ଭୁବନେଶ୍ୱର: ନବୀନ ନିବାସ ପାଇଁ ଏବେ ଯଦି କିଏ ବେଶୀ ଟେନସନ୍ ସେ ହେଲେ ଶ୍ରୀମୟୀ ମିଶ୍ର । ସୋସିଆଲ୍ ମିଡିଆ ଜରିଆରେ ବିଜେଡି ନେତୃତ୍ୱର ଧଜିଆ ଉଡ଼ାଇଛନ୍ତି । ନିକଟରେ ତାଙ୍କର ଏକ ପୋଷ୍ଟ ହଇଚଇ ସୃଷ୍ଟି କରିଥିଲା । ମହାଭାରତର ‘ଧୃତରାଷ୍ଟ୍ର’ ଉପାଖ୍ୟାନ ଆଣି ନବୀନ ପଟ୍ଟନାୟକ ଏବଂ ଭି.କେ ପାଣ୍ଡିଆନଙ୍କୁ ପରୋକ୍ଷରେ ନିଶାନା କରିଥିଲେ । ସୋସିଆଲ୍ ମିଡିଆଠାରୁ ଆରମ୍ଭ କରି ବିଭିନ୍ନ ଗଣମାଧ୍ୟମରେ ଏହା ଚର୍ଚ୍ଚାର ବିଷୟ ପାଲଟିଥିଲା ।
ବରିଷ୍ଠ ନେତା ପ୍ରଫୁଲ୍ଲ ମଲ୍ଲିକଙ୍କ ଉପରେ ଆଜି କାର୍ଯ୍ୟାନୁଷ୍ଠାନ ପରିପ୍ରେକ୍ଷୀରେ ଶ୍ରୀମୟୀଙ୍କୁ ନେଇ ବିଜେଡିରେ ଗୁଞ୍ଜରଣ ସୃଷ୍ଟି ହୋଇଛି । ଶ୍ରୀମୟୀ ପରୋକ୍ଷରେ ନେତୃତ୍ୱର ଛାଲ ଉତାରିଛନ୍ତି । ଦଳୀୟ ଆଦେଶକୁ ବେଖାତିର କରିଛନ୍ତି । ବିଜେଡି ଶୃଙ୍ଖଳାର ମାପକାଠି ଶ୍ରୀମୟୀଙ୍କ ପାଇଁ ଲାଗୁ ହେବ ନା ନାହିଁ ବୋଲି କିଛି ନେତା ପ୍ରଶ୍ନ କରିଛନ୍ତି ।
ସୂଚନାଥାଉକି, ନିକଟରେ ଶ୍ରୀମୟୀଙ୍କୁ ବିଜୁ ମହିଳା ଜନତା ଦଳର ରାଜ୍ୟ ସାଧାରଣ ସମ୍ପାଦକ ଭାବେ ନିଯୁକ୍ତି ଦିଆଯାଇଥିଲେ ମଧ୍ୟ ସେ ଗ୍ରହଣ କରିନାହାନ୍ତି । ସ୍ନେହାଙ୍ଗିନୀ ଛୁରିଆଙ୍କ ନେତୃତ୍ୱରେ ନବନିଯୁକ୍ତ ମହିଳା ଟିମ୍ ନବୀନ ନିବାସ ଯାଇ ଦଳର ସଭାପତିଙ୍କୁ ଧନ୍ୟବାଦ ଦେଉଥିବା ବେଳେ ଶ୍ରୀମୟୀ ତାଙ୍କ ଘରେ ବସି ମହାଭାରତର ଧୃତରାଷ୍ଟ୍ର, ଦୁର୍ଯୋଧନ ଏବଂ ଦ୍ରୌପଦୀ ଚରିତ୍ରର ବ୍ୟାଖ୍ୟା ଖୋଜୁଥିଲେ । ନବୀନ ନିବାସ ଯିବା ଡାକରାକୁ ଫୁତ୍ କରିଦେଇଥିଲେ ।
ତାହାର ଦୁଇ ଦିନ ପରେ ଶ୍ରୀମୟୀ ସୋସିଆଲ୍ ମିଡିଆରେ ତାଙ୍କ ଭାବନା ବ୍ୟକ୍ତ କରିଥିଲେ । ଲେଖିଲେ- ଧୃତରାଷ୍ଟ୍ର ହସ୍ତିନାପୁର ରାଜା ଭାବେ ଦ୍ରୌପଦୀଙ୍କ ଅପମାନ ହେଉଥିବା ସଭାରେ ଅଧ୍ୟକ୍ଷତା କରୁଥିଲେ । ଅନ୍ୟାୟ ବିଷୟରେ ଜାଣି ମଧ୍ୟ ସେ ଏହି ଅପମାନ ରୋକିବାକୁ ଚେଷ୍ଟା କରି ନ ଥିଲେ । ଧୃତରାଷ୍ଟ୍ରଙ୍କର ତାଙ୍କ ପୁତ୍ରମାନଙ୍କ ପ୍ରତି ବିଶେଷ କରି ଦୁର୍ଯୋଧନଙ୍କ ପ୍ରତି ଅନ୍ଧପ୍ରୀତି ତାଙ୍କୁ ନିରବ ରହିବାକୁ ପ୍ରଭାବିତ କରିଥିଲା । କିଛି ଲୋକ ଧୃତରାଷ୍ଟ୍ର ପରି ଅନ୍ଧ, ଯେଉଁମାନେ ଅନ୍ୟାୟ ରୋକିବାକୁ ପ୍ରକୃତ ପ୍ରୟାସ କରନ୍ତି ନାହିଁ । ଇତିହାସ କେବେ ଏପରି ଅଯୋଗ୍ୟ ରାଜାଙ୍କୁ କ୍ଷମା କରେ ନାହିଁ । କାରଣ ସେମାନଙ୍କ ନିରବତା ଦୁଃଖଦ ପରିଣାମ ଆଣିଥାଏ ।
ଶ୍ରୀମୟୀଙ୍କ ଏହି ପୋଷ୍ଟ୍ କୁ ନେଇ ଗଣମାଧ୍ୟମରେ ଖବର ଛାଇ ଯାଇଥିବା ବେଳେ ତାଙ୍କର କିନ୍ତୁ ଦେଖା ମିଳିଲାନି । ସାମ୍ବାଦିକମାନେ ତାଙ୍କ ମୁହଁରୁ ପ୍ରତିକ୍ରିୟା ଆଣିବା ପାଇଁ ଚେଷ୍ଟା କରିଥିଲେ ମଧ୍ୟ ତାଙ୍କୁ ପାଇଲେନି ।
ବିଜୁ ମହିଳା ଜନତା ଦଳରେ ସେ ନିଯୁକ୍ତି ପାଇବା ଆଜିକୁ ୮ ଦିନ ହୋଇଗଲା । ମାତ୍ର ଶ୍ରୀମୟୀଙ୍କର ଦେଖାନାହିଁ । ନୂଆ ଦାୟିତ୍ୱ ଗ୍ରହଣ କରିବାକୁ ସେ କୁଆଡ଼େ ରାଜିନାହାନ୍ତି । ନବୀନ ନିବାସର ନିର୍ଦ୍ଦେଶରେ ସଭାନେତ୍ରୀ ଶ୍ରୀମତୀ ଛୁରିଆ ତାଙ୍କୁ ମନେଇବାକୁ ଉଦ୍ୟମ କରିଥିଲେ ମଧ୍ୟ ସଫଳ ହୋଇନାହାନ୍ତି । ଦଳୀୟ ପଦବୀ ଗ୍ରହଣ କରିବାକୁ ସେ ରାଜିନାହାନ୍ତି କି କାହାରି ସହ କଥା ହେବାକୁ ଚାହୁଁ ନାହାନ୍ତି ବୋଲି ବିଶ୍ୱସ୍ତ ସୂତ୍ରରୁ ଜଣାପଡ଼ିଛି ।
ଶ୍ରୀମୟୀ ଏବେ ନୁହଁନ୍ତି । ଗତବର୍ଷ ସାଧାରଣ ନିର୍ବାଚନ ପୂର୍ବରୁ ଅଦୃଶ୍ୟ ରହିଛନ୍ତି । ଏପରିକି କୌଣସି ଦଳୀୟ କାର୍ଯ୍ୟକ୍ରମରେ ତାଙ୍କୁ ଦେଖିବାକୁ ମିଳିନି ।
ଉଲ୍ଲେଖଥାଉକି, ଅଦୃଶ୍ୟ ନ ହେବା ପର୍ଯ୍ୟନ୍ତ ଶ୍ରୀମୟୀ ଥିଲେ ନବୀନ ନିବାସର ଅତି ନିକଟତର । ମନ୍ତ୍ରୀ, ବିଧାୟକ ନ ଥିଲେ ମଧ୍ୟ ଦଳ ଏବଂ ସରକାରରେ ତାଙ୍କର ପ୍ରବଳ ଖାଦି ଥିଲା । ସାଧାରଣ ନିର୍ବାଚନର ପ୍ରାୟ ୬ ମାସ ପୂର୍ବରୁ ତାଙ୍କ ପାଇଁ ନୂଆ ଯୋଜନା କରାଗଲା । ଅରୂପ ପଟ୍ଟନାୟକଙ୍କ ଜାଗାରେ ତାଙ୍କୁ ଭୁବନେଶ୍ୱର ଲୋକସଭା ଆସନରୁ ପ୍ରାର୍ଥୀ କରାଯିବ ବୋଲି ପ୍ରତିଶ୍ରୁତି ଦିଆଗଲା । ପରବର୍ତ୍ତୀ ସମୟରେ ତାଙ୍କର ବ୍ରାଣ୍ଡିଂ ପାଇଁ ଦଳ ପକ୍ଷରୁ ପ୍ରଚୁର ଅର୍ଥ ମଧ୍ୟ ଖର୍ଚ୍ଚ କରାଗଲା । ତେବେ ନିର୍ବାଚନର ଦିନ କେଇଟା ପୂର୍ବରୁ ସବୁ ଫୁସ୍ ହୋଇଗଲା । ମନ୍ମଥ ରାଉତରାୟଙ୍କୁ ଟିକେଟ୍ ଦିଆଗଲା । ଶ୍ରୀମୟୀ ଆଉ ମୁହଁ ଦେଖାଇ ପାରିଲେନି । ଅପମାନରେ ଲୁଚିଗଲେ ।
ସେବେଠାରୁ ତାଙ୍କୁ କେବଳ ସୋସିଆଲ୍ ମିଡିଆରେ ଦେଖିବାକୁ ମିଳୁଛି । ତାହା ପୁଣି ବିଭିନ୍ନ ରୂପରେ । କେତେବେଳେ ପୁରାଣ କଥା କହୁଛନ୍ତି, କେବେ ଆଧ୍ୟାତ୍ମିକ ପ୍ରବଚନ ଦେଉଛନ୍ତି ତ କେତେବେଳେ ସାହିତ୍ୟ ଚର୍ଚ୍ଚା କରୁଛନ୍ତି । ଆଉ ସବୁଥିରେ ରାଗ ଛୁଙ୍କ ଛାଡୁଛନ୍ତି । ସେଥିପାଇଁ ଡରିବା ଲୋକ ଡରିବେନି ଅବା କେମିତି??
