ଭୁବନେଶ୍ୱର: ଚାକିରି କରିବାର ଦୁଇବର୍ଷ ପୂରିନି । ପ୍ରୋବେସନ୍ ପିରିୟର୍ଡ ସରିନି । ହେଲେ ଉପୁରି ରୋଜଗାର ନିଶାରେ ଚୂର୍ । ଭୁଲିଗଲେ ନିଜର ପଦ ମର୍ଯ୍ୟାଦା । ମାତ୍ର ୭ ହଜାର ଟଙ୍କା ପାଇଁ ନିଜର କ୍ୟାରିୟରକୁ ବାଜିରେ ଲଗାଇଛନ୍ତି ବାଲେଶ୍ୱର ଜିଲ୍ଲା ବାଲିଆପାଳ ସବ୍ ରେଜିଷ୍ଟ୍ରାର ତଥା ଯୁବ ଓଆରଏସ୍ ଅଫିସର ମନୀଷା ମିଶ୍ର । ଲାଞ୍ଚ ନେଉଥିବା ବେଳେ ଆଜି ଭିଜିଲାନ୍ସ ହାତରେ ଧରାପଡ଼ିଛନ୍ତି । ଜେଲ୍ ହାଜତରେ ତାଙ୍କର ଦୀପାବଳି କଟିପାରେ ।
ଏକ ସ୍ଥିତିବାନ୍ ଜାଗାର କବଲା ପଞ୍ଜିକରଣ ପାଇଁ ଜଣେ ଜମି କ୍ରେତାଙ୍କଠାରୁ ସେ ୧୦ ହଜାର ଟଙ୍କା ଲାଞ୍ଚ ମାଗିଥିଲେ । ପରେ ୭ ହଜାରରେ କଥା ଛିଣ୍ଡାଇଥିଲେ । ଆଜି ଟଙ୍କା ନେଉଥିଲା ବେଳେ ଆଗରୁ ଛକି ରହିଥିବା ଭିଜିଲାନ୍ସ ଟିମ୍ ଏହି ମହିଳା ଅଫିସରଙ୍କୁ କାବୁ କରିଛନ୍ତି । ଆୟ ବର୍ହିଭୂତ ସମ୍ପତ୍ତିର ଖୋଳତାଡ଼ ପାଇଁ ତାଙ୍କର ଦୁଇଟି ଜାଗାରେ ଆଜି ରେଡ୍ ହୋଇଛି ।
ବାଲିଆପାଳ ଅଞ୍ଚଳର ଜ୍ଞାନରଞ୍ଜନ ପାତ୍ର ନାମକ ଜଣେ ବ୍ୟକ୍ତିଙ୍କର ୦.୧୪ ଡିସିମିଲ୍ ଜମିର କବଲା ରେଜିଷ୍ଟ୍ରେସନ୍ ପାଇଁ ସବ ରେଜିଷ୍ଟ୍ରାରଙ୍କ ପାଖକୁ ବାରମ୍ବାର ଦୌଡ଼ିଥିଲେ । ଉକ୍ତ ଜମିର କିସମ ‘ବାଜ୍ୟାପ୍ତି ସ୍ଥିତିବାନ’ ଭାବେ ରେକର୍ଡ ହୋଇଥିଲେ ମଧ୍ୟ ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗର ନିଦେ୍ର୍ଦଶାବଳୀ ଅନୁଯାୟୀ ଏହାକୁ ‘ସ୍ଥିତିବାନ’ ଜମି ଭାବେ ବିବେଚନା କରି ରେଜିଷ୍ଟ୍ରସନ୍ କରାଯାଇପାରିବ । ଏ ସମ୍ପର୍କରେ ଜମିର କ୍ରେତା ଶ୍ରୀ ପାତ୍ର ବାରମ୍ବାର ଅନୁରୋଧ କରିଥିଲେ ସବ୍ ରେଜିଷ୍ଟ୍ରାର୍ ମନୀଷା ମିଶ୍ର ଶୁଣି ନ ଥିଲେ । ୧୦ ହଜାର ଟଙ୍କା ଦେଲେ ଯାଇ କାମ ହେବ ବୋଲି ଶୁଣାଇ ଦେଇଥିଲେ ।
ମାତ୍ର ଏତେ ଟଙ୍କା ଦେଇପାରିବେନି ବୋଲି ଜ୍ଞାନରଞ୍ଜନ କାକୁତୀ ହେଲା ପରେ ମ୍ୟାଡାମ୍ ଦୟା ଦେଖାଇଲା ଭଳି ୩ ହଜାର ଟଙ୍କା ଛାଡ଼ କରିଥିଲେ । ୭ ହଜାର ଟଙ୍କାରେ କଥା ଛିିଣ୍ଡେଇଲେ । ସବ୍ ରେଜିଷ୍ଟ୍ରାରଙ୍କ ଆଚାରରେ ଅତିଷ୍ଠ ଜ୍ଞାନରଞ୍ଜନ ଘଟଣା ସମ୍ପର୍କରେ ଭିଜିଲାନ୍ସକୁ ଜଣାଇଥିଲେ । ଯୋଜନା ମୁତାବକ ଆଜି ୭ ହଜାର ଟଙ୍କା ଦେଇଥିଲେ । ମ୍ୟାଡାମ୍ ସେହି ଲାଞ୍ଚ ଟଙ୍କା ଧରୁଥିବା ବେଳେ ପାଖରେ ଛକିଥିବା ଭିଜିଲାନସ୍ ଟିମ୍ ମ୍ୟାଡାମ୍ ଙ୍କୁ ଧରିଥିଲା ।
ଝାରସୁଗୁଡ଼ାର ମନୀଷା ମିଶ୍ର ୨୦୨୨ ବ୍ୟାଚ୍ ର ଓଆରଏସ୍ ଅଧିକାରୀ । ଜଣେ ମେଧାବୀ ଛାତ୍ରୀ ଭାବେ ତାଙ୍କର ସୁନାମ ଅଛି । ଉତ୍କଳ ବିଶ୍ୱବିଦ୍ୟାଳୟରୁ ବାୟୋଟେକ୍ ରେ ସ୍ନାତକ ଓ ୟୁପିର ଗଲଗୋଟିଆ ବିିଶ୍ୱବିଦ୍ୟାଳୟରୁ ମାଇକ୍ରୋ ବାୟୋଲୋଜିରେ ସ୍ନାତକୋତ୍ତର ଡିଗ୍ରୀ ହାସଲ କରିଛନ୍ତି । ଟ୍ରେନିଂ ସରିଲା ପରେ ୨୦୨୪ ମସିହାରେ ଚାକିରିରେ ଯୋଗଦେଇଛନ୍ତି । ତାଙ୍କର ପ୍ରୋବେସନ୍ ପିରିୟର୍ଡ ସରିନାହିଁ । ସବ୍ ରେଜିଷ୍ଟ୍ରାର ଭାବେ ବାଲିଆପାଳରେ ପ୍ରୋବେସନରେ ଅଛନ୍ତି ।
