ଭୁବନେଶ୍ୱର: ମହାପ୍ରଭୁଙ୍କ ଦର୍ଶନ ପାଇଁ ଭକ୍ତମାନେ ବ୍ୟାକୁଳ ଥିଲେ । ପହଡ଼ ଖୋଲୁ ଖୋଲୁ ମାଡ଼ି ଆସିଲେ । ଭିଡ଼ ନିୟନ୍ତ୍ରଣ ପାଇଁ କୌଣସି ବ୍ୟବସ୍ଥା ନ ଥିଲା । ଠେଲାପେଲା ଆରମ୍ଭ ହୋଇଗଲା । ଅନେକ ଭକ୍ତ ତଳେ ପଡ଼ିଗଲେ । ପାଦରେ ଚକଟି ହୋଇଗଲେ । କଲବଲ ହୋଇ ମରିଗଲେ । ଜିଲ୍ଲାପାଳଙ୍କ ସୂଚନା ଅନୁଯାୟୀ ତିନି ଜଣ ଭକ୍ତଙ୍କର ମୃତ୍ୟୁ ହୋଇଛି । ୬ ଜଣ ଆହତ ହୋଇଛନ୍ତି । ମାତ୍ର ଅସମର୍ଥିତ ସୂତ୍ରର ସୂଚନା ଅନୁଯାୟୀ ମୃତକ ଏବଂ ଆହତଙ୍କ ସଂଖ୍ୟା ଆହୁରି ଅଧିକ । ଆହତଙ୍କ ସଂଖ୍ୟା ୫୦ରୁ ଅଧିକ । ଦୁଇଦିନ ତଳେ ରଥଯାତ୍ରା ମହାବିଭ୍ରାଟର କମ୍ପନ ନ ଯାଉଣୁ ଆଜି ବଡ଼ି ଭୋରରେ ଶରଧାବାଲିରେ ଏହି ବଡ଼ ଅଘଟଣ ଘଟିଛି । ରଥଯାତ୍ରା ପରିଚାଳନାରେ ସରକାରଙ୍କର ଅକର୍ମଣ୍ୟତା ସମ୍ପୂର୍ଣ୍ଣ ଭାବରେ ପଦାରେ ପଡ଼ିଯାଇଛି ।
ଗତକାଲି ଗୁଣ୍ଡିଚା ଘରେ ତିନି ରଥ ପହଞ୍ଚିଲା ପରେ ଜନ୍ମବେଦି ସମ୍ମୁଖରେ ଉଭା ହୋଇଥିଲେ ଚତୁର୍ଦ୍ଧା ବିଗ୍ରହ । ବଡ଼ ଠାକୁରଙ୍କ ଦର୍ଶନ ପାଇଁ ଶରଧାବାଲିକୁ ଭକ୍ତମାନଙ୍କର ସୁଅ ଛୁଟିଥିଲା । ରାତି ୧୨ଟା ୩୦ରେ ମହାପ୍ରଭୁଙ୍କ ପହୁଡ଼ ପଡ଼ିଥିଲେ ମଧ୍ୟ ଭକ୍ତମାନଙ୍କର ଆଗମନ ବନ୍ଦ ହୋଇ ନ ଥିଲା । ଭୋରୁ ମହାପ୍ରଭୁଙ୍କ ଦର୍ଶନ ଲାଗି ଭକ୍ତମାନେ ଅପେକ୍ଷାରେ ଥିଲେ । ଭୋର ୩ଟା ୪୫ରେ ପହୁଡ଼ ଖୋଲିବା ମାତ୍ରେ ଜୁଆର ଭଳି ଭକ୍ତମାନେ ମାଡ଼ି ଆସିଥିଲେ । ଠେଲାପେଲା ଆରମ୍ଭ ହୋଇଗଲା ।
ପ୍ରାୟ ସାଢ଼େ ଚାରିଟା ବେଳକୁ ପରିସ୍ଥିତି ଅଣାୟତ୍ତ ହୋଇପଡ଼ିଲା । କିଛି ଭକ୍ତ ତଳେ ପଡ଼ିଯିବାରୁ ଅନ୍ୟମାନେ ଚକଟି ପକେଇଲେ । ଅଣନିଶ୍ୱାସୀ ହୋଇ ତିନି ଜଣଙ୍କର ଜୀବନ ଚାଲିଗଲା । ମୃତକମାନେ ହେଲେ ଖୋର୍ଦ୍ଧା ବାଲିପାଟଣାର ପ୍ରଭାତୀ ଦାସ(୫୨), ଭୁବନେଶ୍ୱର ନୟାପଲ୍ଲୀର ପ୍ରେମକାନ୍ତ ମହାନ୍ତି(୭୮) ଏବଂ ଖୋର୍ଦ୍ଧା ଗୋଡ଼ଭଙ୍ଗାର ବାସନ୍ତୀ ସାହୁ(୪୨) । ଆଉ କିଛି ଭକ୍ତ ଗୁରୁତର ଅବସ୍ଥାରେ ଛଟପଟ ହେଉଥିଲା ବେଳେ ସୌଭାଗ୍ୟବଶତଃ ପୁଲିସ ପହଞ୍ଚି ଡାକ୍ତରଖାନା ଟେକି ନେଇଥିଲା । ପ୍ରାୟ ୫୦ ଭକ୍ତ ଗୁରୁତର ଅବସ୍ଥାରେ ଡାକ୍ତରଖାନାରେ ଚିକିତ୍ସିତ ହେଉଥିବା ଜଣାପଡ଼ିଛି ।
ପ୍ରତ୍ୟକ୍ଷଦର୍ଶୀଙ୍କ କହିବାନୁଯାୟୀ, ମହାପ୍ରଭୁଙ୍କ ଦର୍ଶନ ଲାଗି ଭକ୍ତମାନଙ୍କର ପ୍ରବଳ ଭିଡ଼ ହୋଇଥିବା ବେଳେ ଦୁଇଟି ଚାର କାଠ ବୋଝେଇ ଟ୍ରକ୍ ଭିତରକୁ ପଶିଥିଲା । ଦଳାଚକଟା ପାଇଁ ତାହାକୁ ସମସ୍ତେ ଦାୟୀ କରିଛନ୍ତି । କିଏ ସେମାନଙ୍କୁ ଅନୁମତି ଦେଲା ସମସ୍ତଙ୍କୁ ଆନ୍ଦୋଳିତ କରିିଛି । ଶୃଙ୍ଖଳିତ ରଥଯାତ୍ରା ପରିଚାଳନା ପାଇଁ ଏତେ ବ୍ୟବସ୍ଥା ସତ୍ତ୍ୱେ ଏଭଳି କେମିତି ଘଟିଲା ତାହା ସମସ୍ତଙ୍କୁ ବିସ୍ମିତ କରୁଛି । ସେହିଭଳି ଭଡ଼ ନିୟନ୍ତ୍ରଣ ପାଇଁ ସ୍ୱତନ୍ତ୍ର ପୁଲିସ ବ୍ୟବସ୍ଥା ନ ଥିଲା ବୋଲି ଅଭିଯୋଗ ହୋଇଛି । ଭିଡ଼ ବେଳେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଏବଂ ଅନ୍ୟ ଅଧିକାରୀମାନେ ମଧ୍ୟ ଅନୁପସ୍ଥିତ ଥିବା ଜଣାପଡ଼ିଛି ।
ମହାବିଭ୍ରାଟ୍ ମହାପ୍ରଭୁଙ୍କ ଇଚ୍ଛା ବୋଲି ଆଇନମନ୍ତ୍ରୀ ରଥଯାତ୍ରା ମହାବିଭ୍ରାଟ୍ ପରେ ମନ୍ତବ୍ୟ ଦେଇଥିଲେ । ମାତ୍ର ଦଳାଚକଟାରେ ଭକ୍ତ ମରିବା ପରେ ସେ ମହାପ୍ରଭୁଙ୍କୁ କ୍ଷମା ମାଗିବାକୁ ବି ଉଚିତ୍ ମଣିଲେ ନାହିଁ । ଘଟଣାର ତଦନ୍ତ ହେବ ବୋଲି ମନ୍ତ୍ରୀ ଦେଇ କାମ ସାରିଦେଲେ ।
ଅନ୍ୟପକ୍ଷରେ ପୁରୀ ଅଘଟଣାକୁ ନେଇ ସାରା ରାଜ୍ୟରେ ଆଲୋଡ଼ନ ସୃଷ୍ଟି ହେବା ପରେ ଏବଂ ସବୁଆଡୁ ଚାପ ପଡ଼ିବା ପରେ ଯାଇ ମୁଖ୍ୟମନ୍ତ୍ରୀଙ୍କର ସଦବୁଦ୍ଧି ହୋଇଛି । ରଥଯାତ୍ରା ପରିଚାଳନାରେ ଅବହେଳା ହୋଇଥିବା ସେ ସ୍ୱୀକାର କରିଛନ୍ତି ଏବଂ ଏହି ଅବହେଳା ଅକ୍ଷମଣୀୟ ବୋଲି କହିଛନ୍ତି । ଏହି ଅଘଟଣ ପାଇଁ ମୁଖ୍ୟମନ୍ତ୍ରୀ ଏବଂ ତାଙ୍କ ସରକାର ଜଗନ୍ନାଥପ୍ରେମୀଙ୍କ ନିକଟରେ କ୍ଷମା ପ୍ରାର୍ଥନା କରିଛନ୍ତି ।
ପ୍ରଶ୍ନ ଉଠୁଛି, ମହାପ୍ରଭୁ ଏଥିପାଇଁ କ୍ଷମତା ଦେବେ ତ?
ଗତବର୍ଷ ପହଣ୍ଡି ବେଳେ ବଳଭଦ୍ରଙ୍କୁ କଚାଡ଼ି ପକାଇ ଦିଆଗଲା । ଘଟଣାର ତଦନ୍ତ ହୋଇ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ ବୋଲି ଆଇନମନ୍ତ୍ରୀ ବୟାନ ଦେଲେ । ମାତ୍ର ବର୍ଷେ ବିତିଗଲା ପରେ ମଧ୍ୟ ସେ ରିପୋର୍ଟ ସାର୍ବଜନୀନ ହେଲା ନାହିଁ କି ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେଲା ନାହିଁ ।
