ପୁରୀ: ଚଳିତ ବର୍ଷର ପୁରୀ ରଥଯାତ୍ରା ଏକ ଦୁଃଖଦ ଦୁର୍ଘଟଣାରେ ପରିଣତ ହୋଇଛି। ଶ୍ରୀ ଗୁଣ୍ଡିଚା ମନ୍ଦିର ନିକଟରେ ଦଳାଚକଟାରେ ତିନି ଶ୍ରଦ୍ଧାଳୁଙ୍କ ମୃତ୍ୟୁ ହୋଇଛି, ଏବଂ ୫୦ରୁ ଅଧିକ ଆହତ ହୋଇଛନ୍ତି। ଏହି ଘଟଣା ଶ୍ରୀମନ୍ଦିର ପରିଚାଳନା ଓ ରଥଯାତ୍ରା ଆୟୋଜନରେ ଅବହେଳା ଅଭିଯୋଗକୁ ସାମ୍ନାକୁ ଆଣିଛି। ଏହାକୁ ନେଇ ଆଇନ, ଅବକାରୀ ଓ ପୂର୍ତ୍ତ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନଙ୍କ ଇସ୍ତଫା ଦାବି ଜୋର ଧରିଛି।
ଜୁନ୍ ୨୭ରୁ ଆରମ୍ଭ ହୋଇଥିବା ରଥଯାତ୍ରାରେ ଶ୍ରୀ ଜଗନ୍ନାଥଙ୍କ ରଥ ଟଣା ହୋଇ ପାରିନଥିବା ବେଳେ, ଜୁନ୍ ୨୯ ସକାଳ ୪:୩୦ରେ ଶରଧାବାଲି ନିକଟରେ ଦଳାଚକଟା ଘଟି ତିନି ଶ୍ରଦ୍ଧାଳୁଙ୍କ ମୃତ୍ୟୁ ହୋଇଥିଲା। ମୃତଙ୍କ ମଧ୍ୟରେ ବସନ୍ତୀ ସାହୁ (୪୨, ଖୋର୍ଦ୍ଧା), ପ୍ରେମ କାନ୍ତ ମହାନ୍ତି (୭୮, ନୟାପାଲ୍ଲୀ, ଭୁବନେଶ୍ୱର), ଏବଂ ପ୍ରଭାତୀ ଦାସ (୫୨, ବାଲିପାଟଣା) ଅଛନ୍ତି। ୫୦ରୁ ଅଧିକ ଆହତଙ୍କ ମଧ୍ୟରୁ ୬ ଜଣଙ୍କ ଅବସ୍ଥା ଗୁରୁତର, ଯେଉଁମାନେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସିତ ହେଉଛନ୍ତି।
ପ୍ରତ୍ୟକ୍ଷଦର୍ଶୀଙ୍କ ଅନୁସାରେ, ୩୦,୦୦୦ରୁ ଅଧିକ ଭିଡ଼ ମଧ୍ୟରେ ପୋଲିସ, ଆମ୍ବୁଲାନ୍ସ କିମ୍ବା ସୁରକ୍ଷା ବ୍ୟବସ୍ଥା ନଥିଲା, ଯାହା ଅବ୍ୟବସ୍ଥାକୁ ବଢ଼ାଇଥିଲା।
ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ମୁହଁ ଫୁଟାଣି ମାରି ସବୁବେଳେ କହୁଛନ୍ତି – ପ୍ରଭୁଙ୍କ ଲୀଳା। ମହାପ୍ରଭୁଙ୍କ ଇଚ୍ଛା।
ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କ୍ଷମା ପ୍ରାର୍ଥନା କରିଛନ୍ତି ଏବଂ ଅବହେଳାକୁ “ଅକ୍ଷମଣୀୟ” ବୋଲି କହି, ତଦନ୍ତ ଓ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ନିର୍ଦ୍ଦେଶ ଦେଇଛନ୍ତି। ସରକାର ମୃତଙ୍କ ପରିବାରଙ୍କୁ ୨୫ ଲକ୍ଷ ଟଙ୍କା କ୍ଷତିପୂରଣ ଘୋଷଣା କରିଛନ୍ତି।
ଗତ ବର୍ଷ, ଜୁଲାଇ ୯, ୨୦୨୪ରେ, ବଳଭଦ୍ରଙ୍କ ମୂର୍ତ୍ତି ରଥରୁ ଖସି ପଡ଼ିଥିଲେ । ଏଥିରେ ସେବାୟତ ବି ଆହତ ହୋଇଥିଲେ, ଯେଉଁଥିରେ ପାଞ୍ଚ ଜଣ ହସ୍ପିଟାଲରେ ଭର୍ତ୍ତି ହୋଇଥିଲେ। ଏକ ତିନି-ସଦସ୍ୟ କମିଟି ତଦନ୍ତ ପାଇଁ ଗଠିତ ହୋଇଥିଲା, କିନ୍ତୁ ଜୁନ୍ ୨୦୨୫ ପର୍ଯ୍ୟନ୍ତ ରିପୋର୍ଟ ପ୍ରକାଶ ପାଇ ନାହିଁ। ଏହା ଜନସାଧାରଣଙ୍କ ମଧ୍ୟରେ ତୀବ୍ର ଅସନ୍ତୋଷ ସୃଷ୍ଟି କରିଛି।
ଶ୍ରୀମନ୍ଦିର ପରିଚାଳନା କମିଟିର ମିଆଦ ସେପ୍ଟେମ୍ବର ୩, ୨୦୨୪ରେ ଶେଷ ହୋଇଛି। କିନ୍ତୁ ଜୁନ, ୨୦୨୫ ପର୍ଯ୍ୟନ୍ତ ନୂଆ କମିଟି ଗଠନ ହୋଇ ନାହିଁ। ଏହା ୨୦୨୫-୨୬ ବଜେଟ, ନୂଆ ଦର୍ଶନ ବ୍ୟବସ୍ଥା, ଏବଂ ହୁଣ୍ଡି ପୁନଃସ୍ଥାପନ ନିଷ୍ପତ୍ତିକୁ ବାଧାପ୍ରାପ୍ତ କରିଛି। ଆଇନ ମନ୍ତ୍ରୀ ହରିଚନ୍ଦନଙ୍କ ବିଭାଗ ଏହି ବିଳମ୍ବ ପାଇଁ ଦାୟୀ ବୋଲି ଅଭିଯୋଗ ହେଉଛି।
ଅଗଷ୍ଟ ୨୦୨୪ରେ ଗଞ୍ଜାମ ଜିଲ୍ଲାର ଚିକିଟିରେ ବିଷାକ୍ତ ମଦ ପିଇ ତିନି ଜଣଙ୍କ ମୃତ୍ୟୁ ହୋଇଥିଲା, ଏବଂ ୧୩ ଜଣ ହସ୍ପିଟାଲରେ ଭର୍ତ୍ତି ହୋଇଥିଲେ। ଅବକାରୀ ମନ୍ତ୍ରୀ ହରିଚନ୍ଦନ ଆରଡିସି ତଦନ୍ତ ନିର୍ଦ୍ଦେଶ ଦେଇଥିଲେ। କିନ୍ତୁ ଜୁନ୍ ୨୦୨୫ ପର୍ଯ୍ୟନ୍ତ ରିପୋର୍ଟ ପ୍ରକାଶ ପାଇ ନାହିଁ। ଏହା ଅବକାରୀ ବିଭାଗର ଅପାରଗତାକୁ ପ୍ରକାଶ କରୁଛି। ଓ ମନ୍ତ୍ରୀ ଯେ କେବଳ ତଦନ୍ତ ଘୋଷଣା କରନ୍ତି ଓ ତାହା ଆଦୌ ହୁଏ ନାହିଁ ବୋଲି ପ୍ରମାଣିତ ହୋଇଛି।
ରାଜ୍ୟପାଳ ରଘୁବର ଦାସଙ୍କ ପୁଅ ଜଣେ ଓଡ଼ିଆ ଅଧିକାରୀଙ୍କୁ ମାଡ଼ ମାରିବା ଏବଂ ଜୋତାରେ ଛେପ ପକାଇ ଚଟେଇବା ଘଟଣାର ପୁରୀ ଜିଲ୍ଲାପାଳ ତଦନ୍ତ କରି ୧୫ ଦିନ ଭିତରେ ରିପୋର୍ଟ ଦେବେ ବୋଲି ପୃଥ୍ୱୀରାଜ କହିଥିଲେ । ମାତ୍ର ସେ ରିପୋର୍ଟ ଆସିଲା ନାହିଁ କି କାର୍ଯ୍ୟାନୁଷ୍ଠାନ ହେଲା ନାହିଁ । ଓଡ଼ିଆ ଅସ୍ମିତାକୁ ଧୋଇଦେଲେ ମାନ୍ୟବର ।
ପୃଥ୍ୱୀରାଜ ହରିଚନ୍ଦନଙ୍କୁ ସାମାଜିକ ଗଣମାଧ୍ୟମରେ ସେଥିପାଇଁ ତଦନ୍ତ ମନ୍ତ୍ରୀ ଉପାଧି ମିଳିଛି।
ଏହି ଘଟଣାଗୁଡ଼ିକ ମନ୍ତ୍ରୀ ହରିଚନ୍ଦନଙ୍କ ବିଭାଗଗୁଡ଼ିକରେ ଦାୟିତ୍ୱହୀନତା ଓ ଅବହେଳାକୁ ପ୍ରତିଫଳିତ କରୁଛି।
ଜନସାଧାରଣ ଓ ଶ୍ରଦ୍ଧାଳୁମାନେ ପ୍ରଶ୍ନ ଉଠାଉଛନ୍ତି ଯେ, ପ୍ରଭୁ କ’ଣ ନିଜ ଭକ୍ତଙ୍କୁ ଅସହାୟ କରିଛନ୍ତି କେବେ? ଏହା ସରକାରୀ ବିଫଳତାକୁ ଢାଙ୍କିବା ପାଇଁ ଏକ ଅଜବ ଉକ୍ତି ବୋଲି ଅଭିଯୋଗ ହେଉଛି। ସାମାଜିକ ଗଣମାଧ୍ୟମରେ ମନ୍ତ୍ରୀଙ୍କ ଇସ୍ତଫା ଦାବି ଜୋର ଧରିଛି।
ସରକାର ଏହି ଘଟଣାଗୁଡ଼ିକର ତୁରନ୍ତ ତଦନ୍ତ କରି, ଦୋଷୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନେବା ସହ ଶ୍ରୀମନ୍ଦିର ପରିଚାଳନାକୁ ସୁଦୃଢ଼ କରିବା ଆବଶ୍ୟକ। ଏହା ଜନସାଧାରଣଙ୍କ ବିଶ୍ୱାସ ପୁନଃସ୍ଥାପନ କରିବ।
