ଭୁବନେଶ୍ୱର: ଝାଡ଼ଖଣ୍ଡର ପଶ୍ଚିମ ସିଂହଭୂମ ଜିଲ୍ଲାର ଚାଇବାସା କୋଲହାନ ଜଙ୍ଗଲରେ ନକ୍ସଲଙ୍କ ଆକ୍ରମଣରେ ସହିଦ ହୋଇଛନ୍ତି ଓଡ଼ିଆ ଯବାନ ସୁଶାନ୍ତ କୁମାର ଖୁଣ୍ଟିଆ । ସିଆରପିଏଫର ୬୦ ବାଟାଲିୟନରେ କାର୍ଯ୍ୟରତ ସୁଶାନ୍ତ ଅନ୍ୟ ସାଥୀମାନଙ୍କ ସହ କମ୍ବିଂ ଅପରେସନରୁ ଫେରୁଥିବା ବେଳେ ନକ୍ସଲମାନେ ଆମ୍ବୁସ ଲଗାଇ ଆକ୍ରମଣ କରିଥିଲେ । ସୁଶାନ୍ତଙ୍କ ଛାତିରେ ଗୁଳି ବାଜିବାରୁ ସେ ସେହିଠାରେ ହିଁ ଟଳି ପଡ଼ିଥିଲେ । ଅନ୍ୟ ଜଣେ ଯବାନ ଉତ୍ତର ପ୍ରଦେଶର ମୁନ୍ନା ଲାଲ ଯାଦବଙ୍କ ଗୁରୁତର ଅବସ୍ଥାରେ ରାଞ୍ଚି ହସ୍ପିଟାଲରେ ଭର୍ତ୍ତି ହୋଇଛନ୍ତି ।
କେନ୍ଦୁଝର ଜିଲ୍ଲା ଆନନ୍ଦପୁରରେ ସହିଦ ସୁଶାନ୍ତଙ୍କ ଘର । ମାତ୍ର ଦୁଇ ମାସ ତଳେ ବିବାହ କରିଥିଲେ । ଦୁଃଖ ଓ ହୃଦୟ ବିଦାରକ କଥା ହେଉଛି, ଗତ ସାଢ଼େ ୩ ବର୍ଷ ଭିତରେ ଆଗପଛ ହୋଇ ନିଜ ବାପା ଓ ଦୁଇ ଭାଇଙ୍କୁ ହରାଇଥିବା ସୁଶାନ୍ତ ଏବେ ନିଜେ ଆରପାରିକୁ ଚାଲିଯାଇଛନ୍ତି । ଆଜି ତାଙ୍କ ମୃତୁ୍ୟ ଖବର ଆସିବା ବେଳକୁ ଘରେ ତାଲା ପଡ଼ିଥିଲା । ଘରେ ବଡ଼ ବୋହୁ ଓ ଏକମାତ୍ର ନାତିକୁ ଧରି ରହୁଥିବା ରୋଗିଣା ମା’ ୪ ଦିନ ହେଲା ଭୁବନେଶ୍ୱରର ଆପୋଲୋ ହସ୍ପିଟାଲରେ ଭର୍ତ୍ତି ହୋଇଥିଲା ବେଳେ ଏନଏମଆର ନର୍ସ ଚାକିରି କରିଥିବା ପତ୍ନୀ ତେଲକୋଇ ଚାକିରି ଜାଗାରେ ଥିଲେ ।
ତାଙ୍କ ପରିବାରର କରୁଣ କାହାଣୀ ଶୁଣିଲେ କେହି ବି ଥୟ ଧରି ରହିପାରିବେ ନାହିଁ । ଆନନ୍ଦପୁର ପୌରାଞ୍ଚଳ ୪ ନମ୍ବର ୱାର୍ଡ ବାସିନ୍ଦା ସୁଶାନ୍ତଙ୍କ ବାପା ଆତୁଳ ଖୁଣ୍ଟିଆ ପକ୍ଷପାତ ରୋଗରେ ପୀଡ଼ିତ ୨୦୨୦ ଫେବ୍ରୁଆରୀ ମାସରେ ପ୍ରାଣ ହରାଇଥିଲେ । ମଝିଆ ଭାଇ ୨୦୨୨ ମସିହାରେ କ୍ୟାନସରରେ ପ୍ରାଣ ହରାଇଥିଲେ । ଚଳିତବର୍ଷ ଜାନୁଆରୀ ମାସରେ ତାଙ୍କର ବଡ଼ ଭାଇ ପ୍ରାଣ ହରାଇଥିଲେ । ଜାମସେଦପୁରରେ ଚାକିରି କରିଥିବା ବଡ଼ଭାଇଙ୍କର ରହସ୍ୟଜନକ ଅବସ୍ଥାରେ ମୃତ୍ୟୁ ହୋଇଥିଲା । ସେ ଆତ୍ମହତ୍ୟା କରିଥିବା କୁହାଯାଉଛି । ତାଙ୍କର ଜଣେ ବିବାହିତା ଭଉଣୀ ଅଛନ୍ତି । ଭୁବନେଶ୍ୱରରେ ଚିକିତ୍ସିତ ହେଉଥିବା ମା’ ଙ୍କ ପାଖରେ ଏବେ ଅଛନ୍ତି ।
ଖୁଣ୍ଟିଆ ପରିବାରର ଏକମାତ୍ର ସାହା ଭରସା ସୁଶାନ୍ତଙ୍କର ଦୁଃଖଦ ବିୟୋଗ ଅଞ୍ଚଳବାସୀଙ୍କୁ ମ୍ରିୟମାଣ କରିଦେଇଛି । ସମସ୍ତଙ୍କ ଆଖିରୁ ଲୁହ ଝରୁଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସୁଶାନ୍ତଙ୍କ ମୃତ୍ୟୁରେ ଗଭୀର ଶୋକପ୍ରକାଶ କରିଛନ୍ତି ।
