ଭୁବନେଶ୍ୱର: ଓଡ଼ିଶାରୁ ଖାଲି ପଡ଼ିଥିବା ଗୋଟିଏ ଆସନ ସମେତ ୪ ରାଜ୍ୟର ୬ ରାଜ୍ୟସଭା ଆସନ ପାଇଁ ଆସନ୍ତା ଡିସେମ୍ବର ୨୦ରେ ଉପନିର୍ବାଚନ ଅନୁଷ୍ଠିତ ହେବ । ନିର୍ବାଚନ କମିସନଙ୍କ ପକ୍ଷରୁ ଆଜି ଏହି ଘୋଷଣା କରାଯାଇଛି ।
ଘୋଷଣା ଅନୁଯାୟୀ, ଡିସେମ୍ବର ୩ ରେ ନିର୍ବାଚନ ବିଜ୍ଞପ୍ତି ପ୍ରକାଶ ପାଇବ । ନାମାଙ୍କନ ପତ୍ର ଦାଖଲର ଶେଷ ତାରିଖ ଡିସେମ୍ବର ୧୦ । ଡିସେମ୍ବର ୧୧ରେ ନାମାଙ୍କନ ଯାଞ୍ଚ ହେବ । ନାମାଙ୍କନ ପତ୍ର ପ୍ରତ୍ୟାହାରର ଶେଷ ତାରିଖ ଡିସେମ୍ବର ୧୩ । ଡିସେମ୍ବର ୨୦ ରେ ନିର୍ବାଚନ ଅନୁଷ୍ଠିତ ହେବ । ସକାଳ ୯ରୁ ଅପରାହ୍ନ ୪ଟା ଯାଏଁ ଭୋଟ ଗ୍ରହଣ ହେବ । ସେଦିନ ଅପରାହ୍ନ ୫ଟାରେ ଭୋଟ ଗଣତି ହେବ । ଡିସେମ୍ବର ୨୪ ସୁଦ୍ଧା ନିର୍ବାଚନ ପ୍ରକ୍ରିୟା ସମାପ୍ତ ହେବ ।
ବିଜେଡିରୁ ରାଜ୍ୟସଭାକୁ ଯାଇଥିବା ସୁଜିତ୍ କୁମାର ଗତ ସେପ୍ଟେମ୍ବର ୬ ତାରିଖରେ ରାଜ୍ୟସଭା ସଦସ୍ୟ ପଦରୁ ଇସ୍ତଫା ଦେଇଥିଲେ । ବିଜେଡିର ପୂର୍ବତନ ରାଜ୍ୟସଭା ସାଂସଦ ମମତା ମହନ୍ତଙ୍କ ପଥ ଅନୁସରଣ କରି ସେ ମଧ୍ୟ ବିଜେପିରେ ଯୋଗଦେଇଥିଲେ । ତାଙ୍କର ଇସ୍ତଫା ପରେ ସେହି ଆସନ ଖାଲି ପଡ଼ିଛି ।
ଗତ ସାଧାରଣ ନିର୍ବାଚନରେ ଓଡ଼ିଶାରେ ବିଜେଡିର ବିପର୍ଯ୍ୟୟ ପରେ ଦଳର ରାଜ୍ୟସଭା ସାଂସଦଙ୍କୁ ଅକ୍ତିଆର କରିବାକୁ ବିଜେପି ରଣନୀତି କରିଥିବା ଚର୍ଚ୍ଚା ହେଉଛି । ଏଥିରେ ବିଜେଡି ସାଂସଦ ମମତା ମହନ୍ତ ଏବଂ ସୁଜିତ କୁମାରଙ୍କୁ ମନେଇ ନିଜ ପକ୍ଷକୁ ଆଣିବାରେ ବିଜେପି ସକ୍ଷମ ହୋଇଛି । ବିଜେଡି ରାଜ୍ୟସଭା ସଂସଦୀୟ ଦଳ ଭାଙ୍ଗିବା ରଣନୀତିରେ ମମତାଙ୍କୁ ବିଜେପି ନିଜ ପକ୍ଷକୁ ଆଣି ପୁନର୍ବାର ରାଜ୍ୟସଭାକୁ ପଠାଇ ସାରିଛି । ସୁଜିତ କୁମାରଙ୍କୁ ଅନୁରୂପ ଭାବେ ରାଜ୍ୟସଭା ପଠାଇ ଅଭିଯାନରେ ଆଗକୁ ବଢ଼ିବ ବୋଲି କୁହାଯାଉଛି । ବିଜେପି ଯୋଗାଯୋଗରେ ଆହୁରି ୨ ବିଜେଡି ରାଜ୍ୟସଭା ସାଂସଦ ଥିବା ଆଲୋଚନା ହେଉଛି ।
ସୂଚନାଯୋଗ୍ୟ, ସାଧାରଣ ନିର୍ବାଚନ ବେଳକୁ ବିଜେଡିର ରାଜ୍ୟସଭା ସଦସ୍ୟଙ୍କ ସଂଖ୍ୟା ୯ ଥିଲା । ବର୍ତ୍ତମାନ ଏହି ସଂଖ୍ୟା ୭ କୁ ଖସି ଆସିଛି ।
