ଭୁବନେଶ୍ୱର: ଓଡ଼ିଶା ଡିଜିପି ନିଯୁକ୍ତି ସମ୍ପର୍କିତ ମାମଲାର ଶୁଣାଣି ୧୬ ତାରିଖକୁ ଘୁଞ୍ଚିଛି । ତେବେ ଚୟନ ତାଲିକାରୁ ବାଦ୍ ପଡ଼ିଥିବା ବରିଷ୍ଠ ଆଇପିଏସ୍ ସୁଶାନ୍ତ ନାଥ ମାମଲାରେ ପକ୍ଷଭୁକ୍ତ ହେବା ଏବଂ ଆମିକସକ୍ୟୁରିଙ୍କ ଦ୍ୱିତୀୟ ରିପୋର୍ଟ ତଥ୍ୟ ପଦାକୁ ଆସିଲା ପରେ ହଲଚଲ ସୃଷ୍ଟି ହୋଇଛି ।
ଓଡ଼ିଶା ଡିଜିପି ଚୟନ ପ୍ରକ୍ରିୟାକୁ ନେଇ କୋର୍ଟ ନିଯୁକ୍ତ ଆମିକସକ୍ୟୁରି ରାଜୁ ରାମଚନ୍ଦ୍ରନ୍ ଗୁରୁତ୍ୱପୂର୍ଣ୍ଣ ପ୍ରଶ୍ନ ରଖିଛନ୍ତି । ଡିଜିପି ଚୟନ ପ୍ୟାନେଲ୍ କୁ ନେଇ ଆଶଙ୍କା ଉଠାଇଛନ୍ତି । ଅସ୍ଥାୟୀ ଡିଜିପି କ୍ୟାଡର ପଦବୀ ସୃଷ୍ଟି କରି ଯୋଗ୍ୟ ଅଧିକାରୀଙ୍କ ତାଲିକା ବଦଳାଯିବା ଚୟନ ପ୍ରକ୍ରିୟାର ସ୍ୱଚ୍ଛତା ଉପରେ ପ୍ରଶ୍ନ ସୃଷ୍ଟି କରୁଛି । ସାଧାରଣ ଭାବେ ଯୋଗ୍ୟତା ନ ଥିବା ଜଣେ ବ୍ୟକ୍ତିଙ୍କୁ ଡିଜିପି କରିବାର ଏହା ପ୍ରୟାସ ଥିଲା ନା ନାହିଁ ଜାଣିବାକୁ ଚାହିଁଛନ୍ତି ।
ଡିଜିପି ଚୟନ ପାଇଁ ୧୪ ମେ’ ରେ ରାଜ୍ୟ ସରକାର ପ୍ରଥମ ଯୋଗ୍ୟତା ତାଲିକା ପ୍ରକାଶ କରିଥିଲେ । କିନ୍ତୁ ଦୁଇ ଅଧିକାରୀଙ୍କ ପଦୋନ୍ନତି ପରେ ୧୦ ଅଗଷ୍ଟରେ ଏକ ସଂଶୋଧିତ ତାଲିକା ପ୍ରସ୍ତୁତ ହୋଇଥିଲା । ଆମିକସକ୍ୟୁରି ମତରେ ୧୦ ଅଗଷ୍ଟ ତାଲିକା ବଦଳରେ ୧୪ ମେ ମୂଳ ତାଲିକାକୁ ବିଚାର କରିବା ଉଚିତ । ଏହାଦ୍ୱାରା ଶେଷ ମୁହୂର୍ତ୍ତର ଚୟନ ପ୍ରକ୍ରିୟାକୁ ପ୍ରଭାବିତ କରିବାର ଆଶଙ୍କା ରହିବ ନାହିଁ । ଏହି ମାମଲାର ଅନ୍ୟ ଦିଗ ହେଉଛି ଦୁଇଟି ଅସ୍ଥାୟୀ ଡିଜି ପଦବୀ ସୃଷ୍ଟି । ଫେବ୍ରୁଆରୀ ୨୦୨୬ରେ କେନ୍ଦ୍ର ଗୃହ ମନ୍ତ୍ରଣାଳୟ ଦୁଇଟି ଅସ୍ଥାୟୀ ଡିଜି ପଦବୀ ପାଇଁ ସହମତି ଦେଇ ନ ଥିଲେ । କିନ୍ତୁ ରାଜ୍ୟ ସରକାର ୮ ଅଗଷ୍ଟରେ ପୁଣି ଅନୁରୋଧ କରିବା ପରେ ଗୃହ ମନ୍ତ୍ରଣାଳୟ ସହମତି ଦେଇଥିଲେ । ଦୁଇଟି ପଦବୀର ଜରୁରୀ ଆବଶ୍ୟକତାର ସ୍ପଷ୍ଟ କାରଣ ଦର୍ଶାଯାଇ ନ ଥଲେ ମଧ୍ୟ କାହିଁକି ସହମତି ଦିଆଗଲା ବୋଲି ଆମିକସକ୍ୟୁରି ପଚାରିଛନ୍ତି । ଏହାର ମାତ୍ର ୯ ଦିନ ପରେ ୧୬ ଅଗଷ୍ଟରେ ତତ୍କାଳୀନ ଡିଜିପିଙ୍କ ଅବସର ପରେ ଏକ ପଦ ଖାଲି ହେବାକୁ ଥିଲା । ମାତ୍ର ତା’ ପୂର୍ବରୁ ଅସ୍ଥାୟୀ ପଦବୀ ସୃଷ୍ଟିର ଆବଶ୍ୟକତା କ’ଣ ଥିଲା ବୋଲି ସେ ପ୍ରଶ୍ନ କରିଛନ୍ତି ।
ସେହିଭଳି ୟୁପିଏସସିକୁ ପ୍ରସ୍ତାବ ପଠାଇ ସାରିବା ପରେ ସୁଶାନ୍ତ ନାଥଙ୍କ ଇଣ୍ଟିଗ୍ରିଟ୍ ସାର୍ଟିଫିକେଟ୍ କାହିଁକି ଅଟକାଗଲା ବୋଲି ଆମିକସକ୍ୟୁରି ପ୍ରଶ୍ନ କରିଛନ୍ତି । ୪ ଅଗଷ୍ଟରେ ସିବିଆଇ ଷ୍ଟାଟସ୍ ରିପୋର୍ଟ କଥା ମଧ୍ୟ ସେ ଉଲ୍ଲେଖ କରିଛନ୍ତି । ଷ୍ଟାଟସ୍ ରିପୋର୍ଟରେ ସୁଶାନ୍ତଙ୍କ ବିରୋଧରେ ଅପରାଧିକ ତଦନ୍ତ ବିଚାରାଧୀନ ନ ଥିଲା । ତାଙ୍କୁ ପଚରାଉଚୁରା ପାଇଁ ମଧ୍ୟ କୌଣସି ଅନୁରୋଧ ନ ଥିଲା । ମାତ୍ର ପୁଣି କ’ଣ ହେଲା ବୋଲି ପ୍ରଶ୍ନ କରିଛନ୍ତି ଆମିକସକ୍ୟୁରି ।
