ଭୁୁବନେଶ୍ୱର: ତାମିଲନାଡୁରେ କାମ ଖୋଜିବାକୁ ଯାଇଥିବା ଜଣେ ୨୭ ବର୍ଷୀୟ ଓଡ଼ିଆ ମହିଳା ନିଜ ସ୍ୱାମୀ ଓ ତିନି ବର୍ଷର ଛୁଆ ସାମନାରେ ଗଣଦୁଷ୍କର୍ମର ଶିକାର ହୋଇଛନ୍ତି । ପୁଲିସର ତତ୍ପରତା ଯୋଗୁଁ ଦୁଷ୍କର୍ମକାରୀ ୩ ବିହାରୀ ଯୁବକ ମହମ୍ମଦ ନଦିମ୍(୨୪), ମହମ୍ମଦ ଡାନିସ୍(୨୫) ଏବଂ ମହମ୍ମଦ ମୁର୍ଶିଥ୍(୨୦) ଧରାପଡ଼ିଛନ୍ତି । ସେମାନଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି ।
ଜାତୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, କାମଧନ୍ଦା ଅନ୍ୱେଷଣରେ ୩ ବର୍ଷର ଛୁଆକୁ ଧରି ଏକ ଓଡ଼ିଆ ଦମ୍ପତ୍ତି ତାମିଲନାଡୁ ଆସିଥିଲେ । ବୁଲି ବୁଲି କାମ ଖୋଜୁଥିଲା ବେଳେ ତିରିପୁର ରେଳଷ୍ଟେସନ ନିକଟସ୍ଥ ପୁଷ୍ପା ଜଙ୍କସନ୍ ରେ ଟ୍ରେନ୍ ଅପେକ୍ଷାରେ ବସିଥିଲେ । ସେହି ସମୟରେ ତିନି ଜଣ ବିହାରୀ ଯୁବକଙ୍କ ହାବୁଡ଼ରେ ପଡ଼ିଥିଲେ । କାମଧନ୍ଦା ପାଇଁ ସେମାନେ ଏଠାକୁ ଆସିଥିବା ଜାଣିବା ପରେ ସେହି ଅସହାୟତାରୁ ଫାଇଦା ନେବା ପାଇଁ ତିନି ବିହାରୀଙ୍କ ମୁଣ୍ଡକୁ ରାକ୍ଷସ ଭାବ ଜୁଟିଲା । କାମଧନ୍ଦା ଯୋଗାଇ ଦେବାର ପ୍ରଲୋଭନ ଦେଇ ସେମାନେ ଲକ୍ଷ୍ମୀ ନଗର ଅଞ୍ଚଳରେ ଥିବା ସେମାନଙ୍କ ଭଡ଼ା ଘରକୁ ନେଇ ସେଠାରେ ରାତିରେ ରହିଯିବାକୁ ବାଧ୍ୟ କରିଥିଲେ ।
ସେମାନଙ୍କ କଥାରେ ବିଶ୍ୱାସ କରିଯାଇଥିଲେ ଓଡ଼ିଆ ଦମ୍ପତ୍ତି । ଭଡ଼ା ଘରକୁ ନେଇ ବିହାରୀ ଯୁବକମାନେ ବଢ଼ିଆ ଅତିଥି ଚର୍ଚ୍ଚା କରିଥିଲେ । ଏକାଠି ବସି ରାତ୍ରିଭୋଜନ କରିଥିଲେ । ତାହା ପରେ ସମସ୍ତେ ଶୋଇବାକୁ ଯାଇଥିଲେ । ତେବେ ଯୋଜନା ମୁତାବକ ସଂପୃକ୍ତ ବିହାରୀମାନେ ରାତି ଅଧରେ ନାରକୀୟ କାଣ୍ଡ ଆରମ୍ଭ କରିଥିଲେ । ନିଦରେ ଶୋଇଥିବା ଓଡ଼ିଆ ମହିଳାଙ୍କୁ ପ୍ରଥମେ ବଳାକ୍ରାର ଉଦ୍ୟମ କରିଥିଲେ । ତାଙ୍କ ଚିକ୍ରାରରେ ସ୍ୱାମୀ ଏବଂ ତିନି ବର୍ଷର ଛୁଆ ନିଦରୁ ଉଠିପଡ଼ିଲେ । ଘଟଣା ଜାଣିବା ପରେ ସ୍ୱାମୀ ବିିରୋଧ କରିବାରୁ ସେହି ରାକ୍ଷସମାନେ ତାଙ୍କୁ ପ୍ରବଳ ପିଟିବା ସହ ଛୁରୀ ଭୂଷି ଦେଇଥିଲେ । ଖାଲି ସେତିକି ନୁହେଁ, ଏକ ଦଉଡ଼ିରେ ହାତଗୋଡ଼ ବାନ୍ଧି ତାଙ୍କରି ସାମନାରେ ପତ୍ନୀଙ୍କୁ ଗଣଦୁଷ୍କର୍ମ କରିଥିଲେ । ଉଭୟ ପତ୍ନୀ ଏବଂ ପତ୍ନୀ ଯନ୍ତ୍ରଣାରେ ଛଟପଟ ହେଉଥିବା ବେଳେ ଆର୍ତ୍ତନାଦ କରୁଥିବା ନିଷ୍ପାପ ଛୁଆକୁ ମଧ୍ୟ ସେମାନେ ଛାଡ଼ି ନ ଥିଲେ । ତଳେ କଚାଡ଼ି ଦେଇଥିଲେ ।
ଘଟଣା ପ୍ରଘଟ କଲେ କିମ୍ବା ପୁଲିସକୁ ଜଣାଇଲେ ପରିବାରକୁ ସଫା କରିଦେବାର ଧମକ ଦେଇ ସେହି ରାତାରାତି ଘରୁ ବିଦା କରିଦେଇଥିଲେ ।
ଆତଙ୍କିତ ଓଡ଼ିଆ ଦମ୍ପତ୍ତି ସେମାନଙ୍କ ଧମକ ପାଇ ଫେରିଥିଲେ ମଧ୍ୟ ସାହାସ ଯୋଗାଡ଼ କରିଥିଲେ । ସ୍ଥାନୀୟ ତିରୁପୁର ନର୍ଥ ମହିଳା ଥାନାକୁ ଆସି ପୁଲିସକୁ ସମସ୍ତ ଘଟଣା ଜଣାଇ ଏତଲା ଦେଇଥିଲେ । ପୁଲିସ ଏହାକୁ ଗ୍ରହଣ କରିବା ସହ ତୁରନ୍ତ ସେହି ରାତିରେ ହିଁ ସେହି ଭଡ଼ା ଘରୁ ତିନି ଦୁର୍ବୃତ୍ତଙ୍କୁ ଗିରଫ କରିଥିଲା । ଆହତ ଓଡ଼ିଆ ଦମ୍ପତ୍ତିଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରିଛି ପୁଲିସ ।
ତାମିଲନାଡୁରେ ଘଟଣାଟି ସୃଷ୍ଟି କରିଥିବା ବେଳେ ଜାତୀୟ ଗଣମାଧ୍ୟମରେ ଚର୍ଚ୍ଚାର ବିଷୟ ହୋଇଛି ।
ସୂଚନାଥାଉକି, ଗତ ନଭେମ୍ବର ମାସରେ ଦିଲ୍ଲୀକୁ ଚାକିରୀ ଅନ୍ୱେଷଣରେ ଯାଇଥିବା ଜଣେ ଗରିବ ଉଚ୍ଚଶିକ୍ଷିତ ଓଡ଼ିଆ ଯୁବତୀ ଗଣଦୁଷ୍କର୍ମର ଶିକାର ହୋଇଥିଲେ । ଏହି ଘଟଣାରେ ସେ ଭୀଷଣ ମାନସିକ ଆଘାତ ପାଇଥିଲେ ।
