ଭୁବନେଶ୍ୱର: ଓଏଏସ୍ ଅଧିକାରୀସ୍ତରରେ ରାଜ୍ୟ ସରକାର ଆଜି ପୁଣି ଏକ ବଦଳି କରିଛନ୍ତି । ମୁଖ୍ୟମନ୍ତ୍ରୀଙ୍କ ଦପ୍ତରର କ୍ଷମତାଶାଳୀ ଅଧିକାରୀ କୁହାଯାଉଥିବା ତ୍ରିଲୋଚନ ମହାନ୍ତିଙ୍କୁ ହଟାଇ ଦିଆଯାଇଛି । ତାଙ୍କୁ ଭୁବନେଶ୍ୱର ସହର ଉପକଣ୍ଠ ଗୋଠପାଟଣାଠାରେ ଥିବା ରେଭେନ୍ୟୁ ଅଫିସର୍ସ ଟ୍ରେନିଂ ଇନଷ୍ଟିଚ୍ୟୁଟ୍(ଆରଓଟିଆଇ) ଅଫିସକୁ ବଦଳି କରାଯାଇଛି । ସେଠାରେ ଯୁଗ୍ମ ନିର୍ଦ୍ଦେଶକ ଭାବେ କାର୍ଯ୍ୟ କରିବେ । ପାୱାର୍ କରିଡର ଚର୍ଚ୍ଚାରେ ଏହାକୁ ପନିଶମେଣ୍ଟ ପୋଷ୍ଟିଂ ଭାବେ ବିବେଚନା କରାଯାଏ ।
ମୋହନ ମାଝୀଙ୍କ ସରକାରରେ ତ୍ରିଲୋଚନ ପ୍ରଥମ ଅଫିସର ଭାବେ ବଦଳି ଅର୍ଡର ପାଇଥିଲେ । କେନ୍ଦୁଝର ଉପଜିଲ୍ଲାପାଳ ଭାବେ କାର୍ଯ୍ୟ କରୁଥିବା ତ୍ରିଲୋଚନଙ୍କୁ ମୁଖ୍ୟମନ୍ତ୍ରୀ ତାଙ୍କ ଦପ୍ତରରେ ଯୁଗ୍ମ ସଚିବ ଭାବେ ନିଯୁକ୍ତି ଦେଇଥିଲେ । ମୁଖ୍ୟମନ୍ତ୍ରୀଙ୍କ ଅତ୍ୟନ୍ତ ବିଶ୍ୱସ୍ତ ଅଫିସର ଭାବରେ ସେବେଠାରୁ କାର୍ଯ୍ୟ କରୁଥିଲେ । ମାତ୍ର ଆଜି ତାଙ୍କୁ ଅଚାନକ ବଦଳି କରାଯିବା ପଛରେ ବିଭିନ୍ନ କାରଣ ଚର୍ଚ୍ଚା ହେଉଛି ।
ମୁଖ୍ୟମନ୍ତ୍ରୀଙ୍କ ଛାଇ ଭଳି ରହିଥିବା କିଛି ରାଜନୈତିକ ବ୍ୟକ୍ତିଙ୍କ ସ୍ୱାର୍ଥରେ ବାଧକ ହେବାରୁ ସେ ବଳି ପଡ଼ିଲେ ବୋଲି ଗୋଟିଏ ଗୋଷ୍ଠୀ ଆଲୋଚନା କରୁଥିବା ବେଳେ ନିର୍ଦ୍ଦିଷ୍ଟ ଅଫିସର ଗୋଷ୍ଠୀର ଏହା ଖେଳ ବୋଲି ମଧ୍ୟ କୁହାଯାଉଛି । ସେଭଳି କୌଣସି ଏକ କାରଣରୁ ମୁଖ୍ୟମନ୍ତ୍ରୀ ତ୍ରିଲୋଚନଙ୍କ ଉପରେ ଚିଡ଼ି ଥାଇପାରନ୍ତି । ଯେଉଁଥିପାଇଁ ତାଙ୍କୁ ଗୋଠପାଟଣା ପଠାଇଛନ୍ତି ।
ପୂର୍ବରୁ ମୁଖ୍ୟମନ୍ତ୍ରୀଙ୍କ ପ୍ରମୁଖ ସଚିବ ନିକୁଞ୍ଜ ଧଳ ଏବଂ ବ୍ୟକ୍ତିଗତ ସଚିବ ଅରିନ୍ଦମ ଡାକୁଆ ଓ ଅନୁପମ ଶାହାଙ୍କ କ୍ଷେତ୍ରରେ ଅଚାନକ ବଦଳିକୁ ନେଇ ଚର୍ଚ୍ଚା ହୋଇଥିଲା ।
ସାଧାରଣ ପ୍ରଶାସନ ବିଭାଗ ପକ୍ଷରୁ ଆଜି ବାହାରିଥିବା ବିଜ୍ଞପ୍ତିରେ ମୋଟ ୪ ଜଣ ଓଏଏସଙ୍କର ବଦଳି ହୋଇଛି । ପଞ୍ଚାୟତିରାଜ ବିଭାଗରେ ଅତିରିକ୍ତ ଶାସନ ସଚିବ ଶ୍ରୀମତୀ ଗୀତାଞ୍ଜଳି ନାୟକଙ୍କୁ ଇଲେକଟ୍ରୋନିକ୍ସ ଓ ଆଇଟି ବିଭାଗର ଅତିରିକ୍ତ ସଚିବ ଭାବେ ଅବସ୍ଥାପିତ କରାଯାଇଛି । ତାଙ୍କ ଜାଗାକୁ ଅତିରିକ୍ତ ଦାୟିତ୍ୱରେ ଆସିଛନ୍ତି ଶ୍ରମ ବିଭାଗର ଅତିରିକ୍ତ ଶାସନ ସଚିବ ଶ୍ରୀମତୀ ନିବେଦିତା ବିଶ୍ୱାଳ । ବାଲେଶ୍ୱର ଫକୀର ମୋହନ ବିଶ୍ୱବିଦ୍ୟାଳୟର କୁଳସଚିବ ଭାବେ ସେ ବଦଳି ଆଦେଶାଧିନରେ ଅଛନ୍ତି ।
ଫକୀର ମୋହନ ବିଶ୍ୱବିଦ୍ୟାଳୟର ପୂର୍ବତନ କୁଳସଚିବ ତଥା ବର୍ତ୍ତମାନ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗରେ ଯୋଗ ଦେଇଥିବା ଶ୍ରୀମତୀ କୁକୁମିନା ଦାସଙ୍କୁ ସୁବର୍ଣ୍ଣରେଖା ଜଳସେଚନ ପ୍ରକଳ୍ପ ନିର୍ଦ୍ଦେଶକ ଭାବେ ବାରିପଦାକୁ ବଦଳି କରାଯାଇଛି ।
