ଭୁୁବନେଶ୍ୱର: ବରିଷ୍ଠ ଆଇପିଏସ୍ ଅଫିସର ଏଡିଜି ଦୟାଲ୍ ଗଙ୍ଗୱାରଙ୍କୁ ଆଜି ଚାକିରିରୁ ନିଲମ୍ବନ କରାଯାଇଛି । ମେ ୭ ରେ ବାଲିଅନ୍ତା ଭିଡ଼ ହତ୍ୟାର ଶିକାର ରେଳବାଇ କନେଷ୍ଟବଳ ସୌମ୍ୟରଂଜନ ସ୍ୱାଇଁଙ୍କୁ ସେ ମାନସିକ ନିର୍ଯ୍ୟାତନା ଦେଇଥିବା ସୌମ୍ୟଙ୍କ ବାପାମାଆ ଅଭିଯୋଗ କରିଥିଲେ । ଏହି ଅଭିଯୋଗକ୍ରମେ ତାଙ୍କୁ କମ୍ୟୁନିକେସନ୍ ଏଡିଜି ପଦବୀରୁ ଗୃହ ବିଭାଗର ଓଏସଡି ଭାବେ ବଦଳି କରାଯାଇଥିଲା । ହତ୍ୟାକାଣ୍ଡର ଦେଢ଼ମାସ ପରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ତାଙ୍କୁ ଚାକିରିରୁ ନିଲମ୍ବନ କରିଛନ୍ତି ।
ଅଭିଯୋଗ ଅନୁଯାୟୀ, ଦୟାଲ୍ ଗଙ୍ଗୱାରଙ୍କ ଭୁବନେଶ୍ୱରରେ ଥିବା ଜିମ୍ ରେ ସୌମ୍ୟରଞ୍ଜନ ଟ୍ରେନର୍ ଭାବେ ମାଗଣାରେ ଖଟୁଥିଲେ । ତାଙ୍କ ସମେତ ୮ ଜଣ ପୁଲିସ କର୍ମଚାରୀ ଗଙ୍ଗୱରଙ୍କ ବ୍ୟକ୍ତିଗତ କାମ କରୁଥିଲେ । ରେଳବାଇ ପୁଲିସ ବିଭାଗ ସହିତ ଦୟାଲ୍ ଗଙ୍ଗୱାରଙ୍କର କୌଣସି ସମ୍ପର୍କ ନ ଥିଲେ ମଧ୍ୟ କଟକ ଜିଆରପି ଏସପିଙ୍କ କାର୍ଯ୍ୟାଳୟରୁ ଏମାନଙ୍କୁ ୪ ବର୍ଷ ହେଲା ଆଣି ବ୍ୟକ୍ତିଗତ କାମରେ ନିୟୋଜିତ କରିଥିଲେ ।
କୁହାଯାଉଛି, ୨୦୧୩ ବ୍ୟାଚ୍ ର କନେଷ୍ଟବଳ ସୌମ୍ୟଙ୍କୁ ଏହି ଦଣ୍ଡ ମିଳିବା ପଛରେ କାରଣ ବି ଥିଲା । ଏକ ପ୍ରେମ ବ୍ୟାପାରକୁ କେନ୍ଦ୍ର କରି ୨୦୨୧ ମସିହାରେ କଟକ ମହିଳା ଥାନାରେ ତାଙ୍କ ନାଁରେ ଏକ କେସ୍ ହୋଇଥିଲା । ଏହି ମାମଲାରେ ସେ ଗିରଫ ହୋଇଥିଲେ । ସେ ଜାମିନ୍ ରେ ଆସିବା ପରେ ତାଙ୍କୁ ଆହୁରି ବିପଦ ଘାରିଥିଲା । ଚାକିରି ପ୍ରତି ସେ ବିପଦର ଆଶଙ୍କା କରିଥିଲେ । କଟକ ଜିଆରପି ଅଫିସ ସହିତ ସମ୍ପର୍କରେ ଥିବାରୁ ସୌମ୍ୟଙ୍କ ଦୁର୍ବଳତା ଜାଣିବାକୁ ପାଇଥିଲେ ଗଙ୍ଗୱାର୍ । ଏହାର ସୁଯୋଗ ଉଠାଇ ତାଙ୍କୁ ଭୁବନେଶ୍ୱର ନିଜ ପାଖକୁ ନେଇ ଆସିଥିଲେ । ଭୁବନେଶ୍ୱରରେ ଥିବା ତାଙ୍କ ଜିମ୍ ରେ ଟ୍ରେନର୍ ଭାବରେ ନିୟୋଜିତ କରିଥିଲେ ।
ତେବେ ଜିମ୍ ପରିଚାଳନା ଓ ଆର୍ଥିକ ବ୍ୟାପାରକୁ ନେଇ ଏପ୍ରିଲ ମାସରେ ଗଙ୍ଗୱରଙ୍କ ସହିତ ସୌମ୍ୟଙ୍କର ବିବାଦ ହେବାରୁ ସେ ଜିମ୍ ଛାଡ଼ି କଟକ ଜିଆରପି ଏସପିଙ୍କ କାର୍ଯ୍ୟାଳୟରେ ଯୋଗଦେଇଥିଲେ । ମାତ୍ର ଗଙ୍ଗୱାରଙ୍କ ଚାପରେ ତାଙ୍କର ଏପ୍ରିଲ୍ ମାସର ଦରମା ବନ୍ଦ କରାଯାଇଥିଲା । ପରବର୍ତ୍ତୀ ସମୟରେ ବାଲିଅନ୍ତା ମବ୍ କିଲିଂ ଘଟଣାରେ ଗଙ୍ଗୱାରଙ୍କ ସଂପୃକ୍ତି ଥାଇପାରେ ବୋଲି ବାପାମାଆ ତଥା ଗ୍ରାମବାସୀ ସନ୍ଦେହ କରିଛନ୍ତି ।
ସୂଚନାଥାଉକି, ସୌମ୍ୟଙ୍କ ମାନସିକ ନିର୍ଯ୍ୟାତନା ପଛରେ ଜଣେ ବରିଷ୍ଠ ଆଇପିଏସ୍ ଅଫିସରଙ୍କ ଭୂମିକା ଥିବା କିଛି ଗଣମାଧ୍ୟମରେ ଚର୍ଚ୍ଚା ହୋଇଥିଲେ ମଧ୍ୟ ନାଁ ଲେଖିବାକୁ ଡରିଯାଇଥିଲେ । ‘ମିଡ୍ ଡେ ଓଡିଶା’ ପ୍ରଥମେ ଦୟାଲ୍ ଗଙ୍ଗୱାରଙ୍କ ନାଁ ସାର୍ବଜନୀନ କରିଥିଲା ।
