ଭୁବନେଶ୍ୱର: ବିଧାୟକ ସୌମ୍ୟରଂଜନ ପଟ୍ଟନାୟକଙ୍କ ଦଳବଦଳକୁ ନେଇ ଚର୍ଚ୍ଚା ଲାଗି ରହିଥିଲା ବେଳେ ଏହାକୁ ଆହୁରି ରୋଚକ କରିଛି ତାଙ୍କର କଲମ ବଦଳ ଚର୍ଚ୍ଚା । ମନ୍ତ୍ରୀ ପଦ ନ ପାଇ ବିଜେଡିରେ ବୀତସ୍ପୃତ ସୌମ୍ୟ ନିଜ ଖବରକାଗଜକୁ ପ୍ରତିଶୋଧର ଅସ୍ତ୍ର କରିଥିଲେ ମଧ୍ୟ ନିଜେ ଆଉ କଲମ ଚଳାଇ ଲୋକହସା ହେବାକୁ ଚାହୁଁନାହାନ୍ତି । ବରଂ ନିଜ କଲମକୁ ଅନ୍ୟ ହାତରେ ଧରାଇବାର ରାସ୍ତା ସାଉଁଟିଥିବା କୁହାଯାଉଛି ।
ବିଜେଡି ବିଧାୟକ ସୌମ୍ୟବାବୁ ନିଜ ଖବରକାଗଜ ଲେଖନୀରେ ବିଜେଡି ସରକାର ଉପରୁ ଇତିମଧ୍ୟରେ ଆସ୍ଥା ତୁଟେଇ ସାରିଛନ୍ତି । ବହୁ ଦିନ ବ୍ୟବଧାନରେ ଗତ ଜୁନ୍ ଶେଷ ସପ୍ତାହରେ ତାଙ୍କ କାଗଜରେ ଆମ ଘରର ହାଲଚାଲ ସ୍ତମ୍ଭ ଲେଖିଥିଲେ । ରାଜ୍ୟର ଶାସନ ବ୍ୟବସ୍ଥାକୁ ପ୍ରଶ୍ନ କରିଥିବା ସାଂସଦ ଅପରାଜିତା ଷଡ଼ଙ୍ଗୀଙ୍କୁ ଖାଲି ସମର୍ଥନ କରି ନ ଥିଲେ ବରଂ ତାଙ୍କର ଭୂୟସୀ ପ୍ରଶଂସା କରିଥିଲେ । ଏହାପରଠୁ ତାଙ୍କ କାଗଜରେ କ୍ରମାଗତ ଏହି ଧାରା ଜାରି ରହିଛି । ମୁଖ୍ୟମନ୍ତ୍ରୀଙ୍କ ସଚିବ(୫-ଟି) ଭି.କେ.ପାଣ୍ଡିଆନ ମୁଖ୍ୟ ଟାର୍ଗେଟ୍ ହୋଇଯାଇଛନ୍ତି ।
ତେବେ ପ୍ରତିଶୋଧର ନିଆଁରେ ଜଳୁଥିବା ସୌମ୍ୟବାବୁ ରାଜନୈତିକ କାରଣରୁ ଖୋଲା ନ ହୋଇ ଛଦ୍ମବେଶରେ ଶତ୍ରୁ ନିପାତ କରିବାକୁ ମନସ୍ଥ କରିଥିବା ତାଙ୍କ ସମର୍ଥକ ମହଲରୁ ଜଣାପଡ଼ିଛି । ଅତୀତରେ ବାରମ୍ବାର ଦଳ ବଦଳେଇଲା ଭଳି ଏଥର ନିଜର କଲମ ବଦଳେଇବାର ନୂଆ ପନ୍ଥା ଆପଣେଇଛନ୍ତି । ଏହି ବାଟରେ ସେ ବିଜେଡି ଓ ସରକାର ଉପରେ ରାଗ ସୁଜୋଉଛନ୍ତି । ସୋ÷ମ୍ୟଙ୍କର ଏହି ଚାଲ୍ କୁ ତାଙ୍କର ବିଶ୍ୱସ୍ତ ସହଯୋଗୀମାନେ ବାହାରେ ପ୍ରଘଟ କରିବା ପରେ ଏହା ଚର୍ଚ୍ଚାର ବିଷୟ ହୋଇଛି ।
କହିବା ବାହୁଲ୍ୟ ଯେ ସୌମ୍ୟବାବୁଙ୍କୁ ଓଡ଼ିଶା ରାଜନୀତିରେ ଅତୃପ୍ତ ଆତ୍ମା ବୋଲି କୁହାଯାଉଛି । ବିଜେଡିରେ ନିଜର ଲକ୍ଷ୍ୟସାଧନରେ ବିଫଳ ହେବା ପରେ ଦଳରୁ ମନ ଛଡ଼ାଇ ଆଣିଛନ୍ତି । ବର୍ତ୍ତମାନ ତାଙ୍କର ଶରୀର ବିଜେଡିରେ ଥିଲେ ମଧ୍ୟ ଆତ୍ମା କେତେବେଳେ ବିଜେପି ତ ଆଉ କେତେବେଳେ କଂଗ୍ରେସରେ ରହିଛି । ନିଜର ଭବିଷ୍ୟତ ସ୍ଥିର କରି ନ ପାରି ନିଜେ ଦ୍ୱନ୍ଦରେ ପଡ଼ିଥିବା କୁହାଯାଉଛି ।
ସୂଚନାଥାଉକି, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହ ସୌମ୍ୟବାବୁ ଇତିମଧ୍ୟରେ ସମ୍ପର୍କ ବଢ଼ାଇଥିବା ବିଜେପି ମହଲରୁ ଜଣାପଡ଼ିଛି । ମାତ୍ର ଅପରାଜିତା ଷଡ଼ଙ୍ଗୀଙ୍କୁ ଖୋଲା ସମର୍ଥନ ଦେବା ତାଙ୍କୁ ଅସୁବିଧାରେ ପକାଇଛି । ଏହା ତାଙ୍କ ପାଇଁ ବିଜେପି ରାସ୍ତା ଅଡୁଆ ହୋଇପାରେ । ଅନ୍ୟପକ୍ଷରେ କଂଗ୍ରେସ ପ୍ରଚାର କମିଟି ଅଧ୍ୟକ୍ଷ ବିଜୟ ପଟ୍ଟନାୟକଙ୍କ ସହ ମଧ୍ୟ ତାଙ୍କର ସମ୍ପର୍କ ନିବିଡ଼ ହୋଇଥିବା କଂଗ୍ରେସ ମହଲରେ ଆଲୋଚନା ହେଉଛି । ଏହି ପରିପ୍ରେକ୍ଷୀରେ ଆଗକୁ ତାଙ୍କର ନିଷ୍ପତ୍ତି କ’ଣ ହେବ ତାହାକୁ ସମସ୍ତଙ୍କର ଅପେକ୍ଷା ରହିଛି ।
