ଭୁୁବନେଶ୍ୱର: ପୂର୍ବତନ ଆଇନ ସଚିବ ତଥା ରାଜ୍ୟ ଟ୍ରିବ୍ୟୁନାଲର ଉପାଧ୍ୟକ୍ଷ ଜଷ୍ଟିସ୍ ସରୋଜ କାନ୍ତ ମିଶ୍ରଙ୍କର ଶୁକ୍ରବାର ହୃଦଘାତରେ ପରଲୋକ ହୋଇଛି । ତାଙ୍କୁ ୮୭ ବର୍ଷ ବୟସ ହୋଇଥିଲା । କେବଳ ଜଣେ ଉଚ୍ଚକୋଟିର ଆଇନ ବିଶାରଦ ନୁହଁନ୍ତି, ଜଣେ ଭଲ ମଣିଷ ଭାବେ ସେ ଅତ୍ୟନ୍ତ ଲୋକପ୍ରିୟ ଥିଲେ ।
ଭୁବନେଶ୍ୱରର ଶୈଳଶ୍ରୀ ବିହାରରେ ରହୁଥିବା ଜଷ୍ଟିସ୍ ମିଶ୍ର ବାର୍ଦ୍ଧକ୍ୟରେ ଉପନୀତ ହୋଇଥିଲେ ମଧ୍ୟ ବେଶ୍ ଚଳଚଞ୍ଚଳ ଥିଲେ । ଜୀବନର ଶେଷ ପର୍ଯ୍ୟନ୍ତ ଆଇନ ବିଦ୍ୟାରେ ନିମଗ୍ନ ରହି ଗରିବ ଓ ଅସହାୟଙ୍କୁ ମାଗଣାରେ ଆଇନ ସେବା ଯୋଗାଇ ଦେଉଥିଲେ । ତାଙ୍କ ମୃତ୍ୟୁରେ ବିଭିନ୍ନ ମହଲରେ ଶୋକ ପ୍ରକାଶ ପାଇଛି ।
ସ୍ୱର୍ଗତ ମିଶ୍ରଙ୍କର ୬ ଝିଅ ଏବଂ ସମସ୍ତେ ଉଚ୍ଚ ପ୍ରତିଷ୍ଠିତ । ବଡ଼ଝିଅ ସୁଚିସ୍ମିତା ମିଶ୍ର ରାଜ୍ୟ ଟ୍ରିବ୍ୟୁନାଲ୍ ର କୋଅପରେଟିଭ୍ ଅଧ୍ୟକ୍ଷା ଭାବେ କାର୍ଯ୍ୟ କରୁଥିଲା ବେଳେ ଦ୍ୱିତୀୟ ଝିଅ ନିବେଦିତା ମିଶ୍ର କମଳା ନେହେରୁ କଲେଜରେ ଅର୍ଥନୀତି ଅଧ୍ୟାପିକା, ତୃତୀୟ ଝିଅ ଗୀତା ଦାଶ ଯୁକ୍ତରାଷ୍ଟ୍ର ଆମେରିକାର ଆରିଜେନା ବିଶ୍ୱବିଦ୍ୟାଳୟରେ ପ୍ରଫେସର, ଚତୁର୍ଥ ଝିଅ ନବନୀତା ମିଶ୍ର ଓଡ଼ିଶା ହାଇକୋର୍ଟରେ ଆଡଭୋକେଟ୍, ପଞ୍ଚମ ଝିଅ ସୁଚରିତା ମିଶ୍ର ଲେଖିକା ଓ ସମାଜସେବୀ ଏବଂ ସବା ସାନ ଝିଅ ସୁରତନୟା ମିଶ୍ର ମାଜିଷ୍ଟ୍ରଟ୍ ଚାକିରି ଛାଡ଼ି ଏବେ ଓଡ଼ିଶା ହାଇକୋର୍ଟରେ ଓକିଲାତି କରୁଛନ୍ତି ।
ସ୍ଥାନୀୟ ସତ୍ୟନଗର ଶ୍ମଶାନରେ ତାଙ୍କର ଅନ୍ତେଷ୍ଟ୍ରିକ୍ରିୟା ସମ୍ପନ୍ନ ହୋଇଥିଲା । ଜ୍ୱାଇଁ ହେମନ୍ତ ରଥ(ସଭାପତି, କଳିଙ୍ଗ ସେନା)ମୁଖାଗ୍ନି ଦେଇଥିଲେ ।
