ଭୁୁବନେଶ୍ୱର: ଦୀର୍ଘ ୨୪ ବର୍ଷ ଧରି କ୍ଷମତାରେ ଥିବା ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସୁରକ୍ଷା ବ୍ୟବସ୍ଥାକୁ ରାଜ୍ୟର ଡବଲ୍ ଇଞ୍ଜିନ୍ ସରକାର ଇତିମଧ୍ୟରେ ପ୍ରତ୍ୟାହାର କରିନେଇଛନ୍ତି । ଗତ ଜୁନ୍ ମାସରେ ନୂଆ ସରକାର ଆସିଲା ପରେ ନବୀନଙ୍କ ଜେଡ୍ ପ୍ଲସ୍ ସୁରକ୍ଷାକୁ ପ୍ରଥମେ ହଟା ଯାଇଥିଲା । ନବୀନ ନିବାସ ଭିତରେ ଓ ବାହାରେ ୩ ଟି ସିଫ୍ଟ୍ରେ ୨୪ ଘଣ୍ଟିଆ ସୁରକ୍ଷା ଦାୟିତ୍ୱରେ ଥିବା ଏସଏସବି ବାଟାଲିୟନର ୩୦୦ ସିପାହୀ ସଂଖ୍ୟା ୪୫ କୁ କମାଇ ଦିଆଯାଇଥିଲା । ପୂର୍ବତନ ମୁଖ୍ୟମନ୍ତ୍ରୀ ଭାବେ ସୁରକ୍ଷା ଦୃଷ୍ଟିରୁ ପାଇଲଟିଂ ଲସକର୍ଟ, ସୁରକ୍ଷା କର୍ମୀଙ୍କ ସହ ଦୁଇଜଣ ହାବିଲଦାରଙ୍କ ଅଧୀନରେ ନବୀନ ନିବାସରେ ୪୫ ଜଣ ସିପାହୀଙ୍କୁ ମୁତୟନ କରାଯାଇଥିଲା । ମାତ୍ର ଏବେ ତାହାକୁ ପୂରାପୂରି ସଙ୍କୁଚିତ କରାଯାଇଛି । ବିଧାୟକ ତଥା ବିରୋଧୀ ଦଳ ନେତା ଭାବେ ତାଙ୍କୁ କେବଳ ଦୁଇଜଣ ପିଏସଓ(ହାବିଲଦାର) ଯୋଗାଇ ଦିଆଯାଇଛି ।
ନବୀନ ପଟ୍ଟନାୟକଙ୍କ ସୁରକ୍ଷା ବ୍ୟବସ୍ଥା ହଟିଥିବାରୁ ତାଙ୍କର ବିରୋଧୀମାନେ ଖୁସିରେ କୁରୁଳିଛନ୍ତି । ଏହି ଖୁସିରେ ଶାସକ ଦଳର କିଛି ନେତା ଓ ଚେଲା ଚାମଣ୍ଡା ୫୬ ଇଞ୍ଚର ଛାତି ଦେଖାଉଛନ୍ତି । ନବୀନ ନିବାସ ଖାଁ ଖାଁ ହୋଇଗଲା ଏବଂ ନବୀନ ବାବୁ ରାଜାରୁ ପ୍ରଜା ହୋଇଗଲେ ବୋଲି ଟାହିଟାପରା କରି କିଛି ପ୍ରମୁଖ ମିଡିଆ ଲଗାତର ଖବର ପରିବେଷଣ କରୁଛନ୍ତି । କିଛି ମନ୍ତ୍ରୀଙ୍କ ସମେତ ବରିଷ୍ଠ ବିଧାୟକ ତଥା ପୂର୍ବତନ ବିରୋଧୀ ଦଳ ନେତା ଜୟ ନାରାୟଣ ମିଶ୍ର ସବୁଠାରୁ ବେଶୀ ଉତ୍ସାହିତ ହୋଇଯାଇଛନ୍ତି । ନବୀନ ବାବୁଙ୍କୁ ତାଙ୍କ ସମସ୍କନ୍ଦ ନେତା ଭାବି ଟିଭିରେ ବାଇଟ୍ ଦେଇଛନ୍ତି ।
ମୋଟାମୋଟି ଭାବେ, ନବୀନଙ୍କ ସୁରକ୍ଷା ବ୍ୟବସ୍ଥା ପ୍ରତ୍ୟାହାରରେ ଖୁସିରେ ମସଗୁଲ ହୋଇଛନ୍ତି ବିଜେପିର କିଛି ନେତା ଓ ଅନ୍ଧ ସମର୍ଥକ । ମୋହନ ସରକାରଙ୍କ ପଦକ୍ଷେପକୁ ସେମାନେ ପ୍ରଶଂସାରେ ପୋତୁ ପକଉଛନ୍ତି । ଏଥିସହ ସୋସିଆଲ୍ ମିଡିଆରେ ନବୀନ ପଟ୍ଟନାୟକଙ୍କୁ ତାତ୍ସଲ୍ୟ କରି ତାଙ୍କର ଚଉଦ ପୁରୁଷ ଉଦ୍ଧାର କରୁଛନ୍ତି । ଉଚ୍ଚା ନବୀନଙ୍କୁ ସେମାନେ ନୀଚ୍ଚା ଦେଖାଇବାରେ ଲାଗିପଡ଼ିଛନ୍ତି ।
ତେବେ ନବୀନ ପଟ୍ଟନାୟକଙ୍କୁ ନ୍ୟୁନ୍ କରିବା ପାଇଁ ହେଉଥିବା ଉଦ୍ୟମକୁ ଖୋଦ୍ ବିଜେପିର ଏକ ବଡ଼ ଗୋଷ୍ଠୀ ସହଜରେ ଗ୍ରହଣ କରୁନାହାନ୍ତି । ଏହା ସରକାର ପାଇଁ ବୁମେରାଂ ହୋଇପାରେ ବୋଲି କିଛି ବରିଷ୍ଠ ନେତା ସ୍ୱୀକାର କରିଛନ୍ତି । ସେମାନଙ୍କ ମତରେ ନବୀନ ବାବୁ ସାଧାରଣ ନେତା ନୁହଁନ୍ତି । କ୍ଷମତା ଚାଲିଗଲା ପରେ ତାଙ୍କୁ ଆଉ କାହାରି ସହ ତୁଳନା କରି ସୁରକ୍ଷା ବ୍ୟବସ୍ଥାର ମାପଚୁପ୍ କରିବା ଉଚିତ୍ ନୁହେଁ । ରାଜ୍ୟରେ ନବୀନଙ୍କ ଲୋକପ୍ରିୟତା ଆଜି ବି ଅତୁଟ୍ ଅଛି ଏବଂ ତାଙ୍କ ପ୍ରତି ଓଡ଼ିଶାବାସୀଙ୍କର ନିବିଡ଼ ଭଲ ପାଇବା ଓ ସମ୍ମାନ ରହିଛି । ଏହାକୁ ଅଣଦେଖା କରିବା ବିଜେପି ପାଇଁ ଆଦୌ ଶୁଭଙ୍କର ନୁହେଁ । ଏହାଦ୍ୱାରା ନବୀନ ଛୋଟ ହୋଇନାହାନ୍ତି ବରଂ ଲୋକଙ୍କ ହୃଦୟକୁ ଅଧିକ ଛୁଇଁଥିବା ବିଶ୍ୱାସ ହେଉଛି ବୋଲି ଉପକୂଳ ଓଡ଼ିଶାର ଜଣେ ଟାଣୁଆ ନେତା କହିଛନ୍ତି ।
ଜଣେ ପୂର୍ବତନ ମୁଖ୍ୟମନ୍ତ୍ରୀ ଏବଂ ବିରୋଧୀ ଦଳର ନେତାଙ୍କୁ କିଭଳି ସୁରକ୍ଷା ଦିଆଯିବ ତାହାର ନିର୍ଦ୍ଦିଷ୍ଟ ପ୍ରୋଟୋକଲ୍ ଅଛି । ନବୀନଙ୍କ କ୍ଷେତ୍ରରେ ଯାହା ହୋଇଛି ତାହା ପ୍ରଶାସନିକ ବିଧି ବ୍ୟବସ୍ଥା ଭିତରେ କରାଯାଇଛି । ଏହାକୁ ଚାଲେଂଜ କରାଯାଇପାରିବ ନାହିଁ । ଅନ୍ୟପକ୍ଷରେ ଭିଆଇପି ସୁରକ୍ଷା ବ୍ୟବସ୍ଥା ତଦାରଖ ପାଇଁ ଥିବା କମିଟିର ନିଷ୍ପତ୍ତି ଅନୁଯାୟୀ ଏହି ପଦକ୍ଷେପ ନିଆଯାଇଥିବା ଡିଜି ୱାଇ.ବି.ଖୁରାନିଆ କହିଛନ୍ତି । ଯାହା କହିଲେ ବି, ସରକାରଙ୍କ ବିନା ଇଙ୍ଗିତରେ ଏଭଳି ନିଷ୍ପତ୍ତି ନିଆଯାଇଥିବା କେହି ବିଶ୍ୱାସ କରୁନାହାନ୍ତି । ସବୁ ନିୟମରେ କିଛି ବ୍ୟତିକ୍ରମ ରହିଥାଏ । ନବୀନ ପଟ୍ଟନାୟକ ସେହି ବ୍ୟତିକ୍ରମ ବୋଲି ଅନେକ ବିଚାର କରୁଛନ୍ତି ।
ନବୀନଙ୍କ ସୁରକ୍ଷା କ୍ଷେତ୍ରରେ ମୁଖ୍ୟମନ୍ତ୍ରୀ ମୋହନ ମାଝୀ ଏବଂ ତାଙ୍କର ପରାମର୍ଶଦାତାମାନେ ଉଦାର ମନୋଭାବ ରଖିବା ଦରକାର ଥିଲା ବୋଲି ବିଭିନ୍ନ ମହଲରେ ଆଲୋଚନା ହେଉଛି । ନବୀନଙ୍କର ଗୁରୁତ୍ୱ କେତେ ତାହା ନୂଆ ସରକାରଙ୍କ ଶପଥ ଗ୍ରହଣ ଉତ୍ସବରେ ଖୋଦ୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ମୁଖ୍ୟମନ୍ତ୍ରୀ ଏବଂ ତାଙ୍କର ମନ୍ତ୍ରୀମଣ୍ଡଳକୁ ସୂଚେଇ ଦେଇଥିଲେ । ସେହି ମଞ୍ଚରେ ପ୍ରଧାନମନ୍ତ୍ରୀ ତାଙ୍କୁ ସୌଜନ୍ୟତା ଓ ଶିଷ୍ଟାଚାରରେ ଭରିଦେଇଥିଲେ । ନବୀନ ବାବୁ ହାରଜିତ୍ ଉଦ୍ଧ୍ୱର୍ରେ ବୋଲି ଓଡ଼ିଶାବାସୀଙ୍କୁ ଜଣାଇଦେଇଥିଲେ । ପରବର୍ତ୍ତୀ ସମୟରେ ମୁଖ୍ୟମନ୍ତ୍ରୀ ମୋହନ ମାଝୀ ଶିଷ୍ଟାଚାରପୂର୍ବକ ନବୀନ ନିବାସ ଯାଇ ତାଙ୍କୁ ସର୍ବଦଳୀୟ ବୈଠକକୁ ନିମନ୍ତ୍ରଣ କରିବାର ଉଦାହରଣ ବି ରହିଛି ।
ମାତ୍ର ପ୍ରଶାସନିକ ବିଧି ବ୍ୟବସ୍ଥା ଓ ନିୟମକାନୁନ ଆଳରେ ନବୀନଙ୍କ ସୁରକ୍ଷା ବ୍ୟବସ୍ଥାକୁ ସମ୍ପୂର୍ଣ୍ଣ ସଙ୍କୋଚିତ କରିବା ଏବଂ ଏହାକୁ ନେଇ ବିଜେପି ଚେଲାଚାମଣ୍ଡମାନେ ନବୀନଙ୍କୁ ନ୍ୟୁନ ଦେଖାଇ ଉପହାସ କରିବା ଘଟଣାକୁ ଦଳ ଭିତରେ ଓ ବାହାରେ ଅଧିକାଂଶ ନାପସନ୍ଦ କରିଛନ୍ତି । ଏହା ନବୀନଙ୍କ ଭାବମୂର୍ତ୍ତି ଆହୁରି ବଢ଼େଇ ଦେଇଛି ବୋଲି ସେମାନଙ୍କର ମତ ।
କେବଳ ଓଡ଼ିଶା କାହିଁକି, ଭାରତବର୍ଷର ଲୋକପ୍ରିୟ ନେତା ଭାବେ ପ୍ରତିଷ୍ଠା ଅର୍ଜନ ରଖିଥିବା ନବୀନ ପଟ୍ଟନାୟକଙ୍କ ପ୍ରତି ମୋହନ ସରକାରଙ୍କର ରାଜନୈତିକ ଶିଷ୍ଟାଚାର ରହିବା କଥା । ଏଥିରେ ସରକାର ଛୋଟ ହୋଇଯାଇ ନ ଥାନ୍ତା । ଆଗାମୀ ଦିନରେ ରାଜ୍ୟ ବିଜେପିକୁ ଏହା ଭାରୀ ପଡ଼ିପାରେ ବୋଲି କୁହାଯାଉଛି ।
