ବିଏମସିରୁ ବିଦା ହେଲେ କୁଲାଙ୍ଗେ

ଭୁବନେଶ୍ୱର: ବିଏମସି କମିସନର ପଦରୁ ବିଜୟ ଅମୃତା କୁଲାଙ୍ଗେଙ୍କୁ ରାଜ୍ୟ ସରକାର ଆଜି ହଟାଇ ଦେଇଛନ୍ତି । ତାଙ୍କ ସ୍ଥାନରେ ୨୦୦୫ ବ୍ୟାଚ୍ ର ଆଏଏସ୍ ରାଜେଶ ପ୍ରଭାକର ପାଟିଲ୍ ଙ୍କୁ ନିଯୁକ୍ତି ଦିଆଯାଇଛି । ଶ୍ରୀ ପାଟିଲ୍ ବିଏମସି କମିସନର ଦାୟିତ୍ୱ ସହ ସମବାୟ ବିଭାଗର କମିସନର ତଥା ସଚିବ ଏବଂ ନଗର ଉନ୍ନୟନ ବିଭାଗର ସ୍ୱତନ୍ତ୍ର ସଚିବ ଭାବେ ଅତିରିକ୍ତ ଦାୟିତ୍ୱ ତୁଲାଇବେ । ବିଦାୟୀ କମିସନର ଶ୍ରୀ କୁଲାଙ୍ଗେ ମାସେ ଯାଏଁ ଛୁଟିରେ ଯାଇଛନ୍ତି । ଛୁଟିରୁ ଫେରିଲା ପରେ ତାଙ୍କର ନୂଆ ନିଯୁକ୍ତି ଆଦେଶ ପ୍ରକାଶ ପାଇବ । ସାଧାରଣ ପ୍ରଶାସନ ବିଭାଗ ପକ୍ଷରୁ ଆଜି ଏହି ଅଫିସ୍ ଅର୍ଡର ବାହାରିଛି ।

ବିଏମସି ପଦରୁ ଶ୍ରୀ କୁଲାଙ୍ଗେ ହଟିବେ ବୋଲି ଗତକାଲି ସଂଧ୍ୟାରୁ ଆଭାସ ମିଳିଥିଲା । କାରଣ ଥିଲା- ତାଙ୍କର ଦାୟିତ୍ୱହୀନତା । ରାଜ୍ୟ ସରକାରଙ୍କ ବିନା ସ୍ୱୀକୃତିରେ ବିଏମସି ମେୟର, ଡେପୁଟି ମେୟର ଓ କର୍ପୋରେଟରମାନଙ୍କର ସିଟିଂ ଆଲାଉନ୍ସ(ବୈଠକ ଭତ୍ତା) ବୃଦ୍ଧି ପାଇଁ ଘୋଷଣା କରିବା ତାଙ୍କୁ ମହଙ୍ଗା ପଡ଼ିଲା । ଫଳ ହେଲା କି ସାଧାରଣ ନିର୍ବାଚନ ଅବ୍ୟବହିତ ପୂର୍ବରୁ ଖାଲି ବିଏମସି କମିସନର ପଦ ଗଲାନି । ଆଜିଠାରୁ ମାସେ କାଳ ଛୁଟିରେ ରହି ସରକାରୀ ଦାୟିତ୍ୱରୁ ଅବ୍ୟାହତି ନେବାକୁ ପଡ଼ିଲା । ଛୁଟିରୁ ଫେରିଲା ପରେ ତାଙ୍କ ଭାଗ୍ୟରେ କ’ଣ ଲେଖା ଅଛି ଜଣାପଡ଼ିବ ।

ସୂଚନାଥାଉକି, ଗତକାଲି ବିଏମସି ମାସିକିଆ ବୈଠକ ବସିଥିଲା । ବୈଠକ ପରେ କମିସନର ଶ୍ରୀ କୁଲାଙ୍ଗେ ବିଏମସିର ମେୟର, ଡେପୁଟି ମେୟର ଓ କର୍ପୋରେଟରମାନଙ୍କର ସିଟିଂ ଆଲାଉନ୍ସ ବୃଦ୍ଧି ଘୋଷଣା କରିଥିଲେ । ଗୋଟିଏ କର୍ପୋରେସନ୍ ମିଟିଂ ପାଇଁ ମେୟରଙ୍କ ଭତ୍ତା ୫୦ ହଜାର ଟଙ୍କା, ଡେପୁଟି ମେୟରଙ୍କୁ ୨୫ ହଜାର ଓ ପ୍ରତ୍ୟେକ କର୍ପୋରେଟରଙ୍କୁ ୧୦ ହଜାର ଟଙ୍କା ଭତ୍ତା ଦେବାକୁ ନିଷ୍ପତ୍ତି ହୋଇଥିବା ସେ ଗଣମାଧ୍ୟମକୁ ସୂଚନା ଦେଇଥିଲେ । ଏ ସମସ୍ତ ଅର୍ଥ ବିଏମସି ପାଣ୍ଠିରୁ ଭରଣା କରାଯିବ ବୋଲି ମଧ୍ୟ ଜଣାଇଥିଲେ ।

ତେବେ ବିଏମସି କମିସନର ଶ୍ରୀ କୁଲାଙ୍ଗେଙ୍କ ଏହି ଘୋଷଣା ସମସ୍ତଙ୍କୁ ବିସ୍ମିତ କରିଥିଲା । ରାଜ୍ୟ ସରକାରଙ୍କ ବିନା ସ୍ୱୀକୃତିରେ ଏହା କିଭଳି ହେଲା ବୋଲି ସରକାରୀ ମହଲରେ ଚର୍ଚ୍ଚା ହେଲା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନଜରକୁ ଏହା ଆସିଲା ପରେ ସେ କ୍ଷୁବ୍ଧ ହୋଇଥିବା ବିଭିନ୍ନ ସୂତ୍ରରୁ ଖବର ଆସିଲା । ଆଉ ଏହା ଯେ ସତ, ପରବର୍ତ୍ତୀ ସମୟରେ ତାହା ସ୍ପଷ୍ଟ ହୋଇଗଲା ।

କମିସନରଙ୍କ ପକ୍ଷରୁ ସଂଧ୍ୟାରେ ପ୍ରେସ୍ ରିଲିଜ୍ ଜରିଆରେ ଏକ ସ୍ପଷ୍ଟୀକରଣ ଦିଆଗଲା । ଏଥିରେ କୁହାଗଲା ଯେ ବିଏମସିର ମେୟର, ଡେପୁଟି ମେୟର ଓ କର୍ପୋରେଟରମାନଙ୍କର ପାରିଶ୍ରମିକ ବୃଦ୍ଧି ନିଷ୍ପତ୍ତି ନେବାରେ ସରକାରଙ୍କ ସ୍ୱୀକୃତିର ଆବଶ୍ୟକତା ରହିଛି । କିନ୍ତୁ ଏଭଳି ଏକ ନିଷ୍ପତ୍ତି ସଂକ୍ରାନ୍ତରେ ବିଏମସି କମିସନରଙ୍କ ବୟାନରେ ଭୁଲ୍(factual errors) ଥିଲା । ଏଣୁ ବିଏମସି କମିସନରଙ୍କ ବୟାନକୁ ପ୍ରତ୍ୟାହାର କରାଯାଉଛି ।

ଏହି ସ୍ପଷ୍ଟୀକରଣ ସହ କମିସନର ଶ୍ରୀ କୁଲାଙ୍ଗେଙ୍କ ଉପରେ ବିପଦ ଆସିବା ଏକ ପ୍ରକାର ସ୍ପଷ୍ଟ ହୋଇଗଲା । କୌଣସି ମୁହୁର୍ତ୍ତରେ ତାଙ୍କର ପଦ ଯାଇପାରେ ବୋଲି ଚର୍ଚ୍ଚା ହୋଇଥିଲା । ତେବେ କେଉଁ ପରିସ୍ଥିତିରେ ସେ ଏଭଳି ଘୋଷଣା କରିଥିଲେ ତାହା ସମସ୍ତଙ୍କ ପାଇଁ ଅବୁଝା ରହିଛି ।