ଶାଶ୍ୱତ ମିଶ୍ର ମୁଖ୍ୟମନ୍ତ୍ରୀଙ୍କ ପ୍ରମୁଖ ସଚିବ
ଭୁବନେଶ୍ୱର: ପୁରୀ ରଥଯାତ୍ରାରେ ମହାବିଭ୍ରାଟ ଏବଂ ବଡ଼ ଅଘଟଣ ଘଟିସାରିବା ପରେ ମୁଖ୍ୟମନ୍ତ୍ରୀ ମୋହନ ମାଝୀଙ୍କର ବୁଦ୍ଧି ପଶିଛି । ସରକାର ଚଳାଇବା ଏକ ପିଲା ଖେଳ ନୁହେଁ ବୋଲି ବର୍ଷେ ପରେ ତାଙ୍କର ହୃଦବୋଧ ହୋଇଛି । ସବୁଠାରୁ ବଡ଼ ଚାଲେଂଜ ଥିବା ରଥଯାତ୍ରା ପରିଚାଳନାରେ ସରକାରଙ୍କ ଅପାରଗତା ଜନ ଅସନ୍ତୋଷର ରୂପ ନେବା ପରେ ସେ କ୍ଷମା ମାଗିବାକୁ ବାଧ୍ୟ ହୋଇଛନ୍ତି । ତେବେ କେବଳ ପୁରୀ ଜିଲ୍ଲାପାଳ ଏବଂ ଏସପିଙ୍କୁ ବଦଳି କରି ସେ ଜନ ଅସନ୍ତୋଷର ନିଆଁକୁ ପ୍ରଶମିତ କରିବାକୁ ଉଦ୍ୟମ କରିଛନ୍ତି । ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. ଅରବିନ୍ଦ ପାଢ଼ୀ ଏବଂ ପୁଲିସ ଡିଜି ୱାଇ.ବି ଖୁରାନିଆଙ୍କ ଦେହରେ ହାତ ମାରିନାହାନ୍ତି । ରଥଯାତ୍ରା ପରିଚାଳନା ସହ ପ୍ରତ୍ୟକ୍ଷ ଭାବରେ ସଂପୃକ୍ତ ଉପମୁଖ୍ୟମନ୍ତ୍ରୀ ଶ୍ରୀମତୀ ପ୍ରଭାତୀ ପରିଡ଼ା ଏବଂ ଆଇନମନ୍ତ୍ରୀ ପୃଥ୍ୱୀରାଜ ହରିଚନ୍ଦନଙ୍କୁ ମଧ୍ୟ ସୁରକ୍ଷା ଦେଇଛନ୍ତି ମାନ୍ୟବର ମୁଖ୍ୟମନ୍ତ୍ରୀ ।
ରଥଯାତ୍ରା ଦିନ ରଥଟଣାରେ ମହାବିଭ୍ରାଟ୍ ଏବଂ ଦଳାଚକଟା ହୋଇଥିଲା । ଘଟଣାକୁ ଲାଗିପଡ଼ି ଚପାଇ ଦେବାକୁ ଉଦ୍ୟମ କରିଥିଲେ ମୋହନ ସରକାର । ମାତ୍ର ଆଜି ବଡ଼ି ଭୋରରୁ ଶରଧାବାଲିରେ ଯେଉଁ ଭୟଙ୍କର ସ୍ଥିତି ହେଲା ସେଥିରୁ ବର୍ତ୍ତି ପାରିନାହାନ୍ତି । ଆଇନମନ୍ତ୍ରୀ ଶ୍ରୀ ହରିଚନ୍ଦନ ପ୍ରଥମେ ସରକାରଙ୍କ ଅବହେଳାକୁ ଫାଙ୍କି ଦେବାକୁ ବସିଥିଲେ । ମାତ୍ର ଅବସ୍ଥା ଅସମ୍ଭାଳ ଦେଖି ମୁଖ୍ୟମନ୍ତ୍ରୀ ଶ୍ରୀ ମାଝୀ ହାତ ଟେକିଦେଲେ । ଏହି ଅବହେଳା ଅକ୍ଷମଣୀୟ ବୋଲି ସେ ସ୍ୱୀକାର କରି ମହାପ୍ରଭୁଙ୍କୁ କ୍ଷମା ମାଗିଲେ । ଆଉ ତା’ ପରେ ଆରମ୍ଭ ହେଲା କାର୍ଯ୍ୟାନୁଷ୍ଠାନ ।
ପୁରୀ ଜିଲ୍ଲାପାଳ ସିଦ୍ଧାର୍ଥ ଶେଖର ସ୍ୱାଇଁ ଏବଂ ଏସପି ବିନୀତ ଅଗ୍ରୱାଲ୍ ଙ୍କୁ ବଦଳି କରାଗଲା । ତାଙ୍କ ଜାଗାରେ ଚଞ୍ଚଳ ରାଣାଙ୍କୁ ପୁରୀର ନୂଆ ଜିଲ୍ଲାପାଳ ଏବଂ ପିନାକ ମିଶ୍ରଙ୍କୁ ଏସପି ଭାବେ ନିଯୁକ୍ତି ଦିଆଯାଇଛି । ସେହିଭଳି ଦାୟିତ୍ୱରେ ଅବହେଳା ପାଇଁ ଡିସିପି ବିଷ୍ଣୁ ପତି ଓ କମାଣ୍ଡାଣ୍ଟ ଅଜୟ ପାଢ଼ୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ ହୋଇଛି । ସେମାନଙ୍କୁ ନିଲମ୍ବିତ କରାଯାଇଛି । ଉନ୍ନୟନ କମିଶନରଙ୍କ ଅଧୀନରେ ପ୍ରଶାସନିକ ତଦନ୍ତ ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି ।
ଅନ୍ୟପକ୍ଷରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. ଅରବିନ୍ଦ ପାଢ଼ୀଙ୍କ ଉପରେ ସରକାର ତାଙ୍କ ଆଭିମୁଖ୍ୟ ସ୍ପଷ୍ଟ କରିନାହାନ୍ତି । ତାଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ହୋଇ ନ ଥିଲେ ମଧ୍ୟ ରଥଯାତ୍ରା ପରିଚାଳନା ଦାୟିତ୍ୱ ଅରବିନ୍ଦ ଅଗ୍ରୱାଲଙ୍କ ଉପରେ ନ୍ୟସ୍ତ କରାଯାଇଛି ।
ରଥଯାତ୍ରା ଭିଡ଼ ନିୟନ୍ତ୍ରଣରେ ପୁଲିସର ସମ୍ପୂର୍ଣ୍ଣ ବିଫଳତା ସତ୍ତ୍ୱେ ଡିଜି ୱାଇ.ବି ଖୁରାନିଆଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ହୋଇନାହିଁ । ତେବେ ପୁଲିସ ଆଧୁନିକୀକରଣ ଅତିରିକ୍ତ ଡିଜି ସୌମେନ୍ଦ୍ର ପ୍ରିୟଦର୍ଶୀଙ୍କୁ ପୁରୀ ରଥଯାତ୍ରା ଶେଷ ପର୍ଯ୍ୟନ୍ତ ଶାନ୍ତିଶୃଙ୍ଖଳା ଦାୟିତ୍ୱ ଦିଆଯାଇଛି ।
ଶେଷରେ, ସରକାର ଚଳାଇବା ଏକ ପିଲା ଖେଳ ନୁହେଁ ବୋଲି ମୁଖ୍ୟମନ୍ତ୍ରୀ ବିଳମ୍ବରେ ବୁଝିଛନ୍ତି । ନିକୁଞ୍ଜ ଧଳ ଦିଲ୍ଲୀ ଚାଲିଯିବା ପରେ ତାଙ୍କ ଜାଗାରେ ଅନ୍ୟ କାହାରିକୁ ନିଯୁକ୍ତି ଦେଇ ନ ଥିଲେ । ଆଜି ପୁରୀ ଅଘଟଣ ପରେ ସମନ୍ୱୟର ଆବଶ୍ୟତା ବୁଝି ସେ ଶାଶ୍ୱତ ମିଶ୍ରଙ୍କୁ ତାଙ୍କର ପ୍ରମୁଖ ସଚିବ ଭାବେ ନିଯୁକ୍ତି ଦେଇଛନ୍ତି । ଅର୍ଥ ବିଭାଗର ପ୍ରମୁଖ ସଚିବ ତଥା ଇଡକୋ ଅଧ୍ୟକ୍ଷ ଭାବେ ସେ ବର୍ତ୍ତମାନ ଦାୟିତ୍ୱ ତୁଲାଉଛନ୍ତି । ଏହି ଦାୟିତ୍ୱକୁ ସେ ଅତିରିକ୍ତି ଦାୟିତ୍ୱ ଭାବେ ତୁଲାଇବେ ।
ବିଡ଼ମ୍ବନାର ବିଷୟ ହେଉଛି, ମୁଖ୍ୟମନ୍ତ୍ରୀଙ୍କ ପ୍ରମୁଖ ସଚିବ ଭାବେ ଡ. ଅରବିନ୍ଦ ପାଢ଼ୀଙ୍କ ନାଁ ସର୍ବାଗ୍ରେ ଥିଲା । ରଥଯାତ୍ରା ପରେ ତାଙ୍କର ନିଯୁକ୍ତିପତ୍ର ଆସିବ ବୋଲି ସ୍ପଷ୍ଟ ଜଣାପଡୁଥିଲା । ମାତ୍ର ତାଙ୍କର ଦୁର୍ଭାଗ୍ୟ ଯେ ରଥଯାତ୍ରା ପରିଚାଳନାରେ ଅପାରଗତା ତାଙ୍କୁ ଏହି ସୁଯୋଗରୁ ବଞ୍ଚିତ କରିଛି ।
