ଭୁୁବନେଶ୍ୱର: ପେଟ୍ରୋଲ୍ ଓ ଡିଜେଲ୍ ଦରବୃଦ୍ଧିରେ ଅଣନିଶ୍ୱାସୀ ହୋଇପଡ଼ିଥିବା ସାଧାରଣ ଜନତାଙ୍କ ପାଇଁ ଆସିଛି ଆଶ୍ୱସ୍ତିକର ଖବର । ପେଟ୍ରୋଲ ଓ ଡିଜେଲ ଉପରୁ ଏକସାଇଜ୍ ଡ୍ୟୁଟି କମାଇବାକୁ କେନ୍ଦ୍ର ସରକାର ନିଷ୍ପତ୍ତି ନେଇଛନ୍ତି । ଅର୍ଥମନ୍ତ୍ରୀ ଶ୍ରୀମତୀ ନିର୍ମଳା ସୀତାରମଣ ଆଜି ସଂଧ୍ୟାରେ ଏହି ସୂଚନା ଦେଇଛନ୍ତି ।
ପେଟ୍ରୋଲ ଉପରୁ ଏକସାଇଜ୍ ଡ୍ୟୁଟି ଲିଟର ପିଛା ୮ ଟଙ୍କା କମାଇବାକୁ ନିଷ୍ପତ୍ତି ହୋଇଥିବା ବେଳେ ଡିଜେଲ ଉପରୁ ଲିଟର ପିଛା ୬ ଟଙ୍କା କମାଇବାକୁ ନିଷ୍ପତ୍ତି ନିଆଯାଇଛି । ଏହାଦ୍ୱାରା ପେଟ୍ରୋଲ ଲିଟର ପିଛା ୯ ଟଙ୍କା ୫୦ ପଇସା ଏବଂ ଡିଜେଲ ଲିଟର ପିଛା ୭ ଟଙ୍କା ଶସ୍ତା ହେବ । ଆସନ୍ତକାଲି ସକାଳ ୬ଟାରୁ ନୂଆ ଦରରେ ଲୋକଙ୍କୁ ମିଳିବ ପେଟ୍ରୋଲ ଓ ଡିଜେଲ ।
ସେହିଭଳି ଉଜ୍ଜଳା ହିତାଧିକାରୀମାନଙ୍କ ପାଇଁ ଏଲପିଜି ଗ୍ୟାସ୍ ଦରରେ ମଧ୍ୟ ହ୍ରାସ୍ କରିଛନ୍ତି କେନ୍ଦ୍ର ସରକାର । ବର୍ଷକୁ ୧୨ ଟି ପର୍ଯ୍ୟନ୍ତ ପ୍ରତି ଏଲପିଜି ସିଲିଣ୍ଡରରେ ୨୦୦ ଟଙ୍କା ସବସିଡି ମିଳିବ ।
ଏଥିସହ ଷ୍ଟିଲ୍ ପାଇଁ ବ୍ୟବହୃତ କଞ୍ଚାମାଲ ଉପରେ ମଧ୍ୟ ଆମଦାନୀ ଶୁଳ୍ପ ହ୍ରାସ୍ କରାଯାଇଛି । ସିମେଣ୍ଟ ଦର ହ୍ରାସ୍ ପାଇଁ ପଦକ୍ଷେପ ନିଆଯାଉଥିବା ଶ୍ରୀମତୀ ସୀତାରମଣ କହିଛନ୍ତି ।
ପେଟ୍ରୋଲ ଓ ଡିଜେଲ ଉପରେ ଏକସାଇଜ୍ ଡ୍ୟୁଟି ହ୍ରାସ ଫଳରେ କେନ୍ଦ୍ର ସରକାର ୧ ଲକ୍ଷ କୋଟି ଟଙ୍କାର ରାଜସ୍ୱ ହରାଇବେ । ତେବେ ଜନସାଧାରଣଙ୍କ ହିତକୁ ଦୃଷ୍ଟିରେ ରଖି ପେଟ୍ରୋଲ ଓ ଡିଜେଲ ଉପରୁ ଭାଟ୍ ହ୍ରାସ୍ କରିବାକୁ କେନ୍ଦ୍ର ଅର୍ଥମନ୍ତ୍ରୀ ରାଜ୍ୟସରକାରମାନଙ୍କୁ ଅନୁରୋଧ କରିଛନ୍ତି ।
