ଭୁବନେଶ୍ୱର: କଥାରେ ଅଛି, ପ୍ରେମ ବୟସ ମାନେନି । ପରିଣତ ବୟସରେ ପ୍ରେମଜନିତ ବିବାହ ନୂଆ ନୁହେଁ । ସେହି ତାଲିକାରେ ଯୋଡି ହୋଇଛନ୍ତି ହାଇପ୍ରୋଫାଇଲ୍ ସେଲିବ୍ରିଟି ପ୍ରେମୀ । ୬୫ ବର୍ଷୀୟ ପୂର୍ବତନ ସାଂସଦ ପିନାକୀ ମିଶ୍ର ବାହା ହୋଇଛନ୍ତି ୫୦ ବର୍ଷୀୟା ବର୍ତ୍ତମାନର ସାଂସଦ ମହୁଆ ମୋଇତ୍ରଙ୍କୁ । ମେ ୩୦ ତାରିଖ ଦିନ ଜର୍ମାନୀର ବର୍ଲିନଠାରେ ଦୁହେଁ ଲୁଚିଛପି ବିବାହ କରିଛନ୍ତି । ଏ ନେଇ ଉଭୟ ପକ୍ଷରୁ ଆନୁଷ୍ଠାନିକ ସୂଚନା ଦିଆଯାଇ ନ ଥିଲେ ମଧ୍ୟ ବିଭିନ୍ନ ଗଣମାଧ୍ୟମରେ ମୁଖ୍ୟ ଖବର ହୋଇଛି । ସୋସିଆଲ୍ ମିଡିଆରେ ଏହି ବିବାହ ଖବର ଟ୍ରେଣ୍ଡ କରୁଛି ।
ପୁରୀର ପୂର୍ବତନ ସାଂସଦ ତଥା ବରିଷ୍ଠ ଆଇନଜୀବୀ ପିନାକୀ ମିଶ୍ରଙ୍କ ସହିତ ପଶ୍ଚିମବଙ୍ଗ କ୍ରିଷ୍ଣନଗର ଲୋକସଭା ଆସନରୁ ଦ୍ୱିତୀୟ ଥର ପାଇଁ ନିର୍ବାଚିତ ମହୁଆ ମୋଇତ୍ରଙ୍କ ବନ୍ଧୁତ୍ୱ ସମ୍ପର୍କକୁ ନେଇ ଗଣମାଧ୍ୟମରେ ପୂର୍ବରୁ ଆଲୋଚନା ହୋଇଥିଲା । ଉଭୟଙ୍କର କିଛି ଫଟୋ ସୋସିଆଲ୍ ମିଡିଆରେ ଭାଇରାଲ୍ ମଧ୍ୟ ହୋଇଥିଲା । ଏବେ ଜର୍ମାନୀରେ ସେମାନଙ୍କର ଗୋପନ ବିବାହ ଖବର ସାରା ଦେଶରେ ଚର୍ଚ୍ଚାର ବିଷୟ ହୋଇଛି ।
୫୦ ବର୍ଷୀୟା ମହୁଆ ମୋଇତ୍ର ପ୍ରଥମେ ଫାଇନାନ୍ସ ଏକ୍ସପର୍ଟ ଲାର୍ସ ବ୍ରୋରସନ୍ ଙ୍କୁ ବିବାହ କରିଥିଲେ । ମାତ୍ର ତାହା ତିଷ୍ଠି ନ ଥିଲା । ସେ ଛାଡ଼ପତ୍ର ଦେଇଥିଲେ । ତା’ ପରେ ବରିଷ୍ଠ ଆଇନଜୀବୀ ଜୟ ଅନନ୍ତ ଦେହାଦ୍ରାଇଙ୍କ ସହ ପ୍ରାୟ ୩ ବର୍ଷ ଧରି ସମ୍ପର୍କରେ ଥିଲେ । ଲୋକସଭାରେ ନିଜର ଅଗ୍ନିବର୍ଷକ ଭାଷଣ ପାଇଁ ଚର୍ଚ୍ଚିତ ଫାୟାର ବ୍ରାଣ୍ଡ ନେତ୍ରୀ ମହୁଆ ଆସାମର ଏକ ବେଙ୍ଗଲୀ ହିନ୍ଦୁ ବ୍ରାହ୍ମଣ ପରିବାରରେ ଜନ୍ମଗ୍ରହଣ କରିଥିଲେ । ଜଣେ ଇନଭେଷ୍ଟମେଣ୍ଟ ବ୍ୟାଙ୍କର୍ ଭାବେ କ୍ୟାରିୟର୍ ଆରମ୍ଭ କରି ସଫଳତା ପାଇଥିଲେ ମଧ୍ୟ ପରବର୍ତ୍ତୀ ସମୟରେ ରାଜନୀତି ପ୍ରତି ଆକୃଷ୍ଟ ହୋଇଥିଲେ । ୨୦୦୮ ମସିହାରେ କଂଗ୍ରେସରେ ଯୋଗଦେଇଥିଲେ । ରାହୁଲ ଗାନ୍ଧୀ ତାଙ୍କୁ ‘ଆମ୍ ଆଦମୀ କା ସିପାହୀ’ ଅଭିଯାନର ନେତୃତ୍ୱ ଦେଇଥିଲେ । ହେଲେ, ଦୁଇବର୍ଷ ପରେ ସେ ମମତା ବାନାର୍ଜୀଙ୍କ ତୃଣମୂଳ କଂଗ୍ରେସକୁ ଢ଼ଳିଥିଲେ । ପଶ୍ଚିମବଙ୍ଗ କ୍ରିଷ୍ଣନଗର ଆସନରୁ ଲଗାତର ଦ୍ୱିତୀୟ ଥର ପାଇଁ ଲୋକସଭାକୁ ନିର୍ବାଚିତ ହୋଇଛନ୍ତି ।
ସେହିଭଳି, ୬୫ ବର୍ଷୀୟ ପିନାକୀ ମିଶ୍ର ପ୍ରଥମେ ସଙ୍ଗୀତା ମିଶ୍ରଙ୍କୁ ବିବାହ କରିଥିଲେ । ତାଙ୍କର ଗୋଟିଏ ପୁଅ ଏବଂ ଝିଅ ଅଛନ୍ତି । ପଣ୍ଡିତ ଗୋଦାବରୀଶ ମିଶ୍ରଙ୍କ ନାତି ଏବଂ ଆସାମର ପୂର୍ବତନ ରାଜ୍ୟପାଳ ଲୋକନାଥ ମିଶ୍ରଙ୍କ ସୁପୁତ୍ର ହେଉଛନ୍ତି ପିନାକୀ ମିଶ୍ର । ସେ ଦେଶର ଜଣେ ନାମୀ ଓକିଲ । ସୁପ୍ରିମକୋର୍ଟର ବରିଷ୍ଠ ଆଡଭୋକେଟ ଭାବେ କାର୍ଯ୍ୟ କରୁଛନ୍ତି । ୧୯୯୬ ମସିହାରେ ପ୍ରଥମ ଥର ପାଇଁ ପୁରୀ ଲୋକସଭା ଆସନରୁ କଂଗ୍ରେସ ଟିକେଟରେ ନିର୍ବାଚିତ ହୋଇଥିଲେ । ପରବର୍ତ୍ତୀ ସମୟରେ ସେ ବିଜୁ ଜନତା ଦଳରେ ଯୋଗଦେଇ ୨୦୦୯, ୨୦୧୪ ଏବଂ ୨୦୧୯ରେ ପୁରୀ ଆସନରୁ ଲୋକସଭାକୁ ନିର୍ବାଚିତ ହୋଇଥିଲେ ।
