‘ଶୀତୁଆ ସନ୍ଧ୍ୟା’ରେ ଅରୁଣଙ୍କ ‘ପୀଡ଼ା’

ଭୁୁବନେଶ୍ୱର: ଗତ ଅଧ୍ୟାୟରେ ବେହାଲ୍ ବର୍ଷାରେ ମତୁଆଲା ହୋଇଥିଲେ ଦର୍ଶକ । ଏଥର ଶୀତୁଆ ସଂଧ୍ୟାରେ ଭାବପ୍ରବଣ ହୋଇଗଲେ ଦର୍ଶକ । ଶୀତୁଆ ସଂଧ୍ୟାର ମହକରେ ଭାସି ଆସିଥିଲା ନାୟକଙ୍କ ସାମାଜିକ ପ୍ରତିବଦ୍ଧତାର ସ୍ୱର । ଦୁଃସ୍ଥ, ଅସହାୟ ମଣିଷର ଜୀବନ ଭିତରେ ‘ପୀଡ଼ା’ର ଅନୁଭବ । ଦ୍ୱେଷ, ଅସୂୟା, ନକରାତ୍ମକ ବାହାରେ ଦୃଢ଼ ମାନବବାଦର ସ୍ୱର । ଜୀବନର ଗତି ବେଗରେ ନୁହେଁ ଆବେଗରେ ପରିପୂର୍ଣ୍ଣ ପାଇଁ ନାୟକଙ୍କ ପ୍ରତିବେଦନ ।

ଏହି ନିଆରା ନାୟକ ଆଉ କେହି ନୁହଁନ୍ତି । ସେ ହେଉଛନ୍ତି ବରିଷ୍ଠ ରାଜନେତା, ବିଧାୟକ ଡ. ଅରୁଣ ସାହୁ । ରାଜନୀତିର ପରିଚୟରେ ନିଜକୁ ସୀମିତ ରଖି ନ ଥିବା ଅରୁଣଙ୍କର ସାହିତ୍ୟ ପ୍ରବେଶର ଏହି ଦ୍ୱିତୀୟ ନିଆରା ସମାରୋହ ସୋମବାର ସଂଧ୍ୟାରେ ସ୍ଥାନୀୟ ଉତ୍କଳ ମଣ୍ଡପରେ ଅନୁଷ୍ଠିତ ହୋଇଥିଲା । ସାହିତ୍ୟ ଓ ସଙ୍ଗୀତର ଏହି ଯୁଗଳବନ୍ଦୀ କାର୍ଯ୍ୟକ୍ରମରେ ଡ. ସାହୁଙ୍କ ରଚିତ ପୁସ୍ତକ ‘ପୀଡ଼ା’ ଓ ସୁଗମ ସଙ୍ଗୀତ ‘ଶୀତୁଆ ସନ୍ଧ୍ୟା’ର ଲୋକାର୍ପଣ ହୋଇଥିଲା । ଅତିଥି ଭାବେ ଯୋଗଦେଇଥିଲେ ବରିଷ୍ଠ ଶିକ୍ଷାବିତ୍ ତଥା ସାରସ୍ୱତ ସାଧକ ମନୋରଞ୍ଜନ ସାହୁ ଏବଂ ବିଶିଷ୍ଟ ଚଇତି ନୃତ୍ୟଗୁରୁ ପଦ୍ମଶ୍ରୀ ଡଃ ଉତ୍ସବ ଚରଣ ଦାସ ।

ଦୁଃସ୍ଥ, ଅସହାୟ ନୋଚା ଲାଖିର ଜୀବନକୁ ଏକ ଭିନ୍ନ ଢ଼ଙ୍ଗରେ ପରିବେଷଣ କରି ‘ପୀଡ଼ା’ ପୁସ୍ତକୁ ଜୀବନଧର୍ମୀ କରିଛନ୍ତି ଅରୁଣ । ଏହି ପୁସ୍ତକରେ ତାଙ୍କର ବାର୍ତ୍ତା ହେଉଛି- କଷ୍ଟ ନକଲେ, ଯନ୍ତ୍ରଣାରେ ଜର୍ଜରିତ ନହେଲେ, ପୀଡ଼ା ନ ପାଇଲେ-ପରିବର୍ତ୍ତନ ବା ସୁଧାର ଆସିବନି । ନିୟନ୍ତାମାନେ ପୀଡ଼ା ପାଇବେ ଯଦି-ସଂଖ୍ୟାଧିକଙ୍କର ପୀଡ଼ା ଉପଶମ ହୋଇପାରିବ । ତେବେ ଯାଇ “ପୀଡ଼ା” ମାର୍ଗଦର୍ଶକ ହୋଇପାରିବ ।

ସେହିପରି ବେହାଲ ବର୍ଷା ସଙ୍ଗୀତର ଅହେତୁକ ସଫଳତା ପରେ ଅରୁଣଙ୍କ କଲମରୁ ଝରି ଆସିଛି ‘ଶୀତୁଆ ସନ୍ଧ୍ୟା’ । ଏହାକୁ ସଙ୍ଗୀତରେ ସଜାଇଛନ୍ତି ଯୁବ ସଙ୍ଗୀତ ନିର୍ଦ୍ଦେଶକ ଜାପାନୀ ଓ ଗାଇଛନ୍ତି ଉଦୀୟମାନ ଯୁବ କଣ୍ଠଶିଳ୍ପୀ ଚିରାଗଦୀପ ।

ଏହି କାର୍ଯ୍ୟକ୍ରମରେ ପ୍ରବଳ ଜନସମାଗମ ହୋଇଥିଲା । ବୁଦ୍ଧିଜୀବୀ, ରାଜନେତା, ସାମ୍ବାଦିକଙ୍କ ସମେତ କଳା, ସାହିତ୍ୟ, ସଙ୍ଗୀତ ଜଗତର ପ୍ରଖ୍ୟାତ ବ୍ୟକ୍ତିମାନେ ଉପସ୍ଥିତ ରହି କାର୍ଯ୍ୟକ୍ରମକୁ ଉପଭୋଗ କରିଥିଲେ । ପୂର୍ବଭଳି ଏହି କାର୍ଯ୍ୟକ୍ରମର ସ୍ୱତନ୍ତ୍ରତା ହେଉଛି ସନ୍ଧ୍ୟା ୬.୧୮ରୁ ଆରମ୍ଭ ହୋଇ ୭.୩୮ରେ ଶେଷ ହୋଇଥିଲା । ଚିରାଚରିତ ଭିଡ଼ରୁ ବାହାରି କିଛି ଭିନ୍ନ କରିବାର ଅରୁଣଙ୍କ ଏହି ନିଆରା ଉଦ୍ୟମକୁ ସମସ୍ତେ ଭୂୟସୀ ପ୍ରଶଂସା କରିଛନ୍ତି ।