ଭୁବନେଶ୍ୱର: ଦୀର୍ଘ ସାଢ଼େ ୪ ମାସ ଧରି ଏମସ୍ ରେ ସଂରକ୍ଷିତ ରହିଲା ୨୮ ମୃତକଙ୍କ ଶବ । ବାହାନଗା ଟ୍ରେନ୍ ଦୁର୍ଘଟଣାରେ ଏମାନଙ୍କର ମୃତ୍ୟୁ ହୋଇଥିଲା । ମାତ୍ର ଶବଗୁଡ଼ିକର ଦାବିଦାର ମିଳିଲେ ନାହିଁ । ଡିଏନଏ ଟେଷ୍ଟ ପରେ ମଧ୍ୟ ସେମାନଙ୍କ ପରିଚୟ ମିଳିଲା ନାହିଁ । ରହସ୍ୟ ହୋଇ ରହିଗଲେ ଏହି ମୃତକମାନେ । ଆଉ ଅଧିକ ଦିନ ଅପେକ୍ଷା କରିବା ସମ୍ଭବ ନ ଥିବାରୁ ବିଏମସି ପକ୍ଷରୁ ଏହି ଅପରିଚିତ ଶବଗୁଡ଼ିକର ଅନ୍ତିମ ସଂସ୍କାର ସ୍ଥାନୀୟ ଭରତପୁର ଶ୍ମଶାନରେ ଆଜି ସଂଧ୍ୟାରୁ ଆରମ୍ଭ ହୋଇଛି ।
ଗତ ଜୁନ୍ ୨ ତାରିଖରେ ବାହାନଗା ଟ୍ରେନ୍ ଦୁର୍ଘଟଣା ଘଟିଥିଲା । ଏଥିରେ ମୃତ୍ୟୁବରଣ କରିଥିବା ବ୍ୟକ୍ତିଙ୍କ ମଧ୍ୟରୁ ୧୬୨ ଜଣଙ୍କର ମୃତଦେହ ଏମସ୍ କୁ ଅଣାଯାଇଥିଲା । ସ୍ୱତନ୍ତ୍ର ବ୍ୟବସ୍ଥାରେ ମୃତଦେହ ସଂରକ୍ଷିତ ରଖାଯାଇଥିଲା । ଫିଜିକାଲ୍ ଭେରିଫିକେସନ୍ ପରେ ୮୧ ମୃତଦେହକୁ ସେମାନଙ୍କ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିଲା । ମାତ୍ର ଅବଶିଷ୍ଟ ମୃତଦେହ ଚିହ୍ନଟରେ ସମସ୍ୟା ଉପୁଜିବାରୁ ଡିଏନଏ ଟେଷ୍ଟ୍ ର ସହାୟତା ନିଆଯାଇଥିଲା । ସେହି ପ୍ରକ୍ରିୟାରେ ୫୩ଟି ମୃତଦେହ ଚିହ୍ନଟ ହୋଇ ସେମାନଙ୍କ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିଲା । ଏହାପରେ ବି ୨୮ ଶବ ଅଚିହ୍ନା ରହିଗଲେ । ଦାବିଦାର ଭାବେ ସେମାନଙ୍କର କୌଣସି ସମ୍ପର୍କୀୟ ଆସିଲେ ନାହିଁ ।
ସେପଟେ ମୃତଦେହ ସଂରକ୍ଷଣ ଆଉ ଅଧିକ ଦିନ ସମ୍ଭବ ନୁହେଁ ବୋଲି ଏମସ୍ କର୍ତ୍ତୃପକ୍ଷ ଜଣାଇବା ପରେ ଦୁର୍ଘଟଣାର ତଦନ୍ତକାରୀ ସଂସ୍ଥା ସିବିଆଇ ପକ୍ଷରୁ ମୃତକଙ୍କ ଅନ୍ତିମ ସଂସ୍କାର ପାଇଁ ଅଗଷ୍ଟ ୨୫ ତାରିଖରେ ଖୋର୍ଦ୍ଧା ଜିଲ୍ଲାପାଳଙ୍କୁ ଚିଠି କରାଯାଇଥିଲା । ଏହାପରେ ବିଏମସି ପଦକ୍ଷେପ ଗ୍ରହଣ ଆରମ୍ଭ କରିଥିଲା । ଆଜି ଅପରାହ୍ନରେ ଏମସ୍ ରୁ ଶବଗୁଡ଼ିକ ହସ୍ତାନ୍ତର ପ୍ରକ୍ରିୟା ଆରମ୍ଭ ହୋଇ ଭରତପୁର ଶ୍ମଶାନରେ ପର୍ଯ୍ୟାୟକ୍ରମେ ସକ୍ରାର କରାଯାଉଛି । ଶବଗୁଡ଼ିକର ସକ୍ରାର ପାଇଁ ଦୁଇଦିନ ସମୟ ଲାଗିବ ବୋଲି ବିଏମସି କମିସନର ବିଜୟ ଅମୃତ କୁଲାଙ୍ଗେ କହିଛନ୍ତି ।
