ପ୍ରବଳ ଉତ୍ତେଜନା, କର୍ତ୍ତୃପକ୍ଷଙ୍କ ଅମଣିଷପଣିଆକୁ ପ୍ରଶ୍ନ
ଭୁବନେଶ୍ୱର: ଚୌଦ୍ୱାରସ୍ଥିତ ପଣ୍ଡା କମ୍ପାନୀ ଇମ୍ଫାରେ ପୁଣି ଏକ ବଡ଼ ଅଘଟଣ । ୱେଲଡିଂ କାର୍ଯ୍ୟରେ ନିୟୋଜିତ ଜଣେ ଶ୍ରମିକଙ୍କର ଆଜି ସନ୍ଦେହଜନକ ମୃତ୍ୟୁ ହୋଇଛି । ଡାକ୍ତରଖାନାରେ ତାଙ୍କୁ ମୃତ୍ୟୁ ଘୋଷଣା କରାଯାଇଥିଲେ ମଧ୍ୟ କମ୍ପାନୀ କର୍ତ୍ତୃପକ୍ଷଙ୍କର ଦେଖା ନ ମିଳିବାରୁ ପ୍ରବଳ ଉତ୍ତେଜନା ସୃଷ୍ଟି ହୋଇଛି । କର୍ତ୍ତୃପକ୍ଷଙ୍କ ଅମାନବିକତାର ପ୍ରତିବାଦ ସହ ମୃତ୍ୟୁର ସଠିକ୍ ତଦନ୍ତ ଏବଂ ୫୦ ଲକ୍ଷ କ୍ଷତିପୂରଣ ଦାବିରେ ଇମ୍ଫା ଗେଟ୍ ଆଗରେ ସମ୍ପର୍କୀୟମାନେ ଧାରଣା ଦେଇଛନ୍ତି । କିଟ୍ ଓ କିସ୍ ରେ ଛାତ୍ରମୃତ୍ୟୁକୁ ନେଇ କମ୍ପମାନ କରୁଥିବା ଓଟିଭି ଏହି ଖବରକୁ କାହିଁକି ଚାପିଦେଇଛି ବୋଲି ସମ୍ପର୍କୀୟମାନେ ପ୍ରଶ୍ନ କରିଛନ୍ତି । ଯଦି କିଟ୍ ରେ ଛାତ୍ରୀ ଆତ୍ମହତ୍ୟା ଓ କିସ୍ ରେ ଛାତ୍ରମୃତ୍ୟୁ ପାଇଁ ଅଚ୍ୟୁତ ସାମନ୍ତ ଦାୟୀ ତେବେ ଇମ୍ଫାରେ ଶ୍ରମିକଙ୍କ ସନ୍ଦେହଜନକ ମୃତ୍ୟୁ ପାଇଁ କାହାକୁ ଦାୟୀ କରାଯିବ ବୋଲି ଓଟିଭି ମାଲିକଙ୍କଠାରୁ ଜବାବ ମାଗିଛନ୍ତି । ଅନ୍ୟଙ୍କୁ ବଦନାମ କରିବାକୁ ଚକ୍ରାନ୍ତର ଫାଶରେ ମାଲିକ ନିଜେ ପଡ଼ିଥିବା ସାଧାରଣରେ ଚର୍ଚ୍ଚା ହେଉଛି ।
ମୃତ ଶ୍ରମିକ ହେଉଛନ୍ତି ରାକେଶ ମୁଦୁଲି(୩୫) । ଚୌଦ୍ୱାର ଅନ୍ତର୍ଗତ ବାଣୀପଦା ପଞ୍ଚାୟତ ଚାଙ୍ଗୁଡିଆ ଗ୍ରାମର ନବବିବାହିତ ରାକେଶ ଦୀର୍ଘ ଦିନ ହେବ ଇମ୍ଫାରେ ୱେଲଡିଂ ଶ୍ରମିକ ଭାବେ କାର୍ଯ୍ୟ କରୁଥିଲେ । ସବୁଦିନ ଭଳି ଆଜି ସକାଳ ୫ଟାରେ ଘରୁ ବାହାରି କାମରେ ଯୋଗଦେଇଥିଲେ । ତେବେ କାମ କରୁଥିବା ବେଳେ ହଠାତ୍ ବେହୋସ ହୋଇ ଟଳି ପଡ଼ିଥିଲେ ବୋଲି କୁହାଯାଉଛି । ସାଙ୍ଗରେ ଥିବା କର୍ମଚାରୀମାନେ ତୁରନ୍ତ ତାଙ୍କୁ ଇଏସଆଇ ହସ୍ପିଟାଲ୍ ରେ ଭର୍ତ୍ତି କରିଥିଲେ । ମାତ୍ର ଡାକ୍ତରମାନେ ତାଙ୍କୁ ମୃତ୍ୟୁ ଘୋଷଣା କରିଥିଲେ । ଖବର ପାଇ ତାଙ୍କ ପରିବାର ଲୋକ ଓ ସମ୍ପର୍କୀୟମାନେ ସେଠାରେ ପହଞ୍ଚିଥିଲେ । ହେଲେ କେହି ତାଙ୍କ ପାଖରେ ନ ଥିବା ଦେଖି ସେମାନେ ଉତ୍ତ୍ୟକ୍ତ ହୋଇପଡ଼ିଥିଲେ ।
ମୃତ ରାକେଶଙ୍କ ପିଉସୀ ଭାରତୀ ବେଉରା ଅଭିଯୋଗ କରିଛନ୍ତି ସେମାନେ ଆସିଲା ବେଳକୁ ତାଙ୍କ ପୁତୁରା ଡାକ୍ତରଖାନା ଖଟରେ ମରି ପଡ଼ିଥିଲେ । ପାଖରେ କେହି ନ ଥିଲେ । କମ୍ପାନୀ ମ୍ୟାନେଜର ଓ କର୍ତ୍ତୃପକ୍ଷଙ୍କୁ ଯୋଗାଯୋଗ କରିଥିଲେ ମଧ୍ୟ କେହି ଶୁଣି ନ ଥିଲେ । ଏଭଳି ଅବସ୍ଥାରେ ତାଙ୍କୁ ଛାଡ଼ିଦେଇଥିବା କମ୍ପାନୀବାଲାଙ୍କ ମଣିଷପଣିଆକୁ ସେ ପ୍ରଶ୍ନ କରିଛନ୍ତି । ଭାରତୀଙ୍କ କହିଛନ୍ତି ଯେ ତାଙ୍କ ପୁତୁରା ରାକେଶ ଜଣେ ସୁସ୍ଥ ସବଳ ଯୁବକ । ୬ ମାସ ତଳେ ବାହା ହୋଇଥିଲେ । ତାଙ୍କର କୌଣସି ରୋଗ ନ ଥିଲା । ହଠାତ କେମିତି ମୃତ୍ୟୁ ହୋଇଯିବ? ତାଙ୍କୁ କେହି ହତ୍ୟା କରିଥିବା ସନ୍ଦେହ ହେଉଛି । ତଦନ୍ତ କରାଗଲେ ସତ ଜଣାପଡ଼ିବ ବୋଲି କହିଛନ୍ତି । ଏଥିସହ ମୃତ ରାକେଶଙ୍କ ପରିବାରକୁ ୫୦ ଲକ୍ଷ ଟଙ୍କା କ୍ଷତିପୂରଣ, ସାନଭାଇକୁ ଚାକିରି ଦେବା ପାଇଁ ସମ୍ପର୍କୀୟମାନେ ଦାବି କରିଛନ୍ତି ।
ଡାକ୍ତରଖାନରୁ ଶବକୁ ଧରି ପରିବାର ଲୋକ ଏବଂ ସମ୍ପର୍କୀୟମାନେ ଇମ୍ଫା ଗେଟ୍ ଆଗରେ ଧାରଣା ଦେଇଥିଲେ । କମ୍ପାନୀ କର୍ତ୍ତୃପକ୍ଷଙ୍କ ସହ ଆଲୋଚନା ପାଇଁ ଜିଦ୍ ଧରିବାରୁ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା । ଚୌଦ୍ୱାର ପୁଲିସ ସେଠାରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିବା ସହ କମ୍ପାନୀ କର୍ତ୍ତୃପକ୍ଷଙ୍କ ସହ ଯୋଗାଯୋଗ କରିବାକୁ ପ୍ରତିଶ୍ରୁତି ଦେଇଥିଲେ ।
ସୂଚନାଥାଉକି, ଗତ ଡିସେମ୍ବର ମାସରେ ଇମ୍ଫା କମ୍ପାନୀରେ କାର୍ଯ୍ୟରତ ସୁରକ୍ଷା କର୍ମୀ ଜିତେନ୍ଦ୍ରୀୟ ସାହୁ ନିଖୋଜ ହୋଇଯାଇଥିଲେ । ବିଶାଖାପାଟଣାକୁ ଏସକର୍ଟ ଡୁ୍ୟଟିରେ ଯାଇ ସେଠାରୁ ଫେରି ନ ଥିଲେ । ତାଙ୍କର ପୋଷାକ ଏବଂ ପରିଚୟପତ୍ର ଆଖପାଖରୁ ମିଳିଥିବାରୁ ପରିବାର ଲୋକେ ହତ୍ୟା ଆଶଙ୍କା କରିଥିଲେ । ମାତ୍ର ଇମ୍ଫା କର୍ତ୍ତୃପକ୍ଷ ତାଙ୍କୁ ଖୋଜିବା ପରିବର୍ତ୍ତେ ଘଟଣାକୁ ଚାପି ଦେବାକୁ ଉଦ୍ୟମ କରିବାରୁ ଉତ୍ତେଜନା ପରିସ୍ଥିତି ସୃଷ୍ଟି ହୋଇଥିଲା । ଦୁଇଛୁଆଙ୍କୁ ଧରି ଜିତେନ୍ଦ୍ରୀୟଙ୍କ ପତ୍ନୀ ଚୌଦ୍ୱାର ଥାନାରେ ଏତଲା ଦେଇଥିଲେ । କମ୍ପାନୀ ମାଲିକଙ୍କ ପରିବାରର ଏକ ନମ୍ବର ଟିଭି ଏହି ଖବରକୁ ଚାପିଦେବାରେ ସମର୍ଥ ହୋଇଥିଲା ।
