ଭୁବନେଶ୍ୱର: ତପୁ ମିଶ୍ର ଆଉ ନାହାନ୍ତି । କରୋନା ଛଡ଼ାଇ ନେଇଛି ଓଡ଼ିଶାର ଏହି ଲୋକପ୍ରିୟ ଯୁବ କଣ୍ଠଶିଳ୍ପୀଙ୍କୁ । ସମ୍ ହସ୍ପିଟାଲ୍ ର ଆଇସିୟୁରେ ସଙ୍କଟାପନ୍ନ ଅବସ୍ଥାରେ ଥିବା ତପୁଙ୍କୁ ରାଜ୍ୟ ବାହାରକୁ ଏୟାରଲିଫ୍ଟ କରିବାକୁ ଯୋଜନା ଚାଲିଥିବା ବେଳେ ଆଜି ରାତି ୧୧ଟାରେ ସେ ସମସ୍ତଙ୍କୁ ଛାଡି ଚାଲିଯାଇଛନ୍ତି । ଗତମାସ ୧୦ ତାରିଖରେ ତାଙ୍କ ବାପାଙ୍କୁ ବି କରୋନା ଛଡ଼ାଇ ନେଇଥିଲା ।
ତପୁଙ୍କ ବିୟୋଗରେ ଓଡ଼ିଶାର କଳା ଓ ଚଳଚିତ୍ର ଜଗତରେ ଶୋକର ଛାୟା ଖେଳିଯାଇଛି । ଗତକାଲି ବରିଷ୍ଠ ଆଇପିଏସ ଦେବାଶିଷ ପାଣିଗ୍ରାହୀଙ୍କ ମୃତ୍ୟୁ ଖବର ଯେଉଁ ସମୟରେ ଆସିଥିଲା ଆଜି ଠିକ୍ ସେହି ସମୟରେ ତପୁଙ୍କ ମୃତ୍ୟୁ ଖବର ସମସ୍ତଙ୍କ ହୃଦୟ ଥରାଇ ଦେଇଛି ।
ମେ ମାସ ଦ୍ୱିତୀୟ ସପ୍ତାହରେ ତପୁ କରୋନାରେ ଆକ୍ରାନ୍ତ ହୋଇଥିଲେ । ହୋମ୍ ଆଇସୋଲେସନ୍ ରେ ଥିଲା ବେଳେ ତାଙ୍କ ଅବସ୍ଥା ଖରାପ ହେବାରୁ ମେ ୧୯ ତାରିଖ ସଂଧ୍ୟାରେ ସେ ହସ୍ପିଟାଲ୍ ରେ ଭର୍ତ୍ତି ହୋଇଥିଲେ । ମାତ୍ର ତାଙ୍କ ଅବସ୍ଥାରେ ଉନ୍ନତି ଆସି ନ ଥିଲା । ପରବର୍ତ୍ତୀ ସମୟରେ ସେ କୋଭିଡ୍ ନେଗେଟିଭ୍ ଚିହ୍ନଟ ହୋଇଥିଲେ ମଧ୍ୟ ସ୍ୱାସ୍ଥ୍ୟାବସ୍ଥା ଅଧିକ ଜଟିଳ ହୋଇପଡ଼ିଥିଲା । ତାଙ୍କ ଫୁସଫୁସ୍ ୭୫% ସଂକ୍ରମିତ ହୋଇଥିଲା । ଅକ୍ସିଜେନ୍ ସ୍ତର ହ୍ରାସ୍ ପାଇବାରୁ ତାଙ୍କୁ ଭେଣ୍ଟିଲେଟରରେ ରଖାଯାଇଥିଲା ।
ଉନ୍ନତମାନର ଚିକିତ୍ସା ପାଇଁ ତାଙ୍କୁ କୋଲକତା କିମ୍ବା ଚେନ୍ନାଇ ନେବାକୁ ଯୋଜନା କରାଯାଉଥିବା ବେଳେ ପରିବାର ଓ ପ୍ରିୟଜନମାନେ ରାଜ୍ୟ ସରକାର ଏବଂ ଶୁଭେଚ୍ଛୁମାନଙ୍କ ସାହାଯ୍ୟ ଲୋଡିଥିଲେ ।
ଖୁବ୍ କମ ବୟସରୁ ସଫଳତାର ଶୀର୍ଷ ଛୁଇଁଥିଲେ ତପୁ । ଓଡ଼ିଆ ଚଳଚିତ୍ର ଜଗତର ସ୍ୱନାମଧନ୍ୟ କଣ୍ଠଶିଳ୍ପୀ ଭାବେ ସେ ଘରେ ଘରେ ପରିଚତ ହୋଇଥିଲେ । ଏକାଧିକ ହିଟ୍ ଫିଲ୍ମରେ ଥିଲା ତାଙ୍କ କଣ୍ଠର ଯାଦୁ । ଖାଲି ଜଣେ ସଫଳ କଳାକାର ନୁହଁନ୍ତି, ଜଣେ ଭଲ ଓ ଖୁସି ମିଜାଜ୍ ର ମଣିଷ ଥିଲେ ତପୁ । ୨୦୧୮ ମସିହାରେ ତପୁ ବିବାହ କରିଥିଲେ ।
