ଭୁୁବନେଶ୍ୱର: ଚାକିରି ଜୀବନ ଆରମ୍ଭ କରିଥିବା ଜଣେ ଓଏଏସ୍ ଟପ୍ପର ୧୫ ହଜାର ଟଙ୍କା ଲାଞ୍ଚ ନେଇ ଗିରଫ ହେବା ଘଟଣା ଚିନ୍ତା ଓ ଲଜ୍ଜାର ବିଷୟ ହୋଇଛି । ଜଣେ ବ୍ୟକ୍ତିଙ୍କ ଚାଷ ଜମିର କିସମ ପରିବର୍ତ୍ତନ ପାଇଁ ଏହି ଯୁବ ଅଫିସର ୧୫ ହଜାର ଟଙ୍କା ଲାଞ୍ଚ ନେଉଥିବା ବେଳେ ଭିଜିଲାନସ୍ ଦ୍ୱାରା ଧରାପଡ଼ିଛନ୍ତି । ଲାଞ୍ଚ କାରବାରରେ ତାଙ୍କୁ ସହାୟତା କରୁଥିବା ଡ୍ରାଇଭର ମଧ୍ୟ ଗିରଫ ହୋଇଛନ୍ତି । ଚଢ଼ଉ ବେଳେ ଓଏଏସ୍ ବାବୁଙ୍କ ଭୁବନେଶ୍ୱର ବାସଭବନରୁ ନଗଦ ୪ ଲକ୍ଷ ୭୩ ହଜାର ଟଙ୍କା ଜବତ କରିଛି ଭିଜିଲାନସ୍ ।
ଲାଞ୍ଚ ନେଇ ଗିରଫ ହୋଇଥିବା ବାବୁଜଣଙ୍କ ହେଉଛନ୍ତି ୩୩ ବର୍ଷୀୟ ଅଶ୍ୱିନୀ କୁମାର ପଣ୍ଡା । ୨୦୧୯ ମସିହାର ଓଡିଶା ପ୍ରଶାସନିକ ସେବା(ଓଏଏସ୍) ପରୀକ୍ଷାରେ ପ୍ରଥମ ସ୍ଥାନ ଅଧିକାର କରିଥିଲେ । ଏବେ ସମ୍ବଲପୁର ଜିଲ୍ଲା ବାମରା ତହସିଲଦାର ଭାବେ ଅବସ୍ଥାପିତ ।
ଭିଜିଲାନ୍ସ ସୂଚନା ଅନୁଯାୟୀ, ପ୍ରାୟ ମାସେ ତଳେ ଜଣେ ବ୍ୟକ୍ତି ନିଜ ଚାଷ ଜମିର କିସମ ପରିବର୍ତ୍ତନ ପାଇଁ ତହସିଲଦାରଙ୍କୁ ଅନୁରୋଧ କରିଥିଲେ । ଓଏଏସ୍ ଟପ୍ପର୍ ତହସିଲଦାର ବାବୁ ସେଥିରେ ରାଜି ହୋଇଯାଇଥିଲେ ଏବଂ ୨୦ ହଜାର ଟଙ୍କା ଲାଞ୍ଚ ମାଗିଥିଲେ । କିସମ ପରିବର୍ତ୍ତନ ଏବଂ ଆରଓଆର ଇସ୍ୟୁ ପାଇଁ ଏହି ଟଙ୍କା ଦେବାକୁ ପଡ଼ିବ ବୋଲି ଡରାଇଥିଲେ । ମାତ୍ର ଏତେ ଟଙ୍କା ଦେଇପାରିବେନି ବୋଲି ସଂପୃକ୍ତ ବ୍ୟକ୍ତି ଜଣଙ୍କ ନେହୁରା ହେଲା ପରେ ଓଏଏସ୍ ଟପ୍ପର୍ ବାବୁ ୧୫ ହଜାର ଟଙ୍କାରେ କଥା ଛିଣ୍ଡାଇଲେ । ସେତିକି ନ ଦେଲେ ମ୍ୟୁଟେସନ୍ ପାଇଁ ଅନୁମତି ଦେବେ ନାହିଁ ବୋଲି ଧମକ ଦେଇଥିଲେ ।
ତହସିଲଦାରଙ୍କ ଲାଞ୍ଚଖୋର ପ୍ରବୃତ୍ତିକୁ ଧରାଇବା ପାଇଁ ସଂପୃକ୍ତ ବ୍ୟକ୍ତି ଭିଜିଲାନ୍ସର ସାହାରା ଲୋଡ଼ିଥିଲେ । ଏବଂ ପୂର୍ବ ପ୍ରସ୍ତୁତି ମୁତାବକ ଅଭିଯୋଗକାରୀଙ୍କଠାରୁ ତହସିଲଦାର ଆଜି ଅଫିସରେ ବସି ଡ୍ରାଇଭର ପି. ପ୍ରବୀଣ କୁମାରଙ୍କ ହାତରେ ୧୫ ହଜାର ଟଙ୍କା ଲାଞ୍ଚଞ୍ଚ ନେଉଥିବା ବେଳେ ଭିଜିଲାନ୍ସ ଅଧିକାରୀମାନେ ମାଡ଼ି ବସିଥିଲେ ।
ଏହା ପରେ ଭିଜିଲାନ୍ସର ପୃଥକ୍ ଟିମ୍ ଅଶ୍ୱିନୀ ପଣ୍ଡାଙ୍କ ଅଫିସ୍, ସେ ରହୁଥିବା ବାମରା ଆଇବି ରୁମ୍, ଭୁବନେଶ୍ୱରସ୍ଥିତ ମେ ଫେୟାର ରୋଡ୍ ରେ ଥିବା ତାଙ୍କ ବାସଭବନ ଉପରେ ଚଢ଼ଉ କରିଥିଲେ । ଭୁବନେଶ୍ୱର ବାସଭବନରୁ ନଗଦ ୪ ଲକ୍ଷ ୭୩ ହଜାର ଟଙ୍କା ଜବତ ହୋଇଛି । ସେହି ଘରେ ତାଙ୍କ ପରିବାର ରହୁଛନ୍ତି ।
ତହସିଲଦାର ଶ୍ରୀ ପଣ୍ଡା ଏବଂ ଡ୍ରାଇଭର ପ୍ରବୀଣ କୁମାରଙ୍କୁ ଗିରଫ କରାଯାଇଛି ।
ସୂଚନାଥାଉକି, ୧୯୯୨ ମସିହାରେ ଜନ୍ମିତ ଅଶ୍ୱିନୀ ପଣ୍ଡାଙ୍କ ଘର ହେଉଛି ଯାଜପୁର ଜିଲ୍ଲା ଧର୍ମଶାଳା ବ୍ଲକ୍ ଅନ୍ତର୍ଗତ କ୍ଷେତ୍ରପାଳରେ । ଗାଁ ସ୍କୁଲରେ ମାଟ୍ରିକ୍ ପଢ଼ିବା ପରେ ରେଭେନ୍ସା କଲେଜରେ ଯୁକ୍ତ ଦୁଇ ବିଜ୍ଞାନ ପଢ଼ିଥିଲେ । ଏହାପରେ ବ୍ରହ୍ମପୁରର ଏକ ଘରୋଇ କଲେଜରୁ ମେକାନିକାଲ୍ ଇଂଜିନିୟରିଂରେ ବି.ଟେକ୍ ପାସ୍ କରିଥିଲେ । ଦିଲ୍ଲୀରେ ଏକ ଘରୋଇ ସଂସ୍ଥାରେ ତିନି ବର୍ଷ କାର୍ଯ୍ୟ କଲା ପରେ ଓଡ଼ିଶା ଫେରିଆସିଥିଲେ ଏବଂ ୨୦୧୮ ମସିହାରେ ଅନୁଷ୍ଠିତ ଏଏସଓ ପରୀକ୍ଷା ପାଇଁ ନିଜକୁ ପ୍ରସ୍ତୁତି କରିଥିଲେ । ମାତ୍ର ସେଥିରେ ସଫଳତା ପାଇଲେ ନାହିଁ । ହେଲେ ନିରାଶ ନ ହୋଇ ଓଏଏସ୍ ପରୀକ୍ଷା ପାଇଁ ଲାଗିପଡ଼ିଲେ ଏବଂ ପ୍ରଥମ ଥରରେ ପ୍ରଥମ ସ୍ଥାନ(ଟପ୍ପର୍) ହୋଇଥିଲେ ।
ଓଏଏସ୍ ରେଜଲ୍ଟ ପ୍ରକାଶ ପାଇବା ଦିନ ତାଙ୍କର ସାକ୍ଷାତକାର ପାଇଁ ସାମ୍ବାଦିକମାନେ ଲାଇନ୍ ଲଗାଇଥିଲେ । ଦୁର୍ନୀତି ଲୋପ ତଥା କଳୁଷିତ ବ୍ୟବସ୍ଥାକୁ ସଜାଡ଼ିବା ପାଇଁ ପ୍ରଚେଷ୍ଟା ରଖିବେ ବୋଲି ସମସ୍ତଙ୍କୁ ସାକ୍ଷାତକାରରେ କହିଥିଲେ । ସମାଜର ତଳସ୍ତରରେ ରହୁଥିବା ଲୋକଙ୍କ ପାଇଁ କାମ କରିବାର ଦୃଢ଼ ସଂକଳ୍ପ ଦେଖାଇଥିଲେ ।
ଓଏଏସ୍ ଟ୍ରେନିଂ ସରିଲା ପରେ ୨୦୨୧ ମସିହା ଡିସେମ୍ବର ୩୦ ତାରିଖରେ ଟ୍ରେନିଂ ରିଜର୍ଭ ଅଫିସର(ଟିଆରଓ) ଭାବେ ବାଲେଶ୍ୱରରୁ ତାଙ୍କର ସରକାରୀ ଚାକିରି ଜୀବନ ଆରମ୍ଭ ହୋଇଥିଲା । ୨୦୨୩ ଜାନୁଆରୀରେ ମୟୁରଭଞ୍ଜ ଜିଲ୍ଲା ଶାମଖୁଣ୍ଟାରେ ତହସିଲଦାର ଭାବେ ଯୋଗ ଦେଇଥିଲେ । ଦୁଇମାସ ତଳେ ସେଠାରୁ ବଦଳି ହୋଇ ଜୁଲାଇ ୧ ରେ ବାମରା ତହସିଲଦାର ଭାବେ ଯୋଗଦେଇଥିଲେ ।
