ଧର୍ମେନ୍ଦ୍ରଙ୍କ ଉପରେ ତଥାଗତଙ୍କର ରାଗ କାହିଁକି?

ଭୁବନେଶ୍ୱର: ପୂର୍ବତନ ବିଜେଡି ସାଂସଦ ତଥାଗତ ଶତପଥୀଙ୍କ ଖବରକାଗଜରେ ଆଜି ଏକ ଆକର୍ଷଣୀୟ ଶିରୋନାମାର ଫଟୋ ସମ୍ବଳିତ ଖବର ପ୍ରକାଶ ପାଇଛି । ଶିରୋନାମାଟି ହେଉଛି- ବୈଜୟନ୍ତଙ୍କୁ ଭେଟିଲେ ରେଖା, ରେଖାଙ୍କୁ ଭେଟିବାକୁ ଗଲେ ଧର୍ମେନ୍ଦ୍ର । ଖବରଟି ହେଉଛି- ଦିଲ୍ଲୀର ନବାଗତ ମୁଖ୍ୟମନ୍ତ୍ରୀ ରେଖା ଗୁପ୍ତା ବିଜେପି ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡାଙ୍କୁ ଭେଟିବାକୁ ତାଙ୍କ ଘରକୁ ଯାଇଥିଲେ । ଅଥଚ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ରେଖାଙ୍କୁ ଭେଟିବା ପାଇଁ ତାଙ୍କ ପ୍ରକୋଷ୍ଠକୁ ଯାଇଥିଲେ ।

ଦିଲ୍ଲୀ ଦରବାରରେ ଧର୍ମେନ୍ଦ୍ରଙ୍କ ପୂର୍ବ ପତିଆରା ଆଉ ନାହିଁ । ତାଙ୍କ ଜାଗା ନେଇଯାଇଛନ୍ତି ବୈଜୟନ୍ତ । ଧର୍ମେନ୍ଦ୍ରଙ୍କ ପ୍ରଭାବ ଅପେକ୍ଷା ଏବେ ବୈଜୟନ୍ତ ଦିଲ୍ଲୀ ରାଜନୀତିରେ ଅଧିକ ପ୍ରଭାବଶାଳୀ ପରିଲିକ୍ଷିତ ହେଉଥିବା ତଥାଗତ ବାବୁଙ୍କ ଖବରକାଗଜର ଅନୁଭବ ହୋଇଛି ।

ତେବେ ତଥାଗତ ବାବୁଙ୍କ କାଗଜରେ ବୈଜୟନ୍ତ ଓ ଧର୍ମେନ୍ଦ୍ରଙ୍କ ‘ପତିଆରା’ ଚିତ୍ରଣ କରାଯାଇଥିବା ଖବରର ଅଧା ଠିକ୍ ହୋଇଥିବା ବେଳେ ଅଧା ଭୁଲ୍ । ଦିଲ୍ଲୀ ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ନେବା ପରେ ରେଖା ଗୁପ୍ତା ନିର୍ବାଚନ ପ୍ରଭାରୀ ଦାୟିତ୍ୱ ସମ୍ଭାଳିଥିବା ବୈଜୟନ୍ତ ପଣ୍ଡାଙ୍କ ଘରକୁ ସୌଜନ୍ୟମୂଳକ ସାକ୍ଷାତ ପାଇଁ ଯାଇଥିଲେ । ଠିକ୍ ସେହିଭଳି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବାସଭବନକୁ ଯାଇ ସୌଜନ୍ୟମୂଳକ ସାକ୍ଷାତ କରିଥିଲେ । ଦିଲ୍ଲୀ ମୁଖ୍ୟମନ୍ତ୍ରୀ ତାଙ୍କ ଏକ୍ସ ହାଣ୍ଡଲରେ ଏହା ସ୍ପଷ୍ଟ ଭାବରେ ଲେଖି ଫଟୋ ଛାଡ଼ିଛନ୍ତି । ତେଣୁ ଏଥିରେ ଭ୍ରମିତ ହେବାର କିଛି ନାହିଁ ।

ଏହା ସତ୍ତ୍ୱେ ତଥାଗତ ବାବୁଙ୍କ ଖବରକାଗଜରେ ଓଡ଼ିଶାର ଦୁଇ କେନ୍ଦ୍ରୀୟ ନେତାଙ୍କ ସହ ଦିଲ୍ଲୀ ମୁଖ୍ୟମନ୍ତ୍ରୀଙ୍କର ସାକ୍ଷାତକାରର ଦୁଇଟି ଫଟୋକୁ ଭୁଲ୍ ଭାବରେ ଉପସ୍ଥାପିତ କରାଯାଇ ଖବର କରାଯିବା ରାଜନୈତିକ ପର୍ଯ୍ୟବେକ୍ଷକ ମହଲକୁ ଆମୋଦିତ କରିଛି । ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତାଙ୍କ ସୋସିଆଲ୍ ମିଡିଆରେ ଏହା ପରିଷ୍କାର ଭାବେ ଉପଲବ୍ଧ ଥିଲା ବେଳେ ଗଛରୁ ତୋଳି ଆଣିବା ଭଳି ଭୁଲ୍ ଖବର ତିଆରି କରିବା ପଛରେ ତାଙ୍କର କ’ଣ ଉଦ୍ଦେଶ୍ୟ ତାହାକୁ ନେଇ ପ୍ରଶ୍ନ ଉଠିଛି ।

ଏକ ଭୁଲ୍ ତଥ୍ୟ ଆଧାରରେ ବୈଜୟନ୍ତଙ୍କୁ ଉଚ୍ଚା କରି ଦେଖାଇବା ଏବଂ ଧର୍ମେନ୍ଦ୍ରଙ୍କୁ ନୀଚ୍ଚା ଦେଖାଇ ଖବର ତିଆରି ପଛର ରହସ୍ୟ କେହି ବୁଝିପାରିନାହାନ୍ତି ।

ଏହି ଖବରରେ କୁହାଯାଇଛି ଯେ ଦିଲ୍ଲୀ ମୁଖ୍ୟମନ୍ତ୍ରୀ ବୈଜୟନ୍ତଙ୍କୁ ଭେଟିବାକୁ ତାଙ୍କ ଘରକୁ ଯିବା ଏବଂ ଧର୍ମେନ୍ଦ୍ର ଦିଲ୍ଲୀ ମୁଖ୍ୟମନ୍ତ୍ରୀଙ୍କ ଘରକୁ ଭେଟିବାକୁ ଯିବା ଘଟଣାରୁ ଦିଲ୍ଲୀରେ ବୈଜୟନ୍ତଙ୍କ ପଲା ଭାରି ହେଉଥିବା ବେଳେ ଧର୍ମେନ୍ଦ୍ରଙ୍କ ପ୍ରଭାବ କମୁଛି । ଓଡ଼ିଶାରେ ଧର୍ମେନ୍ଦ୍ର କୋଣଠେସା ହୋଇଯାଇଛନ୍ତି । ଓଡ଼ିଶାରେ ତାଙ୍କ ରାଜନୈତିକ କାର୍ଯ୍ୟ ପରିସର ସମ୍ବଲପୁରରେ ସୀମିତ ରହୁଛି । ଅନ୍ୟପକ୍ଷରେ ଦିଲ୍ଲୀ ବିଧାନସଭା ନିର୍ବାଚନ ପରଠାରୁ ବୈଜୟନ୍ତ ପଣ୍ଡାଙ୍କ ପ୍ରତି ଦଳ ଅଧିକ ନିର୍ଭରଶୀଳ ହୋଇଯାଇଛି( ତଥାଗତଙ୍କ କାଗଜର ପରିଲକ୍ଷିତ) । ଦିଲ୍ଲୀରେ ବୈଜୟନ୍ତଙ୍କ ପଲା ଭାରି ହୋଇଯାଇଛି ।

ତଥାଗତଙ୍କ କାଗଜର ଉପସଂହାର ହେଉଛି- ଧର୍ମେନ୍ଦ୍ର ହତାଶ ହୋଇ ଓଡ଼ିଶାର ସକ୍ରିୟ ରାଜନୀତିରୁ ଦୂରେଇ ଯାଇଥିବାରୁ ବୈଜୟନ୍ତଙ୍କ ପାଇଁ ସୁଯୋଗ ଆସିଛି । ଅନେକ ନେତା କଂଗ୍ରେସ ଓ ଆଞ୍ଚଳିକ ଦଳରୁ ଯାଇ ଭାଜପାରେ ନିଜର ନେତୃତ୍ୱ ବିକାଶ କରିପାରିଛନ୍ତି । ଭାଜପାରେ ନିଷ୍ଠାପର ଭାବେ କାର୍ଯ୍ୟକଲେ ପରବର୍ତ୍ତୀ ସମୟରେ ଅନ୍ୟ ଦଳରୁ ଆସିଥିଲେ ମଧ୍ୟ ନେତାଙ୍କ ସମ୍ମାନ ବୃଦ୍ଧି ହେଉଥିବା ପରିଲକ୍ଷିତ ହେଉଛି । ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମା ଏହାର ଏକ ବଡ଼ ଉଦାହରଣ ।

ପ୍ରଧାନମନ୍ତ୍ରୀ ନୂଆ ନେତୃତ୍ୱ ସୃଷ୍ଟିରେ ବିଶ୍ୱାସ ରଖୁଥିବା ଯୋଗୁଁ ଏବେ କିଛି ନୂଆ ଚେହେରାଙ୍କୁ ମୁଖ୍ୟମନ୍ତ୍ରୀ ଆସନରେ ବସାଯାଉଛି । ବୈଜୟନ୍ତଙ୍କ ଗୁରୁତ୍ୱ ବଢ଼ୁଥିବାରୁ ହୁଏତ ତାଙ୍କ ଭାଗ୍ୟରେ ମୁଖ୍ୟମନ୍ତ୍ରୀ ହେବାର ସୁଯୋଗ ଆସିପାରେ ବୋଲି ବୁଲେଇ ବଙ୍କେଇ କୁହାଯାଇଛି ।

ସୂଚନାଯୋଗ୍ୟ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ପ୍ରତି ତଥାଗତ ଶତପଥୀଙ୍କର ଆକ୍ଷେପମୂଳକ ମନ୍ତବ୍ୟ ଅତୀତରେ ଚର୍ଚ୍ଚାର ବିଷୟ ହୋଇଥିଲା । ନବୀନ ନିବାସରୁ ବାହାରୁଥିବା ତତ୍କାଳୀନ ବିଜେଡି ସାଂସଦ ତଥାଗତଙ୍କୁ ଘେରିଥିଲେ ସାମ୍ବାଦିକ । ଓଡ଼ିଶାରୁ ଦୁଇଜଣ କେନ୍ଦ୍ରମନ୍ତ୍ରୀ ହୋଇଥିବାରୁ ସାମ୍ବାଦିକମାନେ ତାଙ୍କର ପ୍ରତିକ୍ରିୟା ଲୋଡ଼ିଥିଲେ । ତଥାଗତ ଏହି ପ୍ରଶ୍ନର କଟାକ୍ଷମୂଳକ ଉତ୍ତର ଦେଇଥିଲେ । ଓଡ଼ିଶାରୁ ଜଣେ କେନ୍ଦ୍ରମନ୍ତ୍ରୀ ଜୁଏଲ୍ ଓରାମଙ୍କୁ ସେ ଜାଣନ୍ତି । ମାତ୍ର ଧର୍ମେନ୍ଦ୍ର ପ୍ରଧାନ କିଏ ସେ ଜାଣନ୍ତିନି ବୋଲି ତଥାଗତ କଟାକ୍ଷ କରିଥିଲେ ।