ଭୁବନେଶ୍ୱର: ବାଲେଶ୍ୱର, ବଳଙ୍ଗା ପରେ ପଟ୍ଟାମୁଣ୍ଡାଇ । ଯୁକ୍ତି ତିନି ଶେଷ ବର୍ଷର ଜଣେ ଛାତ୍ରୀ ଜୀଅନ୍ତା ଜଳି ଯାଇଛନ୍ତି । ନିଜ ଘରେ ଏକୁଟିଆ ଥିଲା ବେଳେ ଦେହରେ କିରୋସିନୀ ଢ଼ାଳି ସେ ଆତ୍ମାହୁତି କରିଛନ୍ତି । ଜଣେ ଯୁବକଙ୍କ ବ୍ଲାକମେଲିଂରେ ଅତିଷ୍ଠ ହୋଇ ଛାତ୍ରୀଜଣଙ୍କ ଏହି ଚରମ ପଦକ୍ଷେପ ନେଇଥିବା ଅଭିଯୋଗ ହୋଇଛି । ୬ ମାସ ତଳେ ଥାନାରେ ଜଣାଇଥିଲେ ମଧ୍ୟ ପୁଲିସର ନିଷ୍କ୍ରିୟତା ଯୋଗୁଁ ତାଙ୍କ ଝିଅର ଜୀବନ ଚାଲିଗଲା ବୋଲି ବାପା ଅଭିଯୋଗ କରିଛନ୍ତି । ଘଟଣାଟି ସାରା ରାଜ୍ୟରେ ପୁଣି ଆଲୋଡ଼ନ ସୃଷ୍ଟି କରିଛି ।
ମୃତା ଛାତ୍ରୀଙ୍କ ଘର କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡାଇ ଗ୍ରାମାଞ୍ଚଳ ଥାନା ଅନ୍ତର୍ଗତ ବଡ଼ପଡ଼ା ଗ୍ରାମପଞ୍ଚାୟତର କାଠିଆପଡ଼ା ଗ୍ରାମରେ । ବାପା ମାଆଙ୍କର ଗୋଟିଏ ବୋଲି ଝିଅ । କଲେଜରେ ପାଠ ପଢ଼ୁଥିଲେ । ଘରେ ବାପା ମାଆଙ୍କ ସହ ରହୁଥିଲେ । ଏକମାତ୍ର ଭାଇ ବାହାର ରାଜ୍ୟରେ ଚାକିରି କରୁଛନ୍ତି । ଗତକାଲି ଝିଅର ପରୀକ୍ଷା ସରିଥିବାରୁ ଆଜି ସେ କଲେଜ ଯାଇ ନ ଥିଲେ । ତାଙ୍କୁ ଘରେ ଏକା ଛାଡ଼ି ସକାଳୁ କୌଣସି କାମରେ ବାପା ମାଆ ଦୁହେଁ ବାହାରକୁ ଯାଇଥିଲେ । ଦିନ ସାଢ଼େ ୧୧ଟା ବେଳକୁ ସେମାନେ ଘରକୁ ଫେରିଲା ବେଳେ ଭିତର ପଟୁ କବାଟ ବନ୍ଦ ଥିଲା । ବାଡ଼େଇ ଥିଲେ ମଧ୍ୟ ଝିଅ ଖୋଲି ନ ଥିଲା । ପଡ଼ୋଶୀଙ୍କ ସହାୟତାରେ କବାଟ ତାଡ଼ି ଦେଖିଲା ବେଳକୁ ଭିତର ସିଢ଼ି ପାଖରେ ଝିଅ ନିଆଁରେ ଜଳି ଦଗ୍ଧ ଅବସ୍ଥାରେ ପଡ଼ିଛି । ପାରିପାଶ୍ୱିର୍କ ସ୍ଥିତିରୁ ସେ ନିଜ ଦେହରେ କିରାସିନୀ ଢ଼ାଳି ହୋଇ ଆତ୍ମହତ୍ୟା କରିଥିବା ଅନୁମାନ କରାଯାଉଛି ।
ଘଟଣା ସମ୍ପର୍କରେ ତୁରନ୍ତ ପଟ୍ଟାମୁଣ୍ଡାଇ ଥାନାକୁ ଖବର ଦିଆଯାଇଥିଲେ ମଧ୍ୟ ପୁଲିସ ସେଠାରେ ପହଞ୍ଚିବାକୁ ୪ ଘଣ୍ଟା ଲାଗିଯାଇଥିଲା । ଟିଭି ଚାନେଲ ଗୁଡ଼ିକରେ ଏହି ଘଟଣା ଛାଇ ହୋଇ ସାରିଥିବା ବେଳେ ପୁଲିସର ଖାତିର ନ ଥିଲା । ଘଟଣାସ୍ଥଳକୁ ଶୀଘ୍ର ଯାଆ ବୋଲି ଜିଲ୍ଲା ମୁଖିଆଙ୍କୁ ପୁଲିସ ଡିଜି କହିବାକୁ ପଡ଼ିଲା । ଡିଜିଙ୍କ ଫୋନ୍ ପାଇଲା ପରେ ଯାଇ କେନ୍ଦ୍ରାପଡ଼ା ଏସପି ସିଦ୍ଧାର୍ଥ କଟରିଆ ସଦଳବଳେ ଘଟଣାସ୍ଥଳରେ ପହଞ୍ଚିଥିଲେ ।
ମୃତ ଛାତ୍ରୀଙ୍କ ବାପାଙ୍କ ଅଭିଯୋଗ ଅନୁଯାୟୀ, ଜଣେ ଯୁବକଙ୍କ ବ୍ଲାକମେଲିଂର ଶିକାର ହୋଇ ତାଙ୍କ ଝିଅ ଆତ୍ମହତ୍ୟା କରିଛି । ଉକ୍ତ ଯୁବକଙ୍କ ସହ ଆଗରୁ ତାଙ୍କ ଝିଅର ସମ୍ପର୍କ ଥିଲା । ମାତ୍ର ତାହା ବ୍ରେକ୍ ଅପ୍ ହୋଇଯାଇଛି । ସେହି ଯୁବକଟି ଝିଅକୁ ବାରମ୍ବାର ବ୍ଲାକ୍ ମେଲ୍ କରୁଥିଲା । ସୋସିଆଲ୍ ମିଡିଆରେ ଫଟୋ ଛାଡ଼ିବା ସହ କିରୋସିନୀ ଢ଼ାଳି ମାରିଦେବାକୁ ଧମକ ଦେଉଥିଲା । ଏ ସମ୍ପର୍କରେ ୬ ମାସ ତଳେ ଗ୍ରାମାଞ୍ଚଳ ଥାନାରେ ଅଭିଯୋଗ କରିବାକୁ ଯାଇଥିଲେ । ମାତ୍ର ଦାୟିତ୍ୱରେ ଥିବା ତତ୍କାଳୀନ ଏଏସଆଇ ଶୈଳେନ୍ଦ୍ର ପଲେଇ ତାଙ୍କ ଅଭିଯୋଗକୁ ଗୁରୁତ୍ୱ ଦେଇ ନ ଥିଲେ । ତମ ଝିଅକୁ ବ୍ଲାକମେଲ୍ କରୁଥିବା ଟୋକାର ଫୋନ୍ ବ୍ଲକ୍ କରିଦିଅ କହି ଘରକୁ ପଠାଇ ଦେଇଥିଲେ ବୋଲି ସେ ଅଭିଯୋଗ କରିଛନ୍ତି । ସଂପୃକ୍ତ ଯୁବକର ବ୍ଲାକମେଲିଂ ଏବଂ ମାନସିକ ନିର୍ଯ୍ୟାତନା ଅସହ୍ୟ ହେବାରୁ ତାଙ୍କ ଝିଅ ଆତ୍ମହତ୍ୟା କଲା ବୋଲି କହିଛନ୍ତି ।
ତେବେ ପୀଡ଼ିତାଙ୍କ ବାପାଙ୍କର ଏଭଳି ଅଭିଯୋଗକୁ ଅନ୍ୟତ୍ର ଅବସ୍ଥାପିତ ପଲେଇ ବାବୁ ଗାଲୁ ମାରିଛନ୍ତି । ଏଭଳି କୌଣସି ଅଭିଯୋଗ ଆସିଥିବା ତାଙ୍କର ମନେ ପଡୁନାହିଁ ବୋଲି ସେ ଜବାବ ଦେବା ସହ ଏହାର ପ୍ରମାଣ ମାଗିଛନ୍ତି । ଅନ୍ୟପକ୍ଷରେ ଛାତ୍ରୀ ଆତ୍ମଦାହ ଘଟଣାର ତଦନ୍ତ ଦାୟିତ୍ୱ ନିଜେ ସମ୍ଭାଳିଛନ୍ତି ଏସପି ଶ୍ରୀ କଟରିଆ । ସାଇଣ୍ଟିଫିକ୍ ଟିମ୍ ସହ ଘଟଣାସ୍ଥଳରେ ରହି ସେ ତଦନ୍ତ ଆରମ୍ଭ କରିଛନ୍ତି ।
