ବିଜେଡିରେ ମିଶିଲେ ଅଂଶୁମାନ ମହାନ୍ତି

ଭୁବନେଶ୍ୱର: ଦୁଇଦିନ ତଳେ କଂଗ୍ରେସ ଦଳ ଛାଡ଼ିଥିବା ରାଜନଗରର ପୂର୍ବତନ ବିଧାୟକ ଅଂଶୁମାନ ମହାନ୍ତି ଆଜି ବିଜେଡିରେ ଯୋଗଦେଇଛନ୍ତି । ଶଙ୍ଖ ଭବନଠାରେ ଆୟୋଜିତ ସ୍ୱତନ୍ତ୍ର ମିଶ୍ରଣ ପର୍ବରେ ହଜାରରୁ ଅଧିକ ସମର୍ଥକଙ୍କ ସହ ସେ ଶଙ୍ଖ ଧରିଛନ୍ତି । ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ, ସାଧାରଣ ସମ୍ପାଦକ ତଥା ରାଜ୍ୟସଭା ସାଂସଦ ମାନସ ମଙ୍ଗରାଜ, ମନ୍ତ୍ରୀ ଅତନୁ ସବ୍ୟସାଚୀ ନାୟକ, ମନ୍ତ୍ରୀ ପ୍ରତାପ ଦେବ, ମାହାଙ୍ଗା ବିଧାୟକ ପ୍ରତାପ ଜେନା ଏବଂ ରାଜନଗର ବିଧାୟକ ଧ୍ରୁବ ସାହୁଙ୍କ ଉପସ୍ଥିତିରେ ଏହି ମିଶ୍ରଣ ପର୍ବ ଅନୁଷ୍ଠିତ ହୋଇଥିଲା । ଅଂଶୁମାନଙ୍କ ଯୋଗଦାନ କେନ୍ଦ୍ରାପଡ଼ା ଜିଲ୍ଲାରେ ବିଜେଡିକୁ ଆହୁରି ଶକ୍ତିଶାଳୀ କରିବ ବୋଲି ସେମାନେ କହିଛନ୍ତି ।

ବିଜେଡିରେ ଯୋଗଦେଇ ତାଙ୍କ ବାପାଙ୍କ ପୁରୁଣା ପରିବାରକୁ ଫେରିଆସିଥିବାରୁ ସେ ବହୁତ ଖୁସି ଏବଂ ଆଜି ତାଙ୍କ ପାଇଁ ସୌଭାଗ୍ୟର ଦିନ ବୋଲି ଅଂଶୁମାନ କହିଛନ୍ତି । ମାନ୍ୟବର ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକ୍ରମେ ହିଁ ଏହା ସମ୍ଭବ ହୋଇଛି । ମୁଖ୍ୟମନ୍ତ୍ରୀଙ୍କ ସ୍ୱଚ୍ଛ, ନିର୍ମଳ ଭାବମୂର୍ତ୍ତି ତଥା ବିକାଶଧାରା ବିଶେଷକରି ମୁଖ୍ୟମନ୍ତ୍ରୀଙ୍କ ସ୍ୱପ୍ନର ନୂତନ ଓଡ଼ିଶା ଗଠନରେ ନିଜକୁ ସାମିଲ କରି ଗର୍ବ ଅନୁଭବ କରୁଛି ବୋଲି କହିଥିଲେ ଅଂଶୁମାନ । ସମଗ୍ର କେନ୍ଦ୍ରାପଡ଼ା ଜିଲ୍ଲାରେ ତୃଣମୂଳସ୍ତରରେ ସଂଗଠନକୁ ଆହୁରି ମଜବୁତ କରିବା ପାଇଁ କାମ କରିବି ବୋଲି ସେ କହିବା ସହ ରାଜନଗର, ପଟ୍ଟମୁଣ୍ଡାଇର ବିକାଶଧାରାକୁ ଦ୍ୱିଗୁଣିତ କରାଯିବ ବୋଲି କହିଥିଲେ ।

ଆପଣ କେଉଁ ଆସନରୁ ଲଢ଼ିବେ ବୋଲି ସାମ୍ବାଦିକଙ୍କ ପ୍ରଶ୍ନକୁ ବେଶ୍ ଚତୁରତାର ସହ ସାମନା କରିଥିଲେ ପୂର୍ବତନ ବିଧାୟକ ଅଂଶୁମାନ । କହିଥିଲେ, ନିର୍ବାଚନ ଲଢ଼ିବା ବଡ଼ କଥା ନୁହେଁ । ଅଞ୍ଚଳ ତଥା ରାଜ୍ୟର ବିକାଶ ସବୁଠାରୁ ବଡ଼କଥା । ମୁଁ କୌଣସି ଆଶା ରଖି ବିଜେଡିକୁ ଆସିନାହିଁ । ମୁଖ୍ୟମନ୍ତ୍ରୀଙ୍କ ଦୃଢ଼ ନେତୃତ୍ୱ ଏବଂ ଅଞ୍ଚଳବାସୀଙ୍କ ମତାମତକୁ ସମ୍ମାନ ଦେଇ ବିଜେଡିରେ ଯୋଗଦେଇଛି । ମୁଖ୍ୟମନ୍ତ୍ରୀ ଯେଉଁ ନିର୍ଦ୍ଦେଶ ଏବଂ ଦାୟିତ୍ୱ ଦେବେ ତାହାକୁ ସୁଚାରୂରୂପେ ପାଳନ କରିବି ।

ସୂଚନାଥାଉକି, ଅଂଶୁମାନ ହେଉଛନ୍ତି ରାଜ୍ୟର ଅତି ଲୋକପ୍ରିୟ ତଥା ଅନ୍ୟତମ ପ୍ରଭାବଶାଳୀ ନେତା ସ୍ୱର୍ଗତ ନଳିନୀ ମହାନ୍ତିଙ୍କ ପୁଅ । ୨୦୧୪ ରେ ରାଜନଗର ବିଧାନସଭା ଆସନରେ ସେ କଂଗ୍ରେସରୁ ଲଢ଼ି ବିଜୟୀ ହୋଇଥିଲେ । ତେବେ ୨୦୧୯ ନିର୍ବାଚନରେ ବିଜେଡି ପ୍ରାର୍ଥୀ ଧ୍ରୁବ ସାହୁଙ୍କଠାରୁ ହାରି ଯାଇଥିଲେ । ନିର୍ବାଚନ ହାରିଯାଇଥିଲେ ମଧ୍ୟ କଂଗ୍ରେସରେ ତାଙ୍କର ପତିଆରା କମି ନ ଥିଲା । ଦଳ ତାଙ୍କୁ କେନ୍ଦ୍ରାପଡ଼ା ଜିଲ୍ଲା ସଭାପତି ଦାୟିତ୍ୱ ଦେଇଥିଲା । ୨୦୨୦ରୁ ସେ ଏହି ଦାୟିତ୍ୱ ତୁଲାଇ ଆସୁଥିଲେ ।

ତେବେ ଗତଥର ଭଳି ଏଥର ମଧ୍ୟ ତାଙ୍କର ଦଳବଦଳକୁ ନେଇ ଚର୍ଚ୍ଚା ଲାଗି ରହିଥିଲେ ମଧ୍ୟ କିଛିଦିନ ତଳେ ସେ ରାଜନଗର ଆସନରୁ କଂଗ୍ରେସ ଟିକେଟ୍ ପାଇଁ ଅନଲାଇନ୍ ରେ ଆବେଦନ କରିଥିଲେ । ତେବେ ଆବେଦନର ସପ୍ତାହ ନ ପୂରୁଣୁ ଗତ ୧୪ ତାରିଖରେ ସେ ହଠାତ୍ କଂଗ୍ରେସ ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଥିଲେ ।

ଅଂଶୁମାନ ବିଜେଡିରେ ମିଶିବା ପରେ କେନ୍ଦ୍ରାପଡ଼ା ବିଜେଡି ରାଜନୀତି ଆହୁରି ସରଗରମ ହୋଇଛି । ଦଳ ତାଙ୍କୁ ରାଜନଗର ବିଧାନସଭା ଆସନ କିମ୍ବା କେନ୍ଦ୍ରାପଡ଼ା ଲୋକସଭା ଆସନରୁ ପ୍ରାର୍ଥୀ କରିପାରେ ବୋଲି ଚର୍ଚ୍ଚା ଆରମ୍ଭ ହୋଇଛି । ତେବେ ଦୁଇଦିନ ମଧ୍ୟରେ ଏଥିନେଇ ସ୍ପଷ୍ଟ ସୂଚନା ମିଳିଯିବ ବୋଲି ଅଂଶୁମାନଙ୍କ ସମର୍ଥକ ମହଲରୁ ସୂଚନା ମିଳିଛି ।

ଢ଼େଙ୍କାନାଳର ଡାକ୍ତର ଅବିନାଶ ସାମଲ ବିଜେଡିରେ:

ଢ଼େଙ୍କାନାଳ ଜିଲ୍ଲା ଖଡ଼ଗପ୍ରସାଦର ଡାକ୍ତର ଅବିନାଶ ସାମଲ ମଧ୍ୟ ଆଜି ବିଜେଡିରେ ଯୋଗଦେଇଛନ୍ତି । ସକାଳେ ଶଙ୍ଖ ଭବନରେ ଆୟୋଜିତ ମିଶ୍ରଣ ପର୍ବରେ ରାଜ୍ୟସଭା ସାଂସଦ ମାନସ ମଙ୍ଗରାଜ ଓ ଢ଼େଙ୍କାନାଳ ବିଧାୟକ ସୁଧୀର କୁମାର ସାମଲଙ୍କ ଉପସ୍ଥିତିରେ ସେ ବିଜେଡିରେ ଯୋଗଦେଇଛନ୍ତି । କୌଣସି ପଦବୀ ଲୋଭରେ ନୁହେଁ, ମାନ୍ୟବର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନୀତି ଆଦର୍ଶ ତଥା ଲୋକାଭିମୁଖୀ କାର୍ଯ୍ୟକ୍ରମରେ ଆକୃଷ୍ଟ ହୋଇ ବିଜେଡିରେ ଯୋଗଦେଇଛି ବୋଲି ଅବିନାଶ କହିଛନ୍ତି ।