ଭୁବନେଶ୍ୱର: ଏଥର ବିଜେଡି ସହ ଜୋରଦାର ଲଢ଼େଇ କରିବ ବିଜେପି । ଓଡ଼ିଶା ନେତାଙ୍କୁ ଦିଲ୍ଲୀରୁ ଏଥିପାଇଁ ଗ୍ରୀନ୍ ସିଗନାଲ୍ ମିଳିଯାଇଛି । ନିର୍ବାଚନ ଜିତିବାର ରଣକୋ÷ଶଳ ଧରି ଓଡ଼ିଶା ଆସିଛନ୍ତି ରାଷ୍ଟ୍ରୀୟ ସଂଗଠନ ମହାମନ୍ତ୍ରୀ ବିଏଲ୍ ସନ୍ତୋଷ, କ୍ଷେତ୍ରୀୟ ପ୍ରଭାରୀ ସୁନୀଲ ବଂଶଲ ଏବଂ ସହପ୍ରଭାରୀ ବିଜୟ ପାଲ ସିଂ ତୋମାର । ଡିସେମ୍ବର ୩୦ ରେ ଭୁବନେଶ୍ୱର ରାଜ୍ୟ ମୁଖ୍ୟାଳୟରେ ସେମାନେ ଓଡ଼ିଶା ପାଇଁ ବିଜେପି ଆଭିମୁଖ୍ୟ ସ୍ପଷ୍ଟ କରିଥିବା ବେଳେ ଆଜି ରାଉରକେଲାରେ ରାଜ୍ୟ ପଦାଧିକାରୀ, ବିଭିନ୍ନ କମିଟି ଏବଂ ମୋର୍ଚ୍ଚାର ୫୦ ଜଣ ନେତାଙ୍କୁ ନେଇ ଚିନ୍ତନ ବୈଠକ କରିଛନ୍ତି । ଓଡ଼ିଶାରେ ବିଜେଡି ସହ ଲଢ଼େଇର ମନ୍ତ୍ର ଦେଇଛନ୍ତି ମହାମନ୍ତ୍ରୀ ସନ୍ତୋଷ ଏବଂ କ୍ଷେତ୍ରୀୟ ପ୍ରଭାରୀ ବଂଶଲ ।
ଗତ ନିର୍ବାଚନରେ ୧୦ ହଜାରରୁ କମ୍ ବ୍ୟବଧାନରେ ଜିତିଥିବା ୪୦ଟି ବିଧାନସଭା ଆସନକୁ ଦଳ ଫୋକସ୍ କରିଛି । ସେହିଭଳି ୨୧ଟି ଯାକ ଲୋକସଭା ଆସନ ଉପରେ ଆଖି ରଖାଯାଇଛି । ଏଥିପାଇଁ ସଂଗଠନକୁ ସୁଦୃଢ଼ କରି ଆଗକୁ ବଢ଼ିବାକୁ ଯୋଜନା ପ୍ରସ୍ତୁତ ହୋଇଛି । କେନ୍ଦ୍ରୀୟ ନେତାମାନଙ୍କୁ ଏହାର ସଂଚାଳନ ଦାୟିତ୍ୱ ଦିଆଯିବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଗୃହମନ୍ତ୍ରୀ ଅମିତ୍ ଶାହା, ରାଷ୍ଟ୍ରୀୟ ଅଧ୍ୟକ୍ଷ ଜେ.ପି.ନଡ୍ଡା, ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ସମେତ ଅନ୍ୟ ପ୍ରମୁଖ ନେତାମାନେ ଓଡ଼ିଶାରେ ଘନ ଘନ ନିର୍ବାଚନ ପ୍ରଚାର କରିବେ ।
ଯୁବ ଓ ନୂଆ ଭୋଟରଙ୍କ ଭୋଟ ହାତେଇବା ପାଇଁ ସ୍ୱତନ୍ତ୍ର ରଣନୀତି ପ୍ରସ୍ତୁତ ହୋଇଛି । ଏଥିପାଇଁ ପ୍ରତି ନିର୍ବାଚନମଣ୍ଡଳୀରେ ଯୁବ ସମ୍ମିଳନୀ କରାଯିବ । ସେମାନଙ୍କ ଜରିଆରେ ମୋଦୀ ସରକାରଙ୍କ ବିଭିନ୍ନ ଉନ୍ନୟନମୂଳକ ଯୋଜନା ଏବଂ ନବୀନ ସରକାରଙ୍କ ବିଫଳତାର ପ୍ରଚାର କରାଯିବ । ସ୍ଥାନୀୟ ନେତାମାନେ ଘର ଘର ବୁଲି ଲୋକଙ୍କ ସହ ସମ୍ପର୍କ ଯୋଡିବେ । ଆସନ୍ତା ସପ୍ତାହରୁ ଏହି କାର୍ଯ୍ୟକ୍ରମ ଜୋରଦାର ଢ଼ଙ୍ଗରେ ଆରମ୍ଭ କରିବାକୁ ସ୍ଥିର ହୋଇଛି । ଏହି ରଣନୀତିରେ ବିଜେଡିର ଅସନ୍ତୁଷ୍ଟ ନେତାଙ୍କ ଉପରେ ନଜର ରଖିବାକୁ ମଧ୍ୟ ଯୋଜନା କରାଯାଇଛି । ଏହାଦ୍ୱାରା ଓଡ଼ିଶାରେ କ୍ଷମତା ଦଖଲ ସହଜ ହୋଇଯିବ ବୋଲି ବିଜେପି ନେତାଙ୍କ ହୃଦୟଙ୍ଗମ ହୋଇଛି ।
ତେବେ ଓଡ଼ିଶାରେ ବିଜେପିର ମୁଖ୍ୟମନ୍ତ୍ରୀ ଚେହେରା କିଏ ହେବ ତାହା ସ୍ପଷ୍ଟ ହୋଇପାରିନାହିଁ । ଗତଥର କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଅଘୋଷିତ ମୁଖ୍ୟମନ୍ତ୍ରୀ ଚେହେରା ହୋଇଥିଲେ ମଧ୍ୟ ଏଥର ତାଙ୍କର ଭୂମିକା ଏ ପର୍ଯ୍ୟନ୍ତ ଅସ୍ପଷ୍ଟ ରହିଛି । ଖାସ୍ କରି ସଂଗଠନ ମହାମନ୍ତ୍ରୀ ଶ୍ରୀ ସନ୍ତୋଷଙ୍କ ଦଳୀୟ ରଣନୀତି ବୈଠକରେ ତାଙ୍କର ଅନୁପସ୍ଥିତି ଦେଖିବାକୁ ମିଳୁଛି । ଭୁବନେଶ୍ୱରରେ ଅନୁଷ୍ଠିତ ଓଡ଼ିଶାର ବିଜେପି ଦଖଲ ରଣନୀତି ବୈଠକ ଏବଂ ରାଉରକେଲା ଚିନ୍ତନ ବୈଠକରେ ସେ ଯୋଗଦେଇନାହାନ୍ତି । ଏହାକୁ ନେଇ ରାଜନୈତିକ ମହଲରେ ବିଭିନ୍ନ ଚର୍ଚ୍ଚା ଆଲୋଚନା ଜାରି ରହିଛି ।
