ଭୁବନେଶ୍ୱର: ମନ୍ତ୍ରିମଣ୍ଡଳରେ ସାମିଲ ହୋଇଛନ୍ତି ବିକ୍ରମ କେଶରୀ ଆରୁଖ, ସୁଦାମ ମାର୍ଣ୍ଡି ଏବଂ ସାରଦା ପ୍ରସାଦ ନାୟକ । ସମସ୍ତଙ୍କୁ ମିଳିଛି କ୍ୟାବିନେଟ୍ ପାହ୍ୟା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉପସ୍ଥିତିରେ ରାଜ୍ୟପାଳ ପ୍ରଫେସର ଗଣେଶୀ ଲାଲ୍ ସେମାନଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି । ଲୋକସଭା ଭବନର କନଭେନସନ୍ ହଲ୍ ରେ ଆଜି ଶପଥ ଗ୍ରହଣ ସମାରୋହ ଅନୁଷ୍ଠିତ ହୋଇଥିଲା ।
ପୂର୍ବ ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ, ସକାଳ ୯.୫୦ ମିନିଟ୍ ରେ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ମୁଖ୍ୟ ଶାସନ ସଚିବ ପ୍ରଦୀପ କୁମାର ଜେନା ପ୍ରଥମେ ତିନି ମନ୍ତ୍ରୀଙ୍କ ନିଯୁକ୍ତି ସଂକ୍ରାନ୍ତୀୟ ବିଜ୍ଞପ୍ତି ପାଠ କରିଥିଲେ । ଏହାପରେ ୯.୫୨ ମିନିଟ୍ ରେ ପ୍ରଥମେ ବିକ୍ରମ କେଶରୀ ଆରୁଖଙ୍କୁ ରାଜ୍ୟପାଳ ପଦ ଓ ଗୋପନୀୟତାର ଶପଥ ପାଠ କରାଇଥିଲେ । ତାଙ୍କ ପରେ ସୁଦାମ ମାର୍ଣ୍ଡି ୯.୫୪ ମିନିଟ୍ ରେ ଏବଂ ସାରଦା ପ୍ରସାଦ ନାୟକ ୯.୫୭ ମିନିଟ୍ ରେ ଶପଥ ପାଠ କରିଥିଲେ । ୯.୫୯ ମିନିଟ୍ ରେ ସମାରୋହ ସମାପ୍ତ ଘୋଷଣା ହୋଇଥିଲା ।
ଶପଥ ଗ୍ରହଣ ସମାରୋହର ୧୦ ମିନିଟ୍ ପୂର୍ବରୁ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ କନଭେନସନ୍ ହଲ୍ ରେ ପହଞ୍ଚିଥିଲେ । ତାଙ୍କ ପରେ ପରେ ରାଜ୍ୟପାଳ ପ୍ରଫେସର ଲାଲ୍ ଆସିଥିଲେ । ମୁଖ୍ୟମନ୍ତ୍ରୀ ଓ ରାଜ୍ୟପାଳ ପହଞ୍ଚିବା ପୂର୍ବରୁ ସବୁ ମନ୍ତ୍ରୀ, ବିଧାୟକ ଓ ସାଂସଦଙ୍କ ସମେତ ଉଚ୍ଚ ପଦାଧିକାରୀମାନେ ସେଠାରେ ଉପସ୍ଥିତ ହୋଇଥିଲେ ।
