ମନ ମାରିକି ନେତା ଫେରିଲେ

ଭୁବନେଶ୍ୱର: ସାଧାରଣ ନିର୍ବାଚନକୁ ଆଉ ଦୁଇ ମାସ ବି ନାହିଁ । ବିଜେପି-ବିଜେଡି ସମ୍ଭାବ୍ୟ ମେଣ୍ଟକୁ ନେଇ ଚର୍ଚ୍ଚା ବି ଥମିନାହିଁ । ଏତିକିବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଓଡ଼ିଶା ଗସ୍ତ ସମସ୍ତଙ୍କର ଉତ୍କଣ୍ଠା ବଢ଼ାଇଥିଲା । ଖାସ୍ କରି ରାଜ୍ୟର ବିଜେପି ନେତା ଓ କର୍ମୀମାନେ ପ୍ରଧାନମନ୍ତ୍ରୀଙ୍କ ମୁହଁରୁ ବିଜେଡି ସମ୍ପର୍କରେ ଦଳର ଆଭିମୁଖ୍ୟକୁ ଚାହିଁ ରହିଥିଲେ । ମାତ୍ର ପ୍ରଧାନମନ୍ତ୍ରୀଙ୍କ ଭାଷଣ ସେମାନଙ୍କୁ ନିରାଶ କରିଛି । ଚଣ୍ଡିଖୋଲରେ ଆୟୋଜିତ ମୋଦୀ ଗ୍ୟାରେଣ୍ଟି ସମାବେଶରେ ପ୍ରଧାନମନ୍ତ୍ରୀ ତାଙ୍କ ଭାଷଣରେ କଂଗ୍ରେସ ଏବଂ ଇଣ୍ଡିଆ ମେଣ୍ଟକୁ ଧୂମ୍ ସମାଲୋଚନା କରିଥିଲା ବେଳେ ଓଡ଼ିଶାରେ ବିଜେପିର ମୁଖ୍ୟ ପ୍ରତିଦ୍ୱନ୍ଦୀ ବିଜେଡି କିମ୍ବା ନବୀନ ପଟ୍ଟନାୟକଙ୍କ ସରକାର ବିରୋଧରେ ପଦୁଟିଏ କହିନାହାନ୍ତି । ପ୍ରଧାନମନ୍ତ୍ରୀ ଓଡ଼ିଶା ସରକାରଙ୍କୁ ନିନ୍ଦା କରିନାହାନ୍ତି କି ପ୍ରଶଂସା କରିନାହାନ୍ତି । ଅବଶ୍ୟ ଲୋକସଭାରେ ଏନଡିଏକୁ ୪୦୦ରୁ ଅଧିକ ଆସନରେ ଜିତାଇବା ପାଇଁ ନେତା ଓ କର୍ମୀଙ୍କୁ ସଂକଳ୍ପ ଦେଇଛନ୍ତି । ମୋଦୀଙ୍କ ସଂକଳ୍ପକୁ ମନରେ ଧରି ରାଜ୍ୟ ନେତାମାନେ ମନ ମାରିକି ଚଣ୍ଡିଖୋଲ ଛାଡ଼ିଛନ୍ତି ।

ମୋଦୀ ଗ୍ୟାରେଣ୍ଟି ସମାବେଶରେ ବିଶାଳ ଜନ ସମାଗମ ଓ ସେମାନଙ୍କର ଉତ୍ସାହକୁ ଦେଖି ପ୍ରଧାନମନ୍ତ୍ରୀ ଶ୍ରୀ ମୋଦୀ ଅଭିଭୂତ ହୋଇଯାଇଥିଲେ ।  ତାଙ୍କ ପ୍ରତି ଲୋକଙ୍କର ଭଲ ପାଇବା ତାଙ୍କୁ ଭାବବିହ୍ୱଳ କରିଥିଲା । ଜଗନ୍ନାଥଙ୍କ ଆଶୀର୍ବାଦ ଥିଲେ ଲୋକଙ୍କଠାରୁ ଏମିତି ଭଲ ପାଇବା ମିଳେ ବୋଲି ସେ କହିଥିଲେ । ଜୟ ଜଗନ୍ନାଥରୁ ମୋଦୀ ତାଙ୍କ ଭାଷଣ ଆରମ୍ଭ କରିଥିଲେ । ପବିତ୍ର ବିଜୁବାବୁଙ୍କର ଜୟନ୍ତୀରେ ଓଡ଼ିଶା ମାଟିରେ ରହି ତାଙ୍କୁ ନମନ୍ କରିବାର ସୌଭାଗ୍ୟ ପାଇ ଗୌରାବନ୍ୱିତ ବୋଲି କହିଥିଲେ ।

ଓଡ଼ିଶାରେ ବିକାଶର ନୂଆ ଧାରା ଆରମ୍ଭ ହୋଇଥିବା କହି, ପ୍ରଧାନମନ୍ତ୍ରୀ ତାଙ୍କ ୧୦ ବର୍ଷର ଶାସନକାଳରେ ଗରିବଙ୍କ ପାଇଁ କରିଥିବା ବିଭିନ୍ନ ଯୋଜନାର ଉଲ୍ଲେଖ କରିଥିଲେ । ଭାରତକୁ ବିଶ୍ୱର ତୃତୀୟ ବୃହତ୍ତ ଅର୍ଥନୀତିରେ ପରିଣତ କରିବାର ସଂକଳ୍ପ ଦୋହରାଇ ସେ ଓଡ଼ିଶାର ସଂକଳ୍ପ ଅବ୍ କି ବାର୍ ଚାରିଶ ପାର୍ ବୋଲି ଆହ୍ୱାନ ଦେଇଥିଲେ । ଏହି ଅବସରରେ କଂଗ୍ରେସକୁ ଧୂମ୍ ଧୋଇଥିଲେ ମୋଦୀ ।

କହିଥିଲେ, ୨୦୧୪ ପୂର୍ବରୁ କଂଗ୍ରେସ କେବଳ ନିଜ ସିନ୍ଦୁକ ଭରୁଥିଲା । ନିଜ ଦଳ ଓ ପରିବାରର ସମୃଦ୍ଧି କରୁଥିଲା । ଗରିବ ଲୋକ ସହାୟତା ମାଗିଲେ ଗ୍ୟାରେଣ୍ଟି ମଗା ଯାଉଥିଲା । ଛାତ୍ର, କୃଷକ ସହାୟତା ମାଗିଲେ ଗ୍ୟାରେଣ୍ଟି ମଗାଯାଉଥିଲା । ମାତ୍ର ସେହି ଅବସ୍ଥା ଚାଲିଯାଇଛି । ୨୦୧୪ ପରେ ଜଣେ ଗରିବ ଦେଶର ଶାସନ ଦାୟିତ୍ୱ ନେଇଛି । ଯିଏ ଗ୍ୟାରେଣ୍ଟି ମାଗିଲା, ତାର ଗ୍ୟାରେଣ୍ଟି ମୋଦୀ ନେଲା । ଜନଧନ ଖାତା ଖୋଲିଲୁ । ମୋଦୀ ସମସ୍ତଙ୍କ ଗ୍ୟାରେଣ୍ଟି ବନିଲା । ବିନା ଗ୍ୟାରେଣ୍ଟିରେ ଋଣ ଦେବାକୁ ମୁଦ୍ରା ଯୋଜନା ଆରମ୍ଭ କଲୁ । ମୋଦୀ ଗରିବଙ୍କ ସାଥୀରେ ଅଛି ବୋଲି ଆଜି ଲୋକଙ୍କର ବିଶ୍ୱାସ ଜନ୍ମିଛି । ଯାହାକୁ କେହି ପଚାରୁ ନ ଥିଲେ, ତାକୁ ମୋଦୀ ପଚାରୁଛି । ଗରିବଙ୍କୁ ପକ୍କା ଘର ସ୍ୱପ୍ନ ଥିଲା । ଆଜି ବାସ୍ତବତା ପାଲଟିଛି । ଯେଉଁଠି ସବୁ ସମ୍ଭାବନା ଶେଷ ହୁଏ, ସେଇଠୁ ମୋଦୀର ଆରମ୍ଭ ହୁଏ । ଏହା ହିଁ ମୋଦୀର ଗ୍ୟାରେଣ୍ଟି ବୋଲି ପ୍ରଧାନମନ୍ତ୍ରୀ କହିଥିଲେ ।

ମୋଦୀଙ୍କ ପରିବାର ନାହିଁ, ୟାଙ୍କୁ ହଟାଓ ବୋଲି ଇଣ୍ଡିଆ ଗଠବନ୍ଧନର ଆହ୍ୱାନକୁ କଟାକ୍ଷ କରିଥିଲେ ମୋଦୀ । କହିଥିଲେ ସେମାନଙ୍କ ବିଚାରାଧାରା ହେଉଛି ନିଜ ପିଲାପିଲିଙ୍କ ପାଇଁ ମହଲ୍ ବନାଇବା । ମାତ୍ର ମୋଦୀ ବିଚାରାଧାରା ହେଉଛି ନେସନ୍ ଫାଷ୍ଟ(ରାଷ୍ଟ୍ର ଆଗ) । ମେରା ଭାରତ୍, ମେରା ପରିବାର । ଗରିବଙ୍କ ପାଇଁ ପକ୍କା ଘର କରିବା ମୋଦୀର କାମ ବୋଲି ସେ କହିଥିଲେ ।

ଏହି ଅବସରରେ ମାାଗଣା ବିଜୁଳି ଦେବାକୁ ପ୍ରଧାନମନ୍ତ୍ରୀ ଓଡ଼ିଶାବାସୀଙ୍କୁ ଗ୍ୟାରେଣ୍ଟି ଦେଇଥିଲେ । କହିଥିଲେ, ଓଡ଼ିଶା ଭଗବାନ ସୂର୍ଯ୍ୟ ଦେବତାଙ୍କ ଭୂମି । ସମସ୍ତଙ୍କୁ ମାଗଣା ବିଜୁଳି ଦେବା ପାଇଁ ପିଏମ୍ ସୂର୍ଯ୍ୟଘର ମୁକ୍ତ ବିଜୁଳି ଯୋଜନା ଆରମ୍ଭ କରାଯାଇଛି । ଘର ଛାତରେ ସୋଲାର ପ୍ୟାନେଲ ଲଗାଇ ବିଜୁଳି ଉତ୍ପାଦନ ହେବ । ୩୦୦ ୟୁନିଟ୍ ପର୍ଯ୍ୟନ୍ତ ଉପଭୋକ୍ତାମାନେ ମାଗଣା ବିଜୁଳି ପାଇବେ । ବଳକା ବିଜୁଳି ବିକି ସେମାନେ ଲାଭବାନ ମଧ୍ୟ ହୋଇପାରିବେ ।

ପ୍ରଧାନମନ୍ତ୍ରୀଙ୍କ ସହ ସଭାମଞ୍ଚରେ ରାଜ୍ୟ ସଭାପତି ମନମୋହନ ସାମଲ, ଦୁଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ବିଶ୍ୱେଶ୍ୱର ଟୁଡୁ, ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡାଙ୍କ ସମେତ ଡର୍ଜରୁ ଅଧିକ ନେତା ମଞ୍ଚାସୀନ ଥିଲେ । ପ୍ରଧାନମନ୍ତ୍ରୀ ଅଧଘଣ୍ଟାର ଭାଷଣ ରଖିଥିଲେ ।