ହୋଇଯିବାର ଚାପ ଥିଲା ବୋଧେ । ମାତ୍ର ସୋସିଆଲ୍ ମିଡିଆରେ ଏହି ଦୃଶ୍ୟ ଭାଇରାଲ୍ ହେବା ପରେ ଖବର ତା’ର ମର୍ଯ୍ୟାଦା ପାଇଛି ।
ଆଜି ରାଜ୍ୟ ସରକାରଙ୍କ ଦ୍ୱିତୀୟ ବର୍ଷ ପୂର୍ତ୍ତ ଉତ୍ସବରେ ରାଷ୍ଟ୍ରପତି ଏବଂ ପ୍ରଧାନମନ୍ତ୍ରୀ ଗୋଟିଏ ମଞ୍ଚରେ ଛିଡ଼ା ହୋଇ ମୁଖ୍ୟମନ୍ତ୍ରୀ ମୋହନ ମାଝୀଙ୍କୁ ପ୍ରଶଂସାପତ୍ର ଦେଉଥିଲା ବେଳେ ରାଜ୍ୟବାସୀଙ୍କ ନଜର କିନ୍ତୁ କଲ୍ୟାଣପୁର ଘଟଣା ଉପରେ ଥିଲା । ମୋହନ ମାଝୀଙ୍କ ନେତୃତ୍ୱରେ ରାଜ୍ୟର ଦ୍ରୁତ ବିକାଶ ଚାଲିଥିବା ବେଳେ ବାଲିଅନ୍ତା, କେନ୍ଦ୍ରାପଡ଼ା, କଲ୍ୟାଣପୁର ଘଟଣାଗୁଡ଼ିକ ବାଧକ ସାଜି ପାରିନି । ଏହା ହିଁ ମୋହନ ସରକାରଙ୍କ ଉପଲବ୍ଧ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କର ଅନୁଭବ ବୋଲି ଓଡ଼ିଶାବାସୀଙ୍କୁ ଆଜି ବାର୍ତ୍ତା ଦିଆଯାଇଛି ।
ନବୀନଙ୍କ ଉଦବେଗ
ବିରୋଧୀ ଦଳ ନେତା ନବୀନ ପଟ୍ଟନାୟକ ଏହି ଘଟଣାରେ ଉଦବେଗ ପ୍ରକାଶ କରି ଟୁଇଟ୍ କରିଛନ୍ତି । ଲେଖିଛନ୍ତି, ଦିଲ୍ଲୀର ଛାତ୍ରୀଙ୍କ ସହ ଘଟିଥିବା ଜଘନ୍ୟ, ବର୍ବରୋଚିତ କାଣ୍ଡ ସମଗ୍ର ଓଡ଼ିଶାକୁ ବିଚଳିତ, ଲଜ୍ଜିତ ଓ ଚିନ୍ତିତ କରିଛି । ଏପରି ଦୁଃସ୍ଥିତିର ସାମ୍ନା କରିଥିବା ଛାତ୍ରୀଙ୍କୁ ମୋର ଗଭୀର ସମବେଦନା ଜଣାଉଛି । ସର୍ବସମ୍ମୁଖରେ ଛାତ୍ରୀଙ୍କ ସହ ସଂଘବଦ୍ଧ ଭାବେ ଘଟିଥିବା ବୀଭତ୍ସ, ନାରକୀୟ କାଣ୍ଡ ମାନବିକତା ଏବଂ ଆମ ଅସ୍ମିତା ଉପରେ ବିରାଟ ପ୍ରଶ୍ନବାଚୀ ସୃଷ୍ଟି କରିଛି ।
ଏପରି ଘଟଣା ସାରା ରାଜ୍ୟରେ ଆଲୋଡ଼ନ ସୃଷ୍ଟି କରିଥିବା ବେଳେ ସରକାର ତୁରନ୍ତ ତତ୍ପରତାର ସହ କାର୍ଯ୍ୟାନୁଷ୍ଠାନ ନେବା ଦରକାର । କାହିଁକି ଓଡ଼ିଶାର ଛବି କଳୁଷିତ ହେବାକୁ ଛାଡ଼ି ଦିଆଯାଇଛି? ଏ ସରକାର, ଏ ପୁଲିସ ପ୍ରଶାସନ ଏତେ ଅସହାୟ କ’ଣ ପାଇଁ? ସମସ୍ତଙ୍କୁ ସୁରକ୍ଷା ସୁନିଶ୍ଚିତ କରିବା କ’ଣ ଏ ସରକାରଙ୍କ ଉତ୍ତରଦାୟିତ୍ୱ ନୁହେଁ କି?
ସମ୍ବେଦନଶୀଳ ଘଟଣାରେ ସରକାରଙ୍କ ସ୍ଥାଣୁତା ଓ ଅସମ୍ଭବ ନୀରବତା ଏପରି ବୀଭତ୍ସ କାଣ୍ଡ ଘଟିବାକୁ ପ୍ରଶୟ ଦେଉନାହିଁ କି?
ନାରୀ ନିର୍ଯାତନା ଓ ବିପର୍ଯ୍ୟସ୍ତ ଆଇନଶୃଙ୍ଖଳା ପାଇଁ ଓଡ଼ିଶା ସାରା ବିଶ୍ୱରେ ନିନ୍ଦିତ ହେଉଥିବା ବେଳେ ସରକାର କେଉଁ ମୁହଁରେ ବିକାଶର ଧାରା ଓଡ଼ିଶା ସାରା କହି ଉତ୍ସବରେ ମାତିଛନ୍ତି?
ସରକାର ତୁରନ୍ତ କଠୋରରୁ କଠୋର ପଦକ୍ଷେପ ଗ୍ରହଣ କରି ରାଜ୍ୟରେ ମା’ ଭଉଣୀଙ୍କ ସୁରକ୍ଷା ଓ ଆଇନଶୃଙ୍ଖଳା ସୁନିଶ୍ଚିତ କରନ୍ତୁ ।
