ଭୁୁବନେଶ୍ୱର: ରାଜ୍ୟ ସରକାରଙ୍କ ଆୟୋଜିତ ଚଳିତବର୍ଷ ମାର୍ଚ୍ଚ ୨୦ ପଖାଳ ଦିବସ(ପରବ) ପାଳନରେ ଖର୍ଚ୍ଚ ହୋଇଛି ୧ କୋଟି ୫୪ ଲକ୍ଷ ଟଙ୍କା । ଆପଣଙ୍କୁ ଏହା ଅବିଶ୍ୱାସ ଲାଗିଲେ ବି ନିରାଟ ସତ । ଓଡ଼ିଶା ପର୍ଯ୍ୟଟନ ଉନ୍ନୟନ ନିଗମ(ଓଟିଡିସି) ଏହି ଖର୍ଚ୍ଚ ବହନ କରିଛି । କଲର୍ ପ୍ଲସ୍ ନାମକ ରାଜଧାନୀର ଏକ ଇଭେଣ୍ଟ ମ୍ୟାନଜେମେଣ୍ଟ ସଂସ୍ଥାକୁ ଏହାର ଆୟୋଜନ ଦାୟିତ୍ୱ ଦିଆଯାଇଥିଲା ।
ପାନ୍ଥ ନିବାସଠାରେ ମାର୍ଚ୍ଚ ୧୯ ଓ ୨୦ ତାରିଖ ଦୁଇ ଦିନ ଧରି ପାଳିତ ହୋଇଥିଲା ପଖାଳ ପରବ । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ବାଚସ୍ପତି ଶ୍ରୀମତୀ ସୁରମା ପାଢ଼ୀଙ୍କ ସମେତ ପୂରା ମନ୍ତ୍ରିମଣ୍ଡଳ ଏବଂ ବିଜେପି ବିଧାୟକ ଦଳ ସେହି ଉତ୍ସବରେ ସାମିଲ ହୋଇଥିଲେ । ବାହାରୁ ବି ଅତିଥି ଆସିଥିଲେ । ସେଥିରେ ହୋଇଥିବା ଖର୍ଚ୍ଚର ବିଲ୍ ଆମର ହସ୍ତଗତ ହୋଇଛି ।
ଆୟୋଜନର ଦାୟିତ୍ୱ ନେଇଥିବା କଲର୍ ପ୍ଲସ୍ ସଂସ୍ଥାକୁ ଇଭେଣ୍ଟ ମ୍ୟାନେଜମେଣ୍ଟ ବାବଦରେ ପୈଠ ହୋଇଛି ୮୫ ଲକ୍ଷ ୬୬ ହଜାର ୯୯୪ ଟଙ୍କା । ସେଥିମଧ୍ୟରେ କାର୍ଯ୍ୟକ୍ରମର ସମ୍ପାଦନ ଏବଂ ପରିଚାଳନା ପାଇଁ ୭୭ ଲକ୍ଷ ୮୮ ହଜାର ୧୭୭ ଟଙ୍କା ବିଲ୍ ହୋଇଥିବା ବେଳେ ସୁପରିଭିଜନ ବାବଦରେ ୬ ଲକ୍ଷ ୬୦ ହଜାର ୧୫ ଟଙ୍କା ବିଲ୍ ହୋଇଛି ।
ଅନ୍ୟ ଏକ ବିଲ୍ ରେ ପୈଠ ହୋଇଛି ୬୮ ଲକ୍ଷ ୩୬ ହଜାର ୯୪୬ ଟଙ୍କା । ଏଥିରେ ବି ସୁପରଭିଜନ ଖର୍ଚ୍ଚ ପଡ଼ିଛି ୪ ଲକ୍ଷ ୭୬ ହଜାର ୫୧୨ ଟଙ୍କା । ଏହି ବିଲ୍ ରେ ରହିଛି ଅଫିସିଆଲ୍ ଏବଂ ଅତିଥିମାନଙ୍କ ହୋଟେଲ ରହଣୀ ଖର୍ଚ୍ଚ ୧ ଲକ୍ଷ ୯୯ ହଜାର ୨୮୫ ଟଙ୍କା, ହୋଟେଲରେ ଖାଇବା ଖର୍ଚ୍ଚ ୯ ଲକ୍ଷ ୪୪ ହଜାର ୫୫ ଟଙ୍କା, ପାନ୍ଥନିବାସରେ ରହିବା ଓ ଖାଇବା ବାବଦ ୯ ଲକ୍ଷ ୪୩ ହଜାର ୩୮୩ ଟଙ୍କା, ଗିନିଜ୍ ୱାଲର୍ଡ ବୁକ୍ ଫି ବାବଦ ୩୧ ଲକ୍ଷ ୩୫ ହଜାର ୭୪୮ ଟଙ୍କା, ମେମୋଣ୍ଟୋ, ୱେଷ୍ଟକୋର୍ଟ ଏବଂ ଅନ୍ୟାନ୍ୟ ଖର୍ଚ୍ଚ ୭ ଲକ୍ଷ ୫୯ ହଜାର ୪୮୩ ଟଙ୍କା ଏବଂ ଅଫିସରମାନଙ୍କ ବିମାନ ଖର୍ଚ୍ଚ ୨ ଲକ୍ଷ ୯୨ ହଜାର ୭୦୮ ଟଙ୍କା ।
