ଭୁବନେଶ୍ୱର: ରାଜ୍ୟ ସରକାରଙ୍କ ଡିସେମ୍ବର ମାସର ଅନଲକ୍-୭ ଗାଇଡଲାଇନ୍ ଜାରି କରାଯାଇଛି । ଏଥିରେ ସାମାଜିକ ଓ ଧାର୍ମିକ ସମାବେଶକୁ ବାରଣ କରାଯାଇଥିଲା ବେଳେ ବିବାହ ଉତ୍ସବରେ ୨୦୦ ଏବଂ ଅନ୍ତେଷ୍ଟିକ୍ରିୟାରେ ସର୍ବାଧିକ ୫୦ ଜଣ ଲୋକଙ୍କ ଯୋଗଦାନକୁ ଅନୁମତି ଦିଆଯାଇଛି । ବିବାହ ଆୟୋଜିତ ହଲ୍ ର ୫୦ ଭାଗ କ୍ଷମତାକୁ ଉପଯୋଗ କରାଯିବ ।
ସ୍କୁଲ, କଲେଜ ଖୋଲିବା ନିଷ୍ପତ୍ତି ସଂପୃକ୍ତ ବିଭାଗ ଉପରେ ଛଡ଼ାଯାଇଛି । ସମସ୍ତଙ୍କ ସହ ବିଚାରବିମର୍ଷ କରି ନବମରୁ ଦ୍ୱାଦଶ ଶ୍ରେଣୀ ଖୋଲିବା ନିଷ୍ପତ୍ତି ସ୍କୁଲ ଓ ଗଣଶିକ୍ଷା ବିଭାଗ ନେବ । ସେହିଭଳି କଲେଜ ଖୋଲିବା ନିଷ୍ପତ୍ତି ଉଚ୍ଚଶିକ୍ଷା ବିଭାଗ ନେବ । ଇଂଜିନିୟରିଂ ଓ ବୈଷୟିକ ଅନୁଷ୍ଠାନ ଖୋଲିବା ନିଷ୍ପତ୍ତି ସଂପୃକ୍ତ ବିଭାଗ ନେବ । ତେବେ ଏସଓପି ଗାଇଡଲାଇନ୍ ମତେ ଡିସେମ୍ବର ୧ ରୁ ମେଡ଼ିକାଲ୍ କଲେଜରେ ପାଠପଢ଼ା ଆରମ୍ଭ ହେବ । ଡିସେମ୍ବର ୩୧ ଯାଏଁ ଅଙ୍ଗନବାଡି କେନ୍ଦ୍ର ବନ୍ଦ ରହିବ ।
ସିନେମା ହଲ୍, ଅଡିଟୋରିୟମ୍, ସୁଇମିଂ ପୁଲ୍ ଖୋଲିବାକୁ ଅନୁମତି ଦିଆଯାଇନାହିଁ । ସେହିଭଳି ପ୍ରଦର୍ଶନୀ ଓ ମେଳା ଉପରେ କଟକଣା ବଳବତ୍ତର ରଖାଯାଇଛି । ଫଳରେ ଡିସେମ୍ବର ମାସରେ ହେବାକୁ ଥିବା ତୋଷାଳି ଏବଂ ଶିଶିର ସରସ ମେଳା ଅନୁଷ୍ଠିତ ହୋଇପାରିବ ନାହିଁ । ଡିସେମ୍ବର ୩୧ ପର୍ଯ୍ୟନ୍ତ ଆନ୍ତର୍ଜାତୀୟ ବିମାନ ସେବା ବନ୍ଦ ରହିବ ।
ମନ୍ଦିର ଓ ଧର୍ମାନୁଷ୍ଠାନ ଖୋଲିବା ନିଷ୍ପତ୍ତି ସ୍ଥାନୀୟ ପ୍ରଶାସନ ଉପରେ ଛଡ଼ାଯାଇଛି । ପ୍ରଶାସନ ଚାହିଁଲେ ଅନୁମତି ଦେଇପାରିବେ । କଣ୍ଟେନମେଣ୍ଟ ଜୋନ୍ ରେ ଲକଡାଉନ୍ ଜାରି ରହିବ । ସ୍ଥାନୀୟ ପ୍ରଶାସନ ଏହାର ନିଷ୍ପତ୍ତି ନେବେ ।
ସରକାରୀ ଓ ଘରୋଇ ଅଫିସ୍ ଗୁଡ଼ିକ ଏସଓପି ଆଧାରରେ ଚାଲିବ । ସବୁକ୍ଷେତ୍ରରେ ମାସ୍କ ପିନ୍ଧିବା, ସାମାଜିକ ଦୂରତ୍ୱ ବଜାୟ ରଖିବା ଏବଂ ହାତ ସଫା ରଖିବା ଭଳି କୋଭିଡ ନିୟମ କଡ଼ାକଡ଼ି ପାଳନ ହେବ ବୋଲି ଗାଇଡଲାଇନ୍ ରେ କୁହାଯାଇଛି ।